Skip tu di aatikl

Skip tu lis a tapik

“Lisn tu Disiplin ahn Geh Waiz”

“Lisn tu Disiplin ahn Geh Waiz”

“Mi son, . . . lisn tu disiplin ahn geh waiz.” —PROV. 8:32, 33.

SANG: 56, 89

1. How wi geh wizdom ahn how dat help wi?

AAL wizdom kohn fahn Jehoava ahn hihn shayr it jenaros-wan wid adaz. Jaymz 1:5 seh: “Ahn if eni a unu noh ga di wizdom weh Gaad gi, yu mos aks Gaad fi gi yu. Hihn wahn gi yu nof, ahn yu noh hafu shaym fi aks.” Wen wi aksep disiplin fahn Gaad, wi geh wizdom, ahn dat ku protek wi fahn moaral ahn spirichwal daynja. (Prov. 2:10-12) Dat help wi fi ‘kip wiself eena di lov a Gaad; soh dat wi ku ga laif weh wahn neva en.ʼ—Jood 21.

2. How wi ku geh fi apreeshiayt disiplin?

2 Pahn di ada han, wi imperfekshan, di way wi groa op, an ada tingz ku mek it haad fi aksep disiplin. Bot di moa wi si how disiplin benifit wi, di moa ih proov dat Gaad lov wi. Proverbs 3:11, 12 seh: “Mi son, noh tek it lait wen Jehoava disiplin yu, . . . kaa Jehoava karek dehn wan weh ih lov.” Mek wi neva faget dat Jehoava waahn di bes fi wi. (Reed Heebrooz 12:5-11.) Bikaaz Jehoava noa wi soh gud, wen ih disiplin wi da aalwayz eena di rait way ahn di rait amonk. Mek wi diskos foa difrent kaina disiplin: (1) wen wi disiplin wiself [self-disiplin], (2) wen payrents disiplin dehn pikni, (3) wen sombadi eena di kangrigayshan geh disiplin, ahn  (4) sohnting weh wos dan di payn weh wi goh chroo wen wi geh disiplin.

WIZDOM BRING DISIPLIN

3. Giv wahn egzampl weh shoa how pikni ku laan self-disiplin.

3 Self-disiplin meen dat wi haftu kanchroal wiself soh dat wi ku du beta eena how wi tink an ak. Wi noh baan wid self-disiplin, wi haftu laan it. Da laik wen wahn pikni di fos laan how fi raid wahn baik, ih pa er ma yoozhwali dehdeh fi help ahn balans it. Bot az di pikni laan how fi balans di baik pan ih oan, ih ma er pa wuda let goh lee bit bai lee bit til ih ku balans ihself. Di sayhn way, wen payrents payshent wid dehn pikni, dehn wahn kip aan di teech ahn chrayn dehn eena Jehoava way. Dis wahn help dehn pikni laan self-disiplin ahn groa op fi bee wahn waiz persn.—Ifee. 6:4.

4, 5. (a) Wai self-disiplin soh impoatant wen wi werk haad fi bee di “nyoo persn”? (b) Wai wi noh fi giv op eevn if wi “faal dong sevn taimz”?

4 Adolts weh geh fi noa Jehoava haftu du di sayhn ting. Dehn mait don laan self-disiplin, bot eena wahn spirichwal way dehn stil noh machoar yet. Dehn need fi mek proagres fi machoar az wahn spirichwal persn ahn werk haad fi bee di “nyoo persn.” (Ifee. 4:23, 24) Self-disiplin shoa dat wi di groa spirichwali. Ih teech wi fi liv fi Gaad, ‘fi giv op di plezhaz a dis werl weh onli sinful, fi ga self-kanchroal, ahn fi liv wahn laif weh deesent an aanis, wan weh wahn pleez Gaad.ʼ—Taitos 2:12.

5 Aala wi da sinaz ahn wi mek mistayk. (Eccl. 7:20) Bot if wi sin, dat noh meenz dat wi neva di disiplin wiself. Di Baibl eena Proverbs 24:16 seh: “Di raichos wan mait faal dong sevn taimz, bot fi shoar ih wahn get op agen.” Weh wahn help wi fi ga sokses? Wi kyaahn du it pahn wi oan; onli Jehoava hoali spirit ku help wi. (Reed 2 Korintyanz 4:7.) Self-kanchroal da wahn kwaliti weh hoali spirit projoos ahn dat da nayli di saym laik self-disiplin.

6. How wi ku bee wahn beta styoodent a di Werd a Gaad? (Koment pahn di picha da di biginin a dis aatikl.)

6 Weh ku help wi fi kantinyu disiplin wiself? Wi need fi pray fahn wi haat, stodi di Baibl, ahn meditayt pahn weh wi reed. Bot wat if yu fain it haad fi stodi di Baibl? Maybi yu eevn kansida yuself di kaina persn weh noh laik stodi. Bot memba dat if yu alow Jehoava fi help yu, hihn wahn giv yu di dizaiya fi waahn stodi ih Werd. (1 Peet. 2:2) Bot fos wi need fi pray tu Jehoava ahn den werk lang wid weh wi pray fa. Maybi fi di biginin yu kip di stodi shaat, bot az taim goh, yu wahn fain dat ih geh eeziya ahn yu wahn injai it. Fi shoar yu wahn injai yu taim di reed di Baibl!—1 Tim. 4:15.

7. How self-disiplin ku help wi reech wi spirichwal goalz?

7 Self-disiplin help wi fi reech wi spirichwal goalz. Tek fi egzampl, wahn brada weh mi-di looz ih zeel fi di chroot. Dis mi wori ahn, soh ih set di goal fi bee wahn regyula painyaa ahn fi reed aal di aatikl dehn weh taak bowt da tapik. Dis lang wid pryaa, mi help di brada fi geh spirichwali schranga. Pahn tap a dat, ih agzilari painyaa wen ih mi kud. Wat da-mi di rizolt? Noh mata wat, ih kantinyu fi foakos pan ih goal fi bee wahn regyula painyaa ahn wid taim ih mi reech ih goal.

 DISIPLIN YU CHILJREN EENA JEHOAVA WAY

Chiljren noh baan di noa rait fahn rang, dehn haftu geh chrayn (Paragraaf 8)

8-10. How Noawa egzampl ku help payrents fi rayz op dehn pikni?

8 Da wahn preshos privilij fi Kristyan payrents rayz op dehn chiljren eena Jehoava way. (Ifee. 6:4) Bot dat noh eezi fi du eena dehnya laas dayz. (2 Tim. 3:1-5) Chiljren noh baan di noa rait fahn rang. Bot, dehn baan wid wahn kanshans weh need fi geh chrayn er disiplin. (Roam. 2:14, 15) Wahn risaach buk seh dat di Greek werd weh chranslayt “disiplin” ku meen di difrent stayj weh wahn pikni haftu goh chroo az ih di groa.

9 Chiljren feel di protekshan fahn payrents wen dehn geh disiplin eena wahn lovin way. Dehn laan dat freedom ga limit ahn dat wi disizhanz ku bring wi gud er bad rizolts. Eevn doa evri kolcha difrent, ih impoatant fi payrents kantinyu luk tu Jehoava fi gaidans. Soh, az lang az payrents lisn tu Gaad, dehn noh haftu ges er tink dehn need moa ekspeeryens fi noa how fi giv disiplin tu dehn chiljren.

10 Mek wi diskos di egzampl a Noawa. Wen Jehoava mi tel ahn fi bil di aak, ih mi kyaahn rilai pan ih oan ekspeeryens. Ih neva mi bil wahn aak bifoa. Soh den, Noawa mi haftu pen pahn Jehoava ahn du egzakli weh Ih mi tel ahn fi du. (Gen. 6:22) Wat da-mi di rizolt? Di aak weh Noawa mi bil kom owt egzakli how Jehoava mi tel ahn. Lang wid dat, Noawa da-mi wahn gud famili hed bikaaz ih mi chros eena di wizdom a Gaad. Noawa mi set wahn gud egzampl fi ih chiljren, sohnting weh neva eezi fi du eena di taim weh dehn mi-di liv.—Gen. 6:5.

11. Wai ih impoatant fi payrents set wahn gud egzampl wen dehn di chrayn dehn chiljren?

11 How payrents ku bee laik Noawa? Payrents haftu lisn tu Jehoava. Mek hihn teech yoo how fi rayz op yu pikni wid di Baibl, ahn wid di gaidans weh kohn fan ih aaganaizayshan. Wid taim, yu pikni wahn tank yu fi dat! Wahn brada seh: “Ah onli hapi wid di way mai payrents rayz mi op. Dehn mi du dehn bes fi teech mi. Bikaaz a dehn, Ah groa op fi bee wahn spirichwal persn.” Sohntaim doh, eevn wen payrents du dehn bes fi chrayn dehn pikni, som a dehn stil stap serv Jehoava. Bot, payrents weh chrai dehn bes ku ga wahn gud kanshans. Pahn tap a dat, dehn ku gat di hoap dat wan day dehn pikni wahn serv Jehoava agen.

