Skip tu di aatikl

Skip tu lis a tapik

 STODI AATIKL 15

Kapi Jeezas ahn Yu Wahn Ga Pees

Kapi Jeezas ahn Yu Wahn Ga Pees

“Den Gaad wahn gi unu wahn kaina pees weh nobadi kyaahn andastan. Ih wahn mek da sayhn pees wach oava unu haat.”—FIL. 4:7.

SANG 113 Di Pees Weh Gaad Gi Wi

WEH WI WAHN DISKOS? *

1-2. Wai Jeezas mi deh anda lata presha?

PAN ih laas day az wahn hyooman, Jeezas mi deh anda wahn lata presha. Sohn wikid peepl mi wahn soon mek ih sofa wahn kruwil det. Bot Jeezas neva onli mi-di wori kaaz ih mi wahn soon ded. Hihn mi reeli lov ih Pa an ih mi waahn pleez ahn. Jeezas mi noa dat if ih mi fays dis tes ahn stil stay faytful, ih mi wahn di sopoat Jehoava naym an evriting weh ih stan fa. Jeezas mi lov peepl tu, ahn hihn mi noa dat di onli way wee kuda liv fareva da if hihn mi stay faytful tu Jehoava til ih ded.

2 Eevn doa Jeezas mi deh anda wahn lata presha, ih mi ga pees. Hihn mi tel ih apasl dehn: “Pees da weh Ah di lef wid unu, ahn da mai oan pees.” (Jan 14:27) Hihn mi ga pees fahn Gaad, di kaina pees weh wahn persn geh wen dehn ga wahn kloas kloas rilayshanship wid Jehoava. Dat da di pees weh mi put Jeezas main ahn haat at eez.—Fil. 4:6, 7.

3. Weh wi wahn diskos eena dis aatikl?

3 Non a wi wahn eva goh chroo di kaina presha weh Jeezas mi gaahn chroo, bot evribadi weh fala Jeezas wahn fays chraiyalz. (Mach. 16:24, 25; Jan 15:20) Ahn sohntaim, wi wahn feel schres owt, jos laik Jeezas. Weh wee ku du soh dat wi noh geh soh schres owt dat wi looz wi pees a main ahn hapinis? Mek wi luk pahn chree tingz weh Jeezas mi du joorin ih minischri pahn ert ahn si how wee ku kapi fi hihn egzampl wen wi di fays chraiyalz.

 JEEZAS MI PRAY WAHN LAT

Wee ku ga pees if wi pray (Paragraaf 4-7)

4. Akaadn tu 1 Tesaloanyanz 5:17, weh proof wi ga dat Jeezas mi pray wahn lat pan ih laas day pahn ert?

4 Reed 1 Tesaloanyanz 5:17. Pan ih laas day a laif pahn ert Jeezas mi pray wahn lat. Wen hihn mi shoa ih disaipl dehn how fi memba ih det, ih mi pray oava di bred ahn di wain. (1 Kor. 11:23-25) Bifoa dehn mi lef di plays wehpaat hihn ahn di disaipl dehn mi selibrayt di Paasoava, ih mi pray wid dehn. (Jan 17:1-26) Wen hihn ahn ih disaipl dehn mi reech di Mongt a Alivz, ih mi pray oava ahn oava. (Mach. 26:36-39, 42, 44) Ahn di laas werdz weh mi kom owta Jeezas mowt da-mi wahn pryaa. (Look 23:46) Jeezas mi pray tu Jehoava bowt evriting weh hapm joorin ih laas day a laif pahn ert.

5. Wai di apasl dehn korij mi geh week?

5 Jeezas mi chros ih Pa ahn pray tu ahn wahn lat, dat da wan reezn wai hihn kuda mi bayr op wen ih mi fays chraiyalz. Pahn di ada han, di apasl dehn neva kantinyu fi pray pahn da nait. Bikaaz a dat, wen dehn mi fays chraiyalz dehn neva ga korij. (Mach. 26:40, 41, 43, 45, 56) Di onli way wi ku stay faytful wen wi fays chraiyalz da if wi fala Jeezas egzampl ahn kip di pray. Bot weh wi ku pray fa?

