Skip tu di aatikl

Skip tu lis a tapik

 STODI AATIKL 1

“Noh Wori, Kaaz Ai Da Yu Gaad”

“Noh Wori, Kaaz Ai Da Yu Gaad”

“Noh bee frayd, kaaz Ai deh wid yu. Noh wori, kaaz Ai da yu Gaad. Ai wahn schrentn yu, fi shoar, Ai wahn help yu.”—ISA. 41:10.

SANG 7 Wi Schrent Kohn Fahn Jehoava

WEH WI WAHN DISKOS? *

1-2. (a) How Isaiah 41:10 mi afek wahn sista weh naym Yoshiko? (b) Hoo aal ku benifit fahn di mesij eena Isaiah 41:10?

WAHN faytful Kristyan sista weh naym Yoshiko mi gaahn da dakta wan day ahn di dakta mi giv ahn bad nyooz. Di dakta mi tel ahn dat ih onli ga wahn fyoo moa monts fi liv. Weh shee mi du? Yoshiko mi memba wan a ih fayvrit Baibl vers, Isaiah 41:10. (Reed.) * Den shee mi tel di dakta kaam-wan dat shee neva frayd, bikaaz Jehoava mi-di hoal fi shee han. * Di komfertin werdz eena da vers mi help wi dyaa sista fi chros eena Jehoava noh mata wat. Da sayhn vers ku komfert wee wen wi di goh chroo seeryos chraiyalz. Fi andastan how ih ku help wi, mek wi diskos wai Gaad mi gi Aizaiya da mesij.

2 Di fos reezn wai Jehoava mi mek Aizaiya rait dong da mesij da-mi fi komfert di Jooz. Di Babiloanyan dehn mi wahn kyapcha di Jooz ahn foas dehn fi liv da Babilan. Bot da mesij da neva jos fi di Jooz. Jehoava mi mek Aizaiya rait it dong soh dat aala Gaad peepl fahn den til now ku benifit fan it. (Isa. 40:8; Roam. 15:4) Tudeh, wee di liv eena “terabl taimz,” ahn wi need di inkorijment weh wi ku geh fahn di buk a Isaiah now moa dan eva.—2 Tim. 3:1.

3. (a) Weh pramis fahn Isaiah 41:10 wahn bee di yaateks fi 2019? (b) Wai wi need dehnya pramis?

3 Eena dis aatikl, wi wahn diskos chree a di pramis dehn weh Jehoava mi mek da Isaiah 41:10 ahn wi wahn si how  dehn ku schrentn wi fayt. Dehnya chree pramis da: (1) Jehoava wahn deh wid wi, (2) hihn da fi wee Gaad, ahn (3) hihn wahn help wi. Wi need dehnya pramis * bikaaz, jos laik Yoshiko, wee goh chroo chraiyalz eena laif. Pahn tap a dat, wi haftu deel wid di presha weh dis werl put pahn wi. Som a wi eevn di sofa persikyooshan fahn di govament dehn. Soh mek wi kansida dehnya pramis wan bai wan.

“AI DEH WID YU”

4. (a) Wich pramis wi wahn kansida fos? (Koment pahn di futnoat.) (b) How Jehoava tel wi how ih feel bowt wi? (c) How yoo feel bowt weh Jehoava seh?

4 Di fos pramis weh Jehoava gi wi da: “Noh bee frayd, kaaz Ai deh wid yu.” * Wi noa dat Jehoava deh wid wi bikaaz hihn gi wi ih ful atenshan an ih chreet wi wid lov. Noatis how ih tel wi humoch ih lov wi. Ih seh: “Bikaaz yu preshos tu mee, Ai aana yu, an Ai lov yu.” (Isa. 43:4) Notn eena di yoonivers ku mek Jehoava stap lov enibadi hoo serv ahn. Hihn aalwayz laayal tu fi hihn peepl. (Isa. 54:10) Fi hihn lov ahn frenship gi wi korij. Hihn wahn protek wee tudeh, jos laik how ih mi protek fi hihn fren Aybram (Aybraham). Jehoava mi tel ahn: “Noh bee frayd, Aybram. Ai da wahn sheel fi yu.”—Gen. 15:1.

