Skip tu di aatikl

Skip tu lis a tapik

 STODI AATIKL 13

Shoa Kansaan fi di Peepl Wi Meet Eena di Minischri

Shoa Kansaan fi di Peepl Wi Meet Eena di Minischri

“Ih mi sari fi dehn . . . Soh ih gaahn hed ahn teech dehn lata ting.”—MAAK 6:34.

SANG 70 Saach fi Peepl Wid di Rait Haat Kandishan

WEH WI WAHN DISKOS? *

1. Wat da wan a di tingz bowt Jeezas weh toch wi haat di moas? Pleez eksplayn yu ansa.

WAN a di moas byootiful tingz bowt Jeezas da di way how hihn andastan di chalenjiz weh wee fays az imperfek hyoomanz. Wen hihn mi deh pahn di ert, ih kuda ‘mi rijais lang wid enibadi weh rijais. Ahn wen peepl mi feel sad, hihn mi feel sad lang wid dehn tu.ʼ (Roam. 12:15) Fi egzampl, wen ih 70 disaipl kohn bak hapi bikaaz dehn mi ga wahn gud preechin kampayn, Jeezas “staat tu rijais.” (Look 10:17-21) Pahn di ada han, wen ih mi si how Mayri, Marta, ahn dehn frenz mi feel wen Lazaros mi ded, Jeezas mi sad deep dong eena ih haat.—Jan 11:33.

2. Weh mi help Jeezas fi shoa kansaan fi peepl?

2 Weh mi help dis perfek man fi shoa mersi ahn kompashan tu imperfek hyoomanz? Wel, da mi bikaaz ih lov peepl. Laik weh wi mi menshan eena di laas aatikl, hihn “mi espeshali lov hyoomanz.” (Prov. 8:31) Da lov weh hihn mi gat fi peepl moov hihn fi reeli geh fi noa di way how hyoomanz tink. Di apasl Jan seh bowt Jeezas: “nobadi neva hafu tel hihn how dehn peepl stay, kaa hihn mi don noa aredi.” (Jan 2:25) Jeezas mi ga lata kompashan fi adaz. Peepl kuda mi feel dat hihn lov dehn, soh dehn mi lisn tu di Kingdom mesij. Di moa wi chrai fi ga da saym kaina kompashan fi peepl, di moa wi wahn ku help dehn wen wi preech tu dehn.—2 Tim. 4:5.

3-4. (a) How wi wahn feel bowt wi minischri if wi kay bowt di peepl wi meet? (b) Weh wi wahn laan eena dis aatikl?

3 Di apasl Paal mi noa dat hihn mi ga wahn rispansabiliti fi preech, ahn wee ga da saym rispansabiliti tu. (1 Kor. 9: 16) Bot if wi kay bowt di peepl wi taak tu eena wi minischri, wi noh wahn preech jos bikaaz wi haftu. Wi wahn shoa peepl dat wi kay bowt dehn. Wi noa dat ‘Gaad bles wi moa wen wi gi dan wen wi get.ʼ (Aks 20:35) Soh if wi preech bikaaz wi waahn help peepl, wi wahn injai wi minischri moa.

4 Eena dis aatikl, wi wahn laan how fi shoa kansaan, er kyaa fi di peepl wi meet eena di minischri. Fos, wi wahn si weh wi ku laan fahn di way Jeezas mi feel bowt peepl. Den, wi wahn kansida foa wayz wi ku kapi fi hihn egzampl.—1 Peet. 2:21.

HOW JEEZAS MI SHOA DAT HIHN KAY BOWT PEEPL EENA IH MINISCHRI

Jeezas mi kay bowt peepl soh ih komfert dehn wid di gud nyooz (Paragraaf 5-6)

5-6. (a) Fi hoo Jeezas mi shoa kansaan? (b) Akaadn tu Isaiah 61:1, 2, wai Jeezas mi feel sari fi di peepl ih mi-di preech tu?

5 Mek wi kansida wahn egzampl wen Jeezas mi shoa kansaan fi adaz. Wahn taim, hihn an ih disaipl dehn mi-di preech di gud nyooz widowt stap. Dehn “mi haadli ga taim fi dehnself, noh eevn fi eet.” Soh Jeezas tel ih disaipl dehn: “Lesgoh tek wahn kwaiyet lee brayk wee wan, ahn geh sohn res.” Bot wahn big krowd a peepl ron heda dehn fi meet dehn weh dehn mi gwehn. Wen Jeezas get deh ahn si di peepl, weh yu tink ih mi du? “Ih mi sari * fi dehn bikaa dehn da-mi sayhn laik sheep weh noh ga nobadi fi main dehn. Soh ih gaahn hed ahn teech dehn lata ting.”—Maak 6:30-34.

