Skip tu di aatikl

Skip tu lis a tapik

Hoo Wi Shuda Waahn fi Noatis Ahn Prayz Wi?

Hoo Wi Shuda Waahn fi Noatis Ahn Prayz Wi?

“Gaad da wahn fyaa Gaad, ahn hihn noh wahn faget how haad unu mi werk fi hihn.”—HEEB. 6:10.

SANG: 39, 30

1. Weh nachral dizaiya aala wi gat?

HOW yu feel wen sombadi yu noa ahn rispek faget yu naym er, wos, dehn noh eevn rekonaiz yu? Dat wuda diskorij yu, noh chroo? Wai? Bikaaz aala wi waahn peepl aksep wi. Dis da wahn nachral dizaiya weh Jehoava mek wi wid. Wi noh jos waahn peepl rekonaiz wi, wi waahn dehn tek noatis a hoo wee ahn weh wi du.—Num. 11:16; ftn; Job 31:6.

2, 3. Weh ku hapm tu wi dizaiya fi mek peepl prayz wi? (Koment pahn di picha da di biginin a dis aatikl.)

2 Laik wahn lata ada dizaiya weh wi baan wid, wi dizaiya fi geh noatis ahn prayz ku get owta han bikaaz wi noh perfek. Ih ku mek wi luk fi prayz fahn di rang plays ahn di rang peepl. Evriting eena Saytan werl feed wahn persn dizaiya fi prayz. Dis mek peepl faget di wan hoo reeli dizerv prayz ahn wership, wi hevnli Faada, Jehoava Gaad.—Rev. 4:11.

 3 Som a di rilijos leedaz eena Jeezas day mi waahn peepl noatis dehn. Soh Jeezas waan ih falowaz: ‘Kyaaful a dehn wan weh teech di Laa. Dehn laik waak rong eena lang roab, ahn dehn laik wen evribadi di hayl dehn op owta schreet. Dehn aalwayz waahn sidong eena di front seet da di sinagag dehn er da bankwit ahn soh.ʼ Den, Jeezas seh: “Dehndeh teecha dehn wahn geh ponish moa dahn enibadi els.” (Look 20:46, 47) Bot Jeezas mi noatis ahn komen wahn poa wido hoo mi gi wahn smaal lee doanayshan, ahn praabli nobadi els mi noatis ahn. (Look 21:1-4) Soh Jeezas mi noatis weh ada peepl neva noatis. Dis aatikl wahn help wi fi si tingz di way Jehoava si dehn.

HOO DA DI BES PERSN FI NOATIS AHN PRAYZ WI?

4. Hoo da di bes persn fi noatis ahn prayz wi, ahn wai?

4 Hoo da di bes persn fi noatis ahn prayz wi? Da noh di peepl a di werl weh wuda prayz wi op bikaa wi ga wahn gud ejukayshan, wahn gud jab, er wi big eena entataynment. Insteda dat, da di wan weh Paal mi taak bowt wen ih seh: “Now dat unu geh fi noa Gaad er, raada, Gaad geh fi noa unu, how unu ku ton bak tu di week ahn yoosles tingz ahn slayv fi dehn aal oava agen?” (Gal. 4:9, NW) Da wahn wandaful privilij fi mek Jehoava, di Roola a di yoonivers, noa wi! Hihn waahn ga wahn kloas rilayshanship wid wi. Wi waahn Jehoava aksep wi az ih frenz, bikaaz dat da weh ih mek wi fa.—Eccl. 12:13, 14.

5. Weh wi need fi du fi bee frenz wid Jehoava?

5 Moaziz mi bles bikaaz Jehoava mi noa ahn an aksep ahn az Ih fren. Wen Moaziz mi bayg Jehoava fi help ahn geh fi noa Hihn beta, Jehoava tel ahn: “Ai wahn du weh yu aks mi fi du tu, bikaaz Ah pleez wid yu an Ah noa yu bai yu naym.” (Ex. 33:12-17) Wi ku geh wandaful blesinz tu wen Jehoava geh fi noa wi ahn bee wi kloas fren. Bot weh wi need fi du fi bee frenz wid Jehoava? Wi need fi lov ahn an dedikayt wi laif tu ahn.—Reed 1 Korintyanz 8:3.

