Skip tu di aatikl

Skip tu lis a tapik

Bee Faytful an Obeedyant Laik Noawa, Danyel, ahn Joab

Bee Faytful an Obeedyant Laik Noawa, Danyel, ahn Joab

“Noawa, Danyel, ahn Joab . . . wuda ku onli sayv dehnself bikaaz a dehn raichosnis.”—EZEK. 14:14.

SANG: 89, 119

1, 2. (a) Wai di egzampl a Noawa, Danyel, ahn Joab ku inkorij wi? (b) Wat Izeekyel mi-di goh chroo wen ih mi rait di werdz da Ezekiel 14:14?

YOO di fays prablemz rait now bikaaz a siknis, moni, er persikyooshan? Yoo fain it haad fi stay hapi eena yu servis tu Jehoava? If yu feel dis way, di egzampl a Noawa, Danyel, ahn Joab wahn inkorij yu. Dehn neva perfek ahn dehn mi fays som a di saym chalenjiz laik wee. Dehn mi nayli looz dehn laif tu. Bot, dehn mi stay faytful tu Jehoava, ahn hihn si dehn az wahn gud egzampl a sombadi weh mi faytful an obeedyant.—Reed Ezekiel 14:12-14. *

2 Izeekyel mi rait di werdz a wi teem skripcha wen ih mi deh da Babiloanya, eena 612 B.C.E. * (Ezek. 1:1; 8:1) Noh tu lang afta dat,  Jeroosalem mi geh dischrai eena 607 B.C.E. Onli wahn lee bit a peepl da Jeroosalem mi faytful an obeedyant laik Noawa, Danyel, ahn Joab, ahn geh fi servaiv di dischrokshan. (Ezek. 9:1-5) Som a dehn da-mi Jerimaiya, Barok, Eebed-melek, ahn di Reekabait dehn.

3. Weh wi wahn laan eena dis aatikl?

3 Di saym ting wahn hapm tudeh. Onli di raichos wan dehn wahn servaiv di en a dis sistem a tingz—peepl hoo da laik Noawa, Danyel, ahn Joab. (Rev. 7:9, 14) Soh mek wi laan wai Jehoava yooz dehn fi teech wi how wi ku bee raichos. Az wi taak bowt eech wan a dehn, wi wahn foakos pahn (1) di chalenjiz weh dehn mi fays, ahn (2) how wi ku bee obeedyant ahn faytful jos laik dehn.

NOAWA—FAYTFUL AN OBEEDYANT FI NAIN HONJRID YAAZ

4, 5. Wat da-mi som a di chalenjiz weh Noawa mi fays? Wai ih mi soh amayzin dat hihn kuda mi deel wid dehndeh chalenj?

4 Som a di chalenjiz weh Noawa mi fays. Joorin di taim a Noawa grayt-granfaada Eenak, peepl mi wikid aredi. Dehn eevn mi-di seh sohn ‘terabl tingzʼ gens Jehoava. (Jood 14, 15) Bak den, di werl mi-di geh moa ahn moa vailent. In fak, eena Noawa taim, “di werl mi ful op a vailens.” Sohn wikid aynjel chaynj dehn badi intu hyooman badi ahn marid di uman dehn. Fi dehn chiljren da-mi sohn kruwil jaiyant. (Gen. 6:2-4, 11, 12) Bot Noawa mi difrent. “Jehoava mi lov Noawa. . . . Hihn mi inosent monks aala fi hihn jenarayshan. Noawa mi waak wid di chroo Gaad.”—Gen. 6:8, 9.

5 Tink bowt weh dehndeh werdz di seh bowt Noawa. Fi wan ting, ih neva waak wid Gaad fi jos 70 er 80 yaaz laik wee tudeh, bot hihn mi waak wid Gaad eena da wikid werl fi nayli 600 yaaz! (Gen. 7:11) An ih neva ga wahn kangrigayshan weh kuda mi inkorij ahn. Noh eevn ih relitiv dehn mi dehdeh fi sopoat ahn. *

6. How Noawa mi shoa korij?

6 Noawa neva tink dat ih nof fi jos liv wahn gud laif. Hihn yoostu preech tu dehn peepl. Ih neva frayd fi tel dehn bowt ih fayt eena Jehoava. (2 Peet. 2:5) Di apasl Paal seh: “Noawa fayt eena Gaad mi shoa dat di ada peepl dehn eena di werl mi wikid.” (Heeb. 11:7) Af koars, noh evribadi mi waahn lisn tu Noawa. Dehn mi tek ahn mek papishoh an eevn chretn ih laif. Bot hihn neva frayd fi dehn. (Prov. 29:25) Insted, ih mi ga di korij weh Jehoava gi tu aala ih servant dehn weh stay faytful tu hihn.

