Skip tu di aatikl

Skip tu lis a tapik

 STODI AATIKL 2

Prayz Jehoava Eena di Kangrigayshan

Prayz Jehoava Eena di Kangrigayshan

“Ah wahn tel mi brada ahn mi sista dehn bowt yu wandaful naym. Wen dehn gyada tugeda fi wership yu, Ah wahn prayz yu monks dehn.”—PS. 22:22.

SANG 59 Prayz Jah Wid Mee!

WEH WI WAHN DISKOS? *

1. How Dayvid mi feel bowt Jehoava, ahn weh dat mi moov hihn fi du?

KING DAYVID mi rait: “Jehoava grayt an ih dizerv lata prayz.” (Ps. 145:3) Hihn mi lov Jehoava, ahn dat moov ahn fi prayz Gaad monks ‘ih brada an ih sista dehn.ʼ (Ps. 22:22; 40:5) Fi shoar, yu lov Jehoava ahn yu agree wid Dayvid wen ih mi seh: “Mek evribadi prayz yoo fareva an eva, Oa Jehoava di Gaad a wi pa Izrel.”—1 Chron. 29:10-13.

2. (a) How wi ku prayz Jehoava? (b) Weh chalenj som a wi fays, ahn weh wi wahn diskos?

2 Tudeh day, wan way wi ku prayz Jehoava da wen wi koment da wi Kristyan meetin dehn. Bot lata wi bradaz ahn sistaz fays wahn haad chalenj. Dehn waahn tek paat eena di meetin, bot dehn frayd. How dehn ku deel wid da chalenj? Pahn tap a dat, som a wi mait feel laik wi noh noa how fi gi inkorijin koments. Soh wat da sohn gud sojeshan weh ku help aala wi fi koment an inkorij wan anada? Bifoa wi ansa dehn kweschan, mek wi diskos foa impoatant reezn wai wi koment da wi meetin dehn.

WAI WI KOMENT DA DI MEETIN DEHN

3-5. (a) Akaadn tu Heebrooz 13:15, wai wi koment da wi meetin dehn? (b) Aala wi haftu gi di sayhn kaina koment? Pleez eksplayn yu ansa.

3 Jehoava giv aala wi di privilij fi prayz hihn. (Ps. 119:108) Wan way weh “wi aafa fi wee prayz tu Gaad az wahn sakrifais” da wen wi koment da wi meetin dehn, ahn nobadi els ku aafa da sakrifais fi wi. (Reed Heebrooz 13: 15.) Yu tink aala wi haftu gi di sayhn kaina koment fi mek Jehoava bee hapi wid wi? No, af koars nat!

4 Jehoava noa dat aala wi difrent an aala wi kyaahn du di saym tingz. Bot hihn reeli apreeshiayt di sakrifais dehn weh eech wan a wi aafa akaadn tu weh wi ku du. Tink bowt di difrent kaina sakrifais weh hihn yoostu aksep fahn di Izrelait dehn. Som a di Izrelait dehn kuda mi aafa wahn sheep er wahn goat. Bot if dehn mi poa dehn kuda mi aafa “too dov er too lee yong pijin.” An if wahn Izrelait kudn afoad too berd, Jehoava mi aksep bowt too an a haaf tu chree pong a “fain flowa.” (Lev. 5:7, 11) Flowa mi cheepa, bot Jehoava mi stil apreeshiayt da sakrifais, az lang az da mi “fain flowa.”

5 Jehoava feel di sayhn way tudeh. Wen wi gi wi koment, hihn noh ekspek aala wi fi bee wahn gud speeka laik Apolos er fi kanvins peepl laik Paal. (Aks 18:24; 19:8) Aal weh Jehoava ekspek fahn wi da fi mek eech wan a wi gi di bes koment weh wi kud. Yu memba di poa wido weh mi aafa too lee wan sehn? Shee mi preshos tu Jehoava kaa shee mi giv ahn di bes weh ih kud.—Look 21:1-4.

Wen wi koment, wee an evribadi weh di lisn wahn benifit (Paragraaf 6-7) *

6. (a) Akaadn tu Heebrooz 10:24, 25, how di koment dehn weh yu hyaa fahn adaz ku mek yu feel? (b) How yu ku shoa dehn dat yu apreeshiayt di inkorijment weh dehn gi yu?

