Skip tu di aatikl

Skip tu lis a tapik

Yong Peepl, Unu Ku Liv Wahn Hapi Laif

Yong Peepl, Unu Ku Liv Wahn Hapi Laif

“Yu shoa mi di way weh leed tu laif.”—PS. 16:11.

SANG: 133, 89

1, 2. How Tony ekspeeryens shoa wi dat ih pasabl fi mek chaynjiz eena laif?

WAHN yong bwai naym Tony mi groa op widowt wahn pa. Ih mi-di goh da hai skool, bot ih neva reeli inchrestid eena skool. Az a mata a fak, ih mi-di tink bowt stap skool. Pahn di weeken, Tony wuda goh wach moovi er heng owt wid ih frenz. Ih neva yoostu bee vailent, an ih neva dehn pahn jrogz, bot ih jos neva noa weh ih mi waahn du wid ih laif. Ih neva eevn shoar if Gaad mi egzis. Wan day, Tony mi meet too Witnisiz an ih mi tel dehn how ih feel bowt Gaad. Dehn mi giv ahn too broashoar fi reed—The Origin of Life—Five Questions Worth Asking ahn Was Life Created?

2 Di neks taim di Witnisiz dehn mi vizit Tony, ih atichood mi chaynj. Hihn mi reed ahn stodi di broashoar dehn soh moch dat dehn mi rinkl op. Hihn mi tel dehn: “Gaad haftu egzis.” Ih mi aksep wahn Baibl stodi, an ih mi staat tu mek chaynjiz eena ih laif. Bifoa Tony mi staat stodi, hihn da neva wahn gud styoodent. Bot den ih mi en op di bee wan a di bes styoodent eena di skool! Eevn di prinsipal mi sopraiz. Ih tel Tony: “Yu atichood ahn yu grayd dehn geh wahn lat beta. Dat da bikaaz yu da frenz wid Jehoava Witnisiz?” Tony tel ahn yes an den ih tel di prinsipal bowt weh ih mi-di laan. Ih mi grajuayt fahn hai skool an now ih di serv az wahn  regyula painyaa ahn wahn ministeeryal servant. An ih soh hapi now dat ih ga di bes Pa, Jehoava!—Ps. 68:5.

OBAY JEHOAVA, AHN YU WAHN GA SOKSES

3. Weh advais Jehoava gi yong peepl?

3 Tony ekspeeryens rimain wi dat Jehoava reeli kay bowt yong peepl. Hihn waahn mek yu ga sokses eena laif. Ih waahn yu liv wahn hapi laif. Soh ih tel yu: “Memba yu Gran Kriyayta eena di dayz a yu yoot.” (Eccl. 12:1) Nowadayz, dat noh aalwayz eezi. Bot dat noh meenz yu kyaahn du it. Wid Jehoava help, yu ku ga sokses eena laif noh jos wen yu yong, bot aal chroo yu laif. Fi help wi fi andastan dis beta, mek wi diskos weh mi help di Izrelait dehn fi kanka di Pramis Lan ahn how Dayvid mi geh di powa fi kanka Golaiyat.

4, 5. Weh wi ku laan fahn how di Izrelait dehn mi kanka Kaynan ahn fahn how Dayvid mi kanka Golaiyat? (Koment pahn di picha dehn da di biginin a dis aatikl.)

4 Wen di Izrelait dehn mi reech kloas di Pramis Lan, Jehoava neva tel dehn dat dehn haftu bee beta soaljaz er dat dehn shuda chrayn fi goh da waar. (Deut. 28:1, 2) Raada, hihn mi tel dehn dat dehn haftu obay fi hihn komanment dehn ahn chros eena ahn. (Josh. 1:7-9) Da advais praabli wudn mek sens tu moas peepl. Bot dat da-mi di bes advais fi di Izrelait dehn. Oava an oava agen Jehoava mi help di Izrelait dehn fi win owt oava di Kaynanait dehn. (Josh. 24:11-13) Yes, if wi waahn obay Gaad eena evriting wi haftu ga fayt. Bot if wi ga da kaina fayt, wi wahn aalwayz ga sokses eena weh wi du. Dat mi chroo bak den, an ih stil chroo tudeh day.