Wid Jehoava help, wi ku paas chroo eni kaina chraiyal weh wi fays, eevn if di chraiyal da laik wahn riva weh flod er laik wahn faiya weh di blayz op (Paragraaf 5-6) *

5-6. (a) How wi noa dat Jehoava waahn help wi wen wi di goh chroo chraiyalz? (b) Weh lesn wi laan fahn Yoshiko egzampl?

5 Wi noa dat Jehoava waahn help wi wen wi di goh chroo chraiyalz bikaaz a weh ih pramis ih peepl. Ih tel dehn: “Wen yu paas chroo di waata, Ai wahn deh wid yu, ahn chroo di riva dehn, dehn noh wahn flod oava yu. Wen yu waak chroo di faiya, yu noh wahn bon op, ner di flaym wahn swinj yu.” (Isa. 43:2) Weh da pramis meen?

6 Jehoava noh pramis fi tek weh di prablemz weh mek laif haad fi wi. Bot wen wi ga soh moch prablem dat dehn kohn pahn wi laik wahn “riva,” hihn noh wahn mek wi jrongdid. Wen wi feel laik wi prablem dehn di bon wi laik “faiya,” hihn noh wahn mek wi bon op. Jehoava garantee dat hihn  wahn deh wid wi, an dat ih wahn help wi fi “paas chroo” dehndeh chalenjiz. Weh Jehoava wahn du? Hihn wahn help wi fi stay kaam ahn noh wori soh dat wi ku stay faytful tu hihn, eevn if dat mait kaas wi laif. (Isa. 41:13) Yoshiko, hoo wi mi menshan erliya eena dis aatikl, mi ekspeeryens dat fi ihself. Fi shee daata seh: “Wi mi sopraiz fi si how wi mami mi soh kaam. Wi mi si dat Jehoava mi giv ahn pees a main ahn haat fi chroo. Rait dong tu di day wi mami ded, ih mi taak tu di ners dehn ahn di ada payshent dehn bowt Jehoava ahn fi hihn pramis dehn.” Weh wi laan fahn Yoshiko egzampl? If wi chros eena Gaad wen ih pramis “Ai wahn deh wid yu,” den wee wahn bee schrang ahn ga korij wen wi di goh chroo chraiyalz tu.

“AI DA YU GAAD”

7-8. (a) Wat da di sekant pramis weh wi wahn kansida, ahn weh “wori” meenz eena dis vers? (b) Wai Jehoava mi tel di Jooz da Babilan: “Noh wori”? (c) Weh Isaiah 46:3, 4 seh weh mi help Gaad peepl noh fi wori?

7 Noatis di sekant pramis weh Aizaiya mi rait: “Noh wori, kaaz Ai da yu Gaad.” Weh dat meen? Di orijinal werd weh chranslayt az “wori” eena dis vers ga di aidyaa dat yu “stay di luk oava yu shoalda kaaz yu frayd sombadi er sohnting mait hert yu” er yu di “panik laik sohnbadi weh deh eena wahn daynjaros sichuwayshan.”

8 Wai Jehoava mi tel di Jooz weh mi-di liv da Babilan “noh wori”? Bikaaz hihn mi noa dat sohnting mi wahn hapm weh wuda fraitn di peepl weh mi liv deh. Tuwaadz di en a di 70 yaaz weh di Jooz mi liv da Babilan, di Meedo-Perzhan aami mi wahn atak di siti. Jehoava mi wahn yooz dis aami fi set fi hihn peepl free fahn Babilan. (Isa. 41:2-4) Wen di Babiloanyan dehn ahn di peepl fahn ada nayshanz weh mi liv rong da taim mi noa dat dehn enimi mi wahn soon atak dehn, dehn mi chrai inkorij wan anada ahn seh: “Bee schrang.” Dehn mi mek sohn moa aidol tu, kaa dehn mi hoap dat dehn faals gaad mi wahn protek dehn. (Isa. 41:5-7) Meenwail, Jehoava mi komfert di Jooz ahn tel dehn: “Yoo, Oa Izrel, da mai servant [noh laik di ada nayshan dehn] . . . Noh wori, kaaz Ai da yu Gaad.” (Isa. 41:8-10) Noatis dat Jehoava mi seh: “Ai da yu Gaad.” Wen Jehoava seh dat, ih mi-di rimain ih laayal servants dat ih neva faget dehn. Hihn da-mi stilyet dehn Gaad, ahn dehn da-mi fi hihn peepl. Ih mi tel dehn: “Ai wahn kehr unu . . . ahn reskyu unu.” Da pramis mosi mi gi di Jooz lata korij.—Reed Isaiah 46:3, 4. *

