Skip tu di aatikl

Skip tu lis a tapik

 STODI AATIKL 17

Aksep Jehoava Help fi Stan Op Gens di Wikid Spirit Dehn

Aksep Jehoava Help fi Stan Op Gens di Wikid Spirit Dehn

“Wi noh di fait gens peepl. Wi di fait gens . . . di eevl spirit dehn.”—IFEE. 6:12.

SANG 55 Noh Bee Frayd!

WEH WI WAHN DISKOS? *

1. Akaadn tu Ifeezhanz 6:10-13, wat da wan way Jehoava shoa dat ih kay fi wi? Pleez eksplayn yu ansa.

IH TOCH wi haat fi noa dat Jehoava kay bowt wi. Hihn waahn help wi fi stan op gens wi enimi dehn. Wi mayn enimi dehn da Saytan an ih deemon dehn. Jehoava waan wi bowt dehnya enimi an ih gi wi weh wi need fi stan op gens dehn. (Reed Ifeezhanz 6:10-13.) Di onli way wi ku stan op gens di Devl da if wi aksep Jehoava help ahn ga kompleet chros eena hihn. Wee ku bee kanfident jos laik di apasl Paal. Hihn mi rait: “If Gaad da fi wee, den nobadi kyaahn deh gens wi.”—Roam. 8:31.

2. Weh wi wahn kansida eena dis aatikl?

2 Az chroo Kristyanz, wee noh foakos wi atenshan pahn Saytan an ih deemon dehn. Fi wee foakos deh pahn Jehoava; fi laan bowt hihn ahn fi noa how fi serv hihn. (Ps. 25:5) Bot stil, wi need fi noa di baysik ting bowt weh Saytan du. Wai? Soh dat hihn noh owtsmaat wi. (2 Kor. 2:11.) Eena dis aatikl, wi wahn kansida wahn mayn way how Saytan chrai fi fool op peepl. Wi wahn aalso laan how wi ku stan op gens dehn ahn win.

HOW DI WIKID SPIRIT DEHN CHRAI CHRIK PEEPL

3-4. (a) Wat da spiritizm? (b) How kaman di bileef a spiritizm?

3 Wan a di mayn wayz how Saytan an ih deemon dehn chrai fi chrik peepl da chroo spiritizm. Dehn peepl weh praktis spiritizm klaym seh dat dehn noa bowt er ku kanchroal tingz weh hyoomanz noh ga di powa fi du. Fi egzampl,  som peepl klaym fi ga di powa fi pridik di fyoocha chroo blak majik er horoskoap. Adaz mait ak laik dehn mi-di taak tu sombadi weh don ded. Som peepl praktis oabya ahn dehn mait chrai put wahn kers pahn sombadi els. *

4 Humoch peepl noa bowt di powa a spiritizm? Wahn servay weh som peepl mi du eena 18 difrent konchriz eena Latin America ahn di Caribbean proov dat wan owta evri chree persn bileev eena blak majik, ahn nayli di saym amonk a peepl bileev dat ih pasabl fi kantak di ded. Wahn neks servay weh dehn mi du eena 18 difrent konchriz da Africa proov dat moa dan haaf a di amonk a peepl weh mi tek paat bileev eena majik. Af koars, noh mata wehpaat wi mait liv, wi fi protek wiself fahn eni faam a spiritizm. Saytan mayn goal da fi “fool op aal di peepl eena di werl.”—Rev. 12:9.

5. How Jehoava feel bowt spiritizm?

5 Jehoava da “di Gaad a chroot.” (Ps. 31:5) Soh how hihn feel bowt spiritizm? Hihn hayt it! Jehoava mi tel di Izrelait dehn: “Dehn noh fi fain nobadi monks unu weh mek dehn son er daata paas chroo di faiya, enibadi weh tel di fyoocha, enibadi weh praktis majik, enibadi weh luk fi bad sain, wahn oabya man, enibadi weh put bad ting pahn ada peepl, enibadi weh goh luk fi di oabya man er sombadi weh tel di fyoocha, er enibadi weh kantak di ded. Kaa hoosoeva du dehnya tingz, Jehoava hayt.” (Deut. 18:10-12) Kristyanz noh deh anda di Laa weh Jehoava mi gi di Izrelait dehn. Bot stil, wi noa dat di way hihn feel bowt spiritizm noh chaynj.—Mal. 3:6.

6. (a) How Saytan yooz spiritizm fi haam peepl? (b) Akaadn tu Ecclesiastes 9:5, wat da di chroot bowt di ded?