7. Wat da-mi som a di chalenjiz weh Noawa mi fays wen ih mi-di bil di aak?

7 Noawa mi don stay faytful tu Gaad fi moa dan 500 honjrid yaaz wen Jehoava tel ahn fi bil wahn aak soh dat hyoomanz an di animal dehn ku servaiv di Flod. (Gen. 5:32; 6:14) Jos imajin how Noawa mosi mi feel, kaaz ih neva mi bil sohnting laik dat bifoa. Noh onli dat, bot ih mi noa dat di peepl dehn mi wahn mak ahn eevn moa. Bot ih mi stay faytful. Soh ih gaahn hed wid weh Gaad aks ahn fi du. Di skripcha seh: ‘Ih mi du egzakli weh Gaad aks ahn fi du.ʼ—Gen. 6:22.

8. How Noawa mi chros dat Jehoava mi wahn provaid fi hihn an ih famili?

8 Noawa mi ga wahn nada chalenj. Ih mi haftu provaid fi ih famili. Bifoa di Flod, peepl mi haftu werk haad fi groa dehn oan food, ahn Noawa mi du dat tu. (Gen. 5:28, 29) Bot, ih neva mek dat bee di onli ting ih wori bowt. Ih mi pen pahn Gaad fi weh ih need. Eevn wen ih mi-di bil di aak, ih foakos pahn weh Jehoava mi waahn. Ih mi tek ahn bowt 40 er 50 yaaz fi bil di aak, ahn stil ih  neva looz ih foakos. Ih kantinyu fi du di saym ting fi wahn nada 350 yaaz afta di Flod. (Gen. 9:28) Hihn da wahn gud egzampl fi wee tudeh!

9, 10. (a) How wi ku bee faytful an obeedyant laik Noawa? (b) Weh Jehoava wahn du if yoo faytful an obeedyant tu hihn?

9 How wi ku bee faytful an obeedyant laik Noawa? Wi du dis wen wi difen Jehoava raichos standadz, noh ga notn fi du wid di werl, ahn put di Kingdom fos eena wi laif. (Mach. 6:33; Jan 15:19) Wan ting wi noa doh, di werl noh laik di way how wi liv. Fi egzampl, bikaaz wi stan op fi weh di Baibl seh bowt seks ahn marij, dehn noh laik wi. Sohntaim, peepl seh aal kaina negitiv tingz bowt wi bikaaz a dat. (Reed Malachi 3:17, 18.) * Bot laik Noawa, wi fyaa Jehoava, noh peepl. Wi noa dat da onli hihn ku gi wi evalastin laif.—Look 12:4, 5.

10 Bot how bowt yoo persnali? Yu wahn du weh rait ahn ‘waak wid Gaadʼ eevn wen adaz kritisaiz yu er tek yu mek papishoh? Yu wahn stil ‘waak wid Gaadʼ eena haad taimz ahn chros dat ih ku provaid fi yoo ahn yu famili? If yoo obeedyant ahn faytful laik Noawa, Jehoava wahn tek kayr a yu.—Fil. 4:6, 7.

DANYEL—FAYTFUL AN OBEEDYANT EENA WAHN WIKID SITI

11. Wat da-mi som a di chalenjiz Danyel an ih chree fren dehn mi fays da Babilan? (Koment pahn di picha da di biginin a dis aatikl.)

