Skip tu di aatikl

Skip tu lis a tapik

Eldaz ahn Ministeeryal Servants—Laan Fahn Timoti

Eldaz ahn Ministeeryal Servants—Laan Fahn Timoti

LAAS yaa aal oava di werl, towznz a wi bradaz mi geh apointid az eldaz ahn ministeeryal servants. If yoo da wan a dehn preshos bradaz, den fi shoar yu hapi dat yu mi geh dis privilij.

Af koars, yu mait feel lee nervos. Jason da wahn yong elda, ahn dis da weh hihn seh: “Wen Ah mi fos geh apointid, Ah mi feel laik di nyoo rispansabiliti da-mi tu moch fi mek Ah handl.” Wel, memba Moaziz ahn Jerimaiya mi feel laik dehn kudn du dehn nyoo asainment eeda. (Ex. 4:10; Jer. 1:6) If yu feel di saym way, how yu ku get oava dehn feelinz ahn kantinyu mek proagres? Mek wi luk pahn di egzampl a Timoti eena di Baibl.—Aks 16:1-3.

FALA TIMOTI EGZAMPL

Timoti mosi mi deh eena ih erli 20ʼs er yonga wen di apasl Paal mi invait ahn fi chravl wid ahn fi goh vizit di kangrigayshan dehn. Fi di fos, maybi Timoti neva ga di kanfidens, er maybi ih mi hoal bak fahn du ih jab az wahn nyoo elda bikaaz ih mi yong. (1 Tim. 4:11, 12; 2 Tim. 1:1, 2, 7) Bot, ten yaaz layta, Paal kuda mi tel di kangrigayshan da Filipai: “Ah wahn soon sen Timoti tu unu. . . . Ah noh ga nobadi els laik hihn weh reeli inchrestid eena how unu di get lang.”—Fil. 2:19, 20.

Weh mi mek Timoti wahn gud elda? Tink bowt dehnya siks lesn yu ku laan fan ih egzampl.

1. Ih mi reeli kay bowt peepl. Paal mi tel di bradaz da Filipai: ‘Hihn [Timoti] reeli inchrestid eena how unu di get lang.ʼ (Fil. 2:20) Soh, Timoti mi kay bowt peepl. Ih mi inchrestid eena dehn rilayshanship wid Jehoava, an ih mi wilin fi werk haad fi di bradaz.

Tink bowt wahn bos jraiva hoo onli wori bowt get da eech bos terminal pahn taim insteda pik op di pasinja dehn. Weh yu wuda seh bowt hihn? Soh noh bee laik da jraiva! William da wahn elda fi moa dan 20 yaaz, ahn dis da weh hihn advaiz bradaz weh jos get dehn apointment az wahn elda. Ih seh: “Lov di bradaz. Foakos pahn weh dehn need insteda onli pahn yu ada rispansabiliti eena di kangrigayshan.”

2. Ih put spirichwal tingz fos. Paal mi shoa how Timoti egzampl mi difrent fahn adaz. Ih seh: “Evribadi els di luk owt fi dehn oanself! Dehn noh eevn kay bowt notn weh kansaan Jeezas Krais.” (Fil. 2:21) Paal mi-di rait fahn Roam. Ih mi noatis dat di bradaz mi tu kansaan wid dehn oan laif. Dehn mi kaina layzi eena wahn spirichwal way. Bot Timoti da neva laik dat! Wen apachooniti kom op fi du moa fi di gud nyooz, ih mi ga di saym atichood laik Aizaiya, hoo mi seh: “Si mi ya! Sen mi!”—Isa. 6:8.

How yu ku balans yu persnal ahn spirichwal rispansabiliti dehn? Fos, mek wahn lis a weh moa impoatant. Paal mi seh: “Mek shoar a di moa impoatant tingz.” (Fil. 1:10, NW) Weh impoatant tu Gaad, fi bee weh moas impoatant tu yoo. Sekant, mek yu laif simpl. Geh rid a eniting weh di yooz op yu taim an enerji. Paal mi waan Timoti: “Ron fahn dehn temtayshan weh yong peepl aalwayz di  get eena. Yu fi goh afta evriting weh rait, ahn goh afta fayt, lov ahn pees.”—2 Tim. 2:22.