6 Jehoava waan wi gens spiritizm kaaz hihn noa dat Saytan yooz it fi haam peepl. Saytan yooz spiritizm fi tel lai—inkloodin di lai dat di ded kip aan di liv sohnweh els. (Reed Ecclesiastes 9:5.) * Saytan aalso yooz spiritizm fi mek peepl frayd ahn fi ton dehn weh fahn Jehoava. Fi hihn foakos da fi mek peepl weh praktis spiritizm chros eena di eevl spirit dehn insteda chros eena Jehoava.

HOW WI PROTEK WISELF FAHN EEVL SPIRITS

7. Weh Jehoava tel wi?

7 Laik weh wi mi seh erliya, Jehoava tel wi weh wi need fi noa soh dat wi noh geh fool bai Saytan an ih deemon dehn. Mek wi diskos sohn tingz weh wi ku du soh dat wi ku fait Saytan an ih deemon dehn.

8. (a) Wat da di mayn way wi protek wiself fahn di wikid spirit dehn? (b) How Psalm 146:4 ekspoaz Saytan lai dehn bowt det?

8 Reed Gaad Werd ahn tek di taim fi tink bowt weh wi reed. Dis da di mayn way wi ku fait Saytan teechinz. Gaad Werd da laik wahn shaap soad weh ku kot chroo, er ekspoaz, di lai dehn weh Saytan waahn peepl bileev. (Ifee. 6:17) Fi egzampl, di Baibl ekspoaz di big lai dat di ded ku kamyoonikayt wid di livin.  (Reed Psalm 146:4.) * Ih aalso rimain wi dat onli Jehoava ku noa er pridik di fyoocha. (Isa. 45:21; 46:10) If wi mek it wahn habit fi reed Gaad Werd ahn tek di taim fi tink bowt weh wi reed, wi wahn bee redi fi rijek ahn hayt aala di lai dehn weh Saytan an ih deemon dehn waahn wi bileev.

9. Weh kaina praktis weh ga fi du wid spiritizm wi haftu rijek?

9 Rijek eniting weh ga fi du wid spiritizm. Az chroo Kristyanz, wee noh ga notn fi du wid spiritizm. Fi egzampl, wi noh goh da oabya-man er oabya-uman fi chrai get in kantak wid di ded eena eni ada way. Laik weh wi mi menshan eena di laas aatikl, wi noh ga notn fi du wid eni finaral kostom weh bays pahn di bileef dat ded peepl liv sohnweh els. Ahn wi noh yooz horoskoap er luk fi sainz, reed kyaad, yooz wahn kristal baal, er reed han fi pridik di fyoocha. (Isa. 8:19) Wee noa dat eni kantak wid di deemon dehn veri daynjaros, ih wuda bee laik if wi da too faiv wid Saytan ahn ih deemon dehn.

Kapi di egzampl a di Kristyanz bak eena di taim a apasl dehn ahn geh rid a evriting weh ga fi du wid spiritizm (Paragraaf 10-12)

10-11. (a) Weh som a di peepl weh mi liv eena di taim a di apasl dehn mi du wen dehn mi laan di chroot? (b) Akaadn tu 1 Korintyanz 10:21, wai wi shuda kapi di egzampl a di Kristyanz fahn bak eena di taim a di apasl dehn ahn how wi ku du dat?

10 Geh rid a eniting weh ga fi du wid spiritizm. Eena di taim a di apasl dehn, som a di peepl weh mi liv da Efisos mi praktis spiritizm. Wen dehn mi laan di chroot, dehn mi haftu mek sohn big chaynjiz. Di Baibl seh: “Som a dehn wan weh mi-di du oabya er blak majik bring dehn majik buk dehn ahn bon dehn op eena poblik.” (Aks 19:19) Dehn mi du evriting dehn kud fi stay weh fahn di wikid spirit dehn. Dehn majik buk mi kaas wahn lata moni. Bot insteda gi dehn weh er sel dehn tu sombadi els, dehn mi bon dehn op. Dehn  neva kay humoch dehn buk mi kaas, fi dehn foakos da-mi fi pleez Jehoava.

11 How wee ku kapi di egzampl a di Kristyanz fahn bak den? Da wahn waiz ting fi geh rid a eniting weh ga fi du spiritizm. Dis inklood eniting weh peepl wayr er put eena dehn hows fi protek dehnself fahn di wikid spirit dehn.—Reed 1 Korintyanz 10:21.

