Skip tu di aatikl

Skip tu lis a tapik

Serv Jehoava, di Gaad a Freedom

Serv Jehoava, di Gaad a Freedom

“Weh di spirit a Jehoava deh, da deh freedom deh.” —2 KOR. 3:17, NW.

SANG: 49, 73

1, 2. (a) Wai sohn peepl eena di dayz a di apasl Paal mi kansaan bowt slayvri ahn freedom? (b) Wehpaat Paal tel peepl fi fain chroo freedom?

JOORIN di dayz a di apasl dehn, di Roamanz mi prowd fi bee wahn nayshan weh mi ga laa, jostis, ahn freedom. Bot, moas a di powa ahn gloari a di Roaman Empaiya da-mi bikaaz a weh dehn mi yooz slayvz fi bil op dehn nayshan. In fak, dehn mi ga wahn taim eena hischri weh bowt 30 persent a di peepl weh mi liv deh da-mi slayv. Soh den, wi ku andastan wai di kaman peepl ahn Kristyanz mi aalwayz di tink bowt slayvri ahn freedom.

2 Di apasl Paal mi rait wahn lat bowt freedom. Bot di perpos a fi hihn minischri da neva fi chaynj di govament, laik weh moas peepl mi waahn eena dehndeh dayz. Hihn an ada Kristyanz mi werk haad fi help adaz laan di gud nyooz a Gaad Kingdom ahn bowt di benifit a Jeezas ransom sakrifais. Dehn neva luk tu wahn hyooman roola fi freedom. Paal mi shoa di res a Kristyanz wehpaat fi geh chroo freedom. Fi egzampl, eena ih sekant leta tu di Korintyan kangrigayshan,  ih seh: “Jehoava da di Spirit, ahn weh di spirit a Jehoava deh, da deh freedom deh.”—2 Kor. 3:17, NW.

3, 4. (a) Weh mi mek Paal seh dehn werdz da 2 Korintyanz 3:17? (b) Weh wi haftu du fi injai di freedom weh kohn fahn Jehoava?

3 Erliya eena da saym leta tu di bradaz da Korint, Paal mi taak bowt weh mi hapm tu Moaziz pahn Mongt Sainai afta ih mi taak wid wan a Jehoava aynjel. Wen di peepl mi si Moaziz dehn mi geh frayd, soh Moaziz put wahn vayl oava ih fays. (Ex. 34:29, 30, 33; 2 Kor. 3:7, 13) Paal kantinyu fi seh: “Bot wen enibadi ton tu Jehoava, di vayl kom aaf.” (2 Kor. 3:16, NW) Weh Paal mi meen bai dat?

4 Laik weh wi mi laan eena di laas aatikl, Jehoava, di Kriyayta, da di onli Persn weh ga kompleet freedom. Ih mek sens, den, dat weh Jehoava deh, ahn “weh di spirit a Jehoava deh,” da deh freedom wahn deh. Bot fi injai ahn benifit fahn da freedom, wi haftu “ton tu Jehoava,” er ga wahn persnal rilayshanship wid hihn. Wen di Izrelait dehn mi deh eena di wildanes, dehn neva mi vyoo tingz eena wahn spirichwal way. Dehn neva mi ga di karek vyoo a how Jehoava mi deel wid dehn. Da laik dehn mi ga wahn vayl di kova dehn main ahn haat. Dehn onli mi foakos pahn dehn freedom fahn Eejip eena wahn fizikal way.—Heeb. 3:8-10.

5. (a) Weh kaina freedom kohn fahn Jehoava spirit? (b) How wi noa dat eevn prizn kyaahn tek weh di freedom Jehoava gi wi? (c) Wat da sohn kweschan wi wahn ansa?