6, 7. Weh ku mek wi looz wi rilayshanship wid Jehoava?

6 Wi need fi kip wi rilayshanship wid Jehoava schrang. Jos laik dehn Kristyanz da Galaysha, wi need fi avoid “di week ahn yoosles tingz” a dis werl. Wi noh fi waahn mek di peepl a di werl prayz wi op. (Gal. 4:9, NW) Di Kristyanz bak den mi get tu di point weh Gaad mi noa dehn. Bot Paal mi seh dat dehn saym bradaz mi-di “ton bak” tu dehndeh yoosles tingz. In ada werdz Paal mi-di seh: “Afta unu kom dis far, wai unu waahn goh bak tu di foolish ahn yoosles tingz weh unu lef bihain?”

7 Yu tink wee kuda deh eena di saym sichuwayshan tudeh? Yes, af koars. Wen wi mi fos geh fi noa Jehoava, wi praabli mi haftu giv op wahn lat eena Saytan werl, jos laik weh Paal mi du. (Reed Filipiyanz 3:7, 8.) Maybi wi giv op di apachooniti fi geh haiya ejukayshan er maybi wi ton dong wahn promoashan da werk. Er, maybi wi tong dong di chaans fi mek lata moni. Maybi wi kuda mi mek lata moni di sing er play spoats, bot wi ton wi bak pahn aala dehndeh tingz. (Heeb. 11:24-27) Ih wuda bee foolish fi mek wi luk bak pahn dehndeh gud disizhan ahn tink wi mis owt pahn sohn gud apachooniti!  If wi noh geh rid a dis kaina tinkin, wi mait akchwali goh luk fi di saym tingz weh wi mi don seh da “week ahn yoosles” tingz eena dis werl.

WI WAAHN JEHOAVA NOATIS WI

8. Wat da di fos ting wi need fi memba if wi waahn Jehoava noatis wi?

8 Wi noh waahn di werl noatis wi, raada, wi waahn Jehoava noatis wi. Soh den, weh wi need fi du? Wi need fi memba too impoatant tingz. Fos, Jehoava aalwayz tek noatis a di wan dehn weh faytful tu hihn. (Reed Heebrooz 6:10; 11:6) Hihn reeli apreeshiayt aala ih servants. Bikaaz hihn da wahn “fyaa Gaad,” hihn wuda neva ignoar enibadi weh faytful tu ahn. Jehoava aalwayz “noa dehn wan weh bilangz tu hihn.” (2 Tim. 2:19) Hihn “noa di way a di raichos wan dehn” an ih noa how fi sayv dehn owta di chraiyalz weh dehn fays.—Ps. 1:6; 2 Peet. 2:9.

9. How Jehoava shoa dat ih pleez wid ih peepl?

9 Sohntaim, Jehoava shoa dat hihn pleez wid ih peepl eena speshal wayz. (2 Chron. 20:20, 29) Wan egzampl da wen Jehoava mi sayv ih peepl da di Red See wen Fayro an ih aami mi-di chays dehn. (Ex. 14:21-30; Ps. 106:9-11) Dat mi soh eksaitin dat peepl eena da paat a di werl mi stil di taak bowt it 40 yaaz layta. (Josh. 2:9-11) Bikaaz Jehoava lov ih peepl ih mi shoa ih powa fi sayv dehn. Da ivent reeli inkorij wee tudeh, kaaz wi wahn soon fays di atak a Gag a Maygag! (Ezek. 38:8-12) Wen da taim kohn, wi wahn glad dat da Jehoava mi noatis wi, ahn noh peepl a di werl.

10. Wat da di sekant ting wi need fi memba wen Jehoava di noatis wi?

10 Wi need fi memba wahn neks impoatant ting: Wen Jehoava noatis wi, ih mait du it eena wayz weh wi noh eevn ekspek. If peepl du gud tingz jos fi mek ada peepl prayz dehn, Jehoava noh wahn bles dehn. Dis da bikaaz, laik weh Jeezas mi seh, wen peepl prayz dehn, dat da aal di riwaad dehn wahn get. (Reed Machyu 6:1-5.) Jeezas seh dat ih Faada “noa evriting weh hapm eena seekrit.” Soh hihn si hoo aal du gud tingz fi adaz eevn wen nobadi els si. Hihn si evriting weh wi du ahn bles eech persn akaadn tu weh dehn du. Bot, sohntaim Jehoava riwaad wi eena wayz weh wi noh ekspek. Mek wi si sohn egzampl.

