Skip tu di aatikl

Skip tu lis a tapik

“Shain Yu Lait” Soh Dat Yu Ku Prayz Jehoava

“Shain Yu Lait” Soh Dat Yu Ku Prayz Jehoava

“Shain yu lait fronta evribadi, soh dehn ku . . . prayz yu Faada eena hevn.”—MACH. 5:16.

SANG: 77, 59

1. Weh mek wi soh hapi?

WI SOH hapi fi si aala di blesinz weh Jehoava peepl di injai tudeh! Laas yaa wi kandok oava 10,000,000 Baibl stodiz. Dis reeli shoa dat Gaad servants di mek dehn lait shain! Ahn tink bowt di milyanz a inchrestid peepl weh mi gaahn da di Memoaryal. Dehn mi laan dat Gaad shoa ih lov fi wi wen ih sen ih onli Son fi ded fi wi.—1 Jan 4:9.

2, 3. (a) Weh noh stap wi fahn shain “laik wahn lait”? (b) Bays pahn Jeezas werdz da Machyu 5:14-16, weh wi wahn diskos now?

2 Jehoava peepl aal oava di werl taak lata difrent langwij fahn wan anada. Bot dat noh stap wi fahn bee yoonaitid eena wi prayz tu wi Faada, Jehoava. (Rev. 7:9) Noh mata wat da di langwij wi taak hoam er wehpaat wi liv, wi ku shain “laik wahn lait” tu di werl.—Fil. 2:15.

3 Wi bring prayz tu Jehoava wen wi werk haad, stay yoonaitid, ahn kip pahn di lukowt. Eena dis aatikl, wi wahn taak  bowt how wi ku du dat.—Reed Machyu 5:14-16.

INVAIT ADAZ FI WERSHIP JEHOAVA

4, 5. (a) Bisaidz wi preechin werk, how wi ku mek wi lait shain? (b) Weh mait bee som a di benifits wen wi frenli wid peepl? (Koment pahn di picha da di biginin a dis aatikl.)

4 Di aatikl weh naym “Light in the Darkness,” fahn di The Watch Tower a Joon 1, 1925 seh: “Nobadi ku bee faytful tu Jehoava eena dehnya laas dayz . . . anles dehn mek dehn lait shain.” Den di aatikl eksplayn seh: “Wahn persn shain ih lait wen ih tel di gud nyooz tu adaz, ahn wen ih chaynj ih laif fi liv akaadn tu di way a di lait.” Soh wan way wi mek wi lait shain da wen wi preech di gud nyooz ahn mek disaipl. (Mach. 28:19, 20) Bisaidz dat, wi ku prayz Jehoava chroo wi kandok. Peepl di wach how wi bihayv. Wi frenli smail ahn di way wi greet dehn seh wahn lat bowt wee ahn di kaina Gaad wi wership.

5 Jeezas tel ih disaipl dehn: “Wen unu goh da sohnbadi hows, pay yu rispek.” (Mach. 10:12) Eena di ayrya weh Jeezas an ih apasl dehn yoostu preech, ih mi kaman fi mek peepl invait sombadi weh dehn noh noa intu dehn hows. Tudeh, dis da noh di kostom eena wahn lata plays. Bot if yu pazitiv ahn frenli wen yu di eksplayn wai yu dehdeh, yu ku help eez di persn main ahn mek ih feel komfatabl. Wahn frenli smail aalwayz da di bes way fi greet sombadi. Di bradaz ahn sistaz weh du poblik witnisin wid di kyaat fain dat moas a di taim, peepl rispan tu wahn frenli smail ahn greetin. Ih mait mek dehn tek wan a wi poblikayshan dehn. Yu kain ahn frenli atichood ku help staat wahn kanvasayshan.

6. Weh wahn oalda kopl mi du soh dat dehn kuda mi du moa eena dehn minischri?

6 Wahn oalda kopl fahn England ga sohn helt prablemz weh mek dehn kyaahn du wahn lat eena di hows-tu-hows minischri nohmoh. Dehn disaid dat dehn wahn stil shain dehn lait rait owtsaida fi dehn hows. Dehn liv kloas tu wahn skool, soh lata payrents paas deh fi goh pik op dehn pikni. Di kopl set op wahn taybl fronta dehn hows wid lichricha weh payrents wuda laik fi dehn pikni. Wahn lata dehn stap fi geh di buk dehn, Questions Young People Ask—Answers That Work, ahn sohn broashoar tu. Wahn sista weh di painyaa fahn fi dehn kangrigayshan jain dehn sohntaim. Bikaaz di painyaa mi frenli ahn di kopl di werk haad, wan a di payrent dehn aksep wahn Baibl stodi.

7. Weh yu ku yooz fi preech tu sombadi weh taak wahn difrent langwij fahn yoo?

7 Laytli, wahn lata peepl di lef fi dehn konchri fi goh liv sohnweh els. Weh yoo ku du fi help farinaz noa bowt Jehoava an ih perpos fi wee? Wel, yu ku laan fi greet dehn eena fi dehn langwij. Di JW Language ap ku help yu du dat. Maybi yu ku eevn laan fi seh ada tingz eena dehn langwij soh dat yu ku help dehn. If yu kud, shoa dehn wi websait jw.org, ahn shoa dehn aala di difrent veedyo ahn poblikayshan weh deh eena fi dehn langwij.—Deut. 10:19.

