Skip tu di aatikl

Skip tu lis a tapik

Fayt—Wahn Kwaliti Weh Help Wi fi Bee Schrang

Fayt—Wahn Kwaliti Weh Help Wi fi Bee Schrang

FAYT gi wi wahn lata powa. Fi egzampl, aldoa Saytan waahn dischrai wi rilayshanship wid Jehoava, fayt help wi fi “blak aal di aro dehn wid faiya da en, weh di eevl wan di shoot aata” wi. (Ifee. 6:16) Wid fayt, wi ku bayr op anda prablemz weh luk az big az wahn mongtin. Jeezas mi tel ih disaipl dehn: “If unu ga fayt di saiz a wahn lee chinchi mostad seed, unu wahn ku tel dis mongtin, ‘Moov fahn ya tu oava deh,ʼ ahn di mongtin wahn du it.” (Mach. 17:20) Bikaaz wi noa dat fayt ku mek wi rilayshanship wid Jehoava schranga, wi shuda tink bowt kweschanz laik: Wat da fayt? How di kandishan a wi haat afek wi fayt? How wi ku schrentn wi fayt? Ahn hoo wi shuda ga fayt eena?—Roam. 4:3.

WAT DA FAYT?

Fayt da moa dan jos fi bileev eena weh di Baibl seh. ‘Eevn di deemonz dehn bileev dat Gaad deh, ahn dehn chrimbl.ʼ (Jay. 2:19) Soh den, wat da fayt?

Jos laik how wi chros dat dehn wahn aalwayz bee day ahn dehn wahn aalwayz bee nait, wi chros dat Gaad werd wahn aalwayz kohn chroo

Di Baibl diskraib fayt eena too paat. Fos, fayt “da weh mek wi shoar seh dat wi ga weh wi di hoap fa.” (Heeb. 11:1a) Soh if yu ga fayt, yu bileev widowt wahn dowt dat evriting weh Jehoava seh da chroo ahn dat dehn wahn kohn chroo. Fi egzampl, Jehoava mi tel di Izrelait dehn: “If yu kuda brok mi kovenant wid di day ahn mi kovenant wid di nait, soh dat di nait noh kohn wen ih sopoas tu, onli den mi kovenant wid mi servant Dayvid kuda geh brok.” (Jer. 33:20, 21) Yoo eva frayd dat wi mait noh ga sonraiz ner sonset, ahn kaaz day ahn nait fi stap? If yu noh dowt di laa dehn weh kip di ert di tern ahn weh mek ih goh rong di son, yu tink yu shuda dowt dat di Wan weh kriyayt dehnya laa ku fulfil fi hihn pramis dehn? Af koars nat!—Isa. 55:10, 11; Mach. 5:18.

Sekant, fayt da weh “mek wi shoar a di ting dehn weh wi kyaahn si,” tingz weh invizibl tu di aiy bot weