Skip tu di aatikl

Skip tu lis a tapik

 STODI AATIKL 23

“Noh Mek Nobadi Fool Yu”!

“Noh Mek Nobadi Fool Yu”!

“Noh mek nobadi fool yu wid dehn aagyument weh noh mek no sens. Dehn mait song waiz, bot dehn da faals teechin weh han dong fahn hyooman been.”—KOL. 2:8.

SANG 96 Di Werd a Gaad Da Wahn Chrezha

WEH WI WAHN DISKOS? *

1. Akaadn tu Koloashanz 2:4, 8, how Saytan chrai fi kanchroal wi tinkin?

SAYTAN waahn mek wi ton gens Jehoava; hihn waahn wi stap lov ahn. Soh dat da wai hihn chrai chaynj er kanchroal di way wi tink an insted, mek wi tink di way hihn tink. Hihn chrai fi fool wi wid tingz weh kaal wi atenshan soh dat wi fala hihn.—Reed Koloashanz 2:4, 8.

2-3. (a) Wai wi fi pay atenshan tu di waanin weh Koloashanz 2:8 gi wi? (b) Weh wi wahn laan eena dis aatikl?

2 Yu tink wi deh eena seeryos daynja a geh fool op bai Saytan? Yes, af koars! Memba dat weh Paal mi rait da Koloashanz 2:8 da-mi fi Jehoava peepl. Hihn mi rait it espeshali fi anointid Kristyanz, noh fi peepl weh noh noa Gaad. (Kol. 1:2, 5) Bak den di Kristyanz mi deh eena big daynja, ahn tudeh wee eena eevn grayta daynja. (1 Kor. 10:12) Bot wai wi seh dat? Wel, bikaaz Saytan geh pich dong pahn di ert, ahn hihn di chrai haad fi chrik Gaad laayal servants. (Rev. 12:9, 12, 17) Pahn tap a dat, wi di liv eena wahn taim weh “wikid peepl ahn hipokrits wahn goh fahn bad tu wos.”—2 Tim. 3:1, 13.

3 Eena dis aatikl, wi wahn diskos how Saytan yooz “faals teechin” fi chrai afek wi tinkin. Wi wahn laan bowt chree a ih “eevl plan.” (Ifee. 6:11.) Den, eena di neks aatikl, wi wahn laan how fi hihn chriks ku afek wi tinkin, ahn how wi  ku fait it. Bot fos, mek wi kansida weh wi ku laan fahn di way Saytan fool di Izrelaits afta dehn reech di Pramis Lan.

SAYTAN MI CHRIK DI IZRELAITS FI WERSHIP ADA GAADZ

4-6. Akaadn tu Deuteronomy 11:10-15, weh nyoo way a faamin di Izrelait dehn mi haftu laan wen dehn mi setl eena di Pramis Lan?

4 Saytan mi yooz wahn chriki way fi temp di Izrelaits fi wership ada gaadz. Weh hihn mi du? Hihn mi noa dat dehn need food, soh hihn mi chrai fi yooz dis az bayt fi chrap dehn ahn mek dehn du weh hihn waahn. Wen di Izrelaits mi setl eena di Pramis Lan, dehn mi haftu laan nyoo wayz fi groa dehn food. Wen di Izrelaits mi deh da Eejip, dehn mi yooz waata fahn di Nail Riva fi dehn plaants. Bot eena di Pramis Lan, dehn neva ga wahn big riva fi geh waata fram; dehn mi geh dehn waata fahn di rayn ahn fahn di joo. (Reed Deuteronomy 11:10-15; * Isa. 18:4, 5) Soh dat da wai dehn mi need fi laan nyoo wayz fi groa dehn food. Dat neva mi wahn bee eezi kaaz moas a di Izrelaits weh mi ga ekspeeryens eena faamin mi ded eena di wildanes.

How Saytan mi aybl fi chaynj di tinkin a di Izrelait faama dehn? (Paragraaf 4-6) *

5 Jehoava mi eksplayn tu ih peepl dat dehn serkomstans mi chaynj. At fers, di waanin weh hihn mi gi dehn maita mi  song laik ih noh ga notn fi du wid agrikolcha er faamin. Hihn mi seh: “Bee kyaaful noh fi mek nobadi chrik yu haat ahn mek yu goh aschray ahn wership ada gaadz ahn bow dong tu dehn.” (Deut. 11:16, 17) Wai Jehoava mi waan dehn gens aidol wership wen hihn mi-di taak bowt nyoo wayz fi du faamin?