12, 13. (a) How payrents shoa dat dehn obay Gaad wen dehn pikni geh disfeloship? (b) How wahn famili mi benifit wen dehn mi obay Jehoava?

12 Wan a di graytis tes fi payrents da wen wan a dehn pikni geh disfeloship.  Mek wi luk pahn di sichuwayshan a wahn sista wen ih daata mi geh disfeloship ahn lef hoam. Di ma seh: “Wen Ah yoostu reed weh wi poblikayshanz seh bowt how fi chreet wahn famili memba weh disfeloship, Ah wuda ton it rong fi soot mi. Ah wuda luk fi eni lee ekskyoos fi spen taim wid mi daata ahn grandaata. Bot eena wahn kain way mi hozban tel mi dat wee noh rispansabl fi wi daata nohmoh ahn dat wi noh fi intafyaa wid di disiplin fahn Jehoava.”

13 Afta sohn taim, dehn daata mi geh riyinstaytid bak tu di kangrigayshan. Di ma seh: “Nayli evriday mi daata kaal er teks mi! Ahn shee rispek mee ahn mi hozban bikaaz wi mi obay Jehoava. Now wi injai wahn gud rilayshanship az wahn famili.” Aks yuself; ‘If mi son er daata geh disfeloship, Ai wahn chros eena Jehoava ahn noh rilai pahn mi oan andastandin?ʼ (Prov. 3:5, 6) Memba, dat Jehoava disiplin proov dat ih lov wi. Mek wi neva faget dat Jehoava giv op ih son fi ded fi aala wi, ahn dat inklood fi yoo pikni tu. Jehoava noh waahn nobadi geh dischrai. (Reed 2 Peeta 3:9.) Soh, eevn if ih hert wi fi obay Jehoava, mek wi noh giv op. Kantinyu fi ga fayt eena ih disiplin ahn dairekshan. Mek wi noh goh gens Jehoava disiplin, insteda dat, wi fi werk lang wid it.

DISIPLIN EENA DI KANGRIGAYSHAN

14. How wi benifit fahn di spirichwal food weh Jehoava gi wi chroo di faytful ahn diskreet slayv?

14 Jehoava pramis wi dat ih wahn protek ahn gaid di kangrigayshan. Ih du dat eena wahn lata difrent wayz. Tek fi egzampl how Jehoava tek kayr a di kangrigayshan. Ih lef ih son, Jeezas in chaaj, ahn Jeezas lef di faytful ahn diskreet slayv fi gi di kangrigayshan spirichwal food tu taim. (Look 12:42) Wi aalwayz geh di gaidans ahn disiplin weh wi need bikaaz soh moch spirichwal food deh—an ih kohn tu wi eena lata difrent wayz. Aks yuself, ‘Humoch taimz wahn taak er aatikl eena wi magazeen moov mi fi chaynj di way Ah tink an ak?ʼ If yu ga wahn pazitiv ansa, yu ku feel hapi! Dat meenz yu di alow Jehoava fi disiplin yu.—Prov. 2:1-5.

15, 16. (a) How wee ku benifit fahn di eldaz eena di kangrigayshan? (b) How wi ku help mek di eldaz injai dehn werk?

15 Jeezas mi aalso apoint eldaz fi bee shepadz eena di kangrigayshan. (Ifee. 4:8, 11-13) How wi ku benifit fahn dehnya bradaz? Wan way da fi fala fi dehn gud egzampl ahn ga di kaina fayt dehn gat. Wahn neks way da fi lisn ahn fala di advais weh dehn gi wi fahn di Baibl. (Reed Heebrooz 13:7, 17.) Memba dat di eldaz lov wi ahn dehn waahn wi kantinyu fi groa spirichwali. If dehn noatis dat wi noh di goh da meetin er dat wi di looz wi zeel fi di chroot, dehn kwik fi help wi. Dehn wahn tek dehn taim fi lisn tu wi ahn yooz di Baibl fi inkorij wi. Shepadz eena di kangrigayshan shoa dat Jehoava lov wi.

