Skip tu di aatikl

Skip tu lis a tapik

 STODI AATIKL 10

Weh di Hoal Mi Bak Fahn Geh Baptaiz?

Weh di Hoal Mi Bak Fahn Geh Baptaiz?

“Di too a dehn gaahn dong eena di waata, ahn Filip baptaiz ahn.”—AKS 8:38.

SANG 52 Kristyan Dedikayshan

WEH WI WAHN DISKOS? *

1. Weh Adam ahn Eev mi looz, ahn wat da-mi di rizolt?

HOO yu tink shuda set di standadz a gud ahn bad? Wen Adam ahn Eev mi eet fahn di chree a di nalij a gud ahn bad, dehn mi-di shoa fahn dehn akshanz dat dehn noh chros Jehoava ahn fi Hihn standadz. Dehn mi chooz fi set dehn oan standadz a gud ahn bad. (Gen. 3:22) Bot tink bowt weh aal dehn looz owt pan. Dehn looz dehn frenship wid Jehoava. Dehn aalso looz di apachooniti fi liv fareva, ahn dehn paas aan sin ahn det tu aala wi. (Roam. 5:12) Di disizhan weh Adam ahn Eev mi mek kaaz lata payn ahn sofarin.

Afta di man fahn Eetiyopya aksep di chroot bowt Jeezas, di man geh baptaiz rait away (Paragraaf 2-3)

2-3. (a) How di Eetiyopyan man mi rispan wen Filip preech tu ahn? (b) Wat da som a di blesinz wi get wen wi geh baptaiz, ahn weh kweschanz wi wahn kansida?

2 Di way Adam ahn Eev mi bihayv mi difrent fahn di way di man fahn Eetiyopya mi rispan wen Filip preech tu ahn. Di Eetiyopyan man mi ga way moa apreeshiayshan fi weh Jehoava ahn Jeezas mi du far ahn, soh ih mi geh baptaiz rait away. (Aks 8:34-38) Jos laik di man fahn Eetiyopya, wen wee dedikayt wi laif tu Gaad ahn geh baptaiz, wi di shoa bai fi wee akshanz dat wi apreeshiayt weh Jehoava ahn Jeezas mi du fi wi. Wi aalso di shoa dat wi chros Jehoava an aksep dat hihn ga di rait fi set di standad a gud ahn bad.

3 Tink bowt di blesinz wi injai wen wi serv Jehoava! Fi wan ting, wi ga di hoap fi get bak weh Adam ahn Eev mi laas, inkloodin di apachooniti fi liv fareva. Bikaaz a wi  fayt eena Jeezas Krais, Jehoava fagiv wi mistayk dehn ahn gi wi wahn kleen kanshans. (Mach. 20:28; Aks 10:43) Ahn wi geh fi bee paat a Jehoava famili weh di luk faawod tu wahn wandaful fyoocha. (Jan 10:14-16; Roam. 8:20, 21) Bot eevn doa som peepl noa wat da di benifits wen wi serv Jehoava, dehn stil hoal bak fahn fala di egzampl a di man fahn Eetiyopya. Weh mait hoal dehn bak fahn geh baptaiz? Ahn how dehn ku deel wid dehndeh chalenj?

SOHN CHALENJ WEH HOAL BAK SOM PEEPL FAHN GEH BAPTAIZ

Chalenjiz weh som peepl fays bifoa dehn geh baptaiz

Noh Shoar a Miself (Paragraaf 4-5) *

4-5. Wat da sohn chalenj weh Avery ahn Hannah mi fays?

4 Noh shoar a miself. Avery payrents da Jehoava Witnisiz. Ih pa da wahn lovin faada ahn wahn gud elda. Bot stil, Avery mi frayd fi geh baptaiz. Wai? Hihn seh: “Ah neva tink dat Ah kuda mi bee az gud az mi pa.” Avery mi aalso feel dat ih mi wahn kyaahn handl sertn rispansabiliti weh ih mait get eena di fyoocha. Ih mi seh: “Ah mi wori dat dehn wuda aks mi fi seh wahn poblik pryaa, fi gi wahn poblik taak, er kehr di groop owt pahn feel servis.”

5 Hannah, weh 18 yaaz oal, neva ga no kanfidens ataal. Eevn doa fi shee payrents da Witnisiz, shee mi dowt dat shee kuda liv bai Jehoava standadz. Wai shee mi feel da way? Hannah mi ga wahn reeli loa self esteem, sohntaim ih mi soh loa dat ih wuda hert op ihself fi spait. Dat onli mi mek mataz wers. Shee seh: “Ah neva tel nobadi bowt weh Ah yoostu du, noh eevn mi payrents. Ah yoostu tink dat Jehoava wuda neva waahn mee bikaaz a weh Ah mi-di du tu miself.”