6 Wi inkorij wan anada wen wi koment. (Reed Heebrooz 10:24, 25.) Aala wi injai di difrent koment weh wi hyaa da wi meetin dehn. Wi lov it wen wahn lee pikni gi wahn koment fahn ih haat. Wi geh lata inkorijment wen wi hyaa sohnbadi els eksaitid fi koment pahn sohnting nyoo weh dehn jos laan. Ahn wi reeli lov it wen wahn brada er sista weh shai er jos di laan wi langwij fain di “korij” fi gi wahn koment. (1 Tes. 2:2) How wi ku shoa dat wi apreeshiayt dehn efoat? Afta di meetin wi ku tel dehn tanks fi dehn inkorijin koment. Wahn nada way fi shoa wi apreeshiayshan da fi gi wahn koment wiself. Den wi noh jos geh inkorijment fahn wi meetin dehn, bot wi inkorij adaz tu.—Roam. 1:11, 12.

7. How wi benifit wen wi koment?

7 Wi benifit wiself wen wi koment. (Isa. 48:17) How soh? Fos, if wi plan fi gi  wahn koment, wi haftu pripyaa gud fi di meetin. Wen wi pripyaa gud, wi geh wahn beta andastandin a Gaad Werd. Ahn di moa wi andastan, di beta wi ku aplai weh wi laan. Sekant, wi wahn injai di meetin moa bikaaz wi di tek paat eena di diskoshan. Terd, sins ih tek lata efoat fi pripyaa ahn gi wi koment, wi wahn memba weh wi mi koment pan lang afta di meetin don.

8-9. (a) Akaadn tu Malachi 3:16, how yu tink Jehoava feel bowt wi koments? (b) Weh chalenj som a wi mait stil fays?

8 Wi pleez Jehoava wen wi taak bowt weh wi bileev. Wi ku bee shoar dat Jehoava lisn tu wi ahn dat ih reeli apreeshiayt di efoat weh wi mek fi koment da wi meetin dehn. (Reed Malachi 3:16.) * Jehoava shoa wi humoch ih apreeshiayt wi wen ih bles wi fi di efoat weh wi mek fi pleez ahn.—Mal. 3:10.

9 Fi shoar, wi ga gud reezn fi koment da wi meetin dehn. Bot som a wi mait stilyet bee frayd fi put op wi han fi gi wahn koment. If da soh yoo feel, noh mek dat diskorij yu. Mek wi kansida sohn prinsipl fahn di Baibl, sohn egzampl, ahn sohn gud sojeshan weh ku help aala wi fi chrai koment moa da wi meetin dehn.

HOW FI KOAP WID FYAA

10. (a) Wai lata wi frayd fi koment? (b) Wai ih ku bee wahn gud ting if wi frayd fi koment?

10 Yoo geh nervos wen yu eevn tink bowt put op yu han fi gi wahn koment? Da noh yoo wan feel soh. Aala wi feel kaina frayd wen wi koment da di meetin, ahn dis fyaa ku bee soh schrang dat ih ku stap yu fahn koment. Bot bifoa yu ku deel wid di fyaa, yu haftu andastan weh kaaz it. Yu frayd dat yu wahn faget weh  yu waahn seh er dat yu wahn seh sohnting rang? Yu wori dat yu kyaahn koment az gud az adaz? Akchwali, ih ku bee wahn gud ting if yu feel da way, kaa dat meenz dat yu hombl ahn yu vyoo ada peepl az moa impoatant dan yuself. Jehoava lov hombl peepl. (Ps. 138:6; Fil. 2:3) Bot Jehoava waahn yoo prayz ahn tu, an ih waahn yu inkorij yu bradaz ahn sistaz da di meetin dehn. (1 Tes. 5:11) Hihn lov yu an ih wahn gi yu di korij weh yu need.

11. Wich skripchaz ku help wi get oava wi fyaa?

11 Kansida sohn skripchaz weh ku help wi. Di Baibl seh dat evri now an agen aala wi wahn seh sohnting rang. (Jay. 3:2) Jehoava noh ekspek wi fi bee perfek, ahn wi bradaz ahn sistaz noh ekspek dat needa. (Ps. 103:12-14) Dehn da wi spirichwal famili, ahn dehn lov wi. (Maak 10:29, 30; Jan 13:35) Dehn andastan dat sohntaim wi koment dehn noh kom owt egzakli how wi mi waahn.

12-13. Weh wi laan fahn Nehimaiya ahn Joana egzampl?

