Skip tu di aatikl

Skip tu lis a tapik

Kweschanz Weh Peepl Aks

Kweschanz Weh Peepl Aks

Wai wi kyaahn put poblikayshan weh Jehoava Witnisiz poblish pahn wahn persnal websait er soashal meedya?

Bikaaz wi aafa aala wi poblikayshan, veedyo, myoozik, an ada mateeryal widowt chaaj, som peepl feel laik ih okay fi poas dehn pahn ada websait er pahn soashal meedya. Bot dat goh gens di Kandishanz fi di Yoos a Wi Websait, * an ih kaaz seeryos prablemz. Laik weh dehn Kandishanz seh, wi noh alow nobadi fi “poas eni picha, ilekchranik poblikayshan, chraydmaak, myoozik, veedyo, er aatikl fahn wi websait pahn di Intanet (eni websait, sait fi shayr failz, er soashal netwerk).” Wai wi need dehnya limits?

Nobadi fi poas wi poblikayshan dehn pahn eni ada Intanet sait—dehn ga kapirait

Aala di mateeryal pahn wi websait ga kapirait. Apastayts ahn peepl weh noh laik wi chrai yooz wi poblikayshan pahn fi dehn websait fi mek Jehoava Witnisiz an adaz vizit dehn sait. Bot den, wans yu goh pahn dehn sait, yu wahn fain tingz weh dehn put deh fi mek peepl noh laik wi er fi eevn korop di tinkin a wi bradaz ahn sistaz. (Ps. 26:4; Prov. 22:5) Ada peepl yooz mateeryal fahn wi poblikayshan dehn er wi jw.org loago fi advataiz wahn prodok er fi promoat wahn ap fi tablet, foan, er kompyoota. Bikaaz wi kapirait evriting, wi ga wahn leegal way fi protek wiself ahn wi aaganaizayshan. (Prov. 27:12) Bot if wi alow peepl, eevn wi bradaz, fi poas mateeryal pahn ada websaits er yooz di jw.org chraydmaak fi sel tingz, den di koat noh wahn tek wi seeryos wen wi chrai stap ada peepl fahn du it.

 If wi dongload wi poblikayshan dehn eniway els ada dan jw.org, ih ku bee daynjaros. Jehoava gi di rispansabiliti fi provaid spirichwal food tu taim tu di “faytful ahn diskreet slayv”—an onli tu dehn. (Mach. 24:45, NW) Di “slayv” onli yooz di ofishal websait dehn fi provaid spirichwal food—www.jw.org, tv.jw.org, ahn wol.jw.org. Ahn wi onli ga chree ofishal ap fi foan, tablet, ahn kompyoota—JW Language®, JW Library®, ahn JW Library Sign Language®. Wi ku chros dehnya provizhan fi noh ga eni advataizment ahn fi noh ga eniting fahn Saytan werl een deh weh ku korop wi. If di spirichwal food paas chroo ada peepl er proagram, wi noh ga no garantee dat dehn neva korop it.—Ps. 18:26; 19:8.

Pahn tap a dat, if wi poas wi poblikayshan dehn pahn wahn websait weh alow peepl fi koment, wi jos di gi apastayts di apachooniti fi spred dehn paizn. Som bradaz alow peepl fi pik dehn mowt ahn get dehn intu wahn aagyument, eevn tu di point a du ahn seh tingz weh jreg Jehoava naym chroo di mod. Memba, wahn onlain diskoshan da noh di rait plays fi ‘teech dehn wan weh noh gree wid wi.ʼ (2 Tim. 2:23-25; 1 Tim. 6:3-5) Som peepl eevn mek op fayk soashal meedya akonks er websait eena di naym a di aaganaizayshan, di Govanin Badi, er di bradaz weh serv pahn di Govanin Badi. Wi waahn unu noa dat no memba a di Govanin Badi ga eni persnal websait, Web payj, er soashal meedya akonk.

Wen wi inkorij peepl fi goh da di ofishal websait, wi di help spred di “Gud Nyooz.” (Mach. 24:14) Di dijital toolz weh wi yooz eena wi persnal minischri di geh beta ahn beta. Wee wuda waahn mek evribadi benifit fahn dehn. Soh, jos laik weh di Kandishanz fi di Yoos a Wi Websait seh, yu ku e-mayl sombadi wahn dijital kapi a wan a wi poblikayshan dehn er sen dehn wahn link tu it fi mek dehn get it fahn jw.org. Wen wi inkorij peepl weh inchrestid fi goh da wi ofishal websait, wi di link dehn tu di onli reel way fi geh spirichwal food, chroo “di faytful ahn diskreet slayv.”

^ par. 1 Wahn link tu di Kandishanz fi di Yoos a Wi Websait deh pahn di batam a di hoam payj pahn jw.org, ahn di kandishanz een deh aplai tu evriting weh deh pahn wi websait.