Skip tu di aatikl

Skip tu lis a tapik

 STODI AATIKL 11

Lisn tu Jehoava Vais

Lisn tu Jehoava Vais

“Dis da mai Son . . . Lisn tu ahn.”—MACH. 17:5.

SANG 89 Lisn an Aalwayz Obay

WEH WI WAHN DISKOS? *

1-2. (a) Wat da sohn wayz how Jehoava kamyoonikayt wid hyoomanz? (b) Weh wi wahn kansida eena dis aatikl?

JEHOAVA lov fi kamyoonikayt wid wi. Eena di paas, hihn mi yooz di prafit ahn aynjel dehn, an ih Son, Jeezas Krais, fi paas aan ih taats tu wi. (Amos 3:7; Gal. 3:19; Rev. 1:1) Tudeh, hihn kamyoonikayt wid wi chroo ih Werd, di Baibl, kaaz ih waahn wi noa fi hihn tinkin an andastan fi hihn wayz.

2 Wen Jeezas mi deh pahn di ert, Jehoava mi taak chree taimz fahn hevn. Mek wi kansida (1) weh Jehoava mi seh, (2) weh wi ku laan fahn weh ih mi seh, ahn (3) how wi ku benifit fahn weh ih mi seh.

‘YOO DA MI SON WEH AH ONLI LOVʼ

3. Akaadn tu Maak 1:9-11, weh Jehoava mi seh wen Jeezas mi geh baptaiz, ahn weh chree impoatant tingz dehnya werdz teech?

3 Di fos taim Jehoava mi taak fahn hevn deh da Maak 1:9-11. (Reed.) Hihn mi seh: ‘Yoo da mi Son weh Ah onli lov.ʼ Ih mosi mi toch Jeezas haat wen ih mi hyaa ih Faada vais. Dis mi inkorij an rimain ahn dat ih Faada lov ahn! Weh Jehoava mi seh teech wi chree impoatant chroot bowt Jeezas. Fos, Jeezas da ih Son. Sekant, Jehoava lov ih Son. Ahn terd, Jehoava pleez wid ih Son. Mek wi tek wahn kloasa luk pahn eech wan a dehn.

4. Weh nyoo rilayshanship Jeezas ga wid ih Faada afta ih mi geh baptaiz?

4 “Yoo da mi Son.” Wen Jehoava mi seh dehndeh werdz, ih mi-di shoa dat ih Son, Jeezas Krais, mi now ga wahn nyoo rilayshanship wid Hihn. Yu si, wen Jeezas mi  deh da hevn, hihn da-mi wahn spirit son a Gaad. Bot, wen ih geh baptaiz, Jehoava anoint ahn wid hoali spirit. Dis mek Jeezas, Gaad anointid Son, ga di hoap fi goh bak da hevn fi bee di King ahn Hai Prees weh Jehoava apoint. (Look 1:31-33; Heeb. 1:8, 9; 2:17) Soh wen Jeezas mi geh baptaiz, ih Faada kuda mi seh fi chroo: “Yoo da mi Son.”—Look 3:22.

Aala wi need komendayshan an inkorijment (Paragraaf 5) *

5. How wi ku kapi Jehoava egzampl fi shoa lov ahn apreeshiayshan?

5 ‘Yoo da mi Son weh Ah onli lov.ʼ Jehoava mi tel ih Son dat Ih lov ahn an ih pleez wid ahn. Dis da wahn gud egzampl fi wee. Wi need fi luk fi apachoonitiz ahn wayz fi shoa apreeshiayshan an inkorij adaz. (Jan 5:20) Jos laik wen sombadi wi kay bowt shoa wi lov ahn komen wi fi di gud weh wi du, sayhn way soh, wi need fi lov an inkorij wi bradaz ahn sistaz eena di kangrigayshan ahn wi famili membaz tu. Wen wi komen adaz, wi schrentn dehn fayt ahn help dehn fi bee faytful eena dehn servis tu Jehoava. Payrents espeshali need fi inkorij dehn chiljren. Wen payrents gi sinsyaa komendayshan tu dehn chiljren ahn shoa dat dehn lov dehn, dehn help dehn chiljren fi waahn du dehn bes.