JEHOAVA AANA MAYRI

11. How Jehoava mi shoa dat ih mi aana Mayri?

11 Wen di taim mi kohn fi Gaad Son baan az wahn hyooman, Jehoava mi chooz wahn hombl verjin weh mi naym Mayri, fi bee di mami a dis speshal baybi. Mayri mi liv eena wahn lee tong kaal Nazaret, faar fahn Jeroosalem ahn di templ. (Reed Look 1:26-33.) Wai Jehoava mi chooz Mayri fi dis privilij? Gaybral, wan a Jehoava aynjel, tel ahn dat ‘Gaad pleez wid ahn.ʼ Mayri da-mi wahn spirichwal persn tu. Wi noa dis bikaaz a weh shee mi tel Ilizabet. (Look 1:46-55) Soh, Jehoava mi tek noatis a Mayri an ih giv ahn wahn privilij weh shee neva mi-di ekspek bikaaz shee mi faytful.

12, 13. How Jehoava mi aana Jeezas wen ih mi baan ahn wen Joazef ahn Mayri mi kehr ahn da di templ 40 dayz layta?

12 Wen Mayri mi gi bert tu Jeezas, Jehoava neva tel eni a di ofishal er roola dehn da Jeroosalem er Betlihem  bowt it. Sohn hombl shepad mi-di main dehn sheep owtsaida Betlihem, ahn sohn aynjel tel dehn shepad bowt Jeezas bert. (Look 2:8-14) Den, dehndeh saym shepad gaahn vizit di nyoo baan baybi. (Look 2:15-17) Mayri ahn Joazef mosi mi sopraiz fi si how di shepad dehn mi aana Jeezas! Tink bowt di difrens bitween how Jehoava du tingz ahn how di Devl du tingz. Wen Saytan mi sen sohn waiz man fi vizit Jeezas an ih payrents, evribadi da Jeroosalem mi geh fi hyaa dat Jeezas mi baan. Dis mi ster op wahn lata chrobl. (Mach. 2:3) Noh lang afta dat, Herod paas wahn laa fi kil aala di yong baybi bwai dehn anda di ayj a too yaaz.—Mach. 2:16.

13 Faati dayz afta Jeezas mi baan, Mayri mi haftu gi wahn aafrin tu Jehoava da di templ da Jeroosalem, weh mi deh bowt siks mailz fahn Betlihem. (Look 2:22-24) Az Mayri mi chravl tu Jeroosalem wid Joazef ahn Jeezas, shee praabli mi-di wanda if di prees wuda mi seh eniting speshal bowt Jeezas fyoocha werk. Wel, sombadi did aana Jeezas, bot da neva eena di way Mayri mi-di ekspek. Insted, Jehoava mi yooz Simiyan, wahn ‘hoali man weh yoostu aalwayz obay Gaadʼ, ahn di prafit Ana, wahn wido hoo mi 84 yaaz oal. Dehn mi gi speshal aana tu Jeezas ahn seh dat dis baybi wahn bee di Mesaiya, er Krais.—Look 2:25-38.

14. How Jehoava mi bles Mayri?

14 How bowt Mayri? Yu tink Jehoava mi kantinyu fi bles Mayri fi weh shee mi-di tek kayr a fi hihn Son ahn rayz ahn? Yes! Gaad mi mek shoar dat Mayri akshanz ahn werdz mi geh rait dong eena di Baibl. Mayri neva chravl wid Jeezas joorin ih chree-an-a-haaf-yaaz minischri. Maybi da-mi bikaaz shee da-mi wahn wido an ih mi haftu stay da Nazaret. Bot eevn doa shee mi mis owt pahn wahn lata privilij, shee mi stil deh wid Jeezas wen ih mi ded. (Jan 19:26) Laytaraan doh, Mayri mi deh da Jeroosalem wid di disaipl dehn wen Jehoava mi poar owt ih hoali spirit pahn dehn. (Aks 1:13, 14) Bikaaz shee mi dehdeh, ih pasabl dat shee mi get anointid lang wid di adaz. If dat da di kays, dis wuda meen dat shee mi geh di apachooniti fi goh da hevn ahn deh wid Jeezas fareva. Dat da wahn byootiful way fi shoa apreeshiayshan fi Mayri faytful servis!

