Skip tu di aatikl

Skip tu lis a tapik

Kip Yu Pees a Main Eevn Wen Tingz Chaynj

Kip Yu Pees a Main Eevn Wen Tingz Chaynj

“Ah kaam ahn kwaiyet mi soal.”—PS. 131:2.

SANG: 128, 129

1, 2. (a) How sodn chaynjiz eena laif kud afek wahn Kristyan? (Koment pahn di picha da di biginin a dis aatikl.) (b) Akaadn tu Psalm 131, weh ku help wi ga pees a main?

LLOYD an Alexandra mi serv da Betel fi oava 25 yaaz. Den, dehn mi geh wahn chaynj a asainment. Dehn mi fi lef Betel ahn goh serv az painyaaz eena di feel. Wen dehn mi fos fain owt bowt di chaynj, dehn mi feel sad. Lloyd seh: “Ai mi lov mi laif ahn mi asainment da Betel an Ah mi feel laik da-mi paat a hoo mee. Ah kudn imajin di du eniting els. Ai mi andastan wai wi asainment mi chaynj, bot eena di weeks ahn monts afta dat, lata taim Ai mi feel abandan. Wan minit Ai mi feel gud bowt di chaynj, di neks minit Ah mi feel dipres.”

2 Wen tingz chaynj eena wi laif sodn-wan, wi mait staat tu feel anshos ahn frayd. (Prov. 12:25) Wi mait eevn fain it haad fi aksep di chaynjiz. Wen dis hapm, how wi ku “kaam ahn kwaiyet” wi soal? (Reed Psalm 131:1-3.) * Mek wi stodi bowt how  servants a Jehoava eena di paas an eena fi wee taim mi kip dehn pees a main wen tingz eena dehn laif mi chaynj sodn-wan.

HOW DI PEES A GAAD HELP WI

3. How Joazef laif mi chaynj?

3 Joazef mi bowt 17 yaaz oal wen ih oan breda dehn mi sel ahn az wahn slayv. Dehn mi jelos Joazef bikaaz hihn da-mi ih pa fayvrit son. (Gen. 37:2-4, 23-28) Joazef mi sofa da Eejip fi bowt 13 yaaz. Fos, hihn da-mi wahn slayv ahn den dehn mi put ahn eena prizn. Hihn mi deh faar fahn ih pa, Jaykop, weh hihn mi lov wahn lat. Weh mi help Joazef fi noh feel beks ahn looz hoap?

4. (a) Wen Joazef mi deh eena prizn, weh hihn mi foakos pahn? (b) How Jehoava mi ansa Joazef pryaaz?

4 Wen Joazef mi-di sofa eena prizn, hihn mosi mi foakos pahn weh Jehoava mi-di du far ahn. (Gen. 39:21; Ps. 105:17-19) Maybi hihn mi tink bowt di jreem dehn weh ih mi ga wen ih mi yonga an ih mi feel kanfident dat Jehoava mi deh wid ahn. (Gen. 37:5-11) Hihn mi praabli pray tu Jehoava ahn tel ahn evriting weh mi deh eena ih haat. (Ps. 145:18) Jehoava mi ansa Joazef pryaaz. Hihn mi mek it klyaa tu Joazef dat hihn ‘mi wahn deh wid ahn, ahn bring ahn sayf chroo aala ih chroblz.ʼ—Aks 7:9, 10. *

5. How di pees a Gaad ku help wi fi kantinyu serv Jehoava?

5 Noh mata how haad wi sichuwayshan, wi ku geh komfert wi wid di pees a Gaad weh help wi feel kaam. (Reed Filipiyanz 4:6, 7.) Soh, if wi luk tu Jehoava wen wi di wori ahn feel schres owt, di pees a Gaad ku schrentn wi fi kantinyu serv Jehoava ahn noh giv op. Mek wi kansida sohn egzampl a wi bradaz ahn sistaz weh mi ekspeeryens dat fi dehnself.

AKS JEHOAVA FI HELP YU GET BAK YU PEES A MAIN

6, 7. How spesifik pryaaz ku help wi get bak wi pees a main? Yooz di egzampl eena di paragraaf.