3. Ih mi werk haad fi di gud nyooz. Paal mi rimain di bradaz da Filipai: “Timoti don proov ihself aredi. Hihn di werk lang wid mi fi spred di Gud Nyooz, jos laik how wahn son werk wid ih pa.” (Fil. 2:22) Timoti neva layzi. Ih mi werk haad langsaid Paal, ahn dis mi mek di frenship bitween di too a dehn schranga.

Lata werk deh fi du eena Gaad aaganaizayshan tudeh. Yu wahn benifit fahn dis kaina werk. An ih wahn help yu fi jraa kloasa tu yu bradaz ahn sistaz. Soh set di goal fi aalwayz ‘kip aan di du di Laad werk wid evriting weh yu gat.ʼ—1 Kor. 15:58.

4. Ih aplai di lesn dehn weh ih mi laan. Paal mi rait tu Timoti: “Yoo mi pay atenshan tu dehn ting weh Ah mi teech yu. Yoo si how Ai liv, ahn yu noa weh Ah waahn du eena laif. Yu noa bowt mi fayt eena di Laad, mi payshens, ahn lov, ahn aal di sofarin weh Ah put op wid eena di paas.” (2 Tim. 3:10) Bikaaz Timoti aplai weh ih mi laan, hihn mi kwalifai fi moa rispansabiliti.—1 Kor. 4:17.

Yoo ga wahn fren, maybi sombadi weh oalda dan yoo, weh ku teech an advaiz yu eena wahn spirichwal way? Tom di serv az wahn elda fi wahn lata yaaz. Dis da weh hihn seh: “Wahn elda wid lata ekspeeryens tek persnal inchres eena mi ahn gi mi gud chraynin. Ah yoostu aalwayz aks ahn fi ih advais ahn yooz weh ih mi tel mi. Dis mi help mi fi bil op mi kanfidens.”

5. Ih mi kip aan di chrayn ihself. Paal mi tel Timoti: “Chrayn yuself fi liv moa ahn moa fi Gaad.” (1 Tim. 4:7) Wahn persn weh play spoats mait ga sombadi weh chrayn ahn, bot hihn need fi chrayn ihself tu. Paal tel Timoti: “Mek shoar fi reed Gaad Werd tu di peepl dehn, ahn fi eksplayn it tu dehn ahn teech dehn weh Gaad seh. . . . Yu fi kip aan di du dehn tingz ya aal di taim. Put aal yu haat eena it, soh dat evribadi wahn si dat yu di du beta aal di taim.”—1 Tim. 4:13-15.

Yu need fi chrai du beta ahn beta. Kantinyu fi groa az wahn spirichwal persn. Kip op-tu-dayt wid yu andastandin a kangrigayshan proseeja. Noh geh tu kanfident—noh tink dat yu ga di ekspeeryens fi handl eni sichuwayshan ahn dat yu noh haftu du eni risaach. Fala Timoti egzampl ahn “pay main tu how yu di liv ahn weh yu di teech di peepl dehn.”—1 Tim. 4:16.

6. Ih pen pahn Jehoava spirit. Paal rimain Timoti bowt ih minischri. Paal tel ahn: “Gaad chros yu fi gi yu ih preshos chroot dehn, soh yu mos tek gud kayr a dehn wid di help a di Hoali Spirit weh liv eena wi.” (2 Tim. 1:14) Fi tek kayr a ih minischri, Timoti mi need fi pen pahn Gaad spirit.

Wahn brada weh naym Donald, weh di serv az wahn elda fi yaaz now, seh: “Eldaz ahn ministeeryal servants need fi cherish dehn rilayshanship wid Gaad. Onli soh dehn wahn ku goh ‘fahn schrang tu schranga.ʼ If dehn pray fi Gaad spirit ahn werk haad fi ga di froot a di spirit, den dehn wahn bee wahn blesin tu dehn bradaz.”—Ps. 84:7; 1 Peet. 4:11.

CHERISH YU PRIVILIJ

Ih reeli inkorijin fi si wahn lata nyoo eldaz ahn ministeeryal servants, laik yoo, di mek spirichwal proagres. Jason, di brada wi mi menshan eena di biginin, seh: “Joorin di taim dat Ai di serv az wahn elda, Ah laan wahn lat, an Ah geh moa kanfidens. Now Ah reeli injai mi asainment ahn seeʼt az wahn wandaful privilij!”

Yoo wahn kip aan di mek spirichwal proagres? Laan fahn Timoti egzampl. Den yu wahn bee wahn blesin tu Gaad peepl tu.