JEHOAVA PRAYZ IH SON WEN IH MI DEH PAHN DI ERT

15. How Jehoava mi shoa dat ih mi pleez wid Jeezas wen ih mi deh pahn di ert?

15 Jeezas neva waahn aana fahn di rilijos er politikal leeda dehn. Bot ih mosi mi feel inkorij wen Jehoava mi noatis an prayz ahn chree difrent taimz. Di fos taim da-mi jos afta Jeezas mi geh baptaiz eena di Jaadn Riva. Jehoava tel ahn: ‘Yoo da mi Son weh Ah onli lov, an Ah onli pleez wid yu.ʼ (Mach. 3:17) Jan di Baptis da-mi di onli ada persn hoo mi hyaa dehndeh werdz. Di sekant taim da-mi bowt wahn yaa bifoa Jeezas mi ded. Chree a ih apasl dehn mi hyaa Jehoava seh: ‘Dis da mai Son weh Ah onli lov, an Ah onli pleez wid ahn. Lisn tu ahn.ʼ (Mach. 17:5) Den di terd taim da-mi jos dayz bifoa Jeezas mi ded. Jehoava mi taak fahn hevn agen tu ih Son.—Jan 12:28.

Weh yoo laan fahn di way Jehoava mi aana ahn bles ih Son? (Paragraaf 15-17)

16, 17. How Jehoava mi aana Jeezas eena wahn way weh ih neva mi ekspek?

 16 Jeezas mi pray dat Jehoava wil tek plays ahn noh fi hihn oan. Ih mi pray fi dis eevn doa ih mi noa di kaina det ih mi wahn fays ahn di tingz peepl mi wahn seh bowt ahn. (Mach. 26:39, 42) Ih gaahn chroo di shaym a det pahn wahn taacha stayk. Hihn mi du dat fi pleez ih Faada, noh fi pleez di peepl a di werl. (Heeb. 12:2) How Jehoava mi shoa dat hihn mi did noatis aal weh Jeezas mi du?

17 Wen Jeezas mi deh pahn di ert, ih pray fi get bak di gloari weh ih mi ga wid ih Faada da hevn. (Jan 17:5) Wi noh ga notn weh seh dat Jeezas mi waahn eniting moa dan dat. Ih neva mi-di ekspek wahn haiya pozishan. Bot stil, weh Jehoava du? Ih shoa Jeezas aana eena wahn way weh ih neva mi ekspek. Afta ih rezorekshan, Jehoava mek Jeezas “grayta dan enibadi” els. Jehoava giv ahn weh nobadi els mi ga op tu den—imoartal spirit laif! * (Fil. 2:9; 1 Tim. 6:16) Dat da wahn amayzin way fi riwaad Jeezas fi ih faytful servis!

18. Weh wi fi aalwayz memba?

18 Wi noh fi chrai pleez dis werl. Soh weh wi need fi du? Wi need fi memba dat Jehoava aalwayz rekonaiz ahn riwaad ih faytful servants. Ahn moas a di taim, ih riwaad dehn eena wayz weh dehn noh ekspek. Wi noh noa how Jehoava wahn bles wi eena di fyoocha. Bot fi now, wen wi bayr op anda difrent chroblz ahn chraiyalz, mek wi aalwayz memba dat dis werl, lang wid eniting weh ih ga fi aafa, wahn soon geh dischrai. (1 Jan 2:17) Wi lovin hevnli Faada, Jehoava, ‘da wahn fyaa Gaad, ahn hihn noh wahn faget how haad wi mi werk fi hihn. Ih noh wahn faget wi lov fi hihn.ʼ (Heeb. 6:10) Hihn wahn shoa wi dat ih pleez wid wi, maybi eevn eena wayz weh wi kyaahn eevn imajin now!

^ par. 17 Jeezas praabli neva mi-di ekspek dis blesin sins di Heebroo Skripchaz noh menshan imoartaliti.