Skip tu di aatikl

Skip tu lis a tapik

Fala Jehoava Egzampl—Di Gaad Weh Gi Inkorijment

Fala Jehoava Egzampl—Di Gaad Weh Gi Inkorijment

“Wi prayz Gaad. . . . Hihn komfert [er, inkorij, NW, ftn.] wi eena aala wi chroblz.”—2 KOR. 1:3, 4.

SANG: 7, 3

1. How Jehoava inkorij hyoomanz rait afta Adam ahn Eev sin?

FAHN di biginin, wen Adam ahn Eev sin ahn looz perfek laif, Jehoava di gi hyoomanz inkorijment. Rait afta dehn sin eena Eedn, Gaad giv Adam fyoocha chiljren reezn fi tek korij. Di hyooman famili mi stil ga sohnting fi hoal aan tu. Di prafesi da Genesis 3:15 gi wi hoap dat soon “di oal snayk,” Saytan di Devl, ahn fi hihn wikid werl wahn geh dischrai.—Rev. 12:9; 1 Jan 3:8.

HOW JEHOAVA INKORIJ IH SERVANTS EENA DI PAAS

2. How Jehoava mi inkorij Noawa?

2 Noawa mi liv eena wahn werl weh onli hihn an ih famili mi-di serv Jehoava. Bikaaz a aala di vailens ahn doti loos livin weh mi-di hapm rong ahn, Noawa kuda mi geh diskorij. (Gen. 6:4, 5, 11; Jood 6) Bot Jehoava mi gi Noawa di korij ih mi need fi kip aan di wership Ahn an fi du weh rait. (Gen. 6:9) Jehoava mi tel Noawa dat Ih mi wahn dischrai di wikid werl ahn tel ahn weh ih mi need fi du fi sayv  ih famili. (Gen. 6:13-18) Jehoava da-mi wahn Gaad a inkorijment fi Noawa.

3. How Jehoava mi inkorij Jashwa? (Koment pahn di picha da di biginin a dis aatikl.)

3 Yaaz layta, Jashwa mi ga di jab fi help Gaad peepl setl dong eena di Pramis Lan. Dis mi meen dat Jashwa wuda mi haftu kanka sohn powaful aamiz weh mi liv eena di ayrya. Soh, Jehoava tel Moaziz fi inkorij Jashwa. Gaad tel ahn: “Koman Jashwa an inkorij ahn an schrentn ahn, bikaaz hihn da di wan weh wahn kraas oava ahn leed dis peepl ahn hihn da di wan weh wahn leed dehn fi inherit di lan weh yu wahn si.” (Deut. 3:28) Bifoa Jashwa staat du eniting doh, Jehoava inkorij ahn. Ih tel Jashwa: “Da noh mee koman yu? Ga korij ahn stay schrang. Noh feel kowad ner frayd, bikaaz Jehoava yu Gaad deh wid yu noh kay weh yu goh.” (Josh. 1:1, 9) Dat mosi mi inkorij Jashwa fi chroo!

4, 5. (a) How Jehoava mi inkorij ih peepl dehn? (b) How Jehoava mi inkorij ih Son?

4 Jehoava neva jos inkorij sertn peepl weh mi-di serv ahn, bot ih mi inkorij ih peepl dehn az wahn groop tu. Eena wahn prafesi, Jehoava mi seh: “Noh bee frayd, kaaz Ai deh wid yu. Noh wori, kaaz Ai da yu Gaad. Ah wahn schrentn yu, da mee wahn help yu, Ai wahn reeli hoal aan tu yu wid mai rait han a raichosnis.” (Isa. 41:10) Dis prafesi mi reeli inkorij di Jooz weh mi-di liv da Babilan. Jehoava pramis di Kristyanz eena di apasl dayz di saym ting, an ih pramis wee tudeh tu.—Reed 2 Korintyanz 1:3, 4.

5 Jeezas mi geh inkorijment fan ih Faada. Wen ih mi geh baptaiz, ih hyaa ih Faada vais fahn hevn seh: ‘Yoo da mi Son weh Ah onli lov, an Ah onli pleez wid yu.ʼ (Mach. 3:17) Imajin how dehndeh werdz mosi mi schrentn Jeezas joorin ih minischri pahn di ert!