6 Ryan ahn Juliette mi feel sad ahn dipres wen dehn mi fain owt dat fi dehn asainment az speshal painyaaz mi finish. Ryan seh: “Rait away, wee mi pray tu Jehoava. Wee mi noa dat wi mi ga wahn speshal apachooniti fi shoa dat wee chros Jehoava. Wahn lata di frenz eena wi kangrigayshan mi stil nyoo eena di chroot, soh wee mi pray tu Jehoava fi help wi set wahn gud egzampl a fayt.”

7 How Jehoava mi ansa dehn pryaa? Ryan seh: “Az soon az wi mi finish pray, di negitiv feelinz ahn woriz mi disapyaa. Di pees a Gaad mi protek wi haat ahn wi main. Wi mi riyalaiz dat Jehoava kuda mi kantinyu fi yooz wi az lang az wi chros ahn.”

8-10. (a) How Gaad spirit ku help wi wen wi wori tu moch? (b) How Jehoava ku help wi wen wi foakos pahn wi servis tu hihn?

8 Gaad spirit ku kaam wi ahn dairek wi tu skripchaz eena di Baibl fi help wi andastan weh reeli impoatant eena wi laif. (Reed Jan 14:26, 27.) Kansida di egzampl a wahn marid kopl, Philip ahn Mary, hoo mi serv da Betel fi nayli 25 yaaz. Eena jos foa monts, di too a dehn mami ahn wan a Philip ada relitiv mi ded. Den, dehn mi staat tu tek kayr a Mary pa, weh ga wahn mental kandishan [dementia].

9 Philip seh: “Ai mi tink dat Ah mi-di du aarait, bot sohnting mi misn. Ah mi kohn kraas Koloashanz 1:11 eena wahn Wachtowa stodi aatikl. Yes, Ah mi-di bayr op, bot  noh eena di fulis sens. Ah mi need fi “bayr evriting wid lata payshens” ahn “ga wahn hapi haat.” Dis skripcha mi rimain mi dat mai jai noh dipen pahn how gud tingz di goh eena mi laif, bot pahn how Gaad spirit afek mi laif.”

10 Jehoava mi bles Philip ahn Mary eena wahn lata wayz bikaaz dehn mi stay foakos pahn dehn servis tu Jehoava. Noh tu lang afta dehn mi lef Betel, Philip ahn Mary mi fain sohn Baibl stodi weh mi mek gud spirichwal proagres ahn dehn mi waahn stodi moa dan wan taim fi di week. Wen Mary luk bak pan ih oan ekspeeryens, shee seh: “Dehn mi mek wi hapi ahn dat da-mi Jehoava way fi tel wi dat evriting mi wahn bee aarait.”

GIV JEHOAVA SOHNTING FI BLES

How wi ku kapi Joazef egzampl noh mata wat da wi sichuwayshan eena laif? (Paragraaf 11-13)

11, 12. (a) Wat Joazef mi du fi giv Jehoava sohnting fi bles? (b) Wat da-mi Joazef riwaad fi ih indyoarans?

11 Wen wi fays sodn chaynjiz eena laif, wi ku wori soh moch dat wi kyaahn tink bowt notn els. Dis kuda mi hapm tu Joazef. Bot insteda dat, hihn mi chooz fi handl ih sichuwayshan di bes way pasabl, soh dat Jehoava wuda mi ga sohnting fi bles. Wail ih mi deh eena prizn, Joazef mi mek shoar dat ih mi du ih bes fi fulfil eni jab weh di cheef aafisa giv ahn, jos laik weh ih mi du wen ih mi-di werk fi Potifa.—Gen. 39:21-23.

