Skip tu di aatikl

Skip tu lis a tapik

 STODI AATIKL 6

Stay Laayal!

Stay Laayal!

“Ah noh wahn giv op mi laayalti, eevn if Ah haftu ded!” —JOB 27:5.

SANG 34 Giv Yu Hoal Haat tu Gaad

WEH WI WAHN DISKOS? *

1. How di chree Witnisiz weh dis paragraaf taak bowt mi shoa dehn laayalti tu Jehoava?

IMAJIN dehnya chree sichuwayshan weh Jehoava Witnisiz sohntaim haftu deel wid. (1) Wahn yong gyal deh da skool wan day ahn di teecha aks aala di styoodents fi tek paat eena wahn haliday selibrayshan. Di yong gyal noa dat dis haliday noh pleez Gaad, soh shee noh jain een. (2) Wahn yong man weh shai di preech fahn hows tu hows. Hihn noa dat wan a ih klaasmayt liv da di neks hows, an ih memba dat ih klaasmayt mi mek fon a Jehoava Witnisiz bifoa. Bot stilyet, di yong man goh ahn preech da di hows. (3) Wahn man di werk haad fi sopoat ih famili, ahn wan day ih baas aks ahn fi du sohnting weh noh aanis er weh goh gens di laa. Eevn doa ih ku looz ih jab, di man eksplayn dat hihn haftu bee aanis an obay di laa bikaaz dat da weh Gaad koman ih peepl fi du.—Roam. 13:1-4; Heeb. 13:18.

2. Weh kweschanz wi wahn kansida, ahn wai?

2 Weh kwaliti yu si eena dehn chree Witnisiz? Yu wahn noatis moa dahn wan, laik di korij weh dehn shoa er dat dehn aanis. Bot wan kwaliti weh dehn shoa reeli preshos. Da kwaliti da laayalti. Eech wan a dehn shoa laayalti tu Jehoava. Eech wan a dehn rifyooz fi goh gens Gaad standadz. Dehn ak da way bikaaz a dehn laayalti. Fi shoar Jehoava wuda bee prowd a eech wan a dehn fi di laayalti weh dehn shoa. Wee waahn mek wi Faada eena hevn prowd a wi tu. Soh mek wi ansa dehnya kweschan: Wat da laayalti? Wai wi need laayalti? Ahn how wi ku schrentn wi dizaiya fi stay laayal eena dehnya terabl taimz?

WAT DA LAAYALTI?

3. (a) Weh laayalti meenz fi wee az Jehoava servants? (b) Gi sohn egzampl weh help wi fi andastan weh laayalti meenz.

3 Fi wee az Gaad servants, laayalti meenz dat wi lov Jehoava  wid aala wi haat ahn notn kyaahn kohn bitween wee ahn hihn, ahn bikaaz a dat, wi aalwayz du weh pleez hihn. Kansida how di Baibl yooz di werd laayalti. Di werd weh wi wuda chranslayt az “faytful” er “laayal” ku aalso meen kompleet, er helti. Fi egzampl, wen di Izrelait dehn mi aafa op wahn animal az wahn sakrifais tu Jehoava, di Laa mi seh dat di animal haftu bee helti. * (Lev. 22:21, 22) Gaad peepl dehn neva sopoas tu aafa op wahn animal weh mi misn wahn fut, wahn ayz, er wahn aiy, ner dehn neva fi aafa op wan weh mi sik. Tu Jehoava, ih mi veri impoatant dat dehn onli aafa op wahn animal weh mi kompleet, er helti. (Mal. 1:6-9) Ahn wee ku andastan wai Jehoava kay soh moch bowt dat. Wen wee bai sohnting, noh mata da wat, wi noh waahn notn weh noh di werk er weh ga pees misn. Wi waahn sohnting weh kompleet an eena gud kandishan. Jehoava feel di sayhn way bowt fi wee lov ahn laayalti. Ih haftu bee kompleet.

4. (a) How wahn imperfek persn ku bee laayal? (b) Akaadn tu Psalm 103:12-14, weh Jehoava ekspek fahn wi?

