Skip tu di aatikl

Skip tu lis a tapik

 STODI AATIKL 4

Weh Wahn Simpl Meel Teech Wi Bowt Wahn Hevnli King

Weh Wahn Simpl Meel Teech Wi Bowt Wahn Hevnli King

“Dis da mai badi. . . . Dis da fi mee blod, weh da di nyoo agreement weh Gaad mek wid ih peepl dehn.”—MACH. 26:26-28.

SANG 16 Prayz Jah fi Ih King an Ih Kingdom!

WEH WI WAHN DISKOS? *

1-2. (a) Wai ih noh sopraiz wi dat Jeezas mi gi wi wahn eezi way fi memba fi hihn det? (b) Wich kwalitiz weh Jeezas mi shoa wi wahn kansida?

YOO ku diskraib weh hapm da di anwal Memoaryal a Krais det? Moas a wi ku memba di baysik tingz weh wi du fi selibrayt Krais Eevnin Meel. Wai? Bikaaz dis meel noh komplikaytid ataal. Bot dis da wahn veri impoatant ivent. Soh wai Jeezas mi yooz wahn simpl meel fi dis speshal ivent?

2 Wen Jeezas mi deh ya pahn di ert di preech, ih mi ga wahn repyutayshan fi teech eena wahn way weh klyaa, simpl, an eezi fi andastan. (Mach. 7:28, 29) Eena da sayhn way, hihn mi gi wi wahn simpl way fi selibrayt fi hihn det. Bot eevn doa da mi wahn simpl meel, ih ga lata meenin fi wi. Mek wi kansida di Memoaryal * meel ahn som a di tingz weh Jeezas mi seh ahn du. Wi wahn andastan eevn beta how hombl Jeezas hombl, how ih ga lata korij, ahn how ih soh lovin. Den wi wahn si how wi ku fala fi hihn egzampl kloas-wan.

JEEZAS HOMBL

Di Memoaryal bred ahn wain rimain wi dat Jeezas mi giv op fi hihn laif fi wi ahn dat now hihn da fi wee King eena hevn (Paragraaf 3-5)

3. Akaadn tu di way Machyu 26:26-28 diskraib it, how eezi ih wuda bee fi pripyaa di Memoaryal meel weh Jeezas mi staat, ahn weh di too baysik tingz weh ih mi yooz reprizent?

3 Jeezas mi staat di Memoaryal a fi hihn det wid ih 11 faytful apasl dehn. Hihn mi yooz di lefoavaz fahn di Paasoava  meel fi staat dis simpl selibrayshan. (Reed Machyu 26:26-28.) Hihn onli mi yooz di bred weh mek widowt ees ahn di wain weh don mi dehdeh. Jeezas mi tel ih apasl dehn dat dehndeh too baysik tingz mi reprizent fi hihn perfek badi ahn blod, weh hihn mi wahn soon sakrifais fi dehn. Di apasl dehn praabli neva sopraiz wen dehn mi si how Jeezas yooz wahn simpl meel fi memba dis impoatant ivent. Wai nat?

4. How di advais weh Jeezas mi gi Marta help wi fi andastan wai hihn mi kip di Memoaryal meel simpl?

4 Kansida weh mi hapm sohn monts bifoa, joorin di terd yaa a Jeezas minischri. Hihn mi gaahn hayl ih kloas fren dehn: Lazaros, Marta, ahn Mayri. Wail Jeezas mi dehdeh, ih mi staat teech. Meenwail, Marta mi-di hasl op ihself di mek wahn speshal meel fi Jeezas. Wen Jeezas si dat, ih mi karek Marta eena wahn kain way, an help ahn fi andastan dat wahn big meel noh aalwayz nesiseri. (Look 10:40-42) Laytaraan, wid jos wahn fyoo owaz lef bifoa ih mi giv op ih laif, Jeezas mi aplai ih oan kongsl. Hihn mi kip di Memoaryal meel simpl. Weh dat tel wi bowt Jeezas?

5. Weh wi laan bowt Jeezas fahn di simpl meel weh hihn mi yooz fi staat di Memoaryal, ahn how dat gree wid Filipiyanz 2:5-8?