5 Di freedom weh kohn fahn Jehoava da moa dan di freedom fahn fizikal slayvri. Di freedom fahn Jehoava spirit ku gi wi moa dan weh eni hyooman kuda geh fi dehnself. Ih gi wi freedom fahn sin ahn det, ahn fahn slayvri tu faals wership ahn di difrent chradishan dehn. (Roam. 6:23; 8:2) Now, dat da freedom fi chroo! Wahn persn ku injai di benifits a da kaina freedom eevn wen ih deh da prizn er if ih di werk az wahn slayv. (Gen. 39:20-23) Da dis mi hapm tu Sista Nancy Yuen ahn Brada Harold King. Di too a dehn mi gaahn da prizn fi yaaz sayka dehn fayt. Yu ku si ahn hyaa fi dehn ekspeeryens pahn JW Braadkyaastin. (Luk anda INTERVIEWS AND EXPERIENCES > ENDURING TRIALS.) Wi need fi ansa too kweschan doh: (1) How wi shoa dat wi cherish wi freedom? (2) Weh wi ku du fi mek gud yoos a dis freedom?

CHERISH YU FREEDOM FAHN GAAD

6. How di Izrelait mi shoa dat dehn neva apreeshiayt di freedom weh Jehoava mi gi dehn?

6 Wen wi riyalaiz di valyu a wahn ekspensiv gif, wi shoa wi apreeshiayshan tu di persn weh gi wi da gif. Di Izrelait dehn neva apreeshiayt di freedom weh Jehoava mi gi dehn wen ih free dehn fahn slayvri da Eejip. Jos wahn fyoo monts afta dehn lef Eejip, dehn staat tu krayv di food ahn jrink fahn deh. Dehn mi eevn staat tu komplayn bowt weh Jehoava mi provaid fi dehn. Dehn mi eevn waahn goh bak da Eejip. Jos imajin dat, dehn mi waahn ‘fish, kukumba, waatamelan, oanyan, ahn gyaalikʼ insteda dehn freedom fi wership di chroo Gaad, Jehoava. Noh wanda Jehoava mi geh soh beks wid dehn. (Num. 11:5, 6, 10; 14:3, 4) Dat da wahn impoatant lesn fi wee!

7. How Paal mi aplai ih oan kongsl da 2 Korintyanz 6:1, ahn how wi ku du di saym ting?

 7 Di apasl Paal inkorij aal Kristyanz noh fi tek fi grantid di freedom weh Jehoava gi wi chroo ih Son, Jeezas Krais. (Reed 2 Korintyanz 6:1.) Paal neva perfek, hihn da-mi wahn slayv tu sin ahn det, ahn dis mi mek ih feel terabl. Stilyet, ih seh: “Ah tank Gaad! Jeezas Krais wahn free mi.” Wai ih mi seh dat? Layta ih mi eksplayn tu di bradaz dat wen wi chooz fi yooz wi freedom eena wahn waiz way, ih kud “set wi free fahn sin ahn det.” (Roam. 7:24, 25; 8:2) Mek wi fala Paal egzampl ahn neva tek fi grantid dat Jehoava free wi fahn sin ahn det. Bikaaz a di ransom, wi ku bee hapi ahn serv wi Gaad wid wahn kleen kanshans.—Ps. 40:8.

Yoo di yooz yu freedom fi put di Kingdom fos eena yu laif? (Paragraaf 8-10)

8, 9. (a) Weh waanin di apasl Peeta mi gi wi bowt how fi yooz wi freedom? (b) Wat da sohn daynja weh wi fays tudeh?

8 Bisaid apreeshiayshan fi wi freedom, wi neva waahn yooz wi freedom eena di rang way. Di apasl Peeta mi waan wi fi noh yooz wi freedom az wahn ekskyoos fi sin. (Reed 1 Peeta 2:16.) Da waanin noh rimain yu a weh hapm tu di Izrelait dehn eena di wildanes? An ih eevn moa daynjaros fi wee tudeh. Saytan an ih werl ga aal kaina ting weh wi ku red wi aiy pan. Dehn ga aal kaina stail a kloaz, food, jrink, entataynment, ahn wahn lata ada tingz. Yoozhwali yu si byootiful peepl eena dehn advataizment. Dehn mek ih luk laik yu haftu ga dehndeh tingz, bot moas a di taim da tingz weh yu noh need. Ih soh eezi fi bileev dehnya chrik ahn yooz wi freedom eena di rang way!