4 Yu tink wi haftu bee perfek fi bee laayal? Af koars nat! Wi mait feel laik wee noh kompleet, er dat wi mek lata mistayk. Bot kansida too reezn wai wi noh haftu wori. Fos, Jehoava noh foakos pahn wi mistayk dehn. Di Baibl seh: “Oa Jah, if wi mistayk dehn da di onli ting yu wach, Oa Jehoava, hoo kuda eva stan op fronta yu?” (Ps. 130:3) Hihn noa dat wi noh perfek ahn dat wi da sinaz, ahn stilyet ih redi ahn wilin fi fagiv wi. (Ps. 86:5) Sekant, Jehoava noa weh wi ku du ahn weh wi kyaahn du, an ih noh ekspek wi fi du moa dan weh wi kud. (Reed Psalm 103:12-14.) * Soh akaadn tu Jehoava, eena weh way wi ku bee kompleet?

5. Wai servants a Jehoava haftu ga lov fi bee laayal?

5 Servants a Jehoava haftu ga lov fi bee laayal. Wi lov fi Gaad ahn wi laayalti tu hihn az wi hevnli Faada mos aalwayz bee kompleet. If wi aalwayz lov Jehoava wid aala wi haat, eevn anda tes, den wi ku seh wi laayal. (1 Chron. 28:9; Mach. 22:37) Tink bak tu di chree Witnisiz weh wi mi reed bowt da di biginin a dis aatikl. Wai dehn ak da way? Yu tink di yong gyal da skool noh waahn ga fon, er di yong man di hoap dat ih klaasmayt wahn shaym ahn wen ih di preech, er di man weh haftu sopoat ih famili waahn looz ih jab? Af koars nat. Bot dehn noa dat Jehoava ga raichos standadz, ahn dehn waahn du evriting weh dehn kud fi pleez dehn hevnli Faada. Bikaaz dehn lov Gaad, dehn aalwayz tink bowt hihn wen dehn di mek disizhanz. Ahn soh dehn shoa dehn laayalti bai dehn akshanz.

WAI WI NEED FI BEE LAAYAL

6. (a) Wai yoo need fi bee laayal? (b) How Adam ahn Eev neva shoa laayalti?

6 Wai aala wi need fi bee laayal? Yu haftu bee laayal bikaaz Saytan chalenj Jehoava, an ih chalenj yoo tu. Saytan mi ton gens Jehoava fahn way bak eena di gyaadn a Eedn. Hihn mi slanda Jehoava ahn seh dat Gaad selfish, laiyad, ahn dat hihn da wahn bad Roola. Sad fi seh doh, Adam ahn Eev gaahn lang wid Saytan ahn ribel gens Jehoava. (Gen. 3:1-6) Wail dehn mi-di liv eena di gyaadn a Eedn, dehn  mi ga lata chaans fi schrentn dehn lov fi Jehoava. Bot wen Saytan mi chalenj Jehoava, fi dehn lov neva kompleet tuwaadz Gaad. Soh dat bring op wahn nada kweschan: Eni hyooman wuda eva lov Jehoava inof fi bee laayal tu ahn? In ada werdz, hyoomanz ku eevn bee laayal? Da kweschan mi kom op agen laytaraan wid Joab.

7. Akaadn tu Job 1:8-11, how Jehoava mi feel bowt Joab laayalti, ahn how Saytan mi feel bowt it?

7 Joab mi liv rong di taim wen di Izrelait dehn mi deh da Eejip. Nobadi els weh mi liv rong dehndeh taim mi shoa laayalti laik Joab. Joab mi imperfek an ih mi mek mistayk jos laik aala wi. Bot, Jehoava mi lov Joab bikaaz Joab mi laayal. Saytan praabli mi don mak Jehoava bowt hyooman laayalti aredi. Soh Jehoava mi point tu Joab egzampl. Bai di way how Joab mi liv, hihn mi proov dat Saytan laiyad! Saytan mi insis dat Jehoava alow ahn fi tes Joab laayalti. Jehoava mi chros ih fren, Joab, ahn soh Hihn mi alow Saytan fi tes ahn.—Reed Job 1:8-11. *

