Skip tu di aatikl

Skip tu lis a tapik

 STODI AATIKL 8

Wai Wi Shuda Shoa Apreeshiayshan?

Wai Wi Shuda Shoa Apreeshiayshan?

“Unu fi bee tankful.”—KOL. 3:15, NW.

SANG 46 Wi Tank Yu, Jehoava

WEH WI WAHN DISKOS? *

1. How wahn Samaritan man weh Jeezas mi heel mi shoa apreeshiayshan?

DEHN mi ga ten man weh mi deh eena wahn terabl sichuwayshan. Dehn mi ga leprosi ahn dehn neva noa if dehn wuda eva geh beta. Bot wan day, dehn mi si Jeezas, di Grayt Teecha, wahn lee wayz fahn weh dehn mi deh. Dehn mi hyaa dat Jeezas heel aal kaina dizeez, ahn dehn mi shoar dat Jeezas kuda mi heel dehn tu. Soh dehn hala owt tu ahn: “Teecha, sari fi wi noh!” Den, di ten a di man dehn mi geh heel. Aala dehn mi praabli tankful fi di kainis weh Jeezas mi shoa dehn. Bot wan a dehn mi du moa dahn jos feel tankful. Hihn mi shoa ih apreeshiayshan * tu Jeezas. Da man da-mi wahn Samaritan ahn hihn mi feel moov fi “prayz Gaad haad-wan.”—Look 17:12-19.

2-3. (a) Wai wi mait fayl fi shoa apreeshiayshan? (b) Weh wi wahn diskos eena dis aatikl?

2 Jos laik di Samaritan, wi waahn shoa apreeshiayshan tu peepl weh kain tu wi. Bot sohntaim, wi mait faget fi seh tanks er shoa adaz how wi feel bowt dehn kainis.

3 Eena dis aatikl, wi wahn kansida wai ih soh impoatant fi shoa apreeshiayshan bai weh wi seh ahn du. Wi wahn laan bowt sohn servant a Jehoava eena Baibl taimz hoo mi tankful ahn sohn adaz weh neva shoa apreeshiayshan. Den wi wahn diskos spesifik wayz how wee ku shoa apreeshiayshan.

 WAI WI SHUDA SHOA APREESHIAYSHAN?

4-5. Wai wi shuda shoa apreeshiayshan?

4 Jehoava set di bes egzampl a how fi shoa apreeshiayshan. Wan way Jehoava du dis da wen ih bles peepl weh pleez hihn. (2 Sam. 22:21; Ps. 13:6; Mach. 10:40, 41) Ahn di Skripchaz inkorij wi fi ‘chrai fi bee laik Gaad, bikaaz wi da fi hihn pikni weh ih lov fi chroo.ʼ (Ifee. 5:1) Soh di mayn reezn wai wee shuda shoa apreeshiayshan da bikaaz wee waahn fala Jehoava egzampl.

5 Mek wi kansida wahn nada reezn wai wi waahn shoa apreeshiayshan tu adaz. Apreeshiayshan da laik gud food—wi injai it moa wen wi shayr it wid adaz. Wen wi feel laik adaz apreeshiayt wi, wee feel hapi. Wen wi shoa fi wee apreeshiayshan, wi mek adaz hapi. Di persn hoo wee shoa tanks tu noa dat wateva ih mi gi wi er du fi help wi, mi reeli wert dehn taim an efoat. Bikaaz a dat, wi frenship wid da persn groa schranga.

6. How werdz a apreeshiayshan ku bee laik aaplz weh mek owta goal?

6 Di werdz weh wi yooz fi shoa apreeshiayshan onli preshos. Di Baibl seh: “Wahn werd weh wi seh da di rait taim da jos laik aaplz weh mek owta goal ahn set eena silva kaavin.” (Prov. 25:11) Imajin how byootiful wahn aapl weh mek fahn goal ahn set eena silva wuda luk! Ahn jos tink how ekspensiv dat wuda bee! How yoo wuda feel if yu mi geh wahn gif laik dat? Wel, wen yoo shoa dat yu tankful fi weh adaz du, yu werdz ku bee jos az preshos. Ahn tink bowt dis: Wahn aapl weh mek owta goal kuda laas wahn veri lang taim. Eena da saym way, wen yu shoa apreeshiayshan tu adaz, dehn wahn neva faget it fi di res a dehn laif.