9-10. Wai wi noh fi frayd? Yooz di egzampl eena di paragraaf.

9 Now moa dan eva bifoa, peepl rong wi di wori bikaaz tingz jos di geh wos. Af koars, di saym kaina prablemz afek wee tu. Bot wee noh ga no reezn fi bee frayd. Jehoava tel wi: “Ai da yu Gaad.” How da pramis ku help wi noh fi wori?

10 Kansida dis iloschrayshan: Too peepl, Jim ahn Ben, deh pahn wahn playn weh di raak bikaaz wahn schrang breez di bloa. Az di playn bonks op ahn dong, di pailat vais kom oava di speeka: “Pleez kip aan unu seet belt. Wi wahn di flai chroo sohn schrang breez fi wahn wail.” Jim staat tu wori. Bot den di pailat seh: “Dis da yu pailat. Ah ga evriting anda kanchroal, soh noh wori.” Wen Jim hyaa dat, ih jos shayk  ih hed ahn seh: “How dat sopoas tu help wi?” Den ih noatis dat Ben noh luk laik ih di wori ataal. Soh Jim aks Ben: “How yoo ku sidong deh soh kaam?” Ben smail ahn tel ahn: “Bikaaz Ai noa dis pailat gud. Hihn da mai pa!” Den Ben seh: “Mek Ai tel yu bowt mi pa. Ah shoar dat wans yu noa hihn ahn how gud ih ku flai playn, yu noh wahn wori nohmoh.”

11. Weh lesn wi ku laan fahn di iloschrayshan wid di too peepl pahn di playn?

11 Weh lesn wi ku laan fahn dis iloschrayshan? Laik Ben, wee kaam bikaaz wi noa wi hevnli Faada, Jehoava, gud gud. Wi noa dat hihn wahn gaid wi ahn kip wi sayf noh mata how big di prablemz wi mait haftu fays joorin di laas dayz a dis sistem. (Isa. 35:4) Wi chros eena Jehoava, soh wi noh wori eevn wen di res a di werl soh fraitn dat dehn noh noa weh fi du. (Isa. 30:15) Di ada way wi ak laik Ben da wen wi tel ada peepl wai wi chros eena Gaad. Den, dehn wahn ku bee shoar fi dehnself dat noh mata weh chalenjiz dehn haftu fays, Jehoava wahn sopoat dehn.

“AI WAHN SCHRENTN YU [AHN] HELP YU”

12. (a) Wat da di terd pramis weh wi wahn kansida? (b) Weh Isaiah 40:10 mek wi memba wen ih taak bowt Jehoava “han”?

12 Kansida di terd pramis weh Aizaiya mi rait: “Ai wahn schrentn yu, fi shoar, Ai wahn help yu.” Aizaiya mi don diskraib how Jehoava mi wahn schrentn ih peepl wen ih seh: “Jehoava wahn kohn wid powa, An ih han wahn rool far ahn.” (Isa. 40:10) Lata taim di Baibl yooz di werd “han” fi reprizent powa. Soh wen ih seh dat Jehoava “han wahn rool,” ih rimain wi dat Jehoava da wahn powaful King. Nobadi ahn notn schranga dan Jehoava. Hihn mi yooz ih schrent fi sopoat fi hihn peepl  eena di paas, an ih kantinyu fi schrentn ahn protek aal hoo chros eena ahn tudeh.—Deut. 1:30, 31; Isa. 43:10, ftn.

No wepan wahn ga sokses gens Jehoava schrang han (Paragraaf 12-16) *

13. (a) Wen Jehoava kip ih pramis fi schrentn wi di moas? (b) Weh garantee gi wi schrent ahn kanfidens?