8, 9. (a) How wi meetin joorin di week pripyaa wi fi di minischri? (b) How payrents ku help dehn chiljren fi koment da di meetin?

8 Wan a di provizhan fahn Jehoava da wi Laif ahn Minischri Meetin. Hihn du dis bikaaz ih lov wi an ih waahn wi bee wahn beta teecha eena di minischri. Wi ku yooz aala di inschrokshanz wi get fahn dis meetin. Ih help wi ga  moa kanfidens fi du wi ritern vizit ahn fi kandok wi Baibl stodi dehn.

9 Wahn lata peepl weh kohn da wi meetin fi di fos taim noatis dat wi chiljren tek paat. Soh payrents, help yu chiljren fi koment eena dehn oan werdz. Eena dis way, dehn wahn di shain fi dehn oan lait. Sohntaim, fi dehn lee koments, weh dehn mek fahn dehn haat, help inchrestid peepl weh di vizit wi fi noa dat dis da di chroot.—1 Kor. 14:25.

WERK HAAD FI GA YOONITI

10. How famili wership ku help wi fi bee moa yoonaitid?

10 Wahn nada way fi mek yu lait shain da fi du tingz weh wahn yoonait wi famili ahn wi kangrigayshan. Wahn way payrents ku du dis da fi plan wahn regyula Famili Wership proagram. Wahn lata famili wach JW Braadkyaastin joorin di mont. Afta yu don wach di proagram, tek di taim fi diskos how fi aplai di points fahn di Braadkyaastin. Payrents, memba dat weh wahn yong pikni need mait bee difrent fahn weh wahn teenayja need. Soh chooz di rait mateeryal fi eech persn eena di famili soh dat evribadi ku benifit fan it.—Ps. 148:12, 13.

Wi wahn benifit wen wi tek wahn inchres eena wi oalda bradaz ahn sistaz (Paragraaf 11)

11-13. How aala wi ku ad tu di yooniti eena wi kangrigayshan? Ahn how wi ku help adaz fi shain fi dehn lait?

11 Weh wi yong bradaz ahn sistaz ku du fi kip di kangrigayshan yoonaitid? How dehn ku inkorij adaz fi shain fi dehn lait tu? If yoo da wahn yong brada er sista, mek it yu goal fi tek wahn inchres eena di oalda bradaz. Eena wahn rispekful way, aks dehn bowt eni ekspeeryens dehn gat fahn dehn minischri. Wen yu du dis, yoo ahn di oalda brada er sista wahn feel inkorij fi shain di lait a chroot eevn moa. An aala wi ku chrai wi bes fi welkom peepl hoo kohn da di meetin dehn. If yu du dis, yu wahn di shoa dat yu di werk haad fi ga yooniti, ahn dat mait moov wahn persn weh di vizit fi waahn shain fi dehn lait tu. Maybi yu ku kehr dehn rong di Kingdom Haal fi meet di ada bradaz ahn sistaz. Eena dis way, wi di mek dehn feel welkom.

12 If yu di kandok meetin fi feel servis yu ku du wahn lat fi help wi oalda  bradaz ahn sistaz fi tek paat eena di minischri. Chek if dehn ga wahn teritori weh eeziya fi mek dehn werk. Sohntaim, yu mait haftu asain dehn fi werk lang wid wahn yong persn hoo ku help dehn. Yu ku shoa dat yu kay fi bradaz hoo ga helt prablemz ahn weh kyaahn du az moch az bifoa. Soh wen yu shoa dat yu kay an andastan, yu ku help yong ahn oal, bradaz wid ekspeeryens ahn les ekspeeryens, fi waahn du moa eena di minischri.—Lev. 19:32.

13 Di saamis seh: “Da wahn gud ahn plezant ting wen bradaz liv tugeda eena yooniti!” (Reed Psalm 133:1, 2.) * Bikaaz di Izrelait dehn yoostu aalwayz meet tugeda, dehn mi benifit fahn di taim dehn spen wid wan anada di wership Jehoava. Da-mi laik ail weh dehn mi yooz fi anoint wahn persn. Ih mi smel gud an ih mek di persn feel rifresh. Set wahn goal fi bee moa pazitiv ahn fi werk haada fi ga yooniti monks wi bradaz ahn sistaz. If yu di du dis aredi, dat gud. Bot yu tink yu kuda ‘oapm yu haatʼ eevn moa?—2 Kor. 6:11-13.

14. Weh yu ku du fi mek yu lait shain eena yu naybahud?

14 Weh yu ku du fi mek yu lait shain braita eena yu naybahud? If yu seh kain werdz ahn du kain tingz fi yu nayba dehn, ih mait mek dehn waahn noa bowt di chroot. Aks yuself: ‘Weh mi nayba dehn tink bowt mi? Ai kip mi yaad ahn hows kleen soh dat di naybahud ku luk gud? Ai luk fi wayz fi help mi nayba dehn?ʼ Wen yu di taak wid yu bradaz ahn sistaz, aks dehn how fi dehn kainis ahn gud kandok afek dehn relitiv, nayba, peepl dehn werk wid er goh da skool wid. Fi shoar yu wahn hyaa sohn pazitiv ekspeeryens.—Ifee. 5:9.