9 Wi kud aplai Peeta kongsl eena sohn moa seeryos disizhan eena laif tu, laik wi chois a ejukayshan er werk. Fi egzampl, yong peepl da skool tudeh deh anda lata presha fi du gud soh dat dehn ku goh da di bes kalij er yooniversiti. Teechaz ahn kongslaz tel dehn dat if dehn geh wahn haiya ejukayshan, dehn wahn geh wahn beta jab ahn mek moa moni. Dehn shoa dehn humoch wahn persn wid wahn haiya ejukayshan geh pay kompyaa tu weh wahn persn wid jos wahn baysik ejukayshan get. Aala dis ku luk ahn song gud tu wahn yong persn, bot dis chois ku afek wahn yong persn hoal laif. Soh weh yong peepl ahn dehn payrents need fi memba?

10. Weh wi need fi memba wen wi di yooz wi freedom fi mek persnal disizhanz?

10 Som bradaz mait feel dat sins dehnya da persnal chois, dehn ga di freedom fi chooz weh dehn waahn az lang az ih noh bada dehn kanshans. Maybi dehn eevn tink bowt Paal kongsl tu di Korintyan bradaz bowt food: “Wai Ai fi hoal dong pahn mai freedom jos fi eez sohnbadi els kanshans?” (1 Kor. 10:29) Now, da chroo wi ga di freedom fi mek persnal chois wen ih kohn tu ejukayshan ahn werk, bot wi need fi memba dat wi freedom ga limits ahn dat wateva disizhan wi mek, wi wahn haftu fays di rizolt. Dats wai Paal mi seh dis: “Wee free fi du eniting weh wee waahn. No laa kyaahn stap wi. Bot da noh evriting gud fi bil wi op.” (1 Kor. 10:23) Dat help wi fi si dat moa impoatant tingz deh fi kansida dan weh wee waahn wen ih kohn tu how wi wahn yooz wi persnal freedom eena difrent ayrya a wi laif.

 YOOZ WI FREEDOM FI SERV GAAD

11. Wai Jehoava set wi free?

11 Wen Peeta mi waan wi dat wi noh fi yooz wi freedom eena di rang way, ih tel wi di reezn wai. Ih inkorij wi fi yooz wi freedom “fi liv laik wahn slayv weh bilangz tu Gaad.” Jehoava mi free wi fahn sin ahn det chroo Jeezas. Ahn di reezn wai da soh dat wi ku liv wi hoal laif fi Hihn, ‘laik wahn slayv weh bilangz tu hihn.ʼ

12. Weh wi ku laan fahn di egzampl a Noawa an ih famili?

12 Weh ku help wi soh dat wi noh yooz wi freedom eena di rang way ahn slayv fi di werl agen? Wi haftu kip wi main pahn spirichwal tingz ahn stay bizi eena di Laad werk. (Gal. 5:16) Tink bowt Noawa an ih famili. Dehn mi liv eena wahn werl weh mi vailent ahn wikid. Bot, dehn neva alow di peepl rong dehn fi chaynj dehn. Noawa an ih famili neva waahn di tingz weh di peepl bak den mi-di goh afta. How dehn mi manij fi du dat? Dehn chooz fi stay bizi eena dehn asainment fahn Jehoava—bil wahn aak, put op food fi di hoal famili ahn fi di animal dehn, ahn goh waan adaz. “Noawa mi du akaadn tu aal weh Gaad koman ahn. Ih du egzakli weh ih mi fi du.” (Gen. 6:22) Bikaaz a dat, Noawa an ih famili mi servaiv di Flod.—Heeb. 11:7.