DEHN MI SHOA APREESHIAYSHAN

7. Akaadn tu Psalm 27:4, how Dayvid an sohn ada saamis mi shoa dehn apreeshiayshan?

7 Wahn lata Gaad servants eena di paas  mi shoa apreeshiayshan. Wan a dehn da-mi Dayvid. (Reed Psalm 27:4.) * Hihn mi reeli valyu pyoar wership an ih mi shoa ih apreeshiayshan eena di tingz weh hihn mi du. Hihn mi kanchribyoot wahn lata ekspensiv tingz fi bil op di templ. Aysaf disendant dehn mi rait saamz, er sangz a prayz, fi shoa dehn apreeshiayshan. Eena wan a dehn sang, dehn mi gi tanks tu Gaad ahn seh humoch dehn admaiya aala Jehoava “wandaful werk.” (Ps. 75:1) Wi ku si klyaa dat Dayvid an Aysaf disendant dehn mi waahn shoa Jehoava humoch dehn mi apreeshiayt aala di blesin weh dehn mi geh fahn hihn. Yu ku tink bowt sohn wayz how yoo ku fala dehn saamis egzampl?

Weh Paal leta tu di Roamanz teech wi bowt shoa apreeshiayshan? (Paragraaf 8-9) *

8-9. How di apasl Paal mi shoa apreeshiayshan fi ih bradaz ahn sistaz, ahn wat moa dahn laikli da-mi di rizolt?

8 Di apasl Paal mi apreeshiayt ih bradaz ahn sistaz an ih mi shoa dat eena di way ih mi taak bowt dehn. Hihn mi aalwayz tank Gaad fi dehn eena ih persnal pryaaz. Pahn tap a dat, wen Paal mi rait leta tu dehn ih mi mek dehn noa dat dehn impoatant tu hihn. Eena di fos 15 vers a Roamanz 16, Paal menshan 27 felo Kristyanz bai dehn naym. Paal mi memba gud gud dat Prisila an Akwila “mi redi fi ded” far ahn, an ih mi diskraib Feebi az sombadi hoo “mi help lata peepl,” inkloodin Paal. Hihn mi komen dehn preshos bradaz ahn sistaz fi dehn haad werk.—Roam. 16:1-15.

9 Paal mi noa dat ih bradaz ahn sistaz neva perfek, bot tu di en a ih leta tu di Roamanz, hihn mi chooz fi foakos pahn dehn gud kwalitiz. Di bradaz mi reed da leta tu di hoal kangrigayshan. Imajin how inkorij dehn mosi mi feel fi hyaa weh Paal mi seh bowt dehn! Bikaaz a dat, dehn frenship wid Paal mosi mi groa schranga. Yoo aalwayz shoa apreeshiayshan fi di gud tingz weh yu bradaz ahn sistaz seh ahn du fi yu?

10. Weh wi ku laan fahn di way Jeezas mi shoa apreeshiayshan fi ih falowaz?

10 Eena ih mesij tu som a di kangrigayshan da Aysha Maina, Jeezas mi shoa apreeshiayshan fi di werk weh ih falowaz mi du. Fi egzampl, eena ih mesij tu di kangrigayshan da Taiyataira ih mi staat aaf di seh: “Ai noa di ting dehn weh unu di du. Ai noa unu lov peepl ahn unu noh wahn stap bileev eena mee. Ah noa how haad unu werk ahn how unu di bayr op anda aal unu sofarin. An Ah noa dat unu di du moa now dahn weh unu yoostu du.” (Rev. 2:19) Jeezas neva onli menshan how dehn mi du moa, bot ih mi aalso komen dehn fi di kwalitiz weh mi moov dehn fi du gud tingz. Eevn doa Jeezas mi haftu kongsl som a di bradaz ahn sistaz da Taiyataira, hihn mi stil inkorij dehn da di biginin an da di en a ih mesij. (Rev. 2:25-28) Tink bowt di atariti weh Jeezas gat az di hed a aala di kangrigayshan dehn. Hihn noh haftu tank wi fi di werk weh wee du far ahn. Bot stil, hihn mek shoar dat hihn shoa apreeshiayshan. Jeezas set wahn ekselent egzampl fi eldaz!

