Skip tu di aatikl

Skip tu lis a tapik

Mek Aala Wi Bee Yoonaitid Jos Laik How Jehoava ahn Jeezas Yoonaitid

Mek Aala Wi Bee Yoonaitid Jos Laik How Jehoava ahn Jeezas Yoonaitid

‘Ah di pray Faada, dat aala dehn ku bee wan sayhn laik how mee ahn yoo da wan.ʼ—JAN 17:20, 21.

SANG: 24, 99

1, 2. (a) Weh Jeezas mi aks fa eena ih laas pryaa wid ih apasl dehn? (b) Wai Jeezas mi-di wori bowt yooniti?

JOORIN di laas meel wid ih apasl dehn, Jeezas mi-di wori bowt yooniti. Wen ih mi-di pray wid dehn, ih mi menshan dat ih waahn aala dehn bee wan jos laik how hihn an ih Faada da wan. (Reed Jan 17:20, 21.) Dehn yooniti wuda gi wahn powaful witnis. Ih wuda proov dat Jehoava mi sen Jeezas pahn di ert fi du fi Hihn wil. Lov wuda help peepl fi noa Jeezas chroo disaipl. Bikaaz a dis lov, dehn wuda bee yoonaitid.—Jan 13:34, 35.

2 Jeezas mi-di taak bowt yooniti bikaaz ih mi noatis dat di apasl dehn mi need fi bee moa yoonaitid. Fi egzampl, di apasl dehn mi ga wahn heetid aagyument bowt “wich wan a dehn da-mi di moas impoatant wan monks dehn.” (Look 22:24-27; Maak 9:33, 34) Wahn nada taim, Jaymz ahn Jan mi ga di nervz fi aks Jeezas if wan a dehn ku sidong pan ih rait han said ahn di ada wan pan ih lef wen ih get eena ih Kingdom. Dehn mi waahn di moas impoatant spat.—Maak 10:35-40.

3. Weh kuda mi kaaz di apasl dehn fi noh ga yooniti monks dehnself? Wat da sohn kweschanz wi wahn ansa eena dis aatikl?

 3 Di apasl dehn mi waahn bee impoatant, bot dat da neva di onli ting weh kuda mi dischrai dehn yooniti. Di peepl bak den mi hayt wan anada ahn mi prejudis gens wan anada. Jeezas disaipl dehn mi need fi fait dehndeh feelinz. Eena dis aatikl, wi wahn ansa dehnya kweschanz: How Jeezas mi deel wid prejudis? How ih mi help ih falowaz fi laan fi chreet evribadi di saym way ahn ga yooniti monks dehnself? Ahn how fi hihn teechinz wahn help wi fi stay yoonaitid?

DI PREJUDIS WEH JEEZAS AN IH FALOWAZ MI FAYS

4. Wat da sohn egzampl a prejudis weh Jeezas mi fays?

4 Jeezas ihself mi haftu deel wid prejudis. Wen Filip mi tel Natanyel dat ih mi fain di Mesaiya, Natanyel seh: “Cho! Eniting gud ku kohn fahn Nazaret?” (Jan 1:46) Ih pasabl dat Natanyel mi noa bowt di prafesi da Micah 5:2 ahn tink dat Nazaret da-mi wahn simpl lee tong fi mek di Mesaiya kohn fahn deh. Ahn wahn lata di big-taim peepl fahn Judeeya mi hayt Jeezas kaaz hihn da-mi fahn Gyalilee. (Jan 7:52) Wahn lata di peepl fahn Judeeya mi tink dat dehn mi beta dan di peepl fahn Gyalilee. Ada Jooz mi chrai insolt Jeezas ahn kaal ahn wahn Samaritan. (Jan 8:48) Di kolcha ahn rilijan a di Samaritan peepl mi difrent fahn di Jooz. Soh bikaaz a dat, di peepl fahn Judeeya ahn Gyalilee neva ga moch rispek fi dehn an avoid dehn.—Jan 4:9.