12. Wen ih kohn tu entataynment, weh kweschanz wi shuda aks wiself?

12 Mek shoar di entataynment weh yu chooz prapa. Aks yuself: ‘Ai reed buks, magazeen, er eni aatikl pahn di Intanet weh ga fi du wid spiritizm? Weh kaina myoozik Ai lisn tu, weh kaina moovi ahn TV shoa Ai wach, er weh kaina veedyo gaym Ai play? Eni a dehdeh ga fi du wid spiritizm? Di moovi er TV shoa dehn da bowt zombi, vampaiya, goas er eniting weh ga fi du wid di deemon dehn?ʼ Af koars, noh aal entataynment weh noh bays pahn reel-laif stoari er fayri tayl ga fi du wid spiritizm. Wen yu egzamin yu chois a entataynment, mek shoar fi mek wahn disizhan weh wahn help yu fi stay weh fahn eniting weh Jehoava hayt. Wi waahn du wi bes fi “kip wahn klyaa kanshans wid Gaad.”—Aks 24:16. *

13. Weh wi noh waahn du?

13 Noh tel stoari weh ga fi du wid di deemon dehn. Di perfek egzampl fi fala da Jeezas. (1 Peet. 2:21) Sins Jeezas mi liv da hevn bifoa ih mi kohn pahn ert, Jeezas mi noa wahn lat bowt Saytan an ih deemon dehn. Bot hihn neva shayr stoari bowt weh dehnya wikid spirit dehn du. Jeezas da-mi wahn witnis fi Jehoava,  hihn neva waahn bee wahn witnis a Saytan. Wee waahn kapi Jeezas egzampl eena dis kays ahn noh spred stoari bowt di deemon dehn. Wi waahn shoa bai wi werdz dat da “gud tingz gaid wi haat.” Onli Baibl chroot ku du dis.—Ps. 45:1.

Wi no fi frayd fi di wikid spirit dehn kaaz Jehoava ahn Jeezas faar moa powaful (Paragraaf 14-15) *

14-15. (a) Wai wi noh fi frayd fi di wikid spirit dehn? (b) Weh proov dat Jehoava protek ih peepl tudeh?

14 Noh bee frayd fi di wikid spirit dehn. Eena dis imperfek werl, bad tingz ku hapm tu wi. Wi ku geh sik, wahn aksident ku hapm, er wi ku eevn ded sodn-wan. Bot wi noh fi tink dat da eevl spirits fi blaym. Di Baibl seh: “taim ahn tingz wi noh ekspek” ku hapm tu enibadi. (Eccl. 9:11) Jehoava faar moa powaful dan di deemon dehn. Tek fi egzampl, Jehoava neva alow Saytan fi kil Joab. (Job 2:6) Eena Moaziz day, Jehoava mi shoa dat hihn ga moa powa dan di prees dehn weh praktis majik da Eejip. (Ex. 8:18; 9:11) Laytaraan eena hevn, Jehoava mi gi Jeezas di atariti fi pich Saytan dong pahn di ert. Ahn eena di fyoocha, Jeezas wahn chroa Saytan an ih deemon dehn eena di deep deep hoal wehpaat dehn wahn kyaahn haam er hert nobadi.—Rev. 12:9; 20:2, 3.

15 Wi ku si klyaa-wan dat Jehoava protek ih peepl tudeh day. Tink bowt dis: Wee di preech ahn teech di chroot aal oava di ert. (Mach. 28:19, 20) Wen wi du dis, wi di ekspoaz Saytan lai dehn. If Saytan kuda mi stap dis werk, hihn wuda mi don du it lang taim, bot hihn kyaahnt. Yu si, wi ga gud reezn noh fi frayd fi di wikid spirit dehn. Wee noa dat “Jehoava di luk chroo aal di ert fi shoa ih schrent tuwaadz dehn wan weh di serv ahn wid dehn hoal haat.” (2 Chron. 16:9) If wee faytful tu Jehoava, di deemon dehn kyaahn haam wi.

AAL HOO AKSEP JEHOAVA HELP, HIHN WAHN BLES

16-17. Giv wahn egzampl a how ih tek korij fi stan op gens di wikid spirits.

16 Ih tek lata korij fi stan op gens di wikid spirit dehn, espeshali wen famili er frenz deh gens wi, kaaz dehn tink dat sohnting bad wahn hapm tu wi if wi  noh jain dehn. Bot Jehoava bles aal hoo shoa da kaina korij. Kansida di egzampl a wahn sista weh naym Erica, weh liv da Ghana. Erica mi 21 yaaz oal wen shee mi aksep wahn Baibl stodi. Sins fi shee pa da-mi wahn prees weh mi praktis majik, dehn mi ekspek shee fi tek paat eena sertn kostomz weh ga fi du wid spiritizm. Wan a dehn kostom da-mi fi eet di meet weh dehn aafa az wahn sakrifais tu di gaad dehn weh ih pa wership. Wen Erica mi seh dat ih noh mi wahn tek paat, ih famili mi tek it az wahn insolt gens dehn gaadz. Di famili mi bileev dat dehn gaadz wuda ponish dehn wid mental ahn fizikal siknis.