5 Jeezas mi hombl eena evriting weh ih mi seh ahn du. Soh af koars hihn mi shoa lata hyoomiliti joorin ih laas nait ya pahn di ert. (Mach. 11:29) Hihn mi noa dat soon ih mi wahn aafa op ih laif az di graytis sakrifais eva ahn dat aftawodz, Jehoava mi wahn rezorek ahn fi bee King eena hevn. Stilyet, hihn neva kaal tu moch atenshan tu ihself ahn mek wahn komplikaytid serimoni fi memba fi hihn det. Insteda dat, hihn mi tel ih disaipl dehn dat wans a yaa dehn shuda eet dis simpl meel fi memba ahn. (Jan 13:15; 1 Kor. 11:23-25) Dis simpl meel shoa wi dat Jeezas da neva wahn prowd persn. Wi ku bee hapi dat fi wee hevnli King aalwayz hombl.—Reed Filipiyanz 2:5-8.

6. How wi ku bee hombl laik Jeezas wen wi di goh chroo chraiyalz?

6 How wi ku bee hombl laik Jeezas? Wi haftu luk owt fi wan anada ahn put adaz heda wiself. (Fil. 2:3, 4) Tink bak tu Jeezas laas nait pahn di ert. Jeezas mi noa dat soon ih mi wahn sofa ahn ded. Bot stilyet, ih mi shoa kansaan fi ih faytful apasl dehn hoo mi wahn sofa afta fi hihn det. Soh ih mi spen ih laas nait di teech dehn, inkorij dehn, ahn  pramis dehn dat dehn mi wahn geh moa help. (Jan 14:25-31) Bikaaz Jeezas mi hombl, ih mi shoa moa kansaan fi adaz dan fi ihself. Dat da wahn ekselent egzampl fi mek wee fala!

JEEZAS GA KORIJ

7. How Jeezas mi shoa lata korij rait afta hihn ahn di apasl dehn mi selibrayt Krais Eevnin Meel fi di fos taim?

7 Rait afta Jeezas mi staat op di selibrayshan a Krais Eevnin Meel wid ih apasl dehn, ih mi shoa lata korij. How soh? Jeezas mi aksep weh fi hihn Faada mi waahn mek ih du, eevn doa dat mi meenz dat hihn mi wahn haftu ded. Pahn tap a dat, dehn mi wahn akyooz Jeezas seh dat hihn disrispek Gaad. Imajin how shaymin dat wuda mi bee fi Jeezas! (Mach. 26:65, 66; Look 22:41, 42) Hihn mi stay faytful soh dat hihn kuda mi aana Jehoava naym, stan op fi Gaad rait fi rool, ahn mek evalastin laif fi hyoomanz pasabl. Bot sayhn taim, Jeezas mi pripyaa ih falowaz fi di chraiyalz weh dehn mi wahn soon haftu fays.

8. (a) Weh Jeezas mi tel ih faytful apasl dehn? (b) Eena di yaaz afta Jeezas mi ded, how fi hihn disaipl dehn mi fala fi hihn egzampl a korij?

8 Wahn nada way Jeezas mi shoa korij da wen ih mi put ih oan woriz wan said ahn foakos pahn weh ih faytful disaipl dehn mi need. Di simpl meel, weh hihn neva serv til afta Joodas mi lef, wuda rimain aal hoo mi wahn bee fi hihn anointid falowaz a how dehn benifit fahn Jeezas sakrifais ahn fahn di privilij fi bee paat a di nyoo kovenant. (1 Kor. 10:16, 17) Jeezas mi tel ih falowaz weh hihn an ih Faada ekspek dehn fi du soh dat dehn kuda stay faytful ahn geh dehn hevnli riwaad. (Jan 15:12-15) Jeezas mi aalso  tel ih disaipl dehn bowt di chraiyalz weh dehn mi wahn fays. Den ih mi inkorij dehn fi fala fi hihn egzampl ahn “tek haat!” (Jan 16:1-4a, 33) Yaaz layta, Jeezas disaipl dehn stil mi-di fala fi hihn egzampl ahn shoa korij. Dehn mi kantinyu fi sopoat wan anada ahn put adaz heda dehnself, eevn if dat mi meen dat dehn mi wahn haftu sofa.—Heeb. 10:33, 34.

9. How wee ku shoa korij laik Jeezas?

9 Sayhn way tudeh, wee fala Jeezas egzampl ahn shoa korij. Fi egzampl, ih tek korij fi help wi bradaz wen dehn di goh chroo persikyooshan kaaz a dehn fayt. Sohntaim, wi bradaz dehn en op eena prizn fi no gud reezn. Wen dat hapm, wi haftu du evriting weh wi kud fi help dehn, eevn if dat meenz wi haftu stan op ahn difen dehn. (Fil. 1:14; Heeb. 13:19) Wahn nada way wi shoa korij da fi kantinyu preech widowt frayd. (Aks 14:3) Laik Jeezas, wee mek op wi main fi preech di Kingdom mesij, eevn if peepl persikyoot wi er chrai stap wi. Sohntaim doh, wi mait feel laik wi noh ga inof korij. Weh wi ku du?