Bad Kompni (Paragraaf 6) *

6. Weh mi hoal bak Vanessa fahn geh baptaiz?

6 Bad kompni. Vanessa, weh 22 yaaz oal, seh: “Ah mi ga wahn reeli gud fren hoo Ah mi noa fi nayli ten yaaz.” Vanessa fren neva sopoat ahn eena ih goal fi geh baptaiz. Dat mi hert Vanessa, shee seh: “Ah fain it haad fi mek frenz fi bigin wid, an Ah mi-di wori dat if Ah mi stap bee fi shee fren, Ah wuda neva ga wahn nada kloas fren.”

Frayd fi Mek Wahn Mistayk (Paragraaf 7) *

7. Weh wahn yong laydi weh naym Makayla mi frayd fa, ahn wai?

7 Frayd fi mek wahn mistayk. Makayla mi faiv yaaz oal wen fi shee breda mi geh disfeloship. Az shee geh mi oalda, shee geh fi si how ih breda akshanz mi reeli hert ih payrents. Makayla seh: “Ah mi frayd dat if Ai mi geh baptaiz, Ah wuda mi mek wahn mistayk, geh disfeloship, ahn mek mi payrents feel eevn moa sad.”

Frayd fi Weh Famili Wahn Seh (Paragraaf 8) *

8. Weh wahn yong man weh naym Miles mi frayd fa?

 8 Frayd fi weh famili wahn seh. Miles pa an step-ma di serv Jehoava, bot ih reel ma da noh wahn Witnis. Miles seh: “Ah mi liv wid mi ma fi 18 yaaz, an Ah mi frayd fi tel ahn dat Ah mi waahn geh baptaiz. Ah mi si how shee mi chreet mi pa wen hihn mi geh baptaiz. Ah mi frayd dat shee wuda mi chreet mi di saym way tu.”

HOW YU KU DEEL WID CHALENJIZ?

9. Weh ku hapm wen wi laan dat Jehoava lovin ahn payshent wid aala wi?

9 Di reezn wai Adam ahn Eev mi chooz noh fi serv Jehoava da bikaaz dehn neva ga schrang lov fi hihn. Ahn yet, Jehoava mi stil alow dehn fi liv lang inof fi ga chiljren ahn disaid how dehn mi wahn rayz dehn. Wel, ih neva tek lang fi si dat Adam ahn Eev disizhan fi du dehn oan ting da-mi wahn foolish wan. Dehn oaldis son mi merda ih inosent breda, an az taim paas, ih mi moa kaman fi si vailens ahn selfishnis evriway. (Gen. 4:8; 6:11-13) Bot, Jehoava mi ga wahn way fi sayv aala Adam ahn Eev chiljren hoo waahn serv Hihn. (Jan 6:38-40, 57, 58) Di moa yu laan bowt di amonk a payshens ahn lov weh Jehoava gat, di moa yu wahn lov hihn. Yu noh wahn du weh Adam ahn Eev mi chooz fi du. Bot yu wahn dedikayt yu laif tu Jehoava.

Weh wahn yu help yu fi fays dehnya chalenj

(Paragraaf 9-10) *

10. If wi meditayt pahn Psalm 19:7, how dat ku help yu serv Jehoava?

10 Kantinyu fi laan bowt Jehoava. Di moa yu laan bowt Jehoava, di moa kanfidens yu wahn gat dat yu ku serv hihn. Dis da egzakli how Avery ahn Hannah weh wi mi menshan lee erliya mi feel. Avery seh: “Ah mi geh kanfidens wen Ah mi reed ahn meditayt pahn di pramis da Psalm 19:7.” (Reed.) * Wen Avery mi si how Jehoava kip ih pramis, ih lov fi Gaad geh schranga. Lov noh onli schrentn wi kanfidens bot ih aalso help wi fi foakos pahn Jehoava ahn weh hihn  waahn. Hannah seh: “Chroo mi persnal stodi ahn Baibl reedin, Ah geh fi riyalaiz dat wen Ah hert miself, Ah hert Jehoava tu.” (1 Peet. 5:7) Hannah neva jos stodi, bot shee mi aplai weh ih mi-di laan. Shee mi “du weh [di Werd a Gaad] seh fi du!” (Jay. 1:22) Wat da-mi di rizolt? Shee seh: “Wen Ah geh fi si how Ah benifit wen Ah obay Jehoava, mi lov fi hihn geh schranga. Now Ah noa fi shoar dat Jehoava wahn aalwayz gaid mi wen Ah need ih help.” Hannah mi fays fi shee chalenj wid sokses ahn stap hert ihself. Shee mi dedikayt ih laif tu Jehoava ahn geh baptaiz.