5 Golaiyat da-mi wahn maiti soalja. Hihn mi stan op bowt nain an a haaf feet (3m) taal, ahn fi hihn wepan dehn mi daynjaros. (1 Sam. 17:4-7) Bot Dayvid mi gaahn gaahn fait Golaiyat wid onli wahn sling an ih fayt eena fi hihn Gaad, Jehoava. Enibadi weh neva ga fayt wuda mi tink Dayvid mi fool fool! Bot Golaiyat da-mi di fool.—1 Sam. 17:48-51.

6. Weh wi wahn diskos eena dis aatikl?

6 Eena di laas aatikl wi mi taak bowt foa tingz weh ku mek wi hapiya ahn mek wi ga sokses eena laif. Wi mi laan dat wi haftu satisfai wi spirichwal need, mek gud frenz weh lov Gaad, set gud goalz, ahn cherish di freedom weh Gaad gi wi. Now wi wahn diskos moa wayz how wi ku benifit wen wi du aala dehnya tingz. Mek wi luk pahn sohn prinsipl fahn Psalm 16 fi help wi du dat.

SATISFAI YU SPIRICHWAL NEED

7. (a) How yu wuda diskraib wahn spirichwal persn? (b) Wat da-mi Dayvid “shayr,” ahn how dis mi afek ahn?

7 Wahn spirichwal persn da sohnbadi weh ga fayt eena Gaad ahn tink laik Gaad. Ih aalwayz luk tu Jehoava fi gaidans an ih obay ahn eena evriting. (1 Kor. 2:12, 13) Dayvid da wahn gud egzampl a wahn spirichwal persn. Hihn mi sing: “Jehoava da mai shayr a di inheritans, mai kop.” (Ps. 16:5) Dayvid mi apreeshiayt fi hihn “shayr,” er fi hihn rilayshanship wid Jehoava, an ih mi chros eena Gaad fi protekshan. (Ps. 16:1) Sayka dat, hihn kuda mi seh: “Mi haat onli feel glad.” Notn mi mek Dayvid hapiya dan ih kloas frenship wid Jehoava!—Reed Psalm 16:9, 11. *

8. Wat da sohn tingz weh ku mek yu laif hapi?

8 Peepl weh foakos dehn laif pahn moni er plezha wahn neva bee hapi laik how Dayvid mi hapi. (1 Tim. 6:9, 10) Wahn brada fahn Canada seh: “Chroo satisfakshan noh kohn fahn weh wi ku get owta laif, bot fahn weh wi  giv tu Jehoava, di Wan weh gi wi evri gud gif.” (Jay. 1:17) If yu divelop fayt eena Jehoava an serv ahn, yu laif wahn ga perpos ahn yu wahn bee hapi. Soh, weh yu ku du fi mek yu fayt groa? Yu haftu spen taim wid Jehoava. Yu du dat wen yu reed fi hihn Werd, luk pahn aala fi hihn byootiful kriyayshan, ahn tink bowt aala fi hihn kwaliti dehn, inkloodin fi hihn lov fi yoo.—Roam. 1:20; 5:8.

9. How yu ku alow Gaad Werd fi chaynj di way yu tink an ak?

9 Sohntaim di way Gaad shoa ih lov fi wi da wen ih karek wi, jos laik how wahn lovin pa wuda du. Dayvid mi apreeshiayt it wen Jehoava mi karek ahn. Dayvid mi seh: “Ah wahn prayz Jehoava, hoo mi gi mi advais. Eevn joorin di nait, mi kanshans karek mi.” (Ps. 16:7) Dayvid mi meditayt pahn Gaad way a tinkin, an ih mi laan fi tink di sayhn way laik Jehoava. Dat mi help ahn fi mek chaynjiz ahn bee wahn beta persn. Wen yoo du dat, yu lov fi Gaad ahn yu dizaiya fi obay ahn wahn groa. Yu wahn bee wahn spirichwali machoar Kristyan. Wahn sista weh naym Christin seh: “Wen Ah du risaach ahn meditayt pahn weh Ah reed, Ah feel laik Jehoava mi rait dehnya ting jos fi mee!”