17 Erica famili mi chrai fi foas ahn fi fala dehn kostom bot shee neva du it, eevn doa ih mi haftu pay di prais. Ih mi haftu lef hoam. Sohn Witnisiz mi welkom shee da dehn hows. Eena da way, Jehoava mi bles Erica wid wahn nyoo famili—bradaz ahn sistaz weh da-mi laik wahn reel famili tu shee. (Maak 10:29, 30) Erica mi stay laayal tu Jehoava eevn doa fi shee famili neva kansida ahn fi bee paat a dehn famili nohmoh, dehn mi eevn bon op aala ih tingz. Bot non a dat mi bada ahn. Shee mi geh baptaiz ahn now ih di serv az wahn regyula painyaa. Shee noh frayd fi di deemon dehn. Ahn wen ih kohn tu ih famili, Erica seh: “Evri day Ah pray fi mi famili, dat dehn ku ga di jai weh Ai ga ahn feel di freedom weh Ai feel, bikaaz Ah di serv wahn lovin Gaad. Da wahn reel blesin fi noa Jehoava.”

18. Wat da sohn blesinz weh wi geh wen wi serv Jehoava?

18 Noh aala wi wahn haftu fays dehn kaina tes eena laif. Bot stil, aala wi need fi chros eena Jehoava ahn protek wiself fahn wikid spirits. If wi du dat, wi wahn geh lata blesinz, ahn wi noh wahn geh fool op bai Saytan kruwil lai dehn. Aalso, wi wahn serv Jehoava noh mata wat, kaa di deemon dehn kyaahn stap wi. Wi wahn ga wahn schranga frenship wid Jehoava; dat da weh moa impoatant. Di disaipl Jaymz mi rait: “Soh noa yu plays wid Gaad. Stan op ahn fait di Devl, ahn ih wahn ton rong ahn ron fahn yu. Kohn kloas tu Gaad, ahn hihn wahn kohn kloas tu yoo.”—Jay. 4:7, 8.

SANG 150 Luk tu Gaad fi Salvayshan

^ par. 5 Owta lov, Jehoava waan wi bowt di wikid spirit dehn ahn bowt how dehn ku haam wi. How wikid spirits ku chrik wi? Weh wi ku du fi stan op gens di wikid spirit dehn? Dis aatikl wahn diskos wayz how Jehoava help wi fi noh geh fool bai dehndeh eevl spirit.

^ par. 3 WEH IH MEEN? Spiritizm da eni bileef er praktis weh ga fi du wid deemonz. Peepl weh praktis spiritizm bileev dat wen wahn persn ded, ih spirit kip aan di liv sohnweh els. Ahn soh dehn chrai kantak sombadi weh ded, eeda chroo wahn oabya-man er oabya-uman. Blak majik da wahn faam a spiritizm tu. Eena dis aatikl, wi yooz di werd majik fi taak bowt eni praktis weh ga fi du wid spiritizm. Dis ku meen wen dehn put wahn kers pahn sombadi er tek aaf wahn kers fahn sombadi. Ih noh rifaa tu chriks weh peepl naamali du wid dehn han fi entataynment.

^ par. 6 Ecclesiates 9:5: “Di livin noa dat dehn wahn ded, bot di ded noh noa notn ataal, ner dehn noh ga no riwaad needa kaaz nobadi noh wahn memba dehn.”

^ par. 8 Psalm 146:4: “Ih spirit kom owt, hihn goh bak tu di grong; pahn da sayhn day ih stap tink.”

^ par. 12 Eldaz noh ga di rait fi mek roolz bowt entataynment. Insted, eech Kristyan haftu yooz ih kanshans fi chooz weh fi reed, wach er play. Wahn waiz famili hed mek shoar dat ih famili fala Baibl prinsiplz wen dehn di chooz entataynment.—Si di aatikl Do Jehovahʼs Witnesses Ban Certain Movies, Books, or Songs?eena jw.org® anda ABOUT US > FREQUENTLY ASKED QUESTIONS.

^ par. 56 DI PICHA DEHN: Di picha di shoa Jeezas az wahn powaful King da hevn di leed wahn aami a aynjelz. Jehoava chroan deh haiya dan dehn.