HOW JEEZAS MI INKORIJ ADAZ

6. How Jeezas lee stoari bowt di baas weh gi ih servants moni inkorij wi?

6 Jeezas mi fala ih Faada egzampl. Wen Jeezas mi-di taak bowt di prafesi bowt di laas dayz, ih mi gi wahn lee stoari weh inkorij wi fi bee faytful; da bowt wahn man weh mi gi eech wan a ih servant dehn sohn moni. Wen ih kohn bak, ih tel eech wan a di servant weh mi faytful wid di moni: “Yu du gud! Yu da wahn gud servant weh Ah ku chros. Yu shoa mi seh yu ku handl lee bit a ting, soh Ah wahn put yu in chaaj a lat moa ting. Kohn kohn selibrayt wid mi.” (Mach. 25:21, 23) Dat da schrang inkorijment weh ku help enibadi stay faytful tu Jehoava ahn kantinyu serv Ahn!

7. How Jeezas mi inkorij aala ih apasl dehn, an espeshali Peeta?

7 Jeezas apasl dehn mi aalwayz yoostu kwaaril bowt hoo da di graytis monks dehn. Bot Jeezas mi payshent wid dehn an inkorij dehn evri taim fi stay hombl ahn serv adaz. Dehn neva fi chrai baas op nobadi. (Look 22:24-26) Di wan weh mi disapoint Jeezas di moas da-mi Peeta. (Mach. 16:21-23; 26:31-35, 75) Bot insteda rijek Peeta, Jeezas inkorij ahn. Ih eevn mi tel Peeta fi goh schrentn ih bradaz.—Jan 21:16.

SOHN EGZAMPL A INKORIJMENT EENA BAIBL TAIMZ

8. How Hezikaiya mi inkorij ih aami ahn di peepl a Jooda?

8 Bifoa Jeezas mi kohn pahn di ert ahn set wahn perfek egzampl a how fi  giv inkorijment, Jehoava faytful servants mi noa dat dehn mi need fi inkorij adaz. Fi egzampl, wen di Asiriyanz mi chretn Hezikaiya, ih kaal wahn meetin wid aala ih cheef fan ih aami ahn di peepl da Jooda fi inkorij dehn. Ahn di peepl mi geh korij fahn weh ih mi tel dehn.—Reed 2 Chronicles 32:6-8. *

9. Weh di buk a Job teech wi bowt inkorijment?

9 Wahn nada egzampl da Joab. Eevn doa hihn mi need inkorijment ihself, Joab teech ih chree soa-kaal frenz wahn lesn pahn how fi giv inkorijment. Ih tel dehn dat if hihn da-mi dehn, ih ‘wuda mi schrentn dehn wid di werdz fan ih mowt, ahn di inkorijment fan ih lip wuda mi mek dehn feel beta.ʼ (Job 16:1-5) Eena di en, Joab mi geh inkorijment fahn Ilaihyu ahn fahn Jehoava.—Job 33:24, 25; 36:1, 11; 42:7, 10.

10, 11. (a) Wai Jefta daata mi need inkorijment? (b) Hoo da laik Jefta daata tudeh weh need inkorijment?

10 Jefta daata da wahn nada egzampl a sombadi weh mi need inkorijment. Bifoa Joj Jefta mi fait wid di Amonait dehn, ih pramis Jehoava dat if Hihn help ahn win, ih wahn giv Ahn di fos persn weh kom owt fi meet ahn wen ih get bak hoam. Ih tel Jehoava da persn wahn spen ih hoal laif di serv eena di tabernakl. Wel, wen Jefta get bak hoam, ih daata, weh da-mi ih onli pikni, kom owt fi selibrayt ih vikchri. Dat mi brok Jefta haat. Bot ih kip ih pramis ahn sen ih daata, hoo da-mi wahn verjin, tu Shailoh fi serv da di tabernakl fi di res a fi shee laif.—Judg. 11:30-35.

11 Dis mi haad fi Jefta, bot imajin how ih daata mosi mi feel. Stil, shee mi wilin fi goh lang wid ih pa disizhan. (Judg. 11:36, 37) Shee giv op di rait fi geh marid ahn ga chiljren. Ih pa naym neva mi wahn egzis nohmoh, ahn shee neva mi wahn geh no inheritans. If enibadi bak den mi need inkorijment ahn komfert, da mi shee. Di Baibl tel wi dis doh: “Di yong uman dehn fahn Izrel mi ga di kostom fi goh inkorij di daata a Jefta, di Gilyadait, foa dayz owta evri yaa.” (Judg. 11:39, 40) Yu noh tink dat wi bradaz ahn sistaz hoo noh marid, weh di yooz dehn laif di du “di Laad werk,” dizerv inkorijment tu?—1 Kor. 7:32-35.