10. Akaadn tu Isaiah 26:3, how wi benifit wen wi laan fi luk pahn tingz eena wahn spirichwal way?

10 Wen yu laan fi luk pahn tingz eena wahn spirichwal way, yu wahn geh nalij an andastandin fahn Jehoava. Dat wahn help yu fi si di werl ahn weh wahn hapm tu it eena di fyoocha di sayhn way how Gaad seeʼt. Wai Jehoava gi yu dis nalij an andastandin? Bikaaz ih waahn mek yu put spirichwal tingz fos eena yu laif, fi mek waiz disizhanz, ahn fi ga wahn gud hoap fi di fyoocha! (Reed Isaiah 26:3.) * Wahn brada fahn di Stayts weh naym Jashwa seh: “If yu stay kloas tu Jehoava, yu wahn si klyaa-wan weh impoatant fahn weh noh impoatant.”

MEK CHROO CHROO FRENZ

11. How Dayvid mi pik fi hihn frenz?

11 Reed Psalm 16:3. * Dayvid mi noa how fi fain gud frenz. Hihn mi pik peepl hoo lov Jehoava fi bee ih fren dehn ahn dat mi gi hihn “lata jai.” Hihn mi kaal dehn “hoali peepl” bikaaz dehn mi du dehn bes fi liv akaadn tu Jehoava standad a weh kleen ahn raichos. Wahn nada saamis mi feel di sayhn way bowt fi hihn fren dehn. Ih mi seh: “Ai da fren wid aal hoo fyaa yoo ahn hoo obay yu komanment dehn.” (Ps. 119:63) Laik weh wi mi diskos eena di laas aatikl, yoo ku fain lata gud frenz monks Jehoava peepl tu, ahn dehn noh haftu bee rong di sayhn ayj laik yoo.

12. Wai Dayvid ahn Janatan frenship mi soh schrang?

12 Dayvid neva pik ih fren dehn jos fahn peepl rong di sayhn ayj laik hihn. Yoo ku memba di naym a eni wan a fi hihn “wandaful” fren? Yu mait tink bowt Janatan. Fi dehn frenship da-mi wan a di moas byootiful rilayshanship weh yu ku reed bowt eena di Baibl. Bot yoo mi noa dat Janatan mi bowt 30 yaaz oalda dan Dayvid? Soh how dehn kuda mi bee soh kloas? Di mayn reezn da bikaaz di too a dehn mi ga schrang fayt eena Gaad. Bot dehn mi rispek wan anada tu, ahn dehn mi apreeshiayt eech ada gud kwalitiz. Fi egzampl, di too a dehn mi shoa lata korij wen dehn mi fait gens Gaad enimi dehn.—1 Sam. 13:3; 14:13; 17:48-50; 18:1.

13. How yu ku mek moa frenz? Yooz di egzampl eena di paragraaf.

13 Jos laik Dayvid ahn Janatan, wee geh “lata jai” wen wi lov peepl weh lov Jehoava ahn shoa deh fayt eena ahn. Kiera, hoo di serv Gaad fi yaaz, seh: “Ai mek fren wid peepl  fahn aal oava di werl, fahn difrent bakgrong ahn kolcha.” Wen yoo du dat, yu wahn si fi yuself how di Baibl ahn di hoali spirit bring aala wi tugeda laik wan big spirichwal famili.

SET GUD GOALZ

14. (a) How yu ku set gud goalz eena yu laif? (b) Weh som yong peepl ga fi seh bowt spirichwal goalz?