6. How fayt ku help wi fi kip wi pees?

6 Wi ku pray tu Jehoava fi “gi wi moa fayt.” (Look 17:5; Jan 14:1) Bikaaz Saytan wahn tes aal hoo fala Jeezas, wi need fayt. (Look 22:31) How fayt wahn help wi kip wi pees eevn if wi ga wan prablem afta anada? Wen wi don du aal weh wi  kud fi get oava wahn prablem, fayt wahn moov wi fi lef di mata eena Jehoava han bikaaz wi chros dat hihn noa weh fi du moa dan weh wi kuda eva noa. Dis gi wi wahn pees a main ahn put wi haat at eez.—1 Peet. 5:6, 7.

7. Weh yoo mi laan fahn Robert egzampl?

7 Pryaa ku help wi fi ga pees a main eevn wen wi fays chraiyalz. Mek wi luk pahn di egzampl a wahn faytful elda weh deh eena ih 80ʼs weh naym Robert. Hihn seh: “Di kongsl da Filipiyanz 4:6, 7 help mee fi koap wid di chraiyalz weh Ah fays eena laif. Ah mi ga moni prablemz an Ah mi aalso looz di privilij fi serv az wahn elda eena di kangrigayshan fi wahn wail.” Wat mi help Robert fi ga pees a main? Ih seh: “Az soon az sohnting staat tu schres mi owt, Ah pray. Di moa Ah pray ahn poar owt mi haat tu Jehoava, Ah feel moa ahn moa at pees.”

JEEZAS MI PREECH WID ZEEL

Wee ku ga pees if wi preech (Paragraaf 8-10)

8. Akaadn tu Jan 8:29, wat da wahn nada reezn wai Jeezas mi ga pees a main?

8 Reed Jan 8:29. Eevn wen dehn mi-di persikyoot Jeezas, hihn mi noa dat ih mi-di mek ih Pa hapi ahn dis mi gi Jeezas reel pees a main. Hihn mi stay obeedyant eevn wen ih mi haad fi du. Bikaaz a lov fi Jehoava, Jeezas mek ih servis tu Gaad di moas impoatant ting eena ih laif. Lang bifoa ih mi kohn pahn di ert, hihn da-mi Gaad “maasta werka.” (Prov. 8:30) Ahn wail ih mi deh pahn di ert, hihn mi eega fi teech peepl bowt ih Pa. (Mach. 6:9;  Jan 5:17) Jeezas mi geh wahn lata jai di du dis werk.—Jan 4:34-36.

9. Wai wee ga pees a main wen wi bizi eena di preechin werk?

9 Wi ku kapi Jeezas egzampl wen wi “kip aan di du di Laad werk wid evriting weh [wi] gat.” (1 Kor. 15:58) Wen wi “spen aala [wi] taim” eena di preechin werk, wi ku ga wahn moa pazitiv atichood bowt wi prablemz. (Aks 18:5) Fi egzampl, di peepl weh wi meet eena servis naamali ga lat moa prablemz dan wee. Bot, wen dehn staat tu yooz weh dehn di laan fahn di Baibl eena dehn laif, dehn ga les prablemz ahn dehn hapiya. Wen wee si humoch Jehoava kay bowt wi, dat help wi fi ga wahn eevn kloasa rilayshanship wid ahn. Ahn dat gi wi chroo pees a main. Wahn sista weh hoal a ih laif sofa wid dipreshan ahn weh feel laik ih noh wert notn mi reeli geh bil op bai dis. Shee seh: “Wen Ah bizi eena di preechin werk, Ah aybl fi kanchroal mi feelinz, ahn dis mek Ah feel reeli hapi. Ah tink dat da bikaaz wen Ah di preech, Ah feel kloasa tu Jehoava.”

