Skip tu di aatikl

Skip tu lis a tapik

Shoa Kompashan fi “Evribadi”

Shoa Kompashan fi “Evribadi”

WEN Jeezas mi teech ih disaipl dehn how fi preech di gud nyooz, ih tel dehn dat noh evribadi mi wahn lisn tu di Kingdom mesij. (Look 10:3, 5, 6) Eena wi minischri, wi mait meet peepl weh rispan eena wahn negitiv way er eevn insolt wi. Wen peepl goh aan soh, ih haad fi shoa dehn kompashan.

Wahn persn weh ga kompashan si weh adaz need, si dehn prablemz, feel sari fi dehn, ahn den du sohnting fi help dehn. Bot if wee staat tu looz kompashan fi peepl wi meet eena di minischri, wi mait staat tu looz wi lov fi di minischri ahn noh ga di saym rizolts az bifoa. Pahn di ada han, wen wi werk haad fi ga kompashan, da laik wen wi ad moa wud tu wahn faiya—wi lov fi di minischri wahn stay schrang!—1 Tes. 5:19.

How wi ku ga kompashan eevn wen ih noh eezi? Mek wi kansida chree egzampl weh gud fi fala—Jehoava, Jeezas, ahn di apasl Paal.

KAPI DI WAY JEHOAVA SHOA KOMPASHAN

Fi towznz a yaaz, Jehoava di put op wid aala di laiz peepl seh bowt ahn. Yet, hihn stil “shoa kainis tu dehn wan weh angraytful ahn wikid.” (Look 6:35) How ih shoa ih kainis? Ih payshent wid evribadi. Jehoava “waahn sayv aal peepl.” (1 Tim. 2:3, 4) Aldoa Gaad hayt wikidnis, peepl preshos tu hihn an ih noh waahn nobadi looz dehn laif.—2 Peet. 3:9.

Jehoava noa dat Saytan di fool peepl fi bileev ih lai dehn. (2 Kor. 4:3, 4) Wahn lata peepl laan tingz fahn dehn smaal weh mek it haad fi mek dehn aksep di chroot. Jehoava reeli waahn help dehn. How wi noa dat?

Tink bowt how Jehoava mi feel bowt di peepl eena di siti a Niniveh. Eevn doa dehn mi vailent, Jehoava tel Joana: “Yu noh tink dat Ai shuda feel sari fi Niniveh tu, di grayt siti wehpaat moa dan 120,000 peepl deh weh nat eevn noa weh rait fahn weh rang?” (Jonah 4:11) Di peepl da Niniveh neva noa wahn lat bowt Gaad, bot Hihn mi waahn shoa dehn mersi soh ih sen Joana fi waan dehn.

Laik Jehoava, wi feel di saym way bowt peepl. Tu hihn dehn preshos. Wi ku kapi fi hihn kompashan ahn chrai help enibadi hoo wuda lisn eevn if wi tink dehn noh wahn rispan.

KAPI DI WAY JEEZAS SHOA KOMPASHAN

Jos laik ih Faada, Jeezas mi feel sari fi peepl hoo mi need spirichwal help. “Wen ih si di krowd a peepl dehn, ih haat gaan owt tu dehn kaa dehn mi kanfyooz ahn dehn neva ga nobadi fi help dehn, sayhn laik dehn sheep weh noh ga nobadi fi main dehn.” (Mach. 9:36) Jeezas mi andastan wai dehn mi deh eena da sichuwayshan. Da mi bikaaz di rilijos leedaz yoostu chreet dehn eena wahn bad way ahn teech dehn loan lai. Eevn doa ih mi noa dat som a dehn neva mi wahn fala hihn, ih stil gaahn hed ahn “teech dehn lata tingz.”—Maak 4:1-9.

Noh geh beks if wahn persn noh shoa inchres di fos taim wi meet ahn

Peepl atichood tu di chroot chaynj wen tingz eena dehn laif chaynj

Wen peepl rispan eena wahn negitiv way, wi need fi andastan wai. Som a dehn mait  ga wahn negitiv atichood bowt di Baibl er bowt Kristyanz bikaaz dehn si dat som peepl hoo kaal dehnself Kristyanz du bad tingz. Maybi fi adaz da bikaaz dehn hyaa lai bowt wi bileef dehn. Er adaz mait bee frayd fi weh dehn famili membaz er peepl eena dehn naybahud wuda tel dehn if dehn lisn tu wi.

Som peepl weh wi meet eena di minischri mait rispan eena wahn negitiv way bikaaz dehn mi gaahn chroo sohn terabl ekspeeryens eena dehn laif. Wahn mishineri sista weh naym Kim seh: “Eena sertn paat a wi teritori, wahn lata di peepl mi servaiv wahn waar. Dehn mi looz evriting. Dehn noh ga no hoap fi di fyoocha. Dehn foschraytid ahn noh chros nobadi. Eena dis ayrya, wi aalwayz meet peepl hoo noh waahn hyaa wi mesij. Wahn taim pahn servis, sombadi mi eevn atak mi.”