11 Som a di chalenjiz weh Danyel mi fays. Danyel da-mi wahn prizna da Babilan, wahn siti weh mi ful op a aidol wership ahn spiritizm. Moroava, di Babiloanyanz yoostu luk dong pahn di Jooz ahn mak dehn ahn dehn Gaad, Jehoava. (Ps. 137:1, 3) Dis mosi mi hert Danyel ahn di ada Jooz weh mi stay faytful. Aalso, peepl mi-di wach hihn an ih chree fren dehn—Hananaiya, Mishayel, an Azaraiya—kaaz dehn mi-di geh chraynin fi werk fi di King. Dehn mi eevn ga speshal food fi mek dehn eet. In fak, dehn saym food ahn jrink en op fi bee prablemz, kaaz Danyel neva mi waahn brok Jehoava laa an eet di kaina food weh di Babiloanyan dehn yoostu eet.—Dan. 1:5-8, 14-17.

12. (a) Wat da-mi som a di byootiful kwalitiz weh Danyel mi gat? (b) How Jehoava mi feel bowt Danyel?

12 Danyel mi fays wahn nada chalenj weh kuda mi bee wahn prablem far ahn—hihn da-mi wahn talentid yong man. Soh di King giv ahn speshal privilij. (Dan. 1:19, 20) Bot insteda get aal hai ahn maiti, ahn tink dat weh hihn ga fi seh moa impoatant, ih mi stay hombl an aalwayz gi Jehoava di prayz. (Dan. 2:30) In fak, Danyel da-mi stil wahn yong man wen Jehoava menshan hihn az wahn egzampl a raichosnis lang wid man laik Noawa ahn Joab. Yu tink Gaad mi rang fi chros eena Danyel laik dis? No! Danyel mi stay faytful an obeedyant tu di en a ih laif. Ih mi deh eena ih layt 90ʼs wen wan a Gaad aynjel tel ahn: “Oa Danyel, yoo preshos preshos man.”—Dan. 10:11.

13. How Danyel da-mi wahn blesin tu di ada Jooz dehn?

13 Bikaaz Jehoava mi pleez wid Danyel, ih en op fi bee wahn hai ofishal eena di koat da Babilan, ahn laytaraan eena di koat a Meedo-Perzha. (Dan. 1:21; 6:1, 2) Maybi Jehoava mi werk tingz owt da way soh dat Danyel kuda mi bee wahn blesin tu ih oan peepl, di saym way how Joazef da-mi wahn blesin tu ih peepl da Eejip, ahn how Esta ahn Mordikai da-mi wahn blesin tu di Jooz da Perzha. *  (Dan. 2:48) Ih mosi mi onli inkorij Izeekyel ahn di ada Jooish prizna dehn da Babilan wen dehn mi si how Jehoava mi-di yooz Danyel fi help dehn!

Wi ku bee preshos tu Jehoava if wi stay laayal (Paragraaf 14, 15)

14, 15. (a) Eena weh way wee da jos laik Danyel? (b) Weh payrents ku laan fahn Danyel ma ahn pa?

14 How wi ku bee faytful an obeedyant laik Danyel? Tudeh, wee da farinaz tu. Wi di liv eena wahn werl weh Babilan di Grayt korop wid imoraliti ahn faals wership. Di Baibl kaal Babilan di Grayt (aala faals rilijan tugeda az wahn groop) ‘wahn hoam fi di deemon dehn.ʼ (Rev. 18:2) Soh peepl ku si di difrens bitween wee ahn di res a di werl rait away, ahn dehn mait eevn tek wi mek papishoh. (Maak 13:13) Bot mek wi bee laik Danyel ahn jraa kloasa tu Jehoava. Mek wi stay hombl, kip wi chros eena Gaad, an obay ahn. Den wi wahn bee preshos tu hihn tu.—Hag. 2:7.

15 Payrents ku laan fahn Danyel ma ahn pa. Wen Danyel da-mi wahn lee bwai, moas a di peepl rong ahn mi wikid. Bot ih stil groa op fi lov Gaad. Dis neva hapm jos laik dat. Ih shoa dat ih payrents mi du wahn gud jab di chrayn ahn eena di rait way. (Prov. 22:6) Eevn ih naym meen “Gaad Da Mi Joj.” Dis shoa dat ih payrents mi lov Jehoava. (Dan. 1:6, ftn.) Soh payrents, bee payshent wid yu chiljren ahn noh giv op pahn dehn. Teech dehn bowt Jehoava. (Ifee. 6:4) Aalso, pray fi dehn ahn wid dehn. Wen yu chrai yu bes fi teech dehn di chroot fahn di Baibl soh ih ku reech dehn haat, Jehoava wahn bles yu.—Ps. 37:5.