10. Weh yu laan fahn weh Brenda seh?

10 Neks, kansida di egzampl a wahn sista weh naym Brenda. Shee an ih daata di sofa fahn wahn seeryos dizeez [multiple sclerosis]. Bikaaz a dis dizeez, shee eezi fi geh taiyad an ih haftu yooz wahn weelchyaa fi get rong. Sohntaim ih goh preech fahn hows tu hows, bot moas a di taim ih hafu rait leta. Shee seh: “Wen Ah mi riyalaiz an aksep dat mai kandishan neva mi wahn geh beta, Ah mi aybl fi foakos aala mi atenshan pahn mi minischri. Az a mata a fak, wen Ah di preech, Ah noh tink bowt mi prablemz. Raada, Ah foakos pahn how fi help dehn wan weh Ah di preech tu. Ahn wen Ah di preech, Ah aalwayz tink bowt di hoap weh Ah ga fi di fyoocha.”

JEEZAS MI AKSEP HELP FAHN IH FREN DEHN

Wee ku ga pees if wi spen taim wid gud frenz (Paragraaf 11-15)

11-13. (a) Weh di apasl dehn an adaz mi du fi shoa dat dehn da-mi Jeezas chroo chroo fren? (b) How Jeezas fren dehn mi mek ih feel?

11 Aal chroo di taim wen Jeezas mi-di preech, ih faytful apasl dehn mi proov fi bee ih chroo chroo fren. Dehn da-mi di kaina fren weh di Baibl taak bowt wen ih seh: “Dehn ga wahn fren weh wahn stik kloasa tu yu dan wahn breda.” (Prov. 18:24) Frenz laik dehnya mi preshos tu Jeezas. Joorin ih minischri, non a ih breda dehn mi put fayt eena ahn. (Jan 7:3-5) Wan taim, ih relitiv dehn mi tink dat ih mi owta ih main, er krayzi. (Maak 3:21) Bot wi ku si dat dis da neva chroo. Az a mata fak, Jeezas mi seh tu ih apasl dehn weh mi deh wid ahn di nait bifoa ih ded: “Unu da di wan dehn weh stan bai mi said eena aal mi chroblz ahn chraiyalz.”—Look 22:28.

12 Eevn doa Jeezas apasl dehn mi disapoint ahn wahn lata taimz, hihn neva foakos pahn dehn mistayks. Insteda dat, ih mi foakos pahn di gud; ih mi si dat dehn ga fayt eena ahn. (Mach. 26:40; Maak 10:13, 14; Jan 6:66-69) Pahn di nait bifoa Jeezas mi geh kil, hihn mi tel ih laayal apasl dehn: “Ai chreet unu laik fren, noh laik servant, kaa Ai mek unu noa evriting weh mai Faada tel mi.” (Jan 15:15) Soh wi ku si dat Jeezas frenz mi reeli inkorij ahn wahn lat. Di help weh dehn mi gi ahn eena di minischri mi reeli mek Jeezas hapi.—Look 10:17, 21.

13 Apaat fahn di apasl dehn, Jeezas mi  ga ada frenz hoo mi sopoat ahn eena di preechin werk an ada wayz. Fi egzampl, som mi invait ahn da dehn hows ahn gi ahn sohnting fi eet. (Look 10:38-42; Jan 12:1, 2) Adaz mi chravl wid ahn an shayr weh dehn mi ga wid ahn. (Look 8:3) Jeezas mi ga gud frenz bikaaz hihn mi chreet dehn di way hihn wuda mi wahn dehn chreet hihn. Hihn mi chreet dehn wid lov ahn neva ekspek dehn fi du moa dan dehn kuda du. Eevn doa Jeezas mi perfek, ih neva ekspek ih frenz fi bee perfek. Hihn mi apreeshiayt di sopoat weh ih mi get fahn dehn. Ahn no dowt, dat mi help ahn fi kip ih pees a main.

14-15. How wee ku mek gud frenz ahn how dehn ku help wi?