10. Weh wi shuda du joorin di weeks bifoa di Memoaryal, ahn wai?

10 Wi ku schrentn wi korij if wi tink bowt di hoap weh wi ga bikaaz a Krais ransom sakrifais. (Jan 3:16; Ifee. 1:7) Joorin di weeks bifoa di Memoaryal, wi ga speshal apachooniti fi bil op wi apreeshiayshan fi di ransom. Joorin da taim, kip op wid di Memoaryal Baibl reedin ahn meditayt pahn weh mi hapm rong di taim wen Jeezas mi ded. Den wen wi kohn tugeda fi Krais Eevnin Meel, wi wahn ga wahn beta andastandin a how impoatant di bred ahn di wain, ahn di speshal sakrifais weh dehn reprizent. Wen wi andastan  weh Jeezas ahn Jehoava mi du fi wi, ahn how wee, wi famili, ahn wi fren dehn benifit, wi hoap fi di fyoocha wahn geh schranga, ahn wi wahn ga di korij fi indyoar rait dong tu di en.—Heeb. 12:3.

11-12. Weh wi laan soh faar?

11 Soh faar wi laan dat Krais Eevnin Meel noh onli rimain wi a di preshos ransom weh Jeezas mi pay fi wi, bot ih aalso mek wi tink bowt di hyoomiliti ahn korij weh Jeezas mi shoa. Wi hapi fi noa dat Jeezas kantinyu fi shoa dehnya kwalitiz wail ih serv az wi Hai Prees hoo pleed wid Gaad fi wi! (Heeb. 7:24, 25) Wi mos aalwayz obay Jeezas koman fi memba fi hihn det. Dat wahn shoa humoch wi apreeshiayt weh hihn mi du fi wi. (Look 22:19, 20) Wi du dis pahn Naisan 14, akaadn tu di Jooish kalinda, di moas impoatant day a di yaa.

12 Dis simpl meel teech wi bowt wahn nada kwaliti weh mi moov Jeezas fi ded fi wi. Wen hihn da-mi wahn man ya pahn ert, evribadi mi noa Jeezas fi dis kwaliti. Da wich kwaliti dat?

JEEZAS LOVIN

13. How Jan 15:9 ahn 1 Jan 4:8-10 diskraib di lov weh Jehoava ahn Jeezas shoa, ahn hoo benifit fahn fi dehn lov?

13 Eena evriting weh Jeezas mi du, ih mi shoa di sayhn schrang lov fi wee laik weh Jehoava shoa. (Reed Jan 15:9; 1 Jan 4:8-10.) Di moas impoatant way how Jeezas mi shoa humoch ih lov wi fahn ih haat da wen ih mi giv op ih laif fi wi. Weda wi anointid er wi da wan a di “ada sheep,” wi benifit fahn di lov weh Jehoava an ih Son mi shoa bai da sakrifais. (Jan 10:16; 1 Jan 2:2) Ahn den tink bowt di bred ahn di wain weh Jeezas mi yooz fi di Memoaryal meel. Wi ku si Jeezas lov ahn kansidarayshan fi ih disaipl dehn eena dehndeh tu. How soh?

Owta lov, Jeezas mi staat op wahn Memoaryal serimoni weh mi simpl an eezi fi selibrayt eena eni kaina sichuwayshan (Paragraaf 14-16) *

14. Eena weh way Jeezas mi shoa lov fi ih disaipl dehn?

14 Jeezas mi shoa lov fi ih anointid falowaz eena di way ih mi staat op di Memoaryal meel. Ih neva mek it wahn komplikaytid serimoni. Raada, hihn mi mek it simpl an eezi. Az taim paas, ih anointid disaipl dehn mi wahn haftu selibrayt di Memoaryal evri yaa, noh mata weh sichuwayshan dehn deh eena, eevn if dehn deh eena prizn. (Rev. 2:10) Bot bikaaz da mi wahn simpl araynjment, dehn kuda mi aalwayz obay Jeezas koman!

15-16. How som a wi bradaz ahn sistaz kuda mi selibrayt Krais Eevnin Meel eevn wen tingz mi haad?