13 Espeshali wen peepl persikyoot wi, Jehoava kip ih pramis: “Ai wahn schrentn yu.” Eena som paats a di werl tudeh, wi enimi dehn di chrai haad fi stap wi fahn preech er fi ban wi aaganaizayshan. Bot eevn wid aala da presha, wi noh haftu frayd er wori wen dehn atak wi. Jehoava gi wi wahn pramis weh gi wi aal di schrent ahn kanfidens weh wi need. Hihn pramis wi: “No wepan weh dehn bring gens yu wahn ga eni kaina sokses.” (Isa. 54:17) Da pramis rimain wi a chree impoatant ting.

14. Wai wi noh sopraiz wen Gaad enimi dehn atak wi?

14 Fos, az Krais falowaz, wi ekspek dat peepl wahn hayt wi. (Mach. 10:22) Jeezas mi prafesai dat joorin di laas dayz fi hihn disaipl dehn mi wahn fays lata persikyooshan. (Mach. 24:9; Jan 15:20) Sekant, Aizaiya prafesi tel wi dat wi enimi dehn wahn du moa dan jos hayt wi, dehn wahn yooz aal difrent kaina wepan gens wi. Soh faar dehn twis di chroot fi chrik peepl, dehn tel lata lai bowt wi, ahn dehn persikyoot wi ahn chreet wi bad. (Mach. 5:11) Jehoava noh wahn stap wi enimi dehn fahn yooz dehnya wepan fi fait gens wi. (Ifee. 6:12; Rev. 12:17) Bot wi noh haftu bee frayd. Wai nat?

15-16. (a) Wat da di terd ting weh wi haftu memba, ahn how Isaiah 25:4, 5 help wi fi du dat? (b) Weh Isaiah 41:11, 12 seh wahn hapm tu enibadi weh fait gens wi?

15 Kansida di terd ting weh wi haftu memba. Jehoava mi seh dat “no wepan” weh dehn yooz gens wi wuda “ga eni kaina sokses.” Jos laik how wahn waal ku protek wi fahn di schrang breez a wahn harikayn, da rait soh Jehoava protek wi wen “di kruwil roola dehn blaas wi laik wahn staam.”  (Reed Isaiah 25:4, 5.) * Notn weh wi enimi dehn du wi ku stap Jehoava fahn gi wi evalastin laif.—Isa. 65:17.

16 Jehoava schrentn wi chros eena hihn wen ih tel wi weh wahn hapm tu di peepl weh “di geh beks wid” wi. (Reed Isaiah 41:11, 12.) * Noh mata how haad wi enimi dehn fait gens wi er how bad di waar get, di en rizolt wahn bee di saym: Enibadi weh fait gens Gaad peepl “noh wahn bee notn ahn dehn wahn ded.”

HOW WI SCHRENTN WI CHROS EENA JEHOAVA

Wi wahn chros Jehoava moa if wi reed bowt ahn eena di Baibl (Paragraaf 17-18) *

17-18. (a) How wi chros eena Gaad wahn groa wen wi reed di Baibl? Yooz di egzampl eena di paragraaf. (b) How wi wahn benifit if wi meditayt pahn di yaateks fi 2019?

17 Di moa wi geh fi noa Jehoava, di moa wi wahn chros ahn. Ahn di onli way wi ku reeli geh fi noa Jehoava gud da fi reed di Baibl ahn den meditayt pahn weh wi reed. Di Baibl tel wi egzakli how Jehoava mi protek ih peepl eena di paas. Ahn wen wi reed bowt weh hihn mi du fi ih peepl eena di paas, wi wahn bee eevn moa shoar dat ih wahn tek kayr a wi now.