16 Sohntaim ih noh eezi fi eldaz gi wi advais fahn di Baibl. Wen Dayvid mi sin ahn chrai kova it op, di prafit Naytan mi haftu gi ahn kongsl. Imajin how di prafit Naytan mosi mi feel fi du dat! (2 Sam. 12:1-14) Eena di saym way, wen di apasl Peeta mi shoa fayvritizm tu di Jooish bradaz, di apasl Paal mi haftu ga  korij fi karek ahn. (Gal. 2:11-14) Soh how wi ku eez di load weh di eldaz dehn gat? Wi haftu bee hombl, eezi fi taak tu, ahn tankful. Wi aalso haftu si di advais weh di eldaz gi wi az wahn way how Jehoava shoa ih lov fi wi. Dis noh onli wahn benifit wee bot ih wahn mek di eldaz hapi fi du dehn werk.

17. How wahn sista mi benifit fahn di lovin help weh di eldaz mi giv ahn?

17 Wahn sista mi fain it haad fi lov Jehoava bikaaz a wahn sin weh ih mi du eena di paas. Shee seh: “Weneva mi paas wuda bring mi dong, Ah noa dat Ah wuda haftu goh taak tu di eldaz. Dehn neva bring mi dong er kritisaiz mi, raada dehn inkorij mi. An afta evri meetin, noh mata how bizi dehn yoostu bee, at lees wan a dehn wuda aks mi how Ah di du. Ah mi fain it haad fi bileev dat Jehoava lov mi. Bot chroo di kangrigayshan ahn di eldaz Jehoava aalwayz proov dat ih lov mi. Ai pray dat Ah neva lef Jehoava.”

DI PAYN WI FEEL WEN WI RIJEK DISIPLIN

18, 19. Weh kuda bee wos dan di payn weh disiplin wuda bring? Gi wahn egzampl.

18 Ih payn wi wen wi geh disiplin, bot di payn weh wi feel wen wi rijek disiplin eevn wos. (Heeb. 12:11) Mek wi luk pahn di egzampl a Kayn ahn King Zedikaiya. Wen Kayn haychrid mi groa tuwaadz Aybl, ih mi waahn kil ahn. Soh Jehoava mi waan Kayn. Ih tel ahn seh: “Wai yu soh beks ahn sad? If yu du gud, yu noh tink Ah wahn bles yu? Bot if yu noh du gud, sin deh da yu doa an ih kyaahn wayt fi kanchroal yu; yoo tink yu ku kanchroal it?” (Gen. 4:6, 7) Kayn neva lisn ahn dat mi mek ih komit wahn seeryos sin. Bikaaz Kayn rijek disiplin ih sofa! (Gen. 4:11, 12) Ih kuda mi sayv ihself fahn aala da chrobl, if ih mi onli aksep di waanin fahn Jehoava.

19 Zedikaiya da-mi wahn wikid king weh mi rool oava Jeroosalem. Di prafit Jerimaiya mi kip di tel ahn fi chaynj ih bad wayz, bot di king mi rifyooz fi aksep disiplin. Agen, tingz neva ton owt gud fi Zedikaiya. (Jer. 52:8-11) Jehoava reeli noh waahn wi goh chroo aala da payn!—Reed Isaiah 48:17, 18. *

20. Weh wahn hapm tu dehn wan weh aksep disiplin fahn Jehoava ahn tu di wan dehn weh rifyooz it?

20 Eena di werl peepl luk dong pahn disiplin. Bot peepl weh tink laik dat wahn soon geh dischrai. (Prov. 1:24-31) Soh mek wi bee waiz ahn lisn tu disiplin. Proverbs 4:13 seh: “Aksep disiplin; noh let it goh. Hoal aan tu it kaaz ih meen yu laif.”

^ par. 19 Isaiah 48:17, 18: “Dis da weh Jehoava, di Wan weh bai yu bak, di Hoali Wan a Izrel seh: ‘Ai, Jehoava, da yu Gaad, di Wan weh di teech yu fi yu oan gud, di Wan weh di gaid yu eena di way how yu shuda waak. If yu wuda onli pay atenshan tu mi komanment dehn! Den yu pees wuda bee laik wahn riva ahn yu raichosnis wuda bee laik di wayv a di see.ʼ”