DEHN NEVA SHOA APREESHIAYSHAN

11. Akaadn tu Heebrooz 12:16, wat da-mi Eesaa atichood wen ih kohn tu spirichwal tingz?

11 Ih sad fi seh dat som peepl eena Baibl taimz neva shoa apreeshiayshan. Wi ku tink bowt di egzampl a Eesaa. Eevn doa ih payrents mi lov ahn rispek Jehoava, hihn neva apreeshiayt saykrid tingz. (Reed Heebrooz 12:16.) How wee noa dat Eesaa neva shoa apreeshiayshan? Eesaa neva tink twais fi sel ih raits az di oalda son tu ih yonga breda, Jaykop, jos fi wan lee bowl a soop. (Gen. 25:30-34) Laytaraan, Eesaa mi  reeli sari dat ih mi mek da chois. Bot, hihn neva shoa apreeshiayshan fi weh ih mi gat, soh ih shudn a mi komplayn wen ih neva geh di blesin weh hihn mi sopoas tu get az di oalda son.

12-13. How di Izrelait dehn mi shoa dat dehn neva apreeshiayt spirichwal tingz, ahn wat da-mi di rizolt?

12 Di Izrelait dehn mi ga wahn lata reezn fi shoa apreeshiayshan. Jehoava mi free dehn fahn slayvri afta hihn mi bring di Ten Playg pahn Eejip. Den Gaad mi sayv dehn fahn dizaasta wen ih dischrai hoal a di Eejipshan aami eena di Red See. Di Izrelait dehn mi soh tankful dat dehn mi eevn sing wahn vikchri sang a prayz tu Jehoava. Bot yu tink dehn mi kantinyu fi shoa apreeshiayshan?

13 Wen di Izrelait dehn mi fays nyoo chalenjiz, kwik-wan dehn mi faget bowt aala di gud tingz weh Jehoava mi don du fi dehn. Dehn mi shoa wahn lak a apreeshiayshan. (Ps. 106:7) How dehn mi du dat? “Di hoal asembli a di Izrelait dehn mi staat komplayn gens Moaziz an Ayron”—bot akchwali, dehn mi-di komplayn gens Jehoava. (Ex. 16:2, 8) Jehoava neva pleez wid ih peepl bikaaz dehn neva tankful. Laytaraan, hihn mi prafesai dat evribadi fahn da hoal jenarayshan, eksep Jashwa ahn Kayleb, wuda ded eena di wildanes. (Num. 14:22-24; 26:65) Mek wi si how wi kud avoid fala dehnya bad egzampl ahn si how wi ku fala di gud egzampl dehn.

SHOA APREESHIAYSHAN TUDEH

14-15. (a) How wahn hozban ahn waif ku shoa dat dehn apreeshiayt eech ada? (b) How payrents ku teech dehn chiljren fi shoa apreeshiayshan?

14 Shoa apreeshiayshan eena di famili. Di hoal famili benifit wen eech memba shoa apreeshiayshan. Di moa wahn hozban ahn waif shoa apreeshiayshan fi wan anada, di kloasa dehn geh tu eech ada. Dehn aalso fain dat ih eeziya fi fagiv wan anada mistayk. Wahn hozban hoo apreeshiayt ih waif noh onli noatis di gud tingz weh shee seh ahn du, bot ih aalso “stan op ahn prayz ahn.” (Prov. 31:10, 28) Ahn wahn waiz waif mek ih hozban noa egzakli weh shee apreeshiayt bowt hihn.