6. Wai wi ku ga kanfidens eena Jeezas Krais?

6 ‘Ah onli pleez wid yu.ʼ Dehnya werdz shoa dat Jehoava mi kanfident dat Jeezas mi wahn bee faytful tu ih asainment ahn du di wil a ih Faada. Jehoava ga kanfidens eena ih Son, soh wi ku bee kanfident dat Jeezas wahn du evriting weh Jehoava pramis. Ahn Jeezas wahn bee jos az faytful eena di fyoocha. (2 Kor. 1:20) Wen wi kansida Jeezas egzampl, ih mek wi waahn laan moa bowt hihn ahn  fala fi hihn egzampl. Di saym kanfidens weh Jehoava gat eena ih Son, Hihn gat eena ih servant dehn. Hihn noa dat az wahn groop, wi wahn kantinyu fi laan bowt ih Son.—1 Peet. 2:21.

“LISN TU AHN”

7. Akaadn tu Machyu 17:1-5, wen Jehoava mi taak fahn hevn, ahn weh ih mi seh?

7 Reed Machyu 17:1-5. Di sekant taim Jehoava mi taak fahn hevn da-mi wen Jeezas hoal badi ahn kloaz mi chaynj. Dis da wen hinh mi kehr Peeta, Jaymz, ahn Jan wid ahn op pahn wahn hai mongtin. Wail dehn mi dehdeh, dehn si wahn amayzin vizhan. Dehn mi si Jeezas fays an ih kloaz geh wait wait til ih hat dehn aiy anaal. Dehn mi si too man weh mi luk laik Moaziz an Ilaija. Di too man dehn staat taak tu Jeezas bowt ih det an ih rezorekshan. Aldoa di chree apasl dehn mi “sleepi bad,” dehn si dis amayzin vizhan wen dehn mi don wayk op. (Look 9:29-32) Afta dat, wahn brait klowd mi kova dehn, ahn dehn hyaa wahn vais fahn di klowd—Gaad vais! Jos laik weh mi hapm da Jeezas baptizm, Jehoava mi seh dat ih lov ih Son ahn dat ih pleez wid ahn. Jehoava mi seh: ‘Yoo da mi Son weh Ah onli lov. Ah onli pleez wid yu.ʼ Bot dis taim ya, Jehoava mi seh: “Lisn tu ahn.”

8. How da vizhan mi afek Jeezas an ih disaipl dehn?

8 Da vizhan gi wahn lee glims a di gloari ahn powa weh Jeezas gat az di King a Gaad Kingdom. Af koars, wi noa dat da vizhan mi inkorij ahn schrentn Jeezas fi fays di sofarin ahn paynful det weh ih mi wahn goh chroo. Di vizhan mi aalso schrentn di fayt a di disaipl dehn. Ih mi help dehn fi pripyaa fi di chraiyalz dehn wuda mi fays ahn di haad werk dehn wuda mi haftu du. Bowt 30 yaaz layta, di apasl Peeta mi stil di taak bowt da vizhan, weh mi shoa dat ih mi stil klayr eena ih main, laik ih mi jos hapm.—2 Peet. 1:16-18.

9. Weh yoosful kongsl Jeezas mi gi ih disaipl dehn?

9 “Lisn tu ahn.” Jehoava mek it klayr tu wi dat ih waahn wi lisn tu ih Son an obay ahn. Wen Jeezas mi deh pahn di ert, ih mi seh wahn lata impoatant tingz! Fi egzampl, ih mi teech ih falowaz how fi preech di gud nyooz, an ih mi aalwayz rimain dehn fi kip pahn di wach. (Mach. 24:42; 28:19, 20) Ih mi aalso inkorij dehn fi werk haad ahn noh giv op. (Look 13:24) Jeezas mi aalwayz di rimain ih disaipl dehn fi lov wan anda, fi stay yoonaitid, ahn fi fala ih komanment dehn. (Jan 15:10, 12, 13) Fi shoar, di kongsl Jeezas mi gi dehn mi yoosful. Ahn dehndeh kongsl stil impoatant op tu tudeh.

10-11. How wi ku shoa dat wi di lisn tu Jeezas?

10 Jeezas mi seh: “Evribadi weh lov di chroot lisn tu weh Ai seh.” (Jan 18:37) Wi shoa dat wi di lisn tu Jeezas vais wen wi “aalwayz bayr wid wan anada, ahn . . . fagiv wan anada.” (Kol. 3:13; Look 17:3, 4) Wi aalso shoa dat wi di lisn tu ih vais wen wi du wi bes fi preech di gud nyooz “weda ih luk laik da di karek taim er nat.”—2 Tim. 4:2.