14 Di bes way fi mek gud frenz weh wahn help wi fi stay laayal tu Jehoava da fi bee wahn gud fren. (Mach. 7:12) Fi egzampl, eena di Baibl ih tel wi fi yooz wi enerji fi help adaz, espeshali dehn wan weh “ga need.” (Ifee. 4:28) Yoo ku tink bowt sombadi eena yu kangrigayshan weh yu ku help? Maybi yu noa sombadi weh kyaahn lef ih hows bikaaz a oal ayj er helt prablem. Yu tink yu ku du ih lee shapin fi ahn? Er maybi yu noa sombadi weh di ga moni prablemz. Yu tink yu ku provaid wahn meel fi dehn? Wat if yu noa how fi yooz di jw.org® websait ahn JW Library® ap gud? Yu tink yu ku help adaz eena yu kangrigayshan laan fi yooz dehn soh dat dehn ku benifit fahn di yoosful infamayshan? If wi foakos da fi help adaz, den wi wahn bee hapi.—Aks 20:35.

15 Wi frenz wahn sopoat wi wen wi ga  prablemz ahn dehn wahn help wi fi ga pees a main. Wi frenz aalso help wi wen dehn lisn tu wi az wi tel dehn how wi feel, jos laik how Ilaihyu mi lisn wen Joab mi tel ahn bowt ih chraiyalz. (Job 32:4) Wi noh fi ekspek wi frenz fi tel wi weh fi du er weh disizhan fi mek, bot wi waahn lisn tu dehn advais weh bays pahn di Baibl. (Prov. 15:22) Ahn jos laik how King Dayvid neva tu prowd fi aksep help fahn ih frenz, wee noh wahn bee tu prowd fi aksep help fahn wi frenz wen wi need it needa. (2 Sam. 17:27-29) Gud frenz laik dis da wahn gif fahn Jehoava.—Jay. 1:17.

HOW YU KU KANTINYU FI GA PEES

16. Akaadn tu Filipiyanz 4:6, 7, eksplayn wat da di onli way wi ku geh pees.

16 Reed Filipiyanz 4:6, 7. Wai Jehoava tel wi dat di onli way wi ku ga pees a main ahn haat da chroo Jeezas Krais? Da bikaaz di onli way fi mek wi geh dis pees weh wahn laas da if wi andastan ahn ga fayt eena di roal weh Jeezas play. Fi egzampl, wi ku geh fagivnis fi wi sin dehn chroo Jeezas ransom sakrifais. (1 Jan 2:12) Dat reeli gi wi komfert wen wi tink bowt it! Az King a Gaad Kingdom, Jeezas wahn geh rid a aala di sofarin weh wi di goh chroo bikaaz a Saytan. (Isa. 65:17; 1 Jan 3:8; Rev. 21:3, 4) Dat reeli gi wi wahn wandaful hoap! Eevn doa dis asainment weh wi geh fahn Jeezas fi goh preech noh eezi, hihn deh wid wi fi sopoat wi chroo di laas dayz a dis sistem a tingz. (Mach. 28:19, 20) Dat mek wi ga moa korij! Soh fi ga chroo pees a main, ih veri impoatant dat wi ga hoap ahn korij.

17. (a) How wahn Kristyan ku ga pees a main? (b) Akaadn tu di pramis da Jan 16:33, how wi ku bee laik Jeezas?

17 Soh how yu ku ga pees a main eevn wen yu di deel wid tof chraiyalz? Yu ku ekspeeryens dis if yu kapi Jeezas egzampl. Fos, pray wahn lat. Sekant, wi need fi obay Jehoava ahn preech wid zeel eevn wen ih noh eezi fi du. Ahn terd, aksep help fahn yu frenz wen yu di goh chroo chraiyalz. Den Gaad wahn gi yu wahn kaina pees weh nobadi kyaahn andastan, ahn da pees wahn wach oava yu haat. Ahn laik Jeezas, yu wahn win di vikchri oava eni chraiyal.—Reed Jan 16:33.

SANG 41 Faada, Pleez Hyaa Mi Pryaa

^ par. 5 Aala wi haftu deel wid prablemz weh ku mek it haad fi ga pees. Dis aatikl wahn diskos chree tingz weh Jeezas mi du, ahn weh wee ku du fi ga pees eevn wen wi di sofa bikaaz a tof chraiyalz.