14 Reed Psalm 16:8. * Di moas impoatant ting eena Dayvid laif da-mi fi serv Jehoava. Yoo ku injai wahn hapi laif laik Dayvid, if yu set gud goalz fi yuself an aalwayz tink bowt weh Jehoava waahn yu du. Wahn brada weh naym Steeven mi seh: “Wen Ah set wahn goal, reech it, ahn den luk bak ahn si humoch Ah mi du, ih mek Ah feel satisfai fi chroo.” Wahn yong brada fahn Germany, weh di serv eena wahn nada konchri now, mi seh: “Wen Ah geh oal, Ah noh waahn luk bak pahn mi laif ahn si dat evriting weh Ah du da-mi onli fi miself.” Wi hoap dat yoo feel di sayhn way. If yes, den du evriting yu kud fi aana Gaad ahn du tingz fi adaz. (Gal. 6:10) Set spirichwal goalz fi yuself, ahn pray tu Jehoava an aks ahn fi help yu reech dehn. Yu ku bee shoar dat hihn lov ansa dehn kaina pryaaz!—1 Jan 3:22; 5:14, 15.

15. Wat da sohn goalz weh yu ku set fi yuself? (Si di baks “ Sohn Gud Goalz fi Tink Bowt.”)

15 Weh goalz yu ku set fi yuself? Yu ku koment eena yu oan werdz da di meetin, er staat tu painyaa, er goh serv da Betel. Yu mait waahn chrai laan wahn nada langwij soh yu ku serv eena wahn farin-langwij teritori weh need help. Barak, wahn yong brada weh deh eena ful-taim servis, seh: “Wen Ah wayk op evriday an Ah noa dat Ah di du mi bes fi Jehoava, dat mek Ah feel soh gud.”

CHERISH DI FREEDOM WEH GAAD GI YU

16. How Dayvid mi feel bowt Jehoava raichos standadz, ahn wai?

16 Reed Psalm 16:2, 4. * Eena di laas aatikl wi mi laan dat Gaad raichos laa ahn prinsipl dehn gi wi chroo chroo freedom. Dehn  aalso help wi fi lov weh gud ahn hayt weh bad. (Amos 5:15) Di saamis Dayvid mi rekonaiz dat ih mi ga gud tingz eena ih laif bikaaz a Jehoava gudnis. Gudnis inklood hai moaral standadz, er verchu. Jehoava gud eena evriting weh ih du, an evriting gud weh wi gat kohn fahn hihn. Dayvid mi werk haad fi kapi Gaad egzampl ahn fi lov weh Jehoava lov. Bot Dayvid mi laan fi hayt weh Jehoava hayt tu. Wan a di ting dehn weh ih mi hayt da-mi aidol wership. Dat tek weh di aana weh bilangz tu Jehoava ahn giv it tu sohnbadi er sohnting els, an ih bring dong di hyooman rays tu.—Isa. 2:8, 9; Rev. 4:11.

17, 18. (a) Weh Dayvid mi seh wahn hapm tu peepl weh wership faals gaadz? (b) Weh kaaz peepl tudeh fi “bring moa payn ahn saro pahn dehnself”?

17 Eena Baibl taimz, faals wership yoostu inklood sekshwal imoraliti. (Hos. 4:13, 14) Lata peepl mi laik faals wership bikaaz dehn mi laik di loos laif weh goh lang wid it. Bot dat neva mek dehn hapi ataal! Dayvid mi seh: ‘Dehn peepl weh mi gaan afta ada gaadz mi bring moa payn ahn saro pahn dehnself.ʼ Dehn peepl eevn yoostu sakrifais dehn oan pikni tu dehn faals gaadz! (Isa. 57:5) Jehoava mi hayt how dehn mi soh kruwil! (Jer. 7:31) Imajin weh yu laif wuda mi bee laik if yoo mi liv eena dehn taim deh. Yu wuda mi bee veri tankful if yu payrents mi wership Jehoava, noh chroo?

18 Nowadayz, wahn lata faals rilijan dehn aksep sekshwal imoraliti laik if notn rang wid it, eevn wen da bitween too man er too uman. Dat mait mek peepl feel laik dehn free fi chroo, bot dehn onli di “bring moa payn ahn saro pahn dehnself.” (1 Kor. 6:18, 19) Dat da noh weh yoo si wen yu luk rong di werl tudeh? Soh, unu yong peepl, lisn tu unu hevnli Faada. Proov tu unuself dat di bes ting fi du da obay Gaad. Tink bowt aal weh ku goh rang if unu goh lang wid di imoraliti eena dis werl. (Gal. 6:8) Jashwa, hoo wi mi koat erliya, mi seh: “Wi ku yooz wi freedom eni kaina way wi waahn, bot if wi yooz it di rang way, wi noh wahn bee hapi.”