5. Weh kaina prejudis Jeezas falowaz mi fays?

5 Di Jooish rilijos leedaz neva help di sichuwayshan needa. Tu dehn, Jeezas apasl dehn mi “don kandem aredi.” (Jan 7:47-49) Dehn mi tink dat enibadi weh neva gaahn da eni a fi dehn rilijos skool er hoo noh kip fi dehn chradishanz da-mi kaman peepl. (Aks 4:13) Peepl mi prejudis gens Jeezas an ih disaipl dehn kaaz rong da taim peepl mi prowd a dehn rilijan, dehn pozishan eena sosaiyati, ahn dehn rays. Soh fi bee yoonaitid, di disaipl dehn wuda mi need fi chaynj di way dehn tink.

6. Wat da sohn egzampl weh shoa how prejudis ku afek wi?

6 Tudeh, moas a wi di liv rong peepl weh prejudis. Ih ku bee dat wi di fays prejudis er wee wiself di shoa prejudis. Wahn painyaa sista fahn Australia seh: “Ah mi geh fi hayt wait peepl moa ahn moa kaaz Ah mi-di foakos pahn di injostis dehn mi kaaz tu di Aboriginal peepl eena di paas an eevn tudeh day. Ah mi ga dis kaina haychrid bikaaz a weh Ah mi gaahn chroo tu.” Wahn French Canadian brada menshan dat hihn mi prejudis gens peepl weh taak wahn difrent langwij. Ih seh: “Ai mi tink dat peepl weh taak French mi beta dan evribadi els. Ah mi get fi hayt peepl weh taak Inglish.”

7. How Jeezas mi deel wid prejudis?

7 Sayhn laik eena Jeezas day, prejudis ku deh deep dong eena wahn persn haat. How Jeezas mi deel wid prejudis? Fos, ih mi rijek it. Ih mi chreet evribadi di saym way, ih neva mata tu hihn if dehn mi rich, poa, Farisee, Samaritan, taks kalekta, er sina. Sekant, chroo ih teechinz, Jeezas teech ih disaipl dehn dat dehn kyaahn bee sospishos a peepl er bee prejudis tuwaadz dehn.

FAIT PREJUDIS—SHOA LOV AHN BEE HOMBL

8. Wat baysik prinsipl da di fongdayshan a wi yooniti? Pleez eksplayn yu ansa.

8 Jeezas mi teech ih falowaz wahn baysik prinsipl weh da di fongdayshan a wi  yooniti. Ih mi seh “aala unu da bradaz.” (Reed Machyu 23:8, 9 NW.) * Af koars, bikaaz aala wi kohn fahn Adam, aala wi da “bradaz.” (Aks 17:26) Bot Jeezas mi eksplayn dat ih disaipl dehn da-mi bradaz ahn sistaz kaaz dehn aksep Jehoava az fi dehn hevnli Faada. (Mach. 12:50) Bisaidz dat, dehn da paat a wahn big spirichwal famili weh fi dehn lov ahn fayt yoonait dehn. Dats wai eena di leta dehn weh di apasl dehn mi rait tu dehn felo bileeva, dehn kaal dehn “bradaz ahn sistaz.”—Roam. 1:13; 1 Peet. 2:17; 1 Jan 3:13. *

9, 10. (a) Wai di Jooz neva ga no reezn fi tink dat dehn mi beta dan ada rays? (b) Weh Jeezas iloschrayshan bowt di gud Samaritan teech wi? (Koment pahn di picha da di biginin a dis aatikl.)