6 Jehoava mi noa dat di Izrelaits mi wahn feel temtid fi goh tu di peepl weh wership aidol ahn laan sohn loakal wayz how fi groa food fahn dehn. Da chroo, di paygan peepl dehn mi ga lata skilz wen ih kohn tu faamin, weh di Izrelait dehn kuda mi laan fram, bot wahn daynja mi deh. Dehn kuda mi geh chrik. Di Kaynanait faamaz mi wership Bayal ahn dehn rilijos bileef mi afek dehn tinkin. Dehn mi bileev dat Bayal da di wan weh oan di skai ahn gi rayn. Jehoava neva waahn ih peepl fi geh fool op bai dehndeh faals teechinz. Bot di Izrelaits mi chooz fi wership Bayal oava an oava agen. (Num. 25:3, 5; Judg. 2:13; 1 Ki. 18:18) Noatis how Saytan mi mek di Izrelaits deh anda fi hihn kanchroal.

CHREE WAYZ SAYTAN MI CHRIK DI IZRELAITS

7. How Saytan mi tes di fayt a di Izrelaits afta dehn setl eena di Pramis Lan?

7 Di fos way Saytan mi chrik di Izrelaits mi ga fi du wid dehn nachral dizaiya fi waahn ih rayn soh dehn ku ga inof waata fi dehn plaants. Evri yaa, fahn Aypril tu Septemba, dehn mi ga lee bit a rayn da di Pramis Lan. Fi mek di Izrelaits servaiv ahn mek dehn ga nof food fi di yaa, dehn mi dipen wahn lat pahn di rayn weh staat eena Aktoaba. Saytan mi fool op di Izrelaits fi mek dehn bileev dat dehn mi haftu kapi di kostomz a di paygan peepl rong dehn. Dehndeh paygan peepl mi bileev dat dehn gaadz wuda mek ih rayn onli if dehn mi du sertn rilijos praktis. Di Izrelait dehn weh mi lak fayt eena Jehoava mi bileev dat dis da-mi di onli way di jrowt neva mi wahn laas lang, soh dehn mi du aal kaina rilijos praktis fi aana di faals gaad Bayal.

8. Wat da wahn sekant way Saytan mi fool op di Izrelaits? Pleez eksplayn yu ansa.

8 Saytan mi yooz wahn sekant way fi chrik di Izrelaits. Hihn mi foakos pahn dehn imoaral dizaiyaz. Di paygan nayshanz mi du sohn disgostin imoaral tingz fi wership dehn gaadz. Dis imoaral way a wership mi inklood uman an man prastityooshan. Di paygan peepl dehn mi talarayt aal kaina sekshwal imoraliti laik man weh liv wid man, ahn dehn mi kansida dis fi bee naamal! (Deut. 23:17, 18; 1 Ki. 14:24) Dehnya paygan peepl mi bileev dat dehnya rilijos praktis wuda mek dehn gaadz mek di lan projoos nof food. Lata di Izrelaits mi laik di sekshwali imoaral kostomz a di paygan peepl, ahn sayka dis, dehn mi chooz fi serv faals gaadz. Bot akchwali, da Saytan mi-di kanchroal dehn.

9. Akaadn tu Hosea 2:16, 17, how Saytan mi mek di Izrelait dehn faget hoo da Jehoava?

9 Saytan mi yooz wahn terd way fi fool di Izrelait dehn. Hihn mek di Izrelaits faget hoo da Jehoava. Eena di dayz a di prafit Jerimaiya, Jehoava mi seh dat di faals prafit dehn mi mek fi Hihn peepl faget fi Hihn naym “bikaaz a Bayal.” (Jer. 23:27) Soh Gaad peepl mi stap yooz Jehoava naym ahn staat tu yooz di naym Bayal, weh meenz “Oana” er “Maasta.” Dis mi mek it haad fi di Izrelait dehn noa di difrens bitween Jehoava ahn Bayal. An ih mi mek it eeziya fi miks Bayal wership wid  di wership a Jehoava.—Reed Hosea 2:16, 17 *

DI WAY SAYTAN CHRIK PEEPL TUDEH

10. How Saytan chrik peepl tudeh?

10 Tudeh, Saytan yooz di sayhn chriks az bak den. Bikaaz ih mek sekshwal imoraliti luk naamal, hihn kanchroal peepl ahn mek dehn faget di way Jehoava si tingz. Fos, mek wi diskos how Saytan mek peepl faget di way Jehoava si tingz.