11 Jeezas mi seh: “Mai sheep dehn yehr mai vais.” (Jan 10:27) Fi hihn falowaz noh onli lisn tu ih werdz, bot aplai it eena dehn laif. Di “woriz a dis laif” noh dischrak dehn. (Look 21:34) Insted, ih moa impoatant tu dehn fi obay Jeezas koman dehn, eevn wen ih noh eezi. Weh  Jeezas seh kohn fos. Wahn lata wi bradaz di deel wid seeryos chraiyalz. Som a dehn di deel wid persikyooshan, paverti, ahn nachral dizaasta. Eevn doa dehn di fays dehnya chalenjiz, dehn stay faytful tu Jehoava, noh mata wat. Jeezas pramis dehn faytful bradaz ahn sistaz: “Dehn wan weh noa mi komanment dehn, ahn obay dehn, da di wan dehn weh reeli lov mi fi chroo. Ahn mai Faada wahn lov aala dehn wan weh lov mee.”—Jan 14:21.

Wi minischri help wi fi stay foakos (Paragraaf 12) *

12. Wat da wahn nada way wi ku shoa dat wi di lisn tu Jeezas?

12 Wahn nada way wi ku shoa dat wi di lisn tu Jeezas da fi werk lang wid di bradaz weh hihn apoint fi tek di leed monks wi. (Heeb. 13:7, 17) Gaad aaganaizayshan mek wahn lata ajosment joorin di paas yaaz. Som a dehn ajosment inklood di yoos a wi nyoo toolz fi di minischri, di way wi preech, di faamat fi wi meetin joorin di week, ahn di way wi bil, fiks, ahn mantayn wi Kingdom Haal dehn. Wi apreeshiayt di gaidans weh da fi wi oan gud! Wi ku bee shoar dat Jehoava wahn bles wi efoat fi fala di gaidans fan ih aaganaizayshan.

13. How wi benifit wen wi lisn tu Jeezas?

13 Wi benifit wen wi lisn tu evriting weh Jeezas teech. Hihn mi tel ih disaipl dehn dat fi hihn teechinz wuda rifresh dehn. Ih tel dehn seh: “Yu wahn fain res fi yu soal. Di yoak weh Ah gi yu noh haad fi bak, ahn di load weh Ah gi yu noh hevi ataal.” (Mach. 11:28-30) Di Werd a Gaad, weh inklood di foa Gaspl akonk a Jeezas laif ahn minischri, rifresh wi, gi wi bak wi spirichwal schrent, ahn mek wi waiz. (Ps. 19:7; 23:3) Jeezas mi seh: “Dehn wan weh yehr di Werd a Gaad ahn du weh ih seh stil moa bles [er, “hapi,” NW] dan dat!”—Look 11:28.

“AH DON MEK DEHN SI HOW WANDAFUL MAI NAYM AREDI”

14-15. (a) Akaadn tu Jan 12:27, 28, wen da-mi di terd taim Jehoava taak fahn hevn? (b) Wai Jehoava werdz wuda mi komfert ahn schrentn Jeezas?

14 Reed Jan 12:27, 28. Di Gaspl a Jan rikaad di terd taim Jehoava mi taak fahn hevn. Wahn fyoo dayz bifoa ih det, Jeezas mi deh da Jeroosalem fi selibrayt ih laas Paasoava. Ih mi seh: “Mi haat hevi, hevi.” Den ih mi pray: “Faada, mek dehn si how wandaful yu naym.” Den ih hyaa ih Faada seh fahn hevn: “Ah don mek  dehn si how wandaful mai naym aredi, an Ah wahn du it agen.”

15 Jeezas mi-di wori kaaz a di big rispansabiliti ih mi ga fi stay faytful tu Jehoava. Jeezas mi noa dat dehn mi wahn flag ahn, an dat ih mi wahn haftu fays wahn kruwil det. (Mach. 26:38) Dehn mi akyooz ahn seh dat ih mi disrispek Gaad. Soh, ih mi-di wori dat da akyoozayshan neva mi wahn aana Gaad, kaaz moa dan eniting els, Jeezas mi waahn bring aana tu ih Faada naym. Soh wi ku onli imajin how Jehoava werdz mosi mi inkorij Jeezas, ahn giv ahn kanfidens dat Jehoava naym mi wahn get aana. Weh ih Faada mi tel ahn mi gi ahn komfert an schrent fi weh ih mi wahn haftu fays. Aldoa Jeezas da-mi praabli di onli wan weh mi andastan weh ih Faada mi seh da day, Jehoava mek shoar dat fi Hihn werdz mi geh rait dong fi aala wi.—Jan 12:29, 30.