18 Kansida wahn byootiful iloschrayshan weh Aizaiya yooz fi shoa wi how Jehoava protek wi. Ih seh dat Jehoava da laik wahn shepad ahn dat Gaad peepl da laik sheep. Noatis weh Aizaiya seh bowt Jehoava: “Wid ih han ih wahn gyada tugeda ih lam dehn, ahn kloas tu ih ches ih wahn kehr dehn.” (Isa. 40:11) Wen wi feel laik Jehoava di hog wi tait, wi feel sayf ahn song. Fi help wi feel kaam eevn wen wi di goh chroo prablemz, di faytful ahn diskreet slayv chooz Isaiah 41:10 fi bee di yaateks fi 2019: “Noh wori, kaaz Ai da yu Gaad.” Meditayt pahn da pramis. Ih wahn schrentn yu fi deel wid di chalenjiz weh yu wahn fays eena di fyoocha.

SANG 38 Gaad Wahn Mek Yu Schrang

^ par. 5 Di yaateks fi 2019 gi wi chree reezn wai wi noh fi wori eevn if bad tingz hapm eena di werl er eena wi laif. Eena dis aatikl wi wahn diskos dehn chree reezn ahn wi wahn si how dehn ku help wi noh fi wori tu moch ahn fi chros eena Jehoava moa. Meditayt pahn di yaateks. Laan it bai haat if yu kud. Ih wahn gi yu di schrent fi fays di chalenjiz weh di fyoocha wahn bring.

^ par. 1 Isaiah 41:10: “Noh bee frayd, kaaz Ai deh wid yu. Noh wori, kaaz Ai da yu Gaad. Ai wahn schrentn yu, fi shoar, Ai wahn help yu, Ai wahn reeli hoal aan tu yu wid mai rait han a raichosnis.”

^ par. 1 Si The Watchtower, Joolai 2016, payj 18.

^ par. 3 WEH IH MEEN? Wen Jehoava pramis wi sohnting ih wahn kohn chroo fi shoar. Di pramis dehn weh Jehoava gi wi wahn help wi noh fi wori tu moch bowt di prablemz weh mait kom op eena wi laif.

^ par. 4 Eena Isaiah 41:10, 13, ahn 14, Aizaiya mi rait “noh bee frayd” chree taim. Dehn sayhn vers yooz di werd “Ai” wahn fyoo taimz, an eech taim ih di rifaa tu Jehoava. Wai Jehoava mi mek Aizaiya yooz di werd “Ai” soh moch? Fi mek it playn fi si dat onli if wi chros eena Jehoava wi wahn ku kip kaam ahn noh frayd fi notn.

^ par. 8 Isaiah 46:3, 4: “Lisn tu mi, Oa hows a Jaykop, an aala unu weh lef fahn di hows a Izrel, unu weh Ai don sopoat fahn unu baan ahn kehr fahn wen unu mi deh eena di oom. Til unu groa oal Ai wahn bee di saym; til unu hyaa gray Ai wahn stil di kehr unu. Jos laik how Ah mi don du, Ai wahn kehr unu ahn sopoat unu ahn reskyu unu.”

^ par. 15 Isaiah 25:4, 5: “Bikaaz da yoo protek di hombl wan dehn, ahn da yoo protek di poa peepl weh di sofa. Yu da laik wahn shelta fahn wahn staam, ahn wahn shayd fahn di heet. Wen di kruwil roola dehn blaas wi laik wahn staam, laik di heet eena wahn dezert, yu sailens di naiz weh di schraynja dehn mek. Jos laik how di shado fahn wahn klowd kaam di heet, da rait soh di sang a di kruwil roola dehn wahn geh kwaiyet.”

^ par. 16 Isaiah 41:11, 12: “Luk! Aala dehn wan weh di geh beks wid yu wahn geh put tu shaym. Dehn wan weh fait gens yu noh wahn bee notn ahn dehn wahn ded. Yu wahn saach fi dehn wan weh fait gens yu, bot yu noh wahn fain dehn. Dehn peepl weh di waar gens yu noh wahn bee notn, notn at aal.”

^ par. 56 DI PICHA: Aala di membaz a wahn famili fays chraiyalz eeda wid dehn helt, eena di minischri, da werk, er da skool.

^ par. 58 DI PICHA: Di polees rayd wahn meetin weh di Witnisiz di ga eena sohnbadi hows, bot di bradaz ahn sistaz noh panik.

^ par. 60 DI PICHA: Regyula Famili Wership gi wi di schrent fi indyoar.