Skip tu di aatikl

Skip tu lis a tapik

Dehn Mi Wilin fi Goh Help Owt—Da Madagascar

Dehn Mi Wilin fi Goh Help Owt—Da Madagascar

WAHN painyaa eena ih 20ʼs weh mi naym Sylviana seh: “Wen Ah lisn tu aala di ekspeeryens fahn mi fren dehn weh di serv eena wahn difrent ayrya, Ah kyaahn wayt fi goh feel da saym hapinis tu. Bot, Ah feel frayd dat Ah wahn kyaahn goh help owt sohnweh els.”

Yoo feel di saym way laik Sylviana sohntaim? Yoo waahn goh serv sohnweh weh need help eena di minischri bot wanda if yu wahn eva reech da goal? If dis da yu sichuwayshan, ga korij! Jehoava di help towznz a bradaz ahn sistaz fi deel wid prablemz weh mait stap dehn fahn du moa eena dehn minischri. Fi fain owt how Jehoava help dehn, mek wi vizit Madagascar, di foat bigis ailan pahn di ert.

Lata peepl eena dis paat a Africa lov ahn rispek di Baibl. Joorin di paas ten yaaz, moa dan 70 poblishaz ahn painyaaz fahn 11 difrent konchri * gaahn serv deh. Ahn wahn lata di poblisha dehn fahn rait deh mi wilin fi moov soh dat dehn ku help owt eena di preechin werk pahn dis ailan. Mek wi laan bowt som a dehn.

FYAA AHN DISKORIJMENT

Perrine ahn Louis

Louis ahn Perrine, wahn kopl eena dehn 30ʼs, mi moov fahn France tu Madagascar. Fi yaaz, dehn mi-di tink bowt moov ahn du moa eena dehn minischri, bot Perrine kudn mek op ih main. Shee seh: “Ah mi frayd fi goh da wahn plays weh Ah noh noa. Ah mi frayd fi lef mi famili, kangrigayshan, hows, aala di plays dehn weh Ai noa, ahn how wi yoostu liv. Da mee stap mi oanself sayka weh Ah mi-di wori soh moch.” Wel, eena 2012, Perrine ahn Louis moov. How shee feel bowt dehn disizhan? Shee seh: “Now, wen Ah luk bak, Ah ku si how Jehoava mi werk tingz owt fi wi ahn dat mi reeli schrentn wi fayt.” Louis seh: “Da di fos Memoaryal wi gaahn tu ya, ten a wi Baibl stodiz mi dehdeh!”

 Weh mi help di kopl fi stay eena dehn asainment wen prablemz kom op? Dehn bayg Jehoava eena pryaa fi di schrent fi bayr op. (Fil. 4:13) Louis seh: “Wi si how Jehoava ansa wi pryaaz ahn gi wi ‘fi hihn pees.ʼ Wi foakos pahn di hapinis wi geh fahn wi servis. Ahn wi fren dehn fahn bak hoam sen e-mayl ahn letaz tu wi fi inkorij wi noh fi giv op.”—Fil. 4:6, 7; 2 Kor. 4:7.

Jehoava mi bles Louis ahn Perrine. Louis seh: “Eena Aktoaba 2014, wi gaahn da di Baibl Skool fi Kristyan Koplz * da France. Dat da-mi wahn gif fahn Jehoava weh wi wahn neva faget.” Da dehn grajuwayshan, dehn mi hapi fi get asain bak tu Madagascar.

“NOH WORI, WI WAHN PROWD A UNU!”

Nadine ahn Didier

Didier ahn Nadine, wahn oalda kopl fahn France, moov tu Madagascar eena 2010. Didier seh: “Wi mi painyaa wen wi mi yonga, ahn den wi rayz chree chiljren. Wen dehn ton adolt, wi staat tu tink bowt goh serv eena wahn nada konchri.” Nadine seh: “Ah neva waahn deh faar fahn mi chiljren, bot dehn tel wi: ‘Noh wori, if unu goh serv eena wahn nada konchri, wi wahn prowd a unu!ʼ Dis mi reeli inkorij wi fi moov. Wi liv faar fahn wi chiljren now, bot wi glad wi ku stil taak tu dehn aal di taim.”