15 Payrents, how unu ku teech unu chiljren fi shoa apreeshiayshan? Memba dat unu chiljren wahn fala weh unu seh ahn du. Soh set wahn gud egzampl fi unu chiljren ahn seh tanks wen dehn du tingz fi unu. Pahn tap a dat, teech unu chiljren fi seh tank yu wen peepl du tingz fi dehn. Help unu chiljren andastan dat dehn fi  shoa apreeshiayshan fahn dehn haat ahn dat dehn werdz ku benifit adaz. Fi egzampl, wahn yong uman weh naym Clary seh: “Wen mai ma mi 32 yaaz oal, sodn-wan shee mi lef wid chree chiljren fi rayz bai ihself. Wen Ai mi ton 32, Ai mi tink bowt how haad shee mi ga tingz wen ih yoostu bee da ayj. Soh Ai tel ahn humoch Ai mi apreeshiayt aal weh shee mi sakrifais fi rayz mee ahn mai too breda. Laytli, ih tel mi dat mai werdz stil veri preshos tu ahn, dat shee aalwayz tink bowt dehn, ahn dat dehn aalwayz mek ih feel hapi.”

Teech yu chiljren fi shoa apreeshiayshan (Paragraaf 15) *

16. Gi wahn egzampl a how wi ku inkorij adaz wen wi shoa apreeshiayshan.

16 Shoa apreeshiayshan eena di kangrigayshan. Wen wi shoa apreeshiayshan fi wi bradaz ahn sistaz, wi inkorij dehn. Fi egzampl, Jorge, wahn elda weh 28 yaaz oal, mi geh reeli sik. Hihn kudn aten meetinz fi wahn mont. Eevn afta hihn mi staat aten meetinz agen, hihn kudn handl paats pahn di meetin. Jorge mi seh: “Ai mi feel wotlis bikaaz a di tingz weh Ah kudn du ahn bikaaz Ah kudn tek kayr a mi rispansabiliti eena di kangrigayshan. Bot wan day, afta di meetin, wahn brada mi tel mi: ‘Ah waahn seh tank yu fi di gud egzampl weh yu set fi mi famili. Yoo noh ga no aidyaa humoch wi injai yu taak dehn joorin di paas fyoo yaaz. Dehn mi reeli schrentn wi fayt.ʼ Ih mi toch mi haat soh moch dat Ah staat tu krai. Fi hihn werdz da-mi egzakli weh Ah mi need fi hyaa.”

17. Akaadn tu Koloashanz 3:15, how wi ku shoa apreeshiayshan tu wi jenaros Gaad, Jehoava?

17 Shoa apreeshiayshan tu wi jenaros Gaad. Jehoava gi wi wahn lata spirichwal food. Fi egzampl, wen wi goh da wi meetin dehn, reed wi magazeen dehn, ahn goh da wi websait dehn, wi laan lata tingz weh ku help wi. Yoo eva hyaa wahn taak, reed wahn aatikl er wach wahn braadkyaas ahn tink, ‘Dat da-mi egzakli weh Ah mi needʼ? How wi ku shoa wi apreeshiayshan tu Jehoava? (Reed Koloashanz 3:15, NW.) * Wan way wi ku du dis da wen wi tank ahn fi aala dehnya gud gif weh hihn gi wi.—Jay. 1:17.

Wahn ekselent way fi shoa wi apreeshiayshan da wen wi help kleen di Kingdom Haal (Paragraaf 18)

18. How wi ku shoa apreeshiayshan fi wi Kingdom Haal?

18 Wi aalso shoa apreeshiayshan tu Jehoava wen wi kip wi plays a wership neet ahn kleen. Wi kleen ahn mantayn wi Kingdom Haal aafn, ahn di bradaz weh yooz di song ahn veedyo ikwipment haftu bee  kyaaful soh dat dehn noh damij dehn. Wen wi kip wi Kingdom Haal dehn eena gud kandishan, dehn wahn laas langa ahn wi noh wahn haftu di fiks dehn aal di taim. Soh, wi wahn ga moa moni fi bil ahn fiks op ada Kingdom Haal rong di werl.