8. How Saytan mi atak Joab?

8 Saytan kruwil, an ih da wahn merdara. Hihn mi tek weh evriting weh Joab mi ga, kil ih servant dehn, ahn dischrai ih repyutayshan. Hihn mi atak Joab famili, ahn kil aala ih pikni dehn. Den ih mi atak Joab ihself.  Ih mi mek ih geh sik bad wid lata soar aal oava ih badi fahn di tap a ih hed tu di batam a ih fut. Eevn Joab waif kudn tek it nohmoh, ahn soh shee mi tel ahn fi giv op, fi kers Gaad ahn ded. Joab ihself mi wish ih kuda ded, bot stilyet ih mi stay laayal tu Gaad. Den Saytan chrai wahn difrent way fi brok Joab laayalti. Ih yooz chree man weh mi sopoas tu bee Joab fren. Dehn mi stay wid Joab fi dayz, bot dehn neva giv ahn no komfert. Insteda dat, dehn chree soa-kaal fren mi kritisaiz Joab. Dehn mi klaym seh dat da Jehoava kaaz aala Joab chroblz ahn dat Gaad neva kay bowt Joab laayalti non ataal. Dehn mi eevn seh dat Joab mi wikid ahn dat hihn mi dizerv aala di terabl tingz weh mi-di hapm tu ahn!—Job 1:13-22; 2:7-11; 15:4, 5; 22:3-6; 25:4-6.

9. Eevn wen ih mi deh anda chraiyal, weh Joab mi rifyooz fi du?

9 How Joab mi deel wid aala dehn prablemz? Ih neva perfek. Hihn mi skoal op ih chree soa-kaal fren dehn, an ih mi seh tingz weh eevn hihn mi haftu admit da-mi krayzi taak. Hihn mi spen moa taim di difen ih oan raichosnis dan ih mi spen di difen Gaad raichosnis. (Job 6:3; 13:4, 5; 32:2; 34:5) Bot, az bad az tingz mi get, Joab mi rifyooz fi ton gens Jehoava Gaad. Hihn mi rifyooz fi bileev di lai dehn weh ih soa-kaal fren dehn mi tel ahn. Hihn mi seh: “Ah jos kyaahn seh dat unu raichos! Ah noh wahn giv op mi laayalti, eevn if Ah haftu ded!” (Job 27:5) Joab mi-di seh dat noh mata weh hapm tu ahn, hihn noh mi wahn giv op fi notn. Wee ku du dat tu.

10. How di chalenj weh Saytan mi bring gens Joab afek yoo tu?

10 Saytan klaym di sayhn ting bowt eech wan a wee. How dat afek yoo? Saytan seh dat yoo noh reeli lov Jehoava Gaad, dat yu wuda stap serv Gaad fi sayv yu oan laif, ahn dat yu noh shoa chroo laayalti! (Job 2:4, 5; Rev. 12:10) How yoo feel bowt dat? Dat hert, noh chroo? Bot, tink bowt dis: Jehoava chros yu inof fi gi yu wahn wandaful apachooniti. Jehoava di alow Saytan fi tes yu laayalti. Jehoava shoar dat yu ku stay laayal tu hihn ahn help proov dat Saytan laiyad. Ahn Jehoava pramis fi help yu du dat. (Heeb. 13:6) Da wahn wandaful privilij fi mek di Sovrin a di yoonivers chros yu! Yu si wai laayalti soh impoatant? Wen wi stay laayal wi help proov Saytan rang, wi stan op fi Jehoava, ahn wi shoa dat wi sopoat fi hihn roolaship. Weh wi ku du fi stay laayal?

HOW WI KU STAY LAAYAL NOW

11. Weh wi ku laan fahn Joab?

11 Saytan di atak wi moa ahn moa eena dehnya “laas dayz.” (2 Tim. 3:1) Soh how wi ku schrentn wiself fi stay laayal? Agen, wi ku laan wahn lat fahn Joab. Lang bifoa hihn mi fays eni tes, Joab mi don bil op wahn repyutayshan az wahn laayal man. Mek wi kansida chree lesn weh wi ku laan fahn hihn weh wahn help wi fi schrentn wi dizaiya fi stay laayal.

Weh wi ku du fi schrentn wi dizaiya fi stay laayal? (Paragraaf 12) *

12. (a) Akaadn tu Job 26:7, 8, 14, how Joab mi mek ih rispek fi Jehoava groa? (b) How wee ku admaiya ahn rispek Gaad fahn wi haat?