Di peepl dehn fahn Madagascar taak di Malagasy langwij. Da-mi wahn chalenj fi Didier ahn Nadine laan dis langwij. Nadine joak rong ahn seh: “Wi noh deh eena wi 20ʼs nohmoh.” Soh weh dehn du? Dehn jain wahn French kangrigayshan fi di biginin. Laytaraan, wen dehn mi feel laik dehn ku laan di langwij, dehn jain wahn Malagasy kangrigayshan. Nadine seh: “Lata peepl wi meet eena di minischri reeli laik stodi di Baibl. Wahn lata taimz dehn tel wi tanks fi goh stodi di Baibl wid dehn. Sohntaim, Ah feel laik Ah di jreem. Ah lov painyaa eena di teritori ya. Wen Ah get op da maanin, Ah tel miself, ‘Dis soh wandaful, Ah gwehn preech tudeh!ʼ”

Didier staat laaf wen hihn memba di taim ih mi-di fos laan Malagasy. Ih seh: “Ah mi-di du mi paat fi di meetin bot Ah neva andastan di ansa dehn fahn di bradaz ahn sistaz. Di onli ting Ah kuda mi seh da, ‘Tank yu.ʼ Wahn taim afta Ah tel wahn sista tanks fi ih ansa, di bradaz weh mi-di sidong bihain shee staat tu mek aal kaina sain tu mi fi mek Ah noa dat di ansa neva karek. Soh Ah hori kaal pahn wahn nada brada weh mi gi di karek ansa—wel, at lees Ah mi-di hoap da mi di karek ansa.”

SHEE MI WILIN FI MOOV

Da wahn kanvenshan eena 2005, Thierry an ih waif, Nadia, mi si di jrama “Pursue Goals That  Honor God.” Di jrama mi toch dehn haat; da mi bowt Timoti. Ih mek dehn reeli waahn goh serv sohnweh els. Thierry seh: “Wen di jrama don, Ah aks mi waif, ‘Wehpaat wi gwehn?ʼ Shee seh ih mi-di tink di saym ting.” Lee bit afta dat, dehn staat werk tuwaadz dehn goal. Nadia seh: “Wi geh rid a tingz lee bit bai lee bit til aal weh wi oan fit eena foa sootkays!”

Faar lef: Nadia ahn Marie-Madeleine; Faar rait: Thierry

Fahn dehn get da Madagascar eena 2006, dehn di injai dehn minischri. Nadia seh: “Di peepl wi meet mek wi feel soh hapi.”

Siks yaaz layta, dehn fays wahn chalenj. Nadia mami, Marie-Madeleine, weh mi liv da France, faal dong ahn brok ih han ahn hert ih hed. Afta dehn taak tu di dakta weh mi-di ten tu ahn, dehn aks dehn mami fi kohn liv wid dehn da Madagascar. Eevn doa shee mi 80 yaaz oal, shee gaahn liv wid dehn. How shee feel fi liv deh? Ih seh: “Sohntaim ih haad fi ajos, bot eevn doa Ah kyaahn du moch, Ah stil feel laik Ah di du sohnting eena di kangrigayshan. Mi daata an ih hozban ku kantinyu preech eena di minischri ya bikaaz Ah mi kohn liv wid dehn. Dis mek Ah feel reeli hapi.”

“JEHOAVA HELP MI”

Riana di gi wahn taak eena di Tandroy langwij

Riana da wahn brada eena ih erli 20ʼs. Hihn da fahn Alaotra Mangoro, di eestan paat a Madagascar. Ih mi du gud da skool an ih mi waahn goh ferda ih ejukayshan. Bot, afta ih don stodi di Baibl, ih chaynj ih main. Ih seh: “Ah chrai mi bes fi finish hai skool, ahn Ah pramis Jehoava, ‘If Ah paas mi fainal egzam, Ah wahn staat painyaa.ʼ” Wel, Riana kip ih pramis fi chroo; afta ih grajuayt, ih moov een wid wahn painyaa brada, geh paat-taim werk, ahn staat painyaa. Ih seh. “Da mi di bes disizhan Ah eva mek.”

Bot, Riana relitiv dehn neva andastan wai ih mek dis disizhan. Ih mi seh: “Mi pa, mi onkl, ahn mi aanti mi-di inkorij mi fi goh ferda mi ejukayshan. Bot, Ah neva waahn stap painyaa.” Noh lang afta dat, Riana mi waahn goh serv wehpaat dehn need help eena di minischri. Weh mek ih waahn du dis? Ih seh: “Sohn teef brok eena wi hows ahn gaahn wid evriting weh Ah oan. Ih mek Ah memba weh Jeezas mi seh bowt fi “sayv op richiz eena hevn.” Ah disaid fi werk haada fi sayv op spirichwal richiz.” (Mach. 6:19, 20) Soh ih moov tu di sodan paat a di konchri, bowt 800 mailz (1,300 km) fahn weh dehn mi-di liv. Da ayrya da weh di Antandroy peepl liv. Weh mek ih gaan deh?