6 Wai Jeezas mi feel sari fi dehnya peepl? Ih mi noatis dat dehn da-mi “laik sheep weh noh ga nobadi fi main dehn.” Dis mi shoa dat ih mi kansaan bowt dehn. Maybi Jeezas mi si dat som a dehn mi poa ahn mi-di werk haad fi provaid fi dehn famili. Maybi adaz mi-di deel wid di det a wahn lov wan. If dat da-mi di kays, den Jeezas kuda mi andastan dehn sichuwayshan. Laik wi mi diskos eena di laas aatikl, Jeezas praabli mi fays som a dehnya prablemz tu. Hihn mi kay bowt peepl,  ahn hihn mi moov fi shayr di mesij a komfert wid dehn.—Reed Isaiah 61:1, 2. *

7. How wi ku kapi Jeezas egzampl?

7 Weh wi laan fahn Jeezas egzampl? Jos laik Jeezas, wi meet lata peepl hoo da “laik sheep weh noh ga nobadi fi main dehn.” Dehn schrogl wid wahn lata prablemz. Wee ga weh dehn need—di Kingdom mesij. (Rev. 14:6) Soh wi fala wi Maasta egzampl ahn preech di gud nyooz bikaaz wi ga “piti pahn di hombl ahn di poa wan dehn.” (Ps. 72:13) Wi feel fi di peepl wi preech tu, ahn wi waahn du sohnting fi help dehn.

HOW WEE KU SHOA KANSAAN FI ADAZ?

Tink bowt weh eech persn need (Paragraaf 8-9)

8. Wat da wan way wi ku shoa kansaan fi peepl eena di minischri? Yooz di egzampl eena di paragraaf.

8 Wi need fi imajin how di peepl eena wi minischri tink ahn feel. Den, wi waahn chreet dehn di saym way wee wuda waahn dehn chreet wi if wi mi deh eena fi dehn sichuwayshan. * (Mach. 7:12) Mek wi kansida foa spesifik wayz how wi ku du dat. Fos, tink bowt weh eech persn need. Wen wi preech di gud nyooz, wi da jos laik wahn dakta. Wahn gud dakta tink bowt weh eech payshent need. Ih aks kweschanz ahn lisn az eech persn diskraib ih kandishan er simtomz. Insteda gi di payshent di fos medisn weh kohn tu ih main, di dakta mait mek taim paas soh dat ih ku kip wahn aiy pahn di payshent simtomz ahn den chreet di persn wid di rait medisn. Jos laik dat, wi noh fi chreet evribadi di saym way eena wi minischri. Insted, wi fi tek intu kansidarayshan eech persn sichuwayshan, feelinz, ahn tinkin.

9. Weh wi noh fi du eena wi minischri? Pleez eksplayn yu ansa.

9 Wen yu meet sombadi eena di minischri, yu noh fi tink dat yu don noa da persn aredi, dat yu noa ih sichuwayshan, weh ih bileev, ahn wai ih bileev it. (Prov. 18:13) Insted, wi wahn aks ahn sohn kweschanz. (Prov. 20:5) If ih okay, aks bowt ih werk, ih famili, ih bakgrong, an ih opinyan. Wen wi tink bifoa wi aks kweschanz, an alow dehn fi ansa, da laik wi di alow dehn fi tel wi wai dehn need di gud nyooz. Wans wi noa dat, wi ku giv dehn di help dehn need, jos laik weh Jeezas mi du.—Kompyaa 1 Korintyanz 9:19-23.

Put yuself eena ada peepl sichuwayshan (Paragraaf 10-11)

10-11. Akaadn tu 2 Korintyanz 4:7, 8, wat da wahn neks way wi ku shoa kansaan? Yooz di egzampl eena di paragraaf.

10 Sekant, chrai fi imajin weh dehn laif mait bee laik. Wi ku andastan peepl  sichuwayshan. Aftaraal, aala wi fays prablemz kaa non a wi perfek. (1 Kor. 10:13) Wi noa dat laif eena dis sistem a tingz veri haad. Di onli way wi ku bayr op da wid Jehoava help. (Reed 2 Korintyanz 4:7, 8.) Bot tink bowt peepl hoo di schrogl fi servaiv eena dis werl ahn dehn noh ga wahn frenship wid Jehoava. Ih mosi haad fi mek dehn liv eena dis werl widowt fi hihn help. Jos laik Jeezas, wi kyaahn help bot shayr di “gud nyooz bowt sohnting beta” wid dehn.—Isa. 52:7.