12 Bikaaz Joab mi tink dat evriting Jehoava du amayzin, fi hihn lov fi Gaad mi groa schranga. Joab mi spen taim di meditayt pahn di wandaful ting dehn weh Jehoava kriyayt. (Reed Job 26:7, 8, 14.) * Hihn mi tink dat di ert, di skai, di tonda,  ahn di klowd dehn amayzin, bot stilyet hihn mi riyalaiz dat ih neva noa moch bowt aal weh Jehoava mi mek. Joab mi apreeshiayt Jehoava teechinz tu. Hihn mi seh: “Fi hihn sayinz preshos tu mee.” (Job 23:12) Joab mi tink Jehoava amayzin an ih mi ga lata rispek far ahn. Ih mi lov ih Faada an ih mi waahn pleez ahn. Dat mi mek Joab dizaiya fi stay laayal groa schranga. Wee need fi du di sayhn ting weh Joab mi du. Wee noa wahn lat moa bowt Jehoava wandaful kriyayshan dan peepl weh mi liv eena Joab dayz. Ahn wi ga di hoal Baibl fi help wi reeli geh fi noa Jehoava. Aal weh wi laan amayzin an ih ku toch wi haat. Soh den, az fi wee rispek fi Jehoava groa, wi lov fi hihn wahn groa tu, ahn wi dizaiya fi pleez hihn ahn fi stay laayal tu hihn wahn geh schranga.—Job 28:28.

Wi wahn schrentn wi dizaiya fi stay laayal, wen wi rijek poarnografi (Paragraaf 13) *

13-14. (a) Akaadn tu Job 31:1, how Joab mi proov fi bee obeedyant? (b) How wee ku fala Joab egzampl?

13 Joab mi obeedyant eena evriting, ahn dat mi help ahn fi stay laayal. Joab mi noa dat fi bee laayal ih wuda haftu obay Jehoava eena evriting. Az a mata a fak, evri taim wi obay Jehoava, wi dizaiya fi stay laayal geh schranga. Joab mi werk haad fi obay Gaad eena ih evriday laif. Fi egzampl, hihn mi kyaaful how ih bihayv rong ada uman. (Reed Job 31:1.) * Hihn da-mi wahn marid man, ahn hihn mi noa dat ih rang fi shoa romantik atenshan tu eni ada uman eksep ih waif. Tudeh, wi liv eena wahn werl weh aalwayz put sekshwal temtayshan fronta wi. Wee wahn bee laik Joab ahn rifyooz fi pay di rang kaina atenshan tu sohnbadi weh wi noh marid tu? Wi wahn rifyooz fi luk pahn eni kaina doti pichaz er poarnografi, noh mata wat? (Mach. 5:28) If wee werk haad fi ga da kaina self-kanchroal evri day, wi wahn ku schrentn wi dizaiya fi stay laayal.

Wi wahn schrentn wi dizaiya fi stay laayal, wen wi kip di prapa vyoo a mateeryal tingz (Paragraaf 14) *

 14 Joab mi aalso obay Jehoava eena di way ih vyoo mateeryal tingz. Joab mi noa dat if ih chros eena di tingz weh ih oan, dat wuda bee wahn seeryos sin an ih wuda dizerv ponishment far it. (Job 31:24, 25, 28) Tudeh day, wi liv eena wahn werl weh put mateeryal tingz fos. Bot if wee divelop di prapa vyoo a moni ahn mateeryal tingz, laik how di Baibl kongsl wi fi du, wi wahn schrentn wi dizaiya fi stay laayal.—Prov. 30:8, 9; Mach. 6:19-21.

Wi wahn schrentn wi dizaiya fi stay laayal, wen wi kip di meditayt pahn wi hoap fi di fyoocha (Paragraaf 15) *

15. (a) Weh fyoocha riwaad mi help Joab stay laayal? (b) Wai wi shuda aalwayz tink bowt di hoap weh Jehoava gi wi?

15 Joab mi foakos pan ih hoap fi geh wahn riwaad fahn Gaad, ahn dat mi help ahn fi stay laayal. Hihn mi bileev dat Gaad mi kay bowt fi hihn laayalti. (Job 31:6) Eevn doa ih mi-di goh chroo lata chraiyalz, Joab mi shoar dat Jehoava wuda giv ahn wahn riwaad. Dis kanfidens mi help ahn fi stay laayal noh mata wat. Jehoava mi soh hapi wid Joab laayalti dat ih mi bles Joab wahn lat eevn doa hihn mi stilyet imperfek! (Job 42:12-17; Jay. 5:11) Ahn eevn moa blesin di kohn fi Joab eena di fyoocha. Yoo reeli bileev dat Gaad wahn riwaad yu laayalti? Fi wee Gaad noh chaynj. (Mal. 3:6) If wi memba dat fi wee laayalti preshos tu Jehoava, wi ku kip schrang fayt eena di hoap weh hihn gi wi fi wahn brait ahn wandaful fyoocha.—1 Tes. 5:8, 9.