9 Afta Jeezas seh dat wi fi vyoo wan anada az bradaz ahn sistaz, ih seh wi need fi bee hombl. (Reed Machyu 23:11, 12.) Laik weh wi mi laan, praid mi kaaz divizhan monks Jeezas apasl dehn. Maybi dehn mi prowd a di rays dehn mi kohn fram. Yu tink di Jooz mi ga reezn fi bee prowd bikaaz dehn mi kohn fahn Aybraham famili lain? Wahn lata dehn mi feel da way. Bot Jan di Baptis tel dehn: “Gaad ku tek dehnya stoan dong ya ahn mek Aybraham pikni owta dehn.”—Look 3:8.

10 Jeezas neva laik wen peepl mi tink dat dehn rays beta dan adaz. Ih kandem it. Wi si dis wen wahn teecha a di Laa mi aks ahn: “Hoo egzakli da mi nayba?” Jeezas ansa ahn wid wahn iloschrayshan bowt wahn Samaritan hoo mi shoa kompashan fi wahn Joo weh sohn teef mi beet op ahn lef pahn di roadsaid. Ada Jooz paas an ignoar di man, bot di Samaritan mi feel sari far ahn. Den, Jeezas tel di teecha weh mi aks di kweschan fi bee jos laik di Samaritan. (Look 10:25-37) Jeezas mi shoa dat wahn Samaritan kuda mi teech di Jooz weh ih meen fi ga chroo lov fi yu nayba.

11. Weh di disaipl dehn mi need fi du bifoa dehn kehr di gud nyooz tu farinaz? How Jeezas mi help dehn fi andastan dat?

11 Fi preech di gud nyooz, Jeezas disaipl dehn mi need fi fait di praid ahn prejudis dehn mi gat. Bifoa Jeezas gaahn bak da hevn, ih tel dehn fi preech di gud nyooz tu “di hoal a Judeeya ahn Samayrya, ahn aal oava di werl.” (Aks 1:8) Jeezas mi pripyaa dehn fi dis asainment. Ih mi teech dehn fi si di gud eena peepl fahn aal difrent rays. Ih mi prayz wahn farin aami aafisa fi ih schrang fayt. (Mach. 8:5-10) Jeezas mi eevn menshan som a di farinaz weh Jehoava mi aksep, laik di Foneeshan wido fahn Zarafat, ahn Nayman, di lepa fahn Siriya. (Look 4:25-27) Ahn Jeezas neva jos preech tu wahn Samaritan uman bot ih mi spen too dayz da wahn Samaritan tong bikaaz di peepl mi inchrestid eena ih mesij.—Jan 4:21-24, 40.

HOW DI APASL DEHN MI DEEL WID PREJUDIS

12, 13. (a) Weh di disaipl dehn du wen dehn si Jeezas mi-di preech tu wahn Samaritan uman? (Koment pahn di picha da di biginin a dis aatikl.) (b) How wi noa dat Jaymz ahn Jan neva reeli get di point?

12 Ih neva mi eezi fi mek di apasl dehn geh rid a prejudis. Ih mi sopraiz dehn  wen dehn si dat Jeezas mi wilin fi teech wahn Samaritan uman. (Jan 4:9, 27) Di Jooish rilijos leeda dehn neva yoostu taak tu wahn uman eena di poblik, ahn wos, wahn Samaritan uman weh mi ga wahn bad repyutayshan. Di apasl dehn mi waahn Jeezas eet sohn food. Bot hihn tel dehn dat fi preech Gaad Werd, eevn tu wahn Samaritan uman, da-mi laik food tu ahn. Ih mi impoatant tu hihn fi du di wil a ih Faada.—Jan 4:31-34.

13 Jaymz ahn Jan neva geh di lesn ataal. Wen Jeezas an ih disaipl dehn mi-di chravl chroo Samayrya, di disaipl dehn mi chrai geh lajin eena wan a di Samaritan vilij. Bot di Samaritan dehn mi rijek dehn. Soh Jaymz ahn Jan mi geh beks ahn dehn mi waahn Jeezas kaal dong faiya fahn hevn fi bon op di hoal vilij. Bot Jeezas skoal dehn shaap-wan. (Look 9:51-56) Wi mait wanda if Jaymz ahn Jan wuda mi seh di saym ting if da-mi wahn vilij eena fi dehn hoamtong a Gyalilee. Ih pasabl dat prejudis kaaz dehn fi shoa moa haychrid. Di apasl Jan mosi mi feel shaym bowt weh ih mi seh kaaz laytaraan ih mi injai di preechin werk monks di Samaritan dehn.—Aks 8:14, 25.

