Skip tu di aatikl

Skip tu lis a tapik

Jehoava Apreeshiayt Yu “Aymen”

Jehoava Apreeshiayt Yu “Aymen”

JEHOAVA apreeshiayt wi wership. Hihn di “pay atenshan ahn lisn” tu ih servant dehn. Hihn aalwayz si evriting wi du fi prayz hihn, noh mata how smaal. (Mal. 3:16) Fi egzampl, tink bowt wahn werd weh wi don seh lata taimz. Di werd da “aymen.” Yu tink Jehoava si an apreeshiayt da lee werd deh? Yes, af koars! Fi laan wai, mek wi egzamin weh da werd meen ahn how di Baibl yooz it.

“AALA DI PEEPL WAHN SEH, ‘AYMEN!ʼ”

Di Inglish werd fi “aymen” meen “mek ih bee soh,” er “fi shoar.” Ih kohn fahn wahn Heebroo werd weh meen fi “bee faytful,” er fi “bee chrootful.” Sohntaim, dehn yooz it eena wahn leegal kays. Afta wahn persn mek wahn oat, ih wuda seh “aymen” fi proov dat weh ih mi seh da di chroot ahn dat hihn aksep di rizolts a weh ih mi seh. (Num. 5:22) Wen hihn seh “aymen” eena wahn poblik way, ih di seh dat hihn ga eevn moa reezn fi kip ih pramis.—Neh. 5:13.

Wahn egzampl a di way how di Baibl yooz “aymen” deh da Deuteronomy chapta 27. Afta di Izrelait dehn gaan intu di Pramis Lan, dehn mi gyada tugeda da Mongt Eebal ahn Mongt Gerizim fi hyaa di Laa. Dehn neva jos dehdeh fi lisn bot aalso fi shoa dat dehn aksep di Laa. Soh wen dehn mi hyaa weh wahn hapm tu dehn if dehn disobay di Laa, dehn ansa “Aymen!” (Deut. 27:15-26) Jos imajin towznz a peepl—man, uman ahn pikni di ansa lowd-wan, “Aymen!” (Josh. 8:30-35) Fi shoar dehn neva faget weh dehn mi seh da day. Ahn dehndeh Izrelait mi kip dehn werd, kaaz di Baibl seh: “Izrel kantinyu fi serv Jehoava aala di dayz a Jashwa an aala di dayz a di elda dehn weh mi liv langa dan Jashwa ahn weh mi noa aal weh Jehoava mi du fi Izrel.”—Josh. 24:31.

Jeezas mi aalso yooz “aymen” fi proov tu di peepl weh mi-di lisn tu ahn dat weh ih mi-di seh da di chroot, bot ih mi du it eena wahn difrent way. Hihn neva yoostu seh “aymen” fi ansa wen sombadi seh sohnting, bot hihn mi seh “aymen” (er, “Ah di tel unu di chroot” eena di Kriol Baibl) bifoa hihn seh sohnting. Hihn mi waahn proov dat weh  ih wahn seh neks da di chroot. Sohntaim ih wuda eevn seh “aymen aymen.” (Mach. 5:18; Jan 1:51) Ih mi-di mek shoar di peepl weh mi-di lisn tu ahn noa dat fi hihn werdz da di chroot. Jeezas kuda mi taak wid da kaina kanfidens bikaaz Gaad giv ahn di atariti fi mek aala fi Hihn pramis dehn kohn chroo.—2 Kor. 1:20; Rev. 3:14.

“DI PEEPL SEH, ‘AYMEN!ʼ AHN DEHN PRAYZ JEHOAVA”

Di Izrelait dehn mi yooz “aymen” wen dehn pray an aafa op prayz tu Jehoava. (Neh. 8:6; Ps. 41:13) Wen dehn seh “aymen” da di en a wahn pryaa, aala dehn mi-di seh dat dehn wuda seh dehndeh saym tingz eena fi dehn oan pryaaz. Evribadi weh mi dehdeh kuda mi tek paat an injai dehn wership tu Jehoava. Dat da weh mi hapm wen King Dayvid mi bring di Aak a Jehoava tu Jeroosalem. Joorin di selibrayshan weh mi hapm afta dat, hihn mi seh wahn sinsyaa pryaa fan ih haat. Wi ku reed da pryaa da 1 Chronicles 16:8-36. Ih mi toch evribadi haat dat dehn seh, “Aymen!” ahn dehn prayz Jehoava. Soh dehn mi hapi fi wership Jehoava tugeda.

Kristyanz joorin di apasl dehn dayz mi yooz “aymen” wen dehn mi-di prayz Jehoava. Di man dehn weh mi rait di Baibl inklood it eena fi dehn letaz. (Roam. 1:25; 16:27; 1 Peet. 4:11) Di buk a Revilayshan eevn menshan di aynjel dehn di prayz Jehoava di seh: “Aymen, Halelooya!” (Rev. 19:1, 4) Di fos Kristyanz eena di dayz a di apasl dehn, yoostu seh “aymen” afta di pryaa da di meetin. (1 Kor. 14:16) Bot da neva wahn werd weh dehn mi fi seh widowt tink, er jos bai memri.

WAI IH IMPOATANT FI MEK WI SEH “AYMEN”?

Afta wi laan how Jehoava servants mi yooz di werd “aymen,” wi ku si wai da di  bes way fi en wahn pryaa. Wen wi seh aymen da di en a fi wee oan pryaa, wi di shoa dat wi reeli meen weh wi mi seh. Ahn wen wi seh “aymen” tu wiself er owt lowd da di en a wahn poblik pryaa, wi di shoa dat wi sopoat, er agree wid da pryaa. Noatis wai ih soh impoatant fi mek wi seh “aymen.”

Bikaaz da paat a wi wership soh wi pay atenshan. Wi wership Jehoava joorin pryaa noh onli bai weh wi seh bot bai di way wi bihayv tu. Bikaaz wi waahn bee sinsyaa wen wi seh “aymen”, wi kip wahn prapa atichood ahn pay atenshan tu di pryaa.

Bikaaz aala wi yoonaitid az Jehoava peepl. Wahn poblik pryaa da wi meetin da fi evribadi eena di kangrigayshan. (Aks 1:14; 12:5) Soh wen wi ansa tugeda wid wi bradaz ahn sistaz, wi di schrentn wi yooniti. Weda wi seh “aymen” eena wi haat er owt lowd, wi di gi Jehoava moa reezn fi ansa da pryaa.

Wi prayz Jehoava lang wid di kangrigayshan wen wi seh “aymen”

Bikaaz da wahn way fi mek wi prayz Jehoava. Jehoava noatis evriting weh wi du eena wi wership. (Look 21:2, 3) Hihn noa wai wi du sertn tingz ahn ih si weh deh eena wi haat. Eevn if wi haftu lisn tu di meetin oava di foan, Jehoava stil noatis wen wi seh wi lee “aymen.” Wi di prayz Jehoava lang wid di res a di kangrigayshan.

Wi “aymen” mait bee wahn lee werd, bot ih veri impoatant. Wahn Baibl risaach buk seh: “Wen Gaad servants seh dis wan werd, dehn ku shoa dehn kanfidens, agreement, ahn hoap weh deh eena dehn haat.” Soh wi pray dat evri “aymen” weh wi seh pleez wi Gaad, Jehoava.—Ps. 19:14.