12 Tink bowt sohn Baibl egzampl weh ku help yu fi deel wid yu fyaa. Wan egzampl wi ku kansida da Nehimaiya. Hihn mi serv eena di koat a wahn powaful king. Nehimaiya mi sad bikaaz ih mi hyaa dat di Jooz stilyet neva bil bak di waal ahn gayt dehn da Jeroosalem. (Neh. 1:1-4) Imajin how fraitn ahn nervos hihn mosi mi feel wen di king mi aks ahn wai ih mi luk soh sad! Nehimaiya mi hori seh wahn lee pryaa ahn den ansa di king. Wen di king mi hyaa weh Nehimaiya mi ga fi seh, ih akchwali mi en op di du wahn lat fi help Gaad peepl. (Neh. 2:1-8) Now tink bowt Joana egzampl. Wen Jehoava mi aks ahn fi goh taak tu di peepl da Niniveh, Joana mi soh fraitn dat hihn mi ron weh eena di opozit dairekshan. (Jonah 1:1-3) Bot wid Jehoava help, Joana mi finish ih asainment. Ahn di mesij hihn mi kehr tu di peepl da Niniveh mi help dehn wahn lat. (Jonah 3:5-10) Nehimaiya egzampl teech wi dat ih veri impoatant fi pray bifoa wi ansa. Ahn Joana egzampl teech wi dat noh mata how frayd wi mait feel, Jehoava ku help wi fi serv ahn. Yu tink eni kangrigayshan kuda eva bee az fraitnin az di peepl da Niniveh?

13 How yu ku gi koments weh wahn inkorij yu bradaz ahn sistaz da di meetin dehn? Mek wi kansida wahn fyoo gud sojeshan.

14. Wai wi shuda pripyaa gud fi wi meetin dehn, ahn wen wi ku du dat?

14 Pripyaa fi aala di meetin dehn. Wen yu plan hed ahn pripyaa gud, yu wahn ga moa korij fi koment. (Prov. 21:5) Af koars, aala wi noh ga di sayhn skejul fi pripyaa fi di meetin dehn. Eloise, wahn wido eena ih  80ʼs, staat pripyaa fi di Wachtowa Stodi erli eena di week. Shee seh: “Ai injai di meetin dehn moa if Ah stodi heda taim.” Joy, wahn sista weh werk ful-taim, skejul taim pahn Satideh fi stodi ih Wachtowa. Shee seh: “Ai laik fi ga di lesn fresh eena mi main.” Ike, wahn bizi elda weh di painyaa, seh: “Ai fain dat weh werk bes fi mee da fi stodi lee bit lee bit joorin di week insteda sidong ahn stodi di hoal ting wan lik.”

15. How yu ku pripyaa gud fi di meetin?

15 Weh wi haftu du fi pripyaa gud fi di meetin? Evri taim yu wahn stodi, di fos ting yu shuda du da pray an aks Jehoava fi hoali spirit. (Look 11:13; 1 Jan 5:14) Den tek wahn fyoo minits fi luk oava di lesn. Luk pahn di taitl, di sobhedin dehn, di pichaz, ahn di teechin baks dehn. Chrai andastan how dehn kanek tu wan anada. Den wen yu stodi eech paragraaf, reed az moch a di skripcha dehn az yu kud. Meditayt pahn di infamayshan, espeshali di paats weh yu waahn koment pan. Di beta yu pripyaa, di moa yu wahn benifit ahn di eeziya ih wahn bee fi mek yu gi wahn koment.—2 Kor. 9:6.

16. Weh toolz yu ga fi help yu, ahn how yu ku yooz dehn?

16 If pasabl, yooz di dijital toolz weh avaylabl eena wahn langwij weh yu noa. Jehoava gi wi lata ilekchranik toolz fi help wi pripyaa fi di meetin dehn. Di JW Library® ap help wi fi dongload wi stodi poblikayshan dehn rait tu wi foan er tablet. Den wi ku stodi, er at lees reed er lisn tu di mateeryal, noh mata wehpaat wi deh. Som a wi bradaz ahn sistaz yooz dis tool fi stodi wail dehn di chravl. Som a dehn yooz it joorin dehn lonch brayk da skool er da werk. Di Watchtower Library ahn di Wachtowa ONLAIN LAIBRImek it eeziya fi du risaach fi fain owt moa bowt weh wi di stodi.

Wen yoo skejul taim fi pripyaa fi di meetin dehn? (Paragraaf 14-16) *

17. (a) Wai ih gud fi pripyaa moa dahn wan koment? (b) Weh yu mi laan fahn di veedyo Mek Fren Wid Jehoava—Pripyaa Yu Koment?