14. How di apasl dehn mi deel wid wahn langwij prablem?

14 Noh lang afta Pentikaas 33 C.E., wahn nada kays a prejudis kom op. Dehn mi ga wahn shaatij a food da Jeroosalem, soh di bradaz mi-di shayr owt food tu di wido dehn hoo mi need it. Bot dehn mi-di niglek di Jooish wido dehn weh taak Greek. (Aks 6:1) Maybi da mi sayka prejudis gens di langwij. Bot di apasl dehn fiks di prablem rait away. Dehn chooz sevn spirichwal bradaz fi giv owt di food. Aala dehndeh bradaz mi ga Greek naym. Dis praabli mi mek it eeziya fi di wido dehn aksep di help, sins dehn mi don geh hert aredi.

15. Weh Peeta mi du fi geh rid a eni feelinz a prejudis weh ih mi gat? (Koment pahn di picha da di biginin a dis aatikl.)

15 Eena 36 C.E., di disaipl dehn mi-di preech di gud nyooz tu ada nayshan. Di apasl Peeta onli yoostu spen taim wid di Jooz. Bot afta Gaad tel ahn dat Kristyanz noh fi bee prejudis, ih gaahn preech tu Kaaneelyos, hoo da-mi wahn Roaman soalja. (Reed Aks 10:28, 34, 35.) Afta dat, Peeta mi injai di taim ih spen wid di bileeva dehn fahn ada nayshan. Ih yoostu eet wid dehn. Bot laytaraan doh, Peeta stap eet wid Kristyanz hoo da neva Joo weh mi liv eena di siti a Antiyak. (Gal. 2:11-14) Wel, Paal mi gi Peeta sohn kongsl, an ih mi aksep it. Wen Peeta mi rait ih fos leta tu di Jooish Kristyanz an ada Kristyanz hoo da neva Jooz da Aysha Maina, ih mi taak bowt aala di bradaz ahn sistaz.—1 Peet. 1:1; 2:17.

16. Weh repyutayshan di erli Kristyanz mi gat?

16 Di apasl dehn mi laan fahn Jeezas egzampl fi lov evribadi. (Jan 12:32; 1 Tim. 4:10) Aldoa ih mi tek taim, dehn mi chaynj di way dehn mi-di tink. Di Kristyanz bak den mi ga di repyutayshan fi lov wan anada. Wahn raita weh mi naym Tertullian, hoo mi liv bowt too honjrid yaaz afta Jeezas, mi rait bowt weh ada peepl yoostu seh bowt Kristyanz. Ih buk seh: “Dehn lov wan anada. . . . Dehn redi fi eevn ded fi wan anada.” Bikaaz di Kristyanz bak den mi chaynj dehn oal wayz, dehn geh fi si dat evribadi mi eekwal eena Gaad sait.—Kol. 3:10, 11.

17. How wi ku geh rid a prejudis fahn wi haat? Yooz di egzampl dehn fahn di paragraaf.

17 Tudeh, wi mait need taim tu fi geh  rid a prejudis fahn owta wi haat. Wahn sista fahn France seh dis: “Jehoava teech mi weh ih meen fi lov peepl, fi shayr weh yu gat, ahn fi lov peepl fahn aal difrent bakgrong. Bot Ah stil di laan fi fait di feelin a prejudis tuwaadz adaz; an ih noh aalwayz eezi. Dats wai Ai kantinyu pray bowt it.” Wahn sista fahn Spain fays di saym ting. Shee seh: “Sohntaim Ah schrogl wid haychrid tuwaadz wahn sertn rays, ahn moas a di taim Ah di win dis fait. Bot Ah noa dat Ah kyaahn giv op. Tanks tu Jehoava, Ah hapi fi bee paat a wahn yoonaitid famili.” Eech wan a wi need fi tek wahn aanis luk pahn wiself. Wi mait si dat wi need fi fait feelinz a prejudis jos laik dehnya too sistaz.