KIP PAHN DI LUKOWT

15. Wai ih impoatant fi mek wi kip pahn di lukowt?

15 Wi atichood ku afek how brait wi lait di shain. Oava an oava agen, Jeezas mi tel ih disaipl dehn: “Kip pahn di lukowt.” (Mach. 24:42; 25:13; 26:41) If wi bileev dat di grayt chribyulayshan noh wahn kohn rait now, wi noh wahn ak laik dis preechin werk impoatant. (Mach. 24:21) Insteda shain wi lait brait-wan eena wi naybahud, wi lait wahn staat tu geh dim an mait eevn owt aaf aal tugeda.

16, 17. Weh yu ku du fi kip pahn di lukowt?

16 Wi need fi kip pahn di lukowt bikaaz dehnya haad taimz di geh wos ahn wos. Wen Jehoava du sohnting bowt it, wi noa ih wahn bee pahn taim. (Mach. 24:42-44) Meenwail, shoa payshens ahn kip pahn di lukowt. Reed di Werd a Gaad evri day, ahn neva stap pray. (1 Peet. 4:7) Noatis di egzampl a wi faytful bradaz ahn sistaz hoo hapi fi kip pahn di lukowt ahn mek dehn lait shain. Wahn gud egzampl da di ekspeeryens eena di aatikl “Seventy Years of Holding On to the Skirt of a Jew,” fahn The Watchtower a Aypril 15, 2012, payj 18-21.

17 Stay bizi di serv Jehoava, spen taim wid yu bradaz ahn sistaz, ahn du kain tingz fi peepl. Dehnya tingz wahn mek yu feel hapi. Den, yu wahn wanda weh di taim gaahn. (Ifee. 5:16) Bowt wahn honjrid yaaz agoa, wi bradaz mi  bizi ahn mi-di geh wahn lata werk don. Bot wi di du eevn moa tudeh wid Jehoava help. Wi di mek wi lait shain eena wayz weh wi wudn imajin yaaz agoa.

Wen di eldaz kohn vizit wi, tek advantij a di apachooniti fi laan fahn di wizdom weh deh eena di Baibl (Paragraaf 18, 19)

18, 19. How di eldaz eena di kangrigayshan ku help wi kip pahn di lukowt ahn stay bizi? Yooz di egzampl eena di paragraaf.

18 Eevn doa wi imperfek ahn wi mek mistayk, Jehoava stil alow wi fi serv ahn. Dis reeli schrentn wi fayt. Soh den, apreeshiayt weh Jehoava provaid fi wi chroo di kangrigayshan—di eldaz. (Reed Ifeezhanz 4:8, 11, 12.) Di neks taim wahn elda vizit yu, tek advantij a di apachooniti fi laan fan ih wizdom ahn benifit fan ih advais.

19 Wahn marid kopl fahn England aks fi help fahn too eldaz. Di waif mi feel dat ih hozban neva di provaid fi shee spirichwali. Di hozban admit dat hihn da noh di bes teecha ahn dat ih neva mi-di du wahn regyula famili wership. Di eldaz yooz Jeezas egzampl fi help dehn. Jeezas mi tek kyaa a ih disaipl dehn ahn tink bowt weh dehn mi need. Di eldaz inkorij di hozban fi fala Jeezas egzampl. Dehn inkorij di waif fi bee payshent. Di eldaz mi gi di kopl sohn gud sojeshan pahn how dehn ku werk tugeda fi ga famili wership wid dehn too chiljren. (Ifee. 5:21-29) Layta, di eldaz komen di hozban bikaaz ih mi-di chrai. Dehn inkorij ahn fi noh giv op ahn fi pen pahn hoali spirit fi help ahn bee wahn gud spirichwal hed. Bikaaz di eldaz mi soh lovin ahn sopoat dis famili, dehn di shain fi dehn lait.

20. Weh yu ku ekspek wen yu shain yu lait?

20 Di saamis seh: “Evribadi hoo fyaa Jehoava, hoo waak eena fi Hihn wayz wahn bee hapi.” (Ps. 128:1) Soh taak tu adaz bowt Jehoava soh dat dehn ku serv ahn, kandok yuself eena wahn way fi ga moa yooniti, ahn stay pahn di lukowt, den yu wahn ga moa hapinis. Adaz wahn si aala di gud werk weh yu di du ahn dis wahn moov dehn fi waahn prayz wi Faada tu.—Mach. 5:16.

^ par. 13 Psalm 133:1, 2: “Da wahn gud ahn plezant ting wen bradaz liv tugeda eena yooniti! Da laik gud ail weh dehn poar pahn wahn persn hed weh ron dong di byaad, Ayron byaad, ahn weh ron dong pan ih kloaz.”