Wel, wahn mont bifoa dehn teef owt ih tingz, ih mi staat wahn Baibl stodi wid too Antandroy man. Ih mi laan fi seh wahn fyoo tingz eena fi dehn langwij ahn staat tink bowt humoch moa Antandroy peepl noh hyaa di gud nyooz yet. Ih seh: “Ah pray tu Jehoava fi help mi moov tu dis ayrya soh dat Ah kuda mi help di peepl dehn.”

Soh Riana moov, ahn rait away ih fays wahn prablem. Ih kudn geh wahn jab. Wahn man aks ahn seh: “Da wai yu kohn ya? Peepl lef fahn dis plays ahn goh weh yoo kohn fram fi luk fi jab!” Too weeks layta, Riana neva ga wahn kapa tu ih naym an ih mi waahn goh da di reejinal kanvenshan, bot now ih neva noa weh fi du. Wel ih gaan, ahn pahn di laas day a di kanvenshan, wahn brada put wahn lee sohnting eena ih pakit. Da mi inof moni fi get bak hoam tu di Antandroy ayrya ahn staat wahn lee yoagert bizniz. Riana seh: “Jehoava help mi egzakli wen Ah mi need help. Ah ku kantinyu fi help di peepl weh noh hyaa bowt Jehoava yet!” Di kangrigayshan mi need lata help tu. Riana seh: “Ah gi wahn poblik taak evri ada week. Jehoava di chrayn mi chroo ih aaganaizayshan.” Tudeh, Riana stil di liv deh ahn di preech di gud nyooz tu hooeva waahn laan bowt Jehoava.

 ‘DI GAAD A CHROOT WAHN BLES YUʼ

Jehoava pramis wi dat if “enibadi weh deh pahn di ert saach fi wahn blesin, di Gaad a chroot wahn bles da persn.” (Isa. 65:16) Wen wi werk chroo wi prablemz soh dat wi ku du moa eena di minischri, Jehoava wahn bles wi. Memba Sylviana, weh wi mi taak bowt eena di biginin a dis aatikl, shee mi feel dat shee kyaahn goh help owt eena wahn difrent ayrya. Wai shee mi feel dis way? Ih seh: “Mi lef fut bowt chree-an-a-haaf inch (9 cm) shaata dan mi rait fut. Soh Ah waak wid wahn limp an Ah geh taiyad eezi.”

Sylviana (pahn di lef) ahn Sylvie Ann (pahn di rait) ahn Doratine deh da midl. Dis da wen shee mi geh baptaiz

Stilyet, eena 2014, Sylviana teem op wid Sylvie Ann, wahn yong painyaa sista eena ih kangrigayshan ahn moov tu wahn smaal vilij 53 mailz (85 km) fahn dehn hoam. Eevn doa shee mi ga sohn prablemz fi deel wid, ih mi reech ih goal ahn Jehoava mi bles ahn. Shee seh: “Afta wan yaa eena mi nyoo asainment, mi Baibl stodi weh naym Doratine mi geh baptaiz da wi serkit asembli.”

“AI WAHN HELP YU”

Weh wi laan fahn di fayt a dehnya bradaz ahn sistaz? Wen wi chrai fi deel wid eni prablem soh dat wi ku du moa eena di minischri, wi geh fi si how Jehoava pramis kohn chroo eena wi persnal laif. Ih mi pramis wi: “Ai wahn schrentn yu, fi shoar, Ai wahn help yu.” (Isa. 41:10) Dis schrentn wi rilayshanship wid Jehoava. Ahn wen wi shoa dat wi wilin fi goh help owt eena di saym konchri wi liv er eena wahn difrent konchri, ih pripyaa wi fi ada asainment weh wi wahn get eena di nyoo werl. Da laik weh Didier, hoo wi mi taak bowt lee erliya, seh: “Wen wi goh help owt eena di minischri da wahn difrent plays, da gud chraynin fi di fyoocha!” Wi hoap dat lat moa bradaz ahn sistaz wahn soon geh dis chraynin!

^ par. 4 Dehnya painyaaz ahn poblishaz da fahn Canada, Czech Republic, France, Germany, Guadeloupe, Luxembourg, New Caledonia, Sweden, Switzerland, di United Kingdom, ahn di United States.

^ par. 8 Di Skool fi Kingdom Ivanjelaizaz tek di plays a dis skool. Eni brada er sista weh di painyaa eena wahn nada konchri, ahn weh kwalifai, ku goh da dis skool. Dehn ku eeda goh bak hoam er goh da wahn nada konchri weh dehn di ga di skool, if da eena di langwij weh dehn andastan.