DI MOA LOV WI SHOA DI LES PREJUDIS WI GAT

18, 19. (a) Wai wi fi welkom evribadi? (b) Wat da sohn wayz wi ku du dis?

18 Ih gud fi memba dat aala wi at wan taim da-mi wahn “schraynja,” er farina. Wi mi deh faar fahn Gaad. (Ifee. 2:12) Bot bikaaz Jehoava lov wi, ih jraa wi kloas tu hihn. (Hos. 11:4; Jan 6:44) Ahn Krais welkom wi soh dat wi ku bee paat a Gaad famili. (Reed Roamanz 15:7.) Soh den, how wee kuda eva rijek enibadi afta wi geh da kaina welkom?

Servants a Jehoava luk fi wizdom fahn hihn ahn mek lov yoonait dehn (Paragraaf 19)

19 Divizhan, prejudis, ahn haychrid wahn geh wosa bikaaz wi di liv eena di en a dis wikid sistem. (Gal. 5:19-21; 2 Tim. 3:13) Bot bikaaz wee da servants a Jehoava, wi luk fi di wizdom weh kohn fahn hihn. Dis wizdom help wi fi chreet evribadi di saym way an ih help wi fi liv peesabl wid adaz. (Jay. 3:17, 18) Wi hapi fi mek frenship wid peepl fahn ada konchri. Wi aksep dehn kolcha ahn maybi eevn laan wahn nyoo langwij. Wen wi du dis, pees wahn floa jos laik wahn riva, ahn jostis wahn bee laik di wayv dehn a di see.—Isa. 48:17, 18.

20. Weh hapm wen wi alow lov fi shayp wi main ahn haat?

20 Di sista fahn Australia, weh di aatikl taak bowt erliya, mi menshan how wahn Baibl stodi mi help ahn. Shee seh: “Chroo di Baibl, Ah geh wahn lata nalij. Ah geh fi si how mi prejudis ahn haychrid, weh mi deh deep dong eena mi haat, disapyaa. Da laik Ah mi geh wahn nyoo haat ahn main.” Ahn di French Canadian brada seh dat now ih riyalaiz dat “wen wi noh ga aal di faks wi wahn hayt peepl fahn wahn difrent rays. Bot wahn persn gud kwalitiz noh pen pahn di plays weh ih baan.” Hihn mi en op di marid tu wahn sista weh taak Inglish! Dehnya kaina chaynj eena wahn persn atichood proov dat wahn persn ku fait prejudis if ih shoa Kristyan lov. Dis da weh yoonait wi tugeda!—Kol. 3:14.

^ par. 8 Machyu 23:8, 9: “Bot unu, noh mek nobadi kaal unu Rabai, kaaz unu onli ga wan Teecha, an aala unu da bradaz. Pahn tap a dat, noh kaal nobadi yasoh pahn ert faada, kaaz unu ga wan Faada, di Wan weh liv da hevn.”

^ par. 8 Di werd “bradaz” ku inklood sistaz eena a di kangrigayshan tu. Paal mi sen ih leta tu di “bradaz” da Roam. Af koars, wi noa ih mi sen it tu di sistaz tu kaaz ih mi menshan wahn fyoo a dehn bai naym. (Roam. 16:1, 3, 6, 12) Fi yaaz now, Di Wachtowa di kaal Kristyan bileeva ‘bradaz ahn sistaz.ʼ