16. Weh wi shuda mek op wi main fi du?

16 Mek op yu main fi aalwayz stay laayal tu Jehoava! Sohntaim, yu mait feel laik da yoo wan di chrai bee laayal, bot da noh soh. Yu wahn neva deh pahn yu oan. Yu wahn deh monks di milyanz a faytful peepl rong di werl hoo stay laayal tu Jehoava. Yu wahn bee laik dehn faytful man ahn uman eena di paas weh mi stay laayal tu Gaad eevn wen peepl chretn fi kil dehn. (Heeb. 11:36-38; 12:1) Aala wi waahn du wi bes fi liv op tu weh Joab mi seh: “Ah noh wahn giv op mi laayalti!” Ahn wi hoap dat fi wee laayalti wahn bring aana ahn prayz tu Jehoava fareva!

SANG 124 Aalwayz Bee Laayal

^ par. 5 Wat da laayalti? Wai da kwaliti preshos tu Jehoava? Wai laayalti soh impoatant tu aala wi? Dis aatikl wahn help wi fi ansa dehndeh kweschan fahn di Baibl. An ih wahn help wi fi schrentn wi dizaiya fi stay laayal evri day. Wen wi du dat wi wahn geh lata blesin.

^ par. 3 Di Heebroo werd weh chranslayt az “helti” weh wi yooz fi diskraib wahn animal, simila tu di werd fi “laayalti” weh wi yooz fi taak bowt hyoomanz.

^ par. 4 Psalm 103:12-14: “Az faar az di sonraiz deh fahn di sonset, dat da how faar fahn wi hihn put wi sin dehn. Laik wahn faada weh ga mersi pahn ih son dehn, Jehoava shoa mersi tu dehn wan weh fyaa hihn. Hihn noa gud how wee geh mek, ih memba dat wee da dos.”

^ par. 7 Job 1:8-11: “Ahn Jehoava tel Saytan: ‘Yu di wach pahn mai servant Joab? Nobadi els noh deh laik hihn pahn di ert. Hihn da wahn raichos ahn laayal man weh fyaa Gaad ahn ton weh fahn weh bad.ʼ Den Saytan tel Jehoava: ‘Yu tink dat da jos fi notn Joab fyaa yoo? Da neva yoo put wahn fens rong ahn, ih hows, an evriting weh ih gat? Yu don bles evriting weh ih du, an ih ga lata animal aal oava di lan. Bot, jos fi wahn chaynj, schrech owt yu han ahn schraik evriting weh ih gat, ahn yu wahn si how ih kers yu ahn ton ih bak pahn yu.ʼ”

^ par. 12 Job 26:7, 8, 14: “Hihn schrech owt di naat skai oava emti spays, ahn heng di ert pahn notn; hihn kalek di waata eena ih klowd dehn, ahn di klowd dehn noh geh soh hevi dat dehn bos; 14 Luk! Dehnya da jos di ej a fi hihn wayz; ahn da jos wahn lee wispa wi hyaa bowt hihn! Soh hoo kud andastan ih maiti tonda?”

^ par. 13 Job 31:1: “Ah mi mek wahn agreement wid mi aiy dehn. Soh how Ai kuda eva shoa atenshan weh noh prapa tu wahn verjin?”

^ par. 54 DI PICHA DEHN: Joab di teech som a ih pikni dehn bowt di amayzin tingz weh Jehoava kriyayt.

^ par. 56 DI PICHA DEHN: Wahn brada rifyooz fi wach poarnografi wid ih werkmayt dehn.

^ par. 58 DI PICHA DEHN: Wahn brada fait di temtayshan fi bai wahn big, ekspensiv TV weh ih noh need ahn kyaahn afoad.

^ par. 60 DI PICHA DEHN: Wahn brada tek taim fi pray ahn meditayt pahn di Paradais hoap.