17 If pasabl, pripyaa moa dahn wan koment fi eech lesn. Wai? Bikaaz yu noh mait geh di chaans fi gi yu koment evri taim yu put op yu han. Adaz eena di kangrigayshan mait put op dehn han sayhn taim laik yoo, an di kandokta mait kaal pahn wan a dehn. Sohntaim di kandokta mait noh kaal pahn evribadi weh waahn koment bikaaz ih haftu mek shoar di meetin en pahn taim. Soh if ih noh kaal pahn yu di fos taim yu put op yu han, noh geh beks ahn noh geh diskorij. If yu pripyaa moa dahn wan koment, yu wahn stil ga plenti chaans fi tek paat eena di diskoshan. Maybi yu ku pripyaa wahn koment pahn wahn skripcha. An if yu kud, ih  wuda gud fi pripyaa wahn koment eena yu oan werdz. *

18. Wai wi shuda kip wi koment dehn shaat?

18 Kip yu koment dehn shaat. Lata taim di moas inkorijin koment dehn shaat ahn sweet. Soh chrai fi mek yu koment dehn eena bowt 30 sekants er les. (Prov. 10:19; 15:23) If yoo di koment da di meetin dehn fi yaaz, ih veri impoatant dat yu set wahn gud egzampl eena dis. If yu gi sohn komplikaytid ansa weh laas fi wahn fyoo minits, adaz eena di kangrigayshan mait feel laik dehn kuda neva koment az gud az yoo. Ahn wen wi kip wi koment dehn shaat, wahn lat moa peepl wahn ku tek paat eena di meetin. Soh espeshali if yoo da di fos wan fi ansa pahn wahn paragraaf, kip yu ansa shaat ahn schrayt tu di point. Noh chrai kova aala di infamayshan eena di paragraaf. Afta sohnbadi don ansa di mayn point a di paragraaf, yu ku ad moa deetayl er koment pahn ada points.—Si di baks “ Weh Ah Ku Koment Pan?

19. How di kandokta ku help yu, bot weh yoo haftu du?

19 Mek di kandokta noa if yu waahn koment pahn wahn spesifik paragraaf. If yu disaid fi du dis, yu shuda tel di kandokta wel bifoa di meetin staat. Wen di taim kohn fi koment pahn da paragraaf, mek shoar yu put op yu han kwik inof ahn hai inof soh dat di kandokta ku seeʼt.

20. How wahn kangrigayshan meetin da laik wahn meel weh yu shayr wid frenz?

20 Tink bowt di kangrigayshan meetin laik if da wahn meel weh yu shayr wid yu frenz. Imajin sohn bradaz ahn sistaz eena di kangrigayshan plan wahn baabikyoo ahn dehn aks yu fi bring wahn lee sohnting fi shyaa wid evribadi. Weh yu wuda du? Yu mait feel wahn lee bit nervos, bot yu praabli wuda chrai yu bes fi bring sohnting weh evribadi wuda injai. Jehoava invait wi tu di meetin dehn ahn hihn ful op di taybl wid lata gud spirichwal food. (Ps. 23:5; Mach. 24:45) Ahn hihn hapi wen wee bring wahn lee gif fi shayr, az lang az da di bes weh wi ku giv. Soh pripyaa gud ahn koment az moch az yu kud. Den yu noh jos wahn eet fahn Jehoava taybl, bot yu wahn bring wahn gif fi shayr wid di res a di kangrigayshan tu.

SANG 2 Jehoava Da Yu Naym

^ par. 5 Aala wi lov Jehoava ahn wi hapi fi prayz ahn, jos laik di saamis Dayvid. Wi ga wahn speshal apachooniti fi taak bowt humoch wi lov Jehoava wen wi meet wid wi kangrigayshan fi wership. Bot som a wi fain it haad fi koment da di meetin dehn. If yoo fays da chalenj, dis aatikl ku help yu andastan wai yu mait bee frayd fi koment. Ih ku aalso help yu fi si how yu ku get oava yu fyaa.

^ par. 8 Malachi 3:16: “Joorin da taim deh, di wan dehn weh di fyaa Jehoava mi-di taak wid wan anada, eech wan wid ih fren, ahn Jehoava mi-di pay atenshan ahn lisn. Ahn wahn buk mi geh rait op fronta Gaad weh gat een di naym a aal hoo fyaa Jehoava ahn meditayt pahn fi hihn naym.”

^ par. 17 Pahn jw.org/bzj, wach di veedyo Mek Fren Wid Jehoava—Pripyaa Yu Koment. Luk anda BAIBL TEECHINZ > PIKNI.

^ par. 64 DI PICHA: Bradaz ahn sistaz hapi fi tek paat wen di kangrigayshan di stodi Di Wachtowa.

^ par. 66 DI PICHA: Som a di bradaz ahn sistaz weh wi mi si di tek paat eena di Wachtowa Stodi eena di fos picha. Eevn doa eech wan ga wahn difrent skejul, aala dehn mek taim fi stodi di lesn bifoa di meetin.