(Paragraaf 11) *

11. Weh Vanessa mi du fi mek gud frenz, ahn weh wi ku laan fahn dis?

11 Chooz di rait kaina frenz. Memba Vanessa, weh wi mi menshan lee erliya, shee mi geh fi riyalaiz dat ih fren mi-di hoal ahn bak fahn serv Jehoava. Soh shee mi en da frenship. Bot Vanessa mi du moa dan dat, shee mi werk haad fi mek nyoo frenz eena di kangrigayshan. Shee seh dat di egzampl a Noawa ahn fi hihn famili mi help ahn. Ih seh: “Dehn mi deh rong peepl weh neva lov Jehoava, bot dehn mi ga gud kompni monks dehnself.” Afta Vanessa geh baptaiz, shee staat painyaa. Now shee seh: “Dis help mi fi mek gud frenz noh jos eena mi oan kangrigayshan bot eena ada kangrigayshanz tu.” Yoo ku mek gud frenz tu. Jos stay bizi eena di werk weh Jehoava gi wi fi du.—Mach. 24:14.

(Paragraaf 12-15) *

12. Weh kaina fyaa Adam ahn Eev neva gat, ahn weh hapm bikaaz a dat?

12 Laan fi ga di rait kaina fyaa. Noh aal kaina fyaa bad, som a dehn gud fi wi. Fi egzampl, da wahn gud ting if wi noa dat wi frayd fi mek Jehoava sad. (Ps. 111:10) If Adam ahn Eev mi ga da kaina fyaa, dehn wudn a mi ribel gens Jehoava. Bot dehn mi ribel gens ahn. Afta dehn mi du dat, dehn geh fi si dat dehn da-mi sinaz. Dehn paas aan sin ahn det tu dehn chiljren. Bikaaz dehn mi andastan dehn kandishan, dehn geh shaym fi noa dat dehn mi naykid ahn kova dehnself.—Gen. 3:7, 21.

13-14. (a) Akaadn tu 1 Peeta 3:21, wai wi noh need fi ga wahn ekschreem fyaa a det? (b) Weh da sohn reezn wi ga fi lov Jehoava?

 13 Wi need fi ga wahn helti fyaa a Jehoava, bot wi noh need fi ga wahn ekschreem fyaa a det. Wai wi seh dis? Bikaaz Jehoava mek wahn way owt soh dat wi ku get evalastin laif. An if wi doo komit wahn sin, Jehoava wahn fagiv wi, bot onli if wi sari fahn di batam a wi haat. Hihn wahn fagiv wi bikaaz a wi fayt eena di ransom sakrifais a fi hihn Son. Wahn impoatant way fi shoa wi fayt da fi dedikayt wi laif tu Gaad ahn geh baptaiz.—Reed 1 Peeta 3:21.

14 Wi ga lata reezn fi lov Jehoava. Hihn noh onli gi wi di gud tingz wi injai evri day bot ih aalso teech wi di chroot bowt ihself an ih perpos dehn. (Jan 8:31, 32) Hihn gi wi di Kristyan kangrigayshan fi gaid ahn sopoat wi. Ih help wi wid prablemz now, an ih aafa wi di hoap fi liv fareva eena perfek kandishanz eena di fyoocha. (Ps. 68:19; Rev. 21:3, 4) Wen wi meditayt pahn aal weh Jehoava don du fi wi aredi fi shoa humoch ih lov wi, wi lov ahn eevn moa. Ahn wen wi lov Jehoava, wi wahn ga di rait kaina fyaa. Wi frayd fi hert Jehoava, kaaz wi geh fi lov hihn soh moch.

15. How Makayla mi fays fi shee chalenj fi bee frayd fi mek wahn mistayk?

15 Memba Makayla, shee mi frayd fi mek wahn mistayk ahn brok ih pramis fi serv Jehoava. Weh mi help ahn fays ih chalenj? Shee seh: “Ah mi riyalaiz dat non a wi perfek, aala wi wahn mek mistayk. An Ah mi geh fi andastan dat Jehoava lov wi ahn wahn fagiv wi bikaaz a di ransom.” Soh Makayla mi geh fi si dat Jehoava noh hoal bak fagivnis. Bikaaz a fi shee lov fi Jehoava, shee mi dedikayt ih laif tu Gaad ahn geh baptaiz.

(Paragraaf 16) *

16. How Miles mi fays fi hihn chalenj wid ih famili?

16 Miles mi frayd dat ih ma wuda mi stap ahn fahn geh baptaiz. Soh hihn aks di serkit oavaseeya fi help. Miles seh: “Di serkit oavaseeya mi groa op eena di saym kaina famili laik mee, weh onli wan payrent mi-di serv Jehoava. Hihn mi help mi fi tink bowt weh Ah ku seh fi help mi ma andastan mi sichuwayshan. Ah mi need fi help mi ma si dat da mee di disaid fi geh baptaiz ahn dat mai pa neva di foas mi.” Miles ma neva laik weh shee mi hyaa non ataal. Soh weh hihn du? Hihn mi haftu moov owta ih ma hows ahn stik tu ih disizhan. Hihn seh: “Ih mi toch mi haat wen Ah mi laan bowt aala di tingz weh Jehoava mi du fi mi. Wen Ah stap ahn tink bowt di ransom sakrifais a Jeezas, Ah riyalaiz humoch Jehoava lov mi. Dat mi mek Ah waahn dedikayt mi laif tu Jehoava ahn geh baptaiz.”