HOW DI APASL DEHN INKORIJ DI BRADAZ BAK DEN

12, 13. How Peeta mi inkorij ih bradaz?

12 Pahn di nait bifoa Jeezas mi ded, ih tel di apasl Peeta: “Aiy, Saiman, Saiman, Saytan aks Gaad fi mek ih siv unu jos laik how dehn siv weet fi separayt di gud fahn di bad. Bot Ai don pray fi yoo, Saiman, soh dat yu fayt noh wahn fayl yu. Ahn wen yu kohn bak tu mi agen, yu mos schrentn yu felo disaipl dehn.”—Look 22:31, 32.

Di letaz weh di apasl dehn mi rait tu di kangrigayshanz eena di fos senchri mi reeli inkorij dehn, ahn wen wee reed dehn tudeh, wi feel inkorij tu (Paragraaf 12-17)

13 Wel, Peeta mi werk haad fi sopoat di bradaz bak den. (Gal. 2:9) Da Pentikaas, an afta dat, Peeta egzampl mi reeli inkorij di bradaz fi chroo. Tuwaadz di en a ih minischri, ih tel ih felo bileevaz: “Ah di rait yu dis shaat leta, ahn Sailas, weh da wahn faytful bileeva, di help mi.  Wai Ah di rait dis leta da fi inkorij yu ahn fi mek yu noa seh dat yu ku chros di chroo grays a Gaad noh mata weh hapm.” (1 Peet. 5:12) Di letaz weh Gaad mi gaid Peeta fi rait dong kantinyu fi inkorij aal Kristyanz op tu tudeh. Wi reeli need dis kaina inkorijment az wi di wayt fi di taim wen aala Jehoava pramis wahn kohn chroo.—2 Peet. 3:13.

14, 15. How di buk dehn weh di apasl Jan mi rait inkorij aal Kristyanz fahn bak den til now?

14 Di apasl Jan mi werk haad fi sopoat di fos senchri Kristyan kangrigayshan. Di Gaspl weh hihn mi rait bowt Jeezas minischri reeli inkorij aal Kristyanz op tu tudeh. Da onli fi hihn Gaspl menshan dat Jeezas chroo disaipl dehn wahn ga lov monks dehnself.—Reed Jan 13:34, 35.

15 Di ada chree leta weh Jan rait ga sohn preshos chroot. Wen wi feel diskorij bikaaz a sin, wi feel beta wen wi reed dat “di blod a Jeezas, Gaad Son, mek wi kleen fahn aal sin.” (1 Jan 1:7) Ahn wen wi oan kanshans kandem wi, wi krai anaal wen wi reed dat “Gaad grayta dahn wi kanshans [er, haat, NW], kaa hihn noa evriting.” (1 Jan 3:20) Jan mi rait tu dat “Gaad da lov.” (1 Jan 4:8, 16) Eena ih sekant ahn terd leta, ih prayz di bradaz weh mi-di “fala di chroot.”—2 Jan 4; 3 Jan 3, 4.

16, 17. How di apasl Paal mi inkorij di bradaz bak den?

16 Eena di fos senchri, di apasl Paal da-mi praabli di wan weh mi gi di moas inkorijment tu ih bradaz. Noh lang afta Jeezas mi ded, moas a di apasl dehn mi stay da Jeroosalem wehpaat di govanin badi mi deh. (Aks 8:14; 15:2) Kristyanz da Judeeya yoostu preech tu peepl weh  mi don bileev eena wan Gaad. Bot, di hoali spirit mi sen di apasl Paal fi preech tu peepl weh mi wership lata difrent gaad.—Gal. 2:7-9; 1 Tim. 2:7.