12 Wan day, Joazef mi-di tek kyaa a too prizna weh yoostu ga sohn hai pozishan eena Fayro koat. Bikaaz a Joazef kain atichood, di man dehn mi feel komfatabl fi taak tu hihn bowt di jreem dehn mi ga di nait bifoa. Dehn mi-di wori bikaaz dehn kudn andastan di jreem. (Gen. 40:5-8) Joazef neva noa dat da kanvasayshan wuda mi leed tu ih freedom. Eevn doa ih mi stay eena prizn fi too moa yaaz, eena di en dehn mi free Joazef fahn prizn ahn giv ahn powa fi rool oava Eejip. Fayro da-mi di onli wan hoo mi ga moa powa dan Joazef!—Gen. 41:1, 14-16, 39-41.

13. How wi ku giv Jehoava sohnting fi bles noh mata wat da wi sichuwayshan?

13 Laik Joazef, sohntaim wi ku fain wiself eena sohn sichuwayshan weh wi noh ga no kanchroal oava. Bot if wi payshent ahn du wi bes fi bayr op, wi wahn gi Jehoava sohnting fi bles. (Ps. 37:5) Eevn if sohntaim wi feel laik wi “noh noa weh fi du,” wi wahn neva lef widowt hoap. (2 Kor. 4:8) Jehoava wahn mek shoar ih deh wid wi espeshali if wi stay foakos pahn wi minischri.

STAY FOAKOS PAHN YU MINISCHRI

14-16. How Filip di ivanjelaiza mi kip ih foakos pan ih minischri eevn doa ih laif mi chaynj?

14 Filip di ivanjelaiza da-mi wahn gud egzampl a sohnbadi weh mi kip ih foakos pan ih minischri noh mata how ih laif mi  chaynj. Wen Filip mi deh da Jeroosalem, ih mi-di injai wahn nyoo asainment. (Aks 6:1-6) Bot den evriting mi chaynj. Afta Steeven mi ded, di Kristyan dehn mi fays lata persikyooshan. * Bikaaz a di persikyooshan, di Kristyan dehn mi-di ron weh fahn Jeroosalem. Filip mi waahn stay bizi eena Jehoava servis, soh ih mi gaahn da Samayrya bikaaz di peepl deh mi need fi hyaa di gud nyooz.—Mach. 10:5; Aks 8:1, 5.

15 Filip mi wilin fi goh eniway weh Jehoava spirit mi leed ahn, soh Jehoava mi yooz ahn fi preech tu peepl hoo neva hyaa di gud nyooz bifoa. Lata di Jooz mi luk dong pahn di Samaritan dehn ahn chreet dehn bad, bot Filip neva prejudis. Hihn mi kwait hapi fi shyaa di gud nyooz wid dehn. In fak di peepl dehn mi staat tu “lisn ahn tek een evriting weh ih mi-di seh”!—Aks 8:6-8.

16 Den Gaad spirit mi leed Filip tu Ashdod ahn Seezareeya, wehpaat lata peepl hoo da neva Joo mi liv. (Aks 8:39, 40) Bowt 20 yaaz afta Filip mi fos gaahn preech da Samayrya, ih laif mi chaynj agen. Ih mi setl dong ahn staat wahn famili. Bot noh mata how fi hihn laif mi chaynj, ih mi stil stay bizi eena ih minischri, ahn Jehoava mi kantinyu fi bles hihn an ih famili.—Aks 21:8, 9.

17, 18. How fi wee foakos pahn di minischri ku help wi eevn wen wi laif chaynj?

17 Wahn lata Jehoava ful-taim servants ku tel yu dat wen dehn kip dehn foakos pahn di minischri, ih help dehn fi stay hapi ahn pazitiv eevn wen tingz chaynj op pahn dehn. Fi egzampl, wen Osborne ahn Polite, wahn kopl fahn South Africa, mi lef Betel, dehn mi tink tingz gwehn smood ahn dehn mi wahn fain wahn paat-taim jab ahn wahn plays fi liv. Bot Osborne seh: “Ih neva soh eezi fi fain wahn jab aftaraal.” Ih waif, Polite, seh: “Wi neva fain werk fi chree monts, ahn wi neva ga notn sayv op. Laif mi haad.”