11. How Saytan stap peepl fahn reeli get fi noa Jehoava?

11 Saytan stap peepl fahn reeli get fi noa Jehoava. Afta di det a Jeezas apasl dehn, sohn faals Kristyanz, er apastayts, mi staat tu teech loan lai. (Aks 20:29, 30; 2 Tes. 2:3) Dehnya faals teechaz mi stap peepl fahn reeli get fi noa di chroo Gaad. Fi egzampl, dehn stap yooz Gaad naym eena dehn kapi a di Baibl, ahn dehn yooz taitl laik “Laad” insted. Wen dehn mi tek owt Gaad naym fahn di Baibl ahn yooz “Laad” insted, ih neva eezi fi wahn persn weh reed di Baibl si di difrens bitween Jehoava ahn di ada “laadz” weh di Baibl taak bowt. (1 Kor. 8:5) Dehn mi kaal Jehoava ahn Jeezas “Laad.” Dis mi mek it haada fi mek peepl ku si dat Jehoava ahn Jeezas da noh di saym. (Jan 17:3) Dis da-mi reel kanfyoozhan. Ahn soh di faals teechin a di Chriniti, weh noh bays pahn di Baibl, mi-di spred. Bikaaz a aala dis, lata peepl bileev dat ih impasabl fi noa Gaad. Dat da wahn big lai!—Aks 17:27.

How Saytan yooz faals rilijan fi ster op imoaral dizaiyaz? (Paragraaf 12) *

12. Akaadn tu Roamanz 1:28-31, weh faals rilijan teech, ahn wat da di rizolts?

12 Saytan foakos pahn peepl imoaral dizaiyaz. Eena di dayz a aynshent Izrel, Saytan mi yooz faals rilijan fi promoat imoraliti. Notn chaynj tudeh, kaaz hihn stil di du di sayhn ting. Faals rilijan stil talarayt imoaral kandok ahn chrai fi mek ih luk laik da sohnting naamal. Sayka dat, lata peepl hoo yoostu serv Gaad stap obay ih klyaa ahn kleen moaral standadz. Di apasl Paal eksplayn eena ih leta tu di Roamanz wat da di rizolt bikaaz faals rilijan promoat sekshwal imoraliti. (Reed Roamanz 1:28-31.) Som a di “korop” tingz da aal kaina sekshwal imoraliti, inkloodin  man di sleep wid man er uman di sleep wid uman. (Roam. 1:24-27, 32; Rev. 2:20) Az Gaad peepl, ih veri impoatant fi obay di teechinz fahn di Baibl!

13. Wat da wahn neks chrik weh Saytan yooz?

13 Saytan foakos pahn peepl nachral dizaiyaz. Ih nachral fi mek wi waahn laan sertn skilz soh dat wi ku provaid weh wee ahn wi famili need fi liv. (1 Tim. 5:8) Yoozhwali, wi geh dehndeh skilz wen wi goh da skool ahn stodi haad. Bot wi need fi bee kyaaful. Eena lata konchriz, styoodents laan lata praktikal skilz da skool bot dehn aalso laan di soa-kaal wizdom a di werl. Skoolz inkorij styoodents fi dowt dat Gaad egzis ahn fi disrispek di Baibl. Dehn teech dat hyoomanz egzis sayka evolooshan. Dehn klaym dat smaat peepl tink da way. (Roam 1:21-23) Dehndeh teechinz noh ga notn fi du wid “di wizdom a Gaad.”—1 Kor. 1:19-21, NW; 3:18-20.

14. Weh hyooman wizdom teech?

14 Hyooman wizdom goh gens Jehoava raichos standadz. Ih ignoar di froot a Gaad hoali spirit, an insted, ih teech peepl fi fala dehn “sinful hyooman naycha.” (Gal. 5:19-23) Ih mek peepl prowd ahn soh dehn “jos lov dehnself.” (2 Tim. 3:2-4) Dis atichood da di opozit a di hombl atichood weh Gaad waahn ih peepl fi ga. (2 Sam. 22:28) Som Kristyanz weh gaahn da yooniversiti staat tu tink laik di werl insteda tink laik Gaad. Dehn aksep di werl opinyan insteda Gaad tinkin. Weh ku hapm if wi faget dat dis da wahn big daynja?

How di wizdom a di werl ku afek wi tinkin? (Paragraaf 14-16) *

15-16. Weh yu laan fahn di sista ekspeeryens?

15 Wahn sista weh deh eena ful-taim servis  fi oava 15 yaaz seh: “Az wahn baptaiz Witnis, Ah mi hyaa bowt how daynjaros ih daynjaros fi goh da yooniversiti, bot Ah neva pay no main tu dehndeh waanin. Ai mi tink dat di kongsl da neva fi mee.” Weh prablemz shee mi haftu fays? Shee seh: “Ai mi spen soh moch taim di pripyaa fi mi klaas dehn dat Ah mi tu bizi ahn taiyad fi spen taim fi pray tu Jehoava laik bifoa, fi taak bowt di Baibl wid adaz, ahn fi pripyaa fi di meetin dehn. Tank gudnis, Ah mi geh fi riyalaiz dat Ah mi soh bizi ahn foakos pahn haiya ejukayshan dat ih mi-di damij mi rilayshanship wid Jehoava big taim. Soh Ah disaid fi kwit. An Ah mi kwit fi chroo.”