 STIK TU YU DISIZHAN

Wi ku shoa dat wi apreeshiayt weh Gaad don du fi wi (Paragraaf 17)

17. Weh apachooniti aala wi gat?

17 Wen Eev mi eet di froot fahn di chree eena di gyaadn a Eedn, shee mi ton ih bak pahn fi shee Faada. Wen Adam jain ahn, hihn mi-di shoa dat hihn neva ga apreeshiayshan fi aala di gud tingz weh Jehoava mi du fi hihn. Aala wi ku shoa dat wi da noh laik Adam ahn Eev. Wee apreeshiayt evriting weh Jehoava du fi wi. Wen wi geh baptaiz, wi shoa Jehoava dat wi bileev dat hihn ga di rait fi set di standad a rait ahn rang fi aala wi. Wi proov dat wi lov an chros wi Faada.

18. Weh ku help yu fi ga sokses eena yu servis tu Jehoava?

18 Afta wi geh baptaiz, wi need fi kantinyu du weh Jehoava waahn, noh weh wee waahn. Dis ku bee wahn chalenj, bot aala wi ku du it. Milyanz a peepl di liv bai Jehoava standadz. Yu ku bee laik dehn if yu kantinyu fi andastan di Werd a Gaad beta, spen taim wid yu bradaz ahn sistaz, ahn shayr weh yu laan bowt yu lovin Faada. (Heeb. 10:24, 25) Wen yu mek disizhanz, lisn tu di advais Jehoava gi yu chroo ih Werd an ih aaganaizayshan. (Isa. 30:21) Den yu wahn ga sokses eena yu servis tu Jehoava.—Prov. 16:3, 20.

19. Weh yu need fi aalwayz stap ahn tink bowt, ahn wai?

19 Aalwayz stap ahn tink bowt how Jehoava gaidans di benifit yoo. Dis wahn mek yu lov fi Gaad an ih standadz geh schranga. Den notn weh Saytan ga fi aafa yu wahn mek yu stap serv Jehoava. Imajin yuself wahn towzn yaaz fahn now. Yu wahn luk bak pahn yu disizhan fi geh baptaiz ahn tink dat da-mi di bes disizhan yu eva mek!

SANG 28 Hoo Da Jehoava Fren?

^ par. 5 Di moas impoatant disizhan yu wahn eva mek da weda er nat yu wahn geh baptaiz. Wai da disizhan soh impoatant? Dis aatikl wahn ansa da kweschan. Ih wahn aalso help dehn wan weh di tink bowt geh baptaiz fi deel wid di chalenjiz weh mait hoal dehn bak fahn mek dis disizhan.

^ par. 10 Psalm 19:7: “Di laa a Jehoava perfek, ih ku gi wahn persn bak ih schrent. Di rimainda a Jehoava da sohnting wi ku chros, ih ku mek di persn widowt ekspeeryens waiz.”

^ par. 57 DI PICHA DEHN: Noh Shoar a Miself: Wahn yong man nervos fi gi wahn koment.

^ par. 59 DI PICHA DEHN: Bad Kompni: Wahn yong sista weh ga bad kompni shaym wen shee si ada Witnisiz.

^ par. 61 DI PICHA DEHN: Frayd fi Mek Wahn Mistayk: Wahn yong gyal breda geh disfeloship ahn lef hoam. Shee mi-di wori dat shee wuda du di saym ting.

^ par. 63 DI PICHA DEHN: Frayd fi Weh Famili Wahn Seh: Wahn yong bwai nervos bowt seh wahn lee pryaa bifoa ih eet kaaz ih ma, hoo da noh wahn Witnis, di luk pan ahn.

^ par. 66 DI PICHA DEHN: Noh Shoar a Miself: Wahn yong man du moa persnal stodi.

^ par. 68 DI PICHA DEHN: Bad Kompni: Wahn yong sista laan fi bee prowd fi bee wahn Witnis.

^ par. 70 DI PICHA DEHN: Frayd fi Mek Wahn Mistayk: Wahn yong gyal chooz fi serv Jehoava ahn geh baptaiz.

^ par. 72 DI PICHA DEHN: Frayd fi Weh Famili Wahn Seh: Wahn yong bwai geh di korij fi eksplayn ih bileef dehn tu ih ma.