19. Weh yoo mi laan fahn di ekspeeryens a wahn serkit oavaseeya an ih waif?

19 Shoa apreeshiayshan tu di bradaz ahn sistaz hoo werk haad fi wi. Wen wi shoa apreeshiayshan, wi werdz mait chaynj di way wahn persn feel bowt di chalenjiz weh ih fays. Fi egzampl, kansida di ekspeeryens a wahn serkit oavaseeya an ih waif. Wan day, joorin winta taim, dehn mi preech aal day ahn dehn mi taiyad wen dehn mi gaahn bak tu di plays weh dehn mi-di stay. Ih mi soh koal dat di sista mi kip aan ih winta koat wen ih gaahn sleep. Di neks maanin, shee mi tel ih hozban dat ih feel laik ih kudn kantinyu eena di serkit werk nohmoh. Layta da saym maanin, wahn leta mi kohn fi shee fahn di branch aafis. Di leta mi lovin an ih mi komen ahn fi ih minischri an indyoarans. Eena di leta di bradaz mi tel ahn dat dehn andastan how haad ih ku bee fi moov fahn wan plays tu di neks evri singl week. Fi shee hozban seh: “Dehn werdz a apreeshiayshan mi mek shee feel soh gud dat shee neva taak bowt lef di serkit werk eva agen. In fak, sevral taimz shee mi inkorij mee fi kantinyu wen Ai mi-di tink bowt lef di serkit werk.” Da serkit oavaseeya an ih waif mi stay eena di serkit werk fi nayli 40 yaaz.

20. Weh wi shuda chrai du evri day, ahn wai?

20 Evri day, wi shuda chrai shoa apreeshiayshan bai weh wi seh ahn du. Wi werdz an akshanz weh kohn fahn wi haat mait bee egzakli weh wahn nada persn need fi koap wid di prablemz ahn schres weh wi haftu deel wid eena dis werl. Onli wahn fyoo peepl shoa apreeshiayshan nowadayz, soh wen wi shoa apreeshiayshan, wi wahn bil sohn schranga frenship weh ku laas fareva. Di moas impoatant ting da fi fala wi jenaros Faada, Jehoava, hoo aalwayz shoa apreeshiayshan.

SANG 20 Yu Sen Yu Preshos Son

^ par. 5 Weh wi ku laan fahn Jehoava, Jeezas, ahn wahn Samaritan lepa bowt how fi shoa apreeshiayshan? Eena dis aatikl wi wahn kansida dehnya egzampl ahn moa. Wi wahn diskos wai ih soh impoatant fi shoa dat wi tankful ahn wi wahn rivyoo sohn spesifik wayz how wi ku du dat.

^ par. 1 WEH IH MEEN? Wen wi apreeshiayt sombadi er sohnting ih meenz dat wi rekonaiz di valyu a da persn er da ting. Dis werd ku rifaa tu feelinz a tanks weh kohn fahn di haat.

^ par. 7 Psalm 27:4: “Wan ting Ai mi aks fahn Jehoava—dat da weh Ai wahn luk fa—dat Ai ku deh eena di hows a Jehoava aal di dayz a mai laif, fi luk pahn how plezant Jehoava ahn fi luk pan ih templ wid apreeshiayshan.”

^ par. 17 Koloashanz 3:15: “Eech wan a unu da paat a wan badi, soh unu fi liv eena pees wid wan anada. Soh den, mek da sayhn pees weh Jeezas Krais gi unu kanchroal unu haat. Unu fi bee tankful.”

^ par. 57 DI PICHA DEHN: Wahn brada di reed Paal leta tu di Roaman kangrigayshan; Akwila, Prisila, Feebi an adaz hapi fi hyaa dehn naym geh menshan.

^ par. 59 DI PICHA DEHN: Wahn ma help ih daata shoa apreeshiayshan fi di gud egzampl weh wahn oalda sista set.