JOAB—FAYTFUL AN OBEEDYANT WEDA RICH ER POA

16, 17. Wat da som a di chalenjiz Joab mi fays?

16 Som a di chalenjiz Joab mi fays. Joab mi fays lata difrent chalenj eena ih laif. Bifoa aala dehn tingz mi hapm tu Joab doh, hihn da-mi “di graytis man eena di Ees.” (Job 1:3) Ih mi rich rich, evribadi mi noa ahn an rispek ahn. (Job 29:7-16) Stilyet, ih neva tink tu moch a ihself er feel dat hihn neva need Gaad. In fak, Jehoava mi kaal ahn “mai servant,” ahn den ih seh dis bowt ahn: “Hihn da wahn raichos an aanis man, weh fyaa Gaad ahn ton weh fahn weh bad.”—Job 1:8.

17 Sodn-wan, Joab hoal laif chaynj. Ih looz evriting ih mi oan ahn geh soh dipres dat ih mi waahn ded. Bot wee noa dat da-mi bikaaz a Saytan. Ih mi seh dat Joab onli mi-di wership Gaad fi weh ih ku get fahn Gaad. (Reed Job 1:9, 10.) * Jehoava neva jos tek dat rait  soh. Insted, Jehoava gi Joab di apachooniti fi proov ih laayalti ahn fi shoa dat ih di wership Ahn bikaaz a lov.

18. (a) Weh yoo mi laik bowt Joab laayalti? (b) Weh wi laan bowt Jehoava fahn di way ih mi chreet Joab?

18 Saytan atak Joab oava an oava agen. Ih mi waahn Joab blaym Gaad. (Job 1:13-21) Den chree man, hoo mi klaym seh dat dehn da Joab fren, kohn komfert ahn, bot dehn onli atak ahn wid dehn kruwil werdz. Dehn tel ahn dat Gaad di ponish ahn an dat ih mi dizerv it! (Job 2:11; 22:1, 5-10) Bot Joab stay laayal. Da chroo ih mi seh sohn foolish tingz, bot Jehoava mi andastan dat Joab mi feel hert. (Job 6:1-3) Gaad mi si wahn sad dipres man hoo neva eena ih baan laif mi ton ih bak pan Ahn. Hihn mi noa dat da mi onli bikaaz Saytan atak Joab soh kruwil dat ih mi taak laik dat. Wen evriting mi oava, Jehoava mi gi Joab too taimz moa dan weh ih mi gat bifoa, ahn wahn nada 140 yaaz a laif. (Jay. 5:11) Joab mi kantinyu fi serv Jehoava wid aala ih haat. How wi noa dat? Bikaaz wen Izeekyel mi rait di werdz da Ezekiel 14:14, wi teem skripcha, Joab mi don ded fi honjridz a yaaz.

19, 20. (a) How wi ku bee faytful an obeedyant laik Joab? (b) How wi ku shoa kompashan laik Gaad tu wi bradaz ahn sistaz?

19 How wi ku bee faytful an obeedyant laik Joab? Noh mata weh sichuwayshan wi deh eena, mek wi aalwayz put Jehoava fos eena wi laif, serv ahn, an chros ahn wid aala wi haat. Az a mata a fak, wi ga eevn moa reezn fi du dis dan weh Joab mi gat. Tink bowt dis: Tudeh-day wi noa wahn lat bowt Saytan ahn how ih werk. (2 Kor. 2:11) Di buk a Joab help wi andastan wai Gaad alow sofarin. Fahn Danyel prafesi, wi andastan dat Gaad Kingdom da wahn govament ahn Jeezas da di King. (Dan. 7:13, 14) Ahn wi noa dat dis Kingdom wahn soon en aal kaina sofarin fareva.

20 Aala di difrent tingz Joab mi gaahn chroo teech wi dat wi need fi shoa kompashan tu wi bradaz ahn sistaz wen dehn di goh chroo fi dehn chraiyalz. Som a dehn mait seh sohn foolish tingz, jos laik Joab. (Eccl. 7:7) Bot insteda joj dehn, mek wi shoa kompashan an andastandin. If wi du dis, wi di kapi wi lovin ahn mersiful Faada, Jehoava Gaad.—Ps. 103:8.