13. Weh Gaad koman Jeezas fi du, ahn weh koman Jeezas gi wee fi du?

13 Weh Jehoava koman wi fi du tudeh? Sins wee da Jeezas disaipl, wi noa da koman fahn Gaad. (Reed Look 4:18, 19.) Bot tudeh, di gaad a dis sistem di blain moas peepl. Dehn da stil slayv tu dehn rilijan, moni, ahn di laifstail a peepl rong dehn. (2 Kor. 4:4) Da wahn privilij fi mek wi fala Jeezas egzampl fi help ada peepl geh fi noa ahn wership Jehoava, di Gaad a freedom. (Mach. 28:19, 20) Dat da noh wahn eezi werk, ahn wi mait fays sohn chalenj. Moa  ahn moa peepl noh waahn hyaa di gud nyooz. Som a dehn noh kay ahn som jos hayt wi. Di kweschan weh aala wi fi tink bowt doh da, ‘Ai ku yooz mi freedom fi gi moa sopoat tu di Kingdom werk?ʼ

14, 15. How wahn lata bradaz di rispan tu di preechin werk? (Koment pahn di picha da di biginin a dis aatikl.)

14 Ih nais fi si dat wahn lata bradaz di geh di sens a di taimz weh wi di liv eena. Dehn araynj op tingz eena dehn laif soh dat dehn ku spen moa taim eena di minischri. (1 Kor. 9:19, 23) Som a dehn serv eena dehn oan ayrya; adaz moov wehpaat need moa help. Joorin di laas faiv yaaz, moa dan 250,000 bradaz mi staat painyaa, ahn now wi ga moa dan 1,100,000 regyula painyaaz. Dat da wahn byootiful way fi yooz wi freedom fi serv Jehoava!—Ps. 110:3.

15 Weh mi help dehnya bradaz ahn sistaz fi yooz dehn freedom eena wahn waiz way? Wi ga di egzampl a John ahn Judith. Dehn mi serv eena wahn lata difrent konchri joorin di paas 30 yaaz. Dehn seh dat wen di Painyaa Servis Skool mi staat eena 1977, di bradaz mi-di inkorij evribadi fi moov ahn serv wehpaat need help. John seh dat ih mi haftu chaynj jab wahn lata taimz soh dat ih kuda mi kip ih laif simpl ahn foakos pahn da goal. Den, wen dehn mi get da di konchri weh dehn mi waahn serv, dehn mi haftu pray tu Jehoava ahn pen pahn hihn soh dat dehn kuda mi mek it deh. Dehn mi need help fi laan wahn nyoo langwij, deel wid wahn nyoo kolcha, an ajos tu di weda. How dehn feel now? John seh: “Ah feel laik Ah di du di bes werk eva. Jehoava geh fi bee moa reel tu mi, laik wahn lovin pa. Now Ah ga wahn beta andastandin a weh Jaymz 4:8 meenz: ‘Kohn kloas tu Gaad, ahn hihn wahn kohn kloas tu yoo.ʼ Ah noa dat Ah fain weh Ah mi-di luk fa. Ah feel laik mi laif ga perpos now.”

16. How towznz a bradaz yooz fi dehn freedom, eevn if da jos fi wahn lee wail?

16 Noh aala wi bradaz ahn sistaz ku du weh John ahn Judith di du. Som ku onli serv ful-taim fi wahn fyoo monts. An adaz luk fi wayz fi sopoat di kanschrokshan werk rong di werl. Fi egzampl, wen dehn mi-di bil di werl hedkwaataz da Warwick, New York, bowt 27,000 bradaz ahn sistaz valantyaa. Som stay fi too weeks, adaz stay fi op tu wahn yaa er langa. Wahn lata dehn lef dehn jab an ada tingz fi serv deh. Dehnya bradaz mi yooz dehn freedom fi prayz Jehoava, di Gaad a freedom!

17. Weh wandaful fyoocha wi ku ga if wi yooz wi freedom eena di rait way?

17 Wi graytful tu Jehoava dat wi geh fi noa hihn ahn ku injai di freedom weh kohn fahn chroo wership. Wi wahn shoa humoch wi chrezha dis freedom bai di chois dehn wi mek. Insteda yooz wi freedom eena di rang way, mek wi yooz it fi serv Jehoava eena di bes way wi kud. If wi du dat, wi ku luk faawod fi injai aala di blesin dehn weh Jehoava pramis wi wen dehnya werdz kohn chroo: ‘Dehn noh wahn hafu ded nohmoh. Gaad wahn free dehn soh dat ih ku gi dehn di sayhn gloari weh bilangz tu ih pikni dehn.ʼ—Roam. 8:21.