19, 20. How Jehoava wahn bles yong peepl weh faytful an obeedyant tu hihn?

19 Jeezas mi tel ih falowa dehn: “Unu da mi chroo chroo falowa dehn if unu kip aan obay aal weh Ah tel unu. Unu wahn noa di chroot bowt Gaad, ahn da sayhn chroot wahn mek unu free fi chroo.” (Jan 8:31, 32) Tanks tu Jehoava, wi free fahn faals rilijan, kanfyoozhan, ahn soopastishan. Bot moa dan dat, soon Gaad wahn gi wi di wandaful freedom weh bilangz tu ih pikni dehn. (Rom. 8:21) Bot eevn now yu ku geh wahn lee tays a da freedom if yu ‘obay aal weh Jeezas tel yu.ʼ If yu du dat, yu wahn geh fi “noa di chroot.” Yu noh jos wahn laan di chroot, yu wahn liv it tu!

20 Yong peepl, di freedom weh Gaad gi yu da wahn preshos gif. Laan fi seeʼt da way ahn fi yooz it eena wahn waiz way. If yu du dat, den yu wahn ga wahn wandaful fyoocha heda yu. Wan yong brada mi seh: “If yu yooz yu freedom eena wahn waiz way fahn wen yu yong, ih wahn bee eeziya wen yu haftu mek biga disizhanz eena di fyoocha. Yu wahn ku mek waiz disizhanz wen yu haftu chooz weh kaina jab yu waahn get, weda yu wahn geh marid er if yu wahn stay singl fi wahn wail.”

21. How yu ku stay pahn di road tu “di laif weh da chroo chroo laif”?

21 Eena dis oal sistem, eevn weh peepl tink da wahn gud laif noh laas lang an eniting ku hapm. Wi noh noa weh tumaaro wahn bring. (Jay. 4:13, 14) Soh di bes ting fi du da fi stay pahn di road tu “di laif weh da chroo chroo laif.” (1 Tim. 6:19) Af koars, Gaad noh foas wi fi waak da road. Wee haftu disaid dat fi wiself. Mek Jehoava bee fi yoo “shayr.” Werk haad fi jraa kloasa tu hihn an cherish aala di “gud tingz” weh ih gi yu. (Ps. 103:5) Ahn yu ku bee shoar dat Jehoava ku gi yu hapinis ahn jai weh wahn laas fareva!—Ps. 16:11.

^ par. 7 Psalm 16:9, 11: “Ahn soh mi haat onli feel glad, ahn mi mowt sing ih prayz. Eevn doa Ah da flesh ahn blod, Ah ga kanfidens. Yu shoa mi di way weh leed tu laif, ahn bikaaz yu deh wid mi, Ah onli feel hapi.”

^ par. 10 Isaiah 26:3: “Yoo wahn protek enibadi weh aalwayz pen pahn yu; yu wahn gi dehn pees weh wahn laas, bikaaz dehn chros eena yoo.”

^ par. 11 Psalm 16:3: “Ahn yu hoali peepl dehn rait ya pahn di ert, dehn wandaful, dehn bring mi lata jai.”

^ par. 14 Psalm 16:8: “Ah aalwayz si di Laad fronta mi aal di taim. Sayka weh ih deh rait saida mi, Ah noh hafu wori bowt notn.”

^ par. 16 Psalm 16:2, 4: “Ah mi tel Jehoava: ‘Oa Jehoava, evriting gud weh Ah ga kohn fahn yoo.ʼ Dehn peepl weh goh afta ada gaadz bring moa payn ahn saro pahn dehnself. Ah wahn neva poar owt wahn blod sakrifais tu dehn gaad ner eevn menshan dehn naym.”