18 Weh mi help dehn fi deel wid da sichuwayshan? Osborne seh: “Wi mi kip di preech lang wid di kangrigayshan ahn dat mi help wi fi kip wi main foakos pahn pazitiv tingz. Insteda sidong hoam ahn fret, wi mi disaid fi du aal weh wi kud fi stay bizi eena di preechin werk, ahn dat mi gi  wi lata jai. Wi mi saach aal oava, an afta wahn wail wi mi fain werk.”

BEE PAYSHENT AHN CHROS EENA JEHOAVA

19-21. (a) Wat wahn help wi fi kip wi pees a main? (b) How wi benifit wen wi ajos tu chaynjiz eena laif weh wi noh ekspek?

19 Dehnya egzampl shoa wi dat if wi du weh wi kud fi ajos tu chaynjiz eena wi laif, wi ku chros dat Jehoava wahn help wi kip wi pees a main noh mata wat. (Reed Micah 7:7.) * Wi wahn fain owt dat wi rilayshanship wid Jehoava geh schranga wen wi mek dehn ajosment. Bays pan ih oan ekspeeryens, Polite seh: “Wen wi mi geh wi nyoo asainment, Ah mi laan weh ih reeli meenz fi pen pahn Jehoava eevn wen laif haad. Mai rilayshanship wid Jehoava eevn schranga now.”

20 Mary, hoo wi mi koat erliya, stil di tek kayr a ih pa eevn wail shee di painyaa. Shee seh: “Ai laan dat wen Ah staat tu wori tu moch, Ah haftu stap, pray, an den rilaks. Praabli di bigis lesn Ah laan da fi lef tingz eena Jehoava han, an Ah noa Ah wahn haftu kantinyu du dat eevn moa eena di fyoocha.”

21 Lloyd an Alexandra admit dat di chaynjiz eena dehn laif mi tes dehn fayt eena wayz weh dehn neva ekspek. Bot dehn ku si how dehnya tes akchwali help dehn. Now dehn noa dat dehn fayt schrang inof fi gi dehn komfert wen dehn ga prablemz, ahn soh dehn feel dat dehn da beta peepl now.

Sodn chaynjiz eena laif ku leed tu blesinz weh wi noh ekspek! (Paragraaf 19-21)

22. If wi du di bes wi kud, noh mata wat da wi sichuwayshan, weh kanfidens wi ku ga?

22 Eena dis sistem, wi laif ku chaynj sodn-wan. Wi mait geh wahn nyoo asainment eena Jehoava servis, en op wid helt prablemz, er wi famili sichuwayshan mait chaynj. Bot noh mata weh hapm, yu ku bee shoar dat Jehoava kay bowt yu an ih wahn help yu da di rait taim. (Heeb. 4:16; 1 Peet. 5:6, 7) Eena di meentaim, du yu bes fi handl yu sichuwayshan eena di rait way. Pray tu yu Faada, Jehoava, ahn laan fi pen pahn hihn fi evriting. Wen yu du dat, noh mata weh chaynj eena yu laif, yu wahn aalwayz ga di kaina pees weh onli Jehoava ku gi yu.

^ par. 2 Psalm 131:1-3: “Oa Jehoava, mi haat noh hai ahn maiti, ner mi aiy dehn prowd; Ah noh aym fi notn weh tu grayt, er tingz weh tu wandaful fi mee. Ah kaam ahn kwaiyet mi soal laik wahn lee pikni wen ih ma di bak ahn; Ah feel kantentid laik da lee pikni. Mek Izrel wayt fi Jehoava fahn now til fareva.”

^ par. 4 Afta dehn let Joazef owta prizn, hihn mi rekonaiz dat Jehoava mi komfert ahn wen ih giv ahn wahn son. Joazef mi naym ih son Manaaseh bikaaz, hihn mi seh: “Gaad mek a faget aala mi chrobl.”—Gen. 41:51, ftn.

^ par. 14 Si di aatikl “Yu Mi Noa?” eena dis ishu.

^ par. 19 Micah 7:7: “Bot az fi mee, Ah wahn kip aan di wayt fi Jehoava. Ai wahn wait payshent-wan fi di Gaad a mai salvayshan. Mai Gaad wahn hyaa mi.”