11 Tink bowt di egzampl a wahn brada weh naym Sergey. Bifoa hihn mi laan di chroot, ih mi shai ahn kwaiyet. Ih mi fain it haad fi seh how ih feel er weh ih tink. In taim, ih aksep wahn Baibl stodi. Sergey seh: “Di moa Ah get intu mi stodi, Ah fain owt dat Kristyanz ga di rispansabiliti fi taak bowt weh dehn laan fahn di Baibl wid ada peepl. Ah mi reeli bileev dat Ah kuda neva du dat.” Bot, hihn tink bowt di peepl hoo noh hyaa di chroot yet, an imajin how fi dehn laif stan widowt Jehoava help. Sergey seh: “Di nyoo tingz weh Ah mi-di laan mek Ah feel reeli hapi ahn ga wahn peesful feelin eena mi haat. Ah mi noa dat ada peepl need fi hyaa di chroot tu.” Di moa Sergey mi feel lov ahn kansaan eena ih haat, di moa korij ih mi gat fi preech. Ih seh: “Ah mi sopraiz wen Ah noatis dat di moa Ah tel adaz bowt di Baibl, di moa kanfidens Ah get. Ih mi aalso schrentn mi fayt.” *

Ih mait tek taim fi wahn persn mek spirichwal proagres (Paragraaf 12-13)

12-13. Wai wi need fi bee payshent wid di peepl wi teech eena di minischri? Yooz di iloschrayshan eena di paragraaf.

12 Terd, bee payshent wid di peepl wi teech. Eevn doa wi noa di chroot fahn di Baibl, memba dat som peepl wi taak tu mait noh eevn tink bowt dehnya chroot. Ahn wahn lata peepl reeli lov weh dehn bileev eena. Ih ku aalso bee dat dehn rilijan da weh jraa dehn hoal famili kloas tugeda. Fi dehn bileef mait eevn bee paat a dehn kolcha, ahn dehn kamyooniti. Soh, how wi ku help dehn?

13 Tink bowt dis iloschrayshan: Weh  hapm wen dehn need fi brok dong wahn oal, krenki brij ahn bil wahn nyoo wan? Moas a di taim, wail dehn di bil di nyoo brij, dehn stil yooz di oal wan. Wans di nyoo brij don, dehn brok dong di oal wan. Jos laik dat, bifoa wi aks peepl fi giv op dehn “oal” bileef weh dehn lov soh moch, wi mait haftu help dehn bil schrang apreeshiayshan fi di “nyoo” chroot weh dehn di laan fahn di Baibl fi di fos taim. Onli den, dehn wahn bee redi fi lef dehn oal bileef bihain. Ih mait tek taim fi help peepl mek dehnya kaina chaynjiz.—Roam. 12:2.

14-15. How wi ku help peepl hoo bayli noa eniting bowt di hoap a evalastin laif pahn wahn paradais ert? Yooz di egzampl eena di paragraaf.

14 If wi payshent wid di peepl wi meet eena di minischri, wi noh wahn ekspek dehn fi andastan er aksep Baibl chroot di fos taim dehn hyaa it. Insted, if wi kay bowt dehn, wi wahn chrai help dehn fi andastan di Skripchaz, eevn if ih tek sohn taim. Az wahn egzampl, how wi kuda teech wahn persn bowt di hoap a evalastin laif pahn wahn paradais ert? Wahn lata peepl bayli noa bowt dis teechin. Dehn mait bileev dat wen wahn persn ded, dehn wahn neva si ahn agen. Er dehn mait tink dat aal gud peepl goh da hevn. How wi ku help dehn?

15 Dis da how wahn brada help peepl fi andastan di hoap a livin fareva pahn ert. Fos, ih reed Genesis 1:28. Den, ih aks di persn wehpaat Gaad mi waahn hyoomanz fi liv an eena weh kaina kandishanz. Moas peepl seh: “Pahn ert, eena gud kandishanz.” Den, di brada reed Isaiah 55:11 an aks di persn if ih tink Gaad perpos chaynj. Moas a di taim, di persn wuda seh no. Den, di brada wuda reed Psalm 37:10, 11 an aks weh wi fyoocha wahn bee laik. Ih fain dat wen ih yooz di Skripchaz dis way, ih help wahn nomba a peepl fi andastan dat Gaad stil waahn gud peepl fi liv fareva eena Paradais pahn ert.

Eni kainis weh wi du fi adaz, eevn if da sohnting smaal, laik rait wahn leta, ku bee reeli inkorijin (Paragraaf 16-17)

16-17. Wen wi tink bowt Proverbs 3:27, wat da sohn tingz yu ku du fi shoa peepl dat yu kay bowt dehn? Yooz di egzampl dehn fahn di paragraaf.