16 How haiya ejukayshan mi afek di sista tinkin? Shee seh: “Ah eevn shaym fi seh it, bot haiya ejukayshan mi mek Ah foakos pahn di mistayk a adaz, espeshali di mistayk dehn a mi bradaz ahn sistaz. Ah mi-di ekspek tu moch fahn dehn; moa dan weh dehn kuda mi du. An akchwali, Ah mi-di separayt miself fahn dehn. Ih mi tek mi wahn lang taim fi stap tink da way deh. Dis weh Ai mi gaahn chroo shoa mi how daynjaros ih daynjaros fi ignoar di waanin weh wi hevnli Faada gi wi chroo ih aaganaizayshan. Ah kuda mi avoid aala dis. Ah shuda mi lisn tu ahn!”

17. (a) Weh wi shuda waahn du? (b) Weh wi wahn kansida eena di neks aatikl?

17 Wi shuda mek op wi main fi neva mek “dehn aagyument” fool wi “dehn mait song waiz, bot dehn da faals teechin.” Dehn kohn fahn Saytan werl. (1 Kor. 3:18; 2 Kor. 2:11) Neva mek Saytan stap yu fahn reeli get fi noa hoo da Jehoava. Fala Jehoava hai moaral standadz. Ahn noh mek Saytan fool yu soh dat yu noh fala Jehoava waanin dehn. Bot now, weh yu shuda du if yu feel laik dis werl di afek yu tinkin? Di neks aatikl wahn teech wi how Gaad Werd ku help wi fi chaynj weh deh deep deep dong eena wi haat ahn main.—2 Kor. 10:4, 5.

SANG 49 Mek Jehoava Haat Rijais

^ par. 5 Saytan noa how fi fool op peepl. Hihn chrik lata peepl fi tink dat dehn free, bot akchwali dehn noh free kaaz da hihn di kanchroal dehn. Da laik dehn da fi hihn priznaz. Eena dis aatikl, wi wahn stodi sohn wayz weh Saytan yooz fi chrik peepl.

^ par. 4 Deuteronomy 11:10-15: “Di lan weh yu wahn oan da noh laik di lan da Eejip, fahn owta weh yoo kohn fram, wehpaat yu yoostu plaant ahn waata it wid yu fut, laik wahn gyaadn a vejitablz. Bot di lan weh yu bowt fi kraas intu ahn tek oava da wahn lan ful a mongtin ahn vali. Ih soak op di waata weh kohn dong fahn di hevnz; da wahn lan weh Jehoava yu Gaad di tek kayr a. Di aiy dehn a Jehoava yu Gaad aalwayz deh pan it. Fahn di biginin a di yaa tu di laas day a di yaa. ‘An if yoo obay aala di komanment dehn weh Ah di gi yu tudeh ahn lov Jehoava yu Gaad ahn serv ahn wid aala yu haat ahn yu soal, Ah wahn aalso mek ih rayn pahn yu lan da di rait taim. Ah wahn mek ih rayn joorin di koal seezn ahn joorin di jrai seezn, ahn yu wahn gyada yu grayn ahn yu nyoo wain ahn yu ail. An Ah wahn mek yu lan projoos fi yu animal dehn, ahn yu wahn eet ahn bee satisfai.ʼ”

^ par. 9 Hosea 2:16, 17: “Jehoava seh: ‘Ahn pahn da day, yu noh wahn kaal mi Mai hozban, ahn yu noh wahn kaal mi Mai maasta, [er, “Mai Bayal,” ftn.] nohmoh. Ai wahn tek weh di naym a di Bayal imij dehn fahn fi shee mowt, ahn dehn noh wahn memba dehn bai dehn naym nohmoh.ʼ”

^ par. 50 DI PICHA DEHN: Di Izrelaits di mingl wid Kaynanait peepl, dehn geh temp fi tek paat eena Bayal wership an imoraliti.

^ par. 53 DI PICHA DEHN: Wahn advataizment a wahn cherch weh aksep man weh liv wid man an uman weh liv wid uman az dehn membaz.

^ par. 55 DI PICHA DEHN: Wahn yong sista staat yooniversiti. Shee an ih klaasmayt dehn bileev dehn teecha aidyaa dat saiyens ahn teknalaji ku solv aala di prablemz eena di werl. Layta, da di Kingdom Haal, shee noh inchrestid eena weh di hapm an ih staat tu kritisaiz di bradaz eena ih haat ahn main.