Jehoava wahn aana ih naym ahn sayv ih peepl (Paragraaf 16) *

16. Wai wi mait wori wen enibadi disrispek Jehoava naym?

16 Jos laik Jeezas, di moas impoatant ting tu wee da fi bring aana tu Jehoava naym, ahn wi wori if enibadi disrispek fi Hihn naym. Laik Jeezas, maybi peepl chreet wi eena wahn bad way ahn prejudis gens wi. Er wi mait wori bowt faals stoari weh peepl spred bowt wi. Wi mait wori bowt how dehndeh ripoat mek Jehoava naym an ih aaganaizayshan luk. Joorin taimz laik dis, Jehoava werdz reeli komfert wi. Wi noh  need fi wori tu moch bowt it. Wi ku bee shoar dat “Gaad wahn gi [wi] wahn kaina pees weh nobadi kyaahn andastan. Ih wahn mek da sayhn pees wach oava [wi] haat ahn [wi] main.” (Fil. 4:6, 7) Jehoava wahn aalwayz aana ih naym. Chroo ih Kingdom, hihn wahn fiks aala di damij weh Saytan an dis werl kaaz tu fi Hihn faytful servant dehn.—Ps. 94:22, 23; Isa. 65:17.

DI BENIFITS WEN WI LISN TU JEHOAVA VAIS TUDEH

17. Akaadn tu Isaiah 30:21, how Jehoava taak tu wi tudeh?

17 Jehoava stil di taak tu wi tudeh. (Reed Isaiah 30:21.) * Wel, da chroo dat wi noh di hyaa Gaad di taak fahn hevn. Bot ih gi wi ih Werd di Baibl; dis da how ih gi wi inschrokshan. Aalso, Jehoava spirit moov “di faytful servant” fi aalwayz giv Ih servants dehn food tu taim. (Look 12:42, NW) Wi ga wahn lata spirichwal food nowadayz, wi ga wi buk ahn magazeen dehn, weh aalso avaylabl onlain, lang wid veedyo, an aadyo poblikayshanz!

18. How Jehoava werdz bil op yu fayt ahn gi yu korij?

18 Mek wi aalwayz rimemba weh Jehoava mi tel ih Son wen ih mi deh pahn di ert! Wi pray dat Gaad oan werdz, weh deh eena di Baibl, gi wi di kanfidens dat Jehoava ga evriting anda kanchroal ahn dat hihn wahn fiks eni damij weh Saytan an ih wikid werl kaaz. Ahn mek wi reeli lisn tu Jehoava vais. If wi du dehnya tingz, wi wahn ku fays eni chalenj eena di fyoocha. Di Baibl rimain wi: “Unu haftu heng een deh, soh dat wen unu don du weh Gaad waahn unu du, unu wahn geh weh ih pramis unu.”—Heeb. 10:36.

SANG 4 “Jehoava Da Mai Shepad”

^ par. 5 Wen Jeezas mi deh pahn di ert, Jehoava mi taak chree taimz fahn hevn. Pahn wan a dehndeh taimz, Jehoava mi inkorij Jeezas disaipl dehn fi lisn tu ih Son. Tudeh, Jehoava taak tu wi chroo ih Werd di Baibl weh inklood Jeezas teechin dehn. An ih aalso taak tu wi chroo ih aaganaizayshan. Dis aatikl wahn kansida how wi benifit wen wi lisn tu Jehoava ahn tu Jeezas.

^ par. 17 Isaiah 30:21: “Ahn yu oan ayz wahn hyaa wahn werd di kohn fahn bihain yu di seh, ‘Dis da di way. Waak eena it,ʼ jos in kays yu goh tu di rait er tu di lef.”

^ par. 53 DI PICHA DEHN: Wahn elda noatis wahn ministeeryal servant di werk da di lichricha kownta ahn di help wid di mantaynans a di Kingdom Haal. Di elda giv ahn waam komendayshan.

^ par. 55 DI PICHA DEHN: Wahn kopl da Sierra Leone di gi wahn meetin invitayshan tu wahn fishaman.

^ par. 57 DI PICHA DEHN: Bradaz ahn sistaz di meet eena wahn praivit hoam da wahn konchri weh wi werk deh anda ban. Dehn jres eena regyula kloaz kaaz dehn noh waahn jraa atenshan tu dehnself.