16 Foat, tink bowt weh yu ku du fi shoa peepl dat yu kay bowt dehn. Fi egzampl, yu tink wi di vizit da di rang taim? Wel, if da di rang taim, wi ku seh sari an aks if wi ku kohn bak da wahn beta taim. Wat if di persn need wahn lee help rong di hows? Er wat if di persn sik eena bed ahn kyaahn lef ih hows, yu tink wi ku ron wahn lee eran far ahn? Eena dehnya kaina sichuwayshan, wi mait ku help di persn.—Reed Proverbs 3:27 *.

17 Wahn sista mi ga gud rizolts wen shee mi du sohnting weh veri kain, eevn doa  shee mi tink da neva no big deel. Shee mi kansaan fi wahn famili weh mi looz dehn lee baybi bwai di saym day ih baan. Soh shee rait wahn leta tu dehn. Di leta mi inklood komfert fahn di Skripchaz. How di leta mi afek di famili? Di ma mi rait bak: “Ah noh tink yu ga eni aidyaa how yu leta mi afek wi. Ah kyaahn tank yu inof er eevn bigin fi tel yu humoch ih meen tu wi. Ah reed da leta mosi laik 20 taimz er moa yestudeh. Dis leta mi soh kain an inkorijin. Tank yu fahn di batam a wi haat.” Fi shoar, wi ku ga gud rizolts wen wi put wiself eena ada peepl sichuwayshan ahn du sohnting fi help dehn.

NOH EKSPEK TU MOCH A YUSELF

18. Akaadn tu 1 Korintyanz 3:6, 7, weh wi waahn memba bowt wi minischri ahn wai?

18 Af koars, wi waahn kip wahn balans vyoo a wat da wi jab eena di minischri. Eevn doa wi help adaz laan bowt Jehoava, wee noh di du di moas impoatant paat. (Reed 1 Korintyanz 3:6, 7.) Da Jehoava da di Wan weh jraa peepl tu hihn. (Jan 6:44) Eena di en, weda wahn persn aksep di chroot er nat, dipen pahn di kandishan a da persn haat. (Mach. 13:4-8) Memba dat wahn lata peepl neva aksep Jeezas mesij—ahn hihn da-mi di graytis teecha weh eva liv! Soh den, wi shudn geh diskorij if wahn lata peepl noh waahn lisn tu wi mesij.

19. Weh gud rizolts wi gat wen wi shoa kansaan eena wi minischri?

19 Wi wahn ga gud rizolts eena wi minischri wen wi shoa peepl dat wi kay fi dehn. Wi wahn injai di preechin werk moa. Wi wahn feel moa hapinis wen wi giv tu adaz. Ahn wi mek it eeziya fi peepl wid di rait haat kandishan fi aksep di gud nyooz ahn geh evalastin laif. (Aks 13:48) Soh “enitaim wi geh di chaans, mek wi chreet evribadi gud.” (Gal. 6:10) Den wi wahn feel soh hapi kaaz wi di bring aana tu wi hevnli Faada.—Mach. 5:16.

SANG 64 Wi Hapi fi Tek Paat Eena di Haavis

^ par. 5 Wen wi shoa kansaan fi di peepl wi meet eena di minischri, wi wahn ga moa jai ahn dehn mait bee moa wilin fi lisn tu wi mesij. Wai dat da chroo? Wel, eena dis aatikl, wi wahn kansida weh wi ku laan fahn Jeezas egzampl, ahn foa wayz how wi ku shoa dat wi kay bowt di peepl wi meet eena wi minischri.

^ par. 5 WEH IH MEEN? Di werd, sari, eena dis vers, meenz fi ga kompashan fi sombadi weh geh chreet kruwil er hoo di sofa. Feelinz laik dehndeh ku moov wahn persn fi help ada peepl.

^ par. 6 Isaiah 61:1, 2: “Di spirit a di Sovrin Laad Jehoava deh pahn mi, bikaaz Jehoava mi anoint mi fi tel di gud nyooz tu di hombl wan dehn. Hihn mi sen mi fi heel di wan dehn weh feel sad eena dehn haat, fi preech freedom tu di prizna dehn ahn fi help dehn andastan. Fi tel dehn bowt di yaa a gudwil ahn di day a venjans a wi Gaad, fi komfert evribadi weh di moan.”

^ par. 8 Si di aatikl Follow the Golden Rule in Your Ministryeena di May 15, 2014, ishu a The Watchtower.

^ par. 11 Si The Watchtower, Aagas 1, 2011, payj 21-22.

^ par. 16 Proverbs 3:27: “Noh hoal bak gud fahn peepl hoo dizerv it wen yu ku help dehn.”