How Kim kantinyu fi shoa kompashan eevn afta da kaina chreetment? Shee seh: “Wen peepl chreet mi eena wahn bad way, Ah chrai memba Proverbs 19:11, weh seh: ‘Wen wahn man ga andastandin, ih noh wahn eezi fi geh beks.ʼ Ah chrai fi memba dat di peepl eena wi teritori gaahn chroo wahn lat. Dis help mi fi feel sari fi dehn. Noh evribadi wi meet rispan eena wahn negitiv way. Eena da saym ayrya, wi ga sohn nais ritern vizit tu.”

Wi ku aks wiself: ‘If Ai neva noa di chroot, how Ai wuda rispan if Jehoava Witnisiz mi kohn preech tu mi?ʼ Fi egzampl, wat if aal weh wi mi hyaa bowt di Witnisiz da-mi loan lai? Wi praabli wuda rispan eena wahn negitiv way tu, ahn wuda need sombadi fi shoa wi kompashan. Jeezas mi seh dat wi haftu chreet adaz di way wi wuda waahn dehn chreet wi. Soh wi haftu chrai fi andastan how adaz feel ahn bee payshent wid dehn, eevn if ih noh eezi.—Mach. 7:12.

KAPI DI WAY PAAL MI SHOA KOMPASHAN

Di apasl Paal mi shoa kompashan eevn tu peepl weh mi atak ahn. Wai? Bikaaz ih memba how hihn yoostu bee. Ih mi seh: ‘Eevn doa Ai doz insolt Gaad, an Ah doz onli kruwil ahn mek ih peepl dehn sofa, stilyet, Krais ga mersi pahn mi bikaaz Ah neva noa no beta, ahn bikaaz Ah neva bileev eena Krais den.ʼ (1 Tim. 1:13) Paal mi noa dat Jehoava ahn Jeezas shoa hihn mersi. Hihn kuda mi andastan di peepl ih mi-di preech tu, kaaz hihn yoostu ak jos laik dehn.

 Sohntaim, Paal mi meet peepl hoo mi ga schrang bileef eena faals teechinz. How dis mi mek ih feel? Eena Aks 17:16 ih seh dat wail Paal mi deh da Atenz, ‘ih mi feel sad wen ih si di lata aidol dehn rong di siti.ʼ Bot, Paal mi yooz dehndeh saym tingz weh mi get ahn sad fi gi wahn gud witnis (Aks 17:22, 23) Ih chaynj di way ih mi-di preech bays pahn di bakgrong a di peepl ‘soh dat ih kuda mi win dehn oava fi Krais.ʼ—1 Kor. 9:20-23.

Wen wi preech tu peepl hoo rispan eena wahn negitiv way er ga rang bileef, wi ku du weh Paal mi du. Wi ku yooz weh wi noa bowt dehn fi help dehn laan di “gud nyooz bowt sohnting beta.” (Isa. 52:7) Wahn sista weh naym Dorothy seh: “Wahn lata peepl eena wi teritori bileev dat Gaad kyaahn wayt fi joj wi ahn ponish wi. Wen Ai meet peepl laik dis, Ah tel dehn dat ih gud dat dehn ga schrang bileef eena Gaad. Den Ah shoa dehn fahn di Baibl dat Jehoava da wahn lovin Gaad hoo pramis wi wahn byootiful fyoocha.”

‘WIN OAVA EEVL BAI DI GUD WEH WI DUʼ

Bikaaz wi di liv eena “di laas dayz,” wi ku ekspek dat peepl atichood “wahn geh eevn wos.” (2 Tim. 3:1, 13) Bot wi kyaahn mek peepl atichood kaaz wi fi noh shoa kompashan er eevn looz wi jai. Jehoava ku gi wi di schrent fi ‘win oava eevl bai di gud weh wi du.ʼ (Roam. 12:21) Wahn painyaa weh naym Jessica seh: “Ah aalwayz meet peepl hoo prowd ahn mak di Witnisiz ahn dehn mesij. Dis get tu mi sohntaim. Wen Ah bigin wahn kanvasayshan, Ah seh wahn kwik lee pryaa tu Jehoava an aks ahn fi help mi si di persn di way hihn si dehn. Dis help mi fi foakos pahn how fi help di persn insteda how Ai feel.”

Wi noh waahn giv op. Wi kip aan di luk fi peepl weh ga di rait haat kandishan

Bikaaz wi shoa payshens, som peepl chaynj ahn rispan tu di gud nyooz

Wi fi chrai inkorij wi bradaz ahn sistaz tu. Jessica seh: “If wan a wi ga wahn bad ekspeeryens eena di minischri, Ah chrai fi noh taak bowt it. Insted, Ah chaynj di sobjek tu sohnting pazitiv, laik di gud rizolts a wi preechin werk eevn doa som peepl noh waahn lisn.”

Jehoava noa aala di difrent chalenj wi fays eena wi minischri. Ih feel hapi wen wi kapi fi hihn mersi! (Look 6:36) Af koars, Jehoava noh wahn shoa kompashan fareva. Wi ku bee shoar dat hihn noa di egzak taim fi en dis sistem a tingz. Til den, wi preechin werk veri impoatant. (2 Tim. 4:2) Soh mek wi kantinyu fi du wi asainment wid lov ahn tenda kompashan fi “evribadi.”