15 Rait dong tu fi wee day, chroo Kristyanz aalwayz chrai fi memba Jeezas det. Dehn chrai selibrayt Krais Eevnin Meel di rait way az moch az dehn kud, eevn wen dehn sichuwayshan mek it haad fi du. Fi egzampl, wen Brada Harold King mi deh eena wahn prizn sel bai ihself da China, hihn mi haftu kom op wid ih oan way fi selibrayt di Memoaryal. Hihn mi pripyaa di Memoaryal bred ahn wain eena seekrit, wid tingz weh hihn mi gat. An ih mi kalkyulayt di dayt fi di Memoaryal az kloas az ih kud. Wen di day mi kohn, hihn mi sing, pray, ahn gi di Memoaryal taak, hihn wan eena ih prizn sel.

16 Mek wi luk pahn wahn nada egzampl. Wahn groop a sistaz weh mi deh eena wahn kansenchrayshan kyamp joorin Werl Waar II mi ris dehn laif fi selibrayt Krais Eevnin Meel. Bot, bikaaz di meel simpl an eezi fi pripyaa, dehn kuda mi selibrayt di Memoaryal eena seekrit. Dehn mi seh: “Wi mi stan op kloas tugeda eena wahn serkl, wid wahn lee futstool  midl a wi. Wi mi put wahn wait klaat pahn di futstool ahn pahn dat wi mi put di bred ahn di wain. Wi mi yooz wahn kyandl fi lait, bikaaz peepl mi wahn noatis weh wi mi-di du if wi mi yooz ilekchrik lait. . . . Wi mi ripeet wi pramis fi serv Jehoava fahn wi haat ahn yooz aala wi schrent fi prayz fi Hihn hoali naym.” Dat da wahn gud egzampl a fayt fi chroo! Ahn Jeezas mi shoa lata lov wen ih mi mek it pasabl fi selibrayt di Memoaryal noh mata weh sichuwayshan wi deh eena!

17. Weh kweschanz wi ku aks wiself?

17 Az di day fi di Memoaryal geh kloasa, ih wuda gud fi aks wiself dehnya kweschan: ‘How Ai ku fala Jeezas lovin egzampl beta? Ai tink moa bowt weh mi bradaz ahn sistaz need dan weh Ai need? Ai ekspek moa fahn mi bradaz ahn sistaz dan weh dehn ku du, er Ai shoa andastandin?ʼ Mek wi aalwayz kapi Jeezas egzampl ahn shoa “kansaan fi wan anada.”—1 Peet. 3:8.

KIP DEHNYA LESN KLYAA EENA YU MAIN

18-19. (a) Weh wi wahn aalwayz memba bowt Jeezas wen wi tink bowt di Memoaryal? (b) Weh yoo mek op yu main fi du?

18 Soon wi noh wahn haftu selibrayt di Memoaryal a Krais det nohmoh. Wen Jeezas “kohn” joorin di grayt chribyulayshan, hihn wahn gyada tugeda di res a fi hihn “speshal peepl dehn” tu hevn, an afta dat wi noh wahn selibrayt di Memoaryal nohmoh.—1 Kor. 11:26; Mach. 24:31.

19 Eevn afta wi stap selibrayt di Memoaryal, wi ku bee shoar dat Jehoava peepl wahn luk bak pahn dis simpl meel ahn memba di bes egzampl a hyoomiliti, korij, ahn lov weh wahn hyooman eva shoa. Eena da taim, aal hoo mi selibrayt dis speshal meel eena di paas wahn taak bowt it fi mek evribadi els benifit. Bot fi benifit fahn dis meel now, wi haftu mek op wi main fi kapi Jeezas hyoomiliti, korij, ahn lov. If wi du dat, wi ku bee shoar dat wi wahn geh wi riwaad fahn Jehoava.—2 Peet. 1:10, 11.

SANG 13 Krais, fi Wee Egzampl

^ par. 5 Soon wi wahn aten di Memoaryal fi memba di det a Jeezas Krais. Dis simpl meel teech wi wahn lat bowt how Jeezas mi shoa hyoomiliti, korij, ahn lov. Eena dis aatikl, wi wahn diskos how wee ku kapi di way hihn shoa dehnya preshos kwalitiz.

^ par. 2 WEH IH MEEN? Wahn memoaryal da wahn speshal selibrayshan fi memba an aana wahn impoatant ivent er persn.

^ par. 56 DI PICHA DEHN: Dehnya picha di shoa how Jehoava faytful servants yoostu selibrayt di Memoaryal eena di fos-senchri kangrigayshan; eena di layt 1800ʼs; eena wahn Nazi kansenchrayshan kyamp; ahn how wi bradaz selibrayt it eena fi wee taim, eena wahn smaal, oapm Kingdom Haal eena wahn konchri da South America.