17 Di konchri weh wee noa az Turkey da-mi wan a di plays dehn weh Paal mi chravl fi preech. Ih mi gaahn da dehn plays fi set op nyoo kangrigayshanz monks peepl weh da neva Jooz. Dehndeh nyoo Kristyanz ‘mi sofa persikyooshan fahn dehn oan peepl.ʼ (1 Tes. 2:14) Bowt rong 50 C.E., Paal mi tel di yong kangrigayshan da Tesalonaika: “Aal di taim wen wi di pray tu Gaad, wi pray fi unu ahn tel ahn tanks fi aala unu. Wi noh faget fi seh tanks tu wi Faada Gaad fi di way how unu di liv. Ih shoa seh dat unu bileev eena Jeezas, ahn how unu di werk haad far ahn bikaaz unu lov ahn. Wi tank Gaad tu bikaaz unu kip aan di stan schrang.” (1 Tes. 1:2, 3) Ih mi tel dehn tu fi schrentn wan anada. Ih seh: “Unu fi kip aan di inkorij wan anada, ahn help wan anada fi bee schranga eena di Laad, jos laik weh unu mi-di du.”—1 Tes. 5:11.

WAHN INKORIJIN GOVANIN BADI

18. How di govanin badi eena di dayz a di apasl dehn mi inkorij Filip?

18 Joorin di dayz a di apasl dehn, Jehoava mi yooz di govanin badi fi inkorij aala di bradaz, inkloodin bradaz weh mi-di tek di leed eena di kangrigayshan. Wen Filip di ivanjelaiza mi preech bowt Krais tu di Samaritan dehn, di govanin badi mi sopoat ahn. Peeta ahn Jan, weh da-mi membaz a di govanin badi, mi gaahn pray fi di nyoo bileeva dehn soh dat dehn ku geh hoali spirit tu. (Aks 8:5, 14-17) Di sopoat fahn di govanin badi mosi mi inkorij Filip ahn di nyoo Kristyan disaipl dehn!

19. Weh di Kristyan kangrigayshan mi du wen di govanin badi mi sen dehn wahn leta?

19 Layta, di govanin badi mi haftu mek wahn disizhan bowt weda er nat Kristyanz weh da neva Jooz mi fi geh serkomsaiz. Kaaz bays pahn di Laa weh Gaad mi gi Moaziz, fi Hihn peepl mi haftu geh serkomsaiz. (Aks 15:1, 2) Di govanin badi mi alow di hoali spirit fi gaid dehn. An afta dehn saach chroo di Skripchaz gud-wan, dehn disaid dat ih noh nesiseri fi Kristyanz weh da neva Jooz fi geh serkomsaiz. Soh dehn rait wahn leta tu di kangrigayshan dehn fi mek dehn noa bowt di disizhan. Difrent bradaz weh mi reprizent di govanin badi mi kehr di leta dehn tu di kangrigayshanz. How di bradaz mi feel? ‘Afta di leta don reed eena di kangrigayshan, evribadi mi hapi ahn mi feel inkorij.ʼ—Aks 15:27-32.

20. (a) How di Govanin Badi tudeh inkorij aala wi? (b) Weh kweschan wi wahn ansa eena di neks aatikl?

20 Tudeh, di Govanin Badi a Jehoava Witnisiz gi inkorijment tu bradaz ahn sistaz weh di serv da Betel, ful-taim servants owt eena di feel, an aala di bradaz weh da paat a di werlwaid Kristyan famili. Ahn jos laik di bradaz bak den, wi hapi fi geh di inkorijment fahn di Govanin Badi! Bisaidz dat, eena 2015 di Govanin Badi poblish di broashoar Return to Jehovah, weh reeli inkorij wahn lata difrent peepl aal oava di werl. Bot yu tink dat da onli eldaz fi fala Jehoava egzampl ahn gi inkorijment? Wi wahn ansa da kweschan eena di neks aatikl.

^ par. 8 2 Chronicles 32:6-8: “Den, ih put sohn militari komanda oava di peepl ahn gyada dehn tugeda da di poblik skwyaa a di siti gayt an inkorij dehn. Ih seh: ‘Ga korij ahn bee schrang. Noh frayd ner geh fraitn bikaaz a di King a Asiriya an aala di peepl weh deh wid hihn, bikaaz moa deh wid wee dan weh deh wid hihn. Hihn ga man powa, bot wee ga Jehoava wi Gaad fi help wi ahn fi fait wi batl.ʼ Ahn di peepl dehn mi geh schrentn fahn weh King Hezikaiya, di King a Jooda, mi tel dehn.”