JEHOAVA “WAHN MEK YU SCHRANG”

21. How di werdz da 1 Peeta 5:10 rimain wi a weh Noawa, Danyel, ahn Joab mi gaahn chroo eena dehn laif?

21 Noawa, Danyel, ahn Joab neva liv rong di saym taim laik wan anada. Dehn neva gaahn chroo di saym tingz eena laif eeda. Bot wan ting wi noa: Aala dehn mi bayr op ahn stan op schrang anda di difrent chalenjiz weh dehn mi fays. Fi dehn laif stoari mek wi memba weh di apasl Peeta mi seh: “Bot afta yu don sofa fi wahn lee wail, di Gaad a grays weh kaal yu fi bee wan wid Krais Jeezas, fi shayr ih gloari weh wahn laas fareva, hihn wahn mek yu bee aal weh yu sopoas tu bee. Ahn ih wahn mek yu schrang, ahn ih wahn help yu soh dat yu noh shayki eena yu fayt.”—1 Peet. 5:10.

22. Weh wi wahn stodi bowt eena di neks aatikl?

22 Di werdz weh di apasl Peeta mi rait pramis wi dat Jehoava wahn mek ih servant dehn schrang. Jehoava noa dat eevn wee tudeh ku stay schrang tu. Aala wi waahn Jehoava schrentn wi, ahn wi waahn stay faytful tu hihn. Soh den, mek wi fala di egzampl a Noawa, Danyel, ahn Joab. Mek wi stay faytful an obeedyant laik dehn! Wi wahn laan eena di neks aatikl dat dehnya man mi stay laayal tu Jehoava bikaaz dehn mi noa Jehoava. In fak, dehn ‘mi andastan evriting,ʼ weh hihn mi waahn dehn du. (Prov. 28:5) Ahn wee ku du di saym ting.

^ par. 1 Ezekiel 14:12-14: “Ahn di werd a Jehoava mi kohn tu mi agen di seh: ‘Son a man, if di peepl a wahn konchri sin gens mi bikaaz dehn neva stay faytful, Ah wahn schrech owt mi han gens dehn ahn dischrai dehn food soplai, an Ah wahn kaaz wahn famin ahn kot aaf man an animal fahn deh. Eevn if dehnya chree man—Noawa, Danyel, ahn Joab—mi dehdeh, dehn wuda ku onli sayv dehnself bikaaz a dehn raichosnis,ʼ di Sovrin Laad Jehoava seh.”

^ par. 2 Izeekyel da-mi wahn prizna da Babiloanya eena 617 B.C.E. Ih mi rait Ezekiel 8:1–19:14 “eena di siks” yaa az wahn prizna, er 612 B.C.E.

^ par. 5 Noawa pa, weh mi naym Laymek, da-mi wan a Gaad servant. Hihn mi ded faiv yaaz bifoa di Flod. If Noawa ma an ih brada er sista dehn mi stil livin wen di Flod hapm, dehn neva servaiv.

^ par. 9 Malachi 3:17, 18: “Jehoava a aamiz seh: ‘Pahn di day Ai chooz wahn speshal prapati, dehn wahn bee fi mee. Ai wahn shoa dehn kompashan, jos laik how wahn man shoa kompashan tu ih son hoo di serv ahn. Ahn yu wahn si agen di difrens bitween wahn raichos persn ahn wahn wikid persn, yu wahn si di difrens bitween sombadi weh di serv Gaad ahn sombadi weh noh di serv ahn.ʼ”

^ par. 13 Ih ku bee dat Jehoava mi du di saym ting fi Danyel chree fren dehn soh dat dehn kuda mi help di Jooish peepl dehn tu.—Dan. 2:49.

^ par. 17 Job 1:9, 10: “Den Saytan tel Jehoava: ‘Da noh fi notn Joab fyaa yoo. Da neva yoo put wahn fens rong ahn, ih hows, an evriting weh ih gat? Yu don bles evriting weh ih du, an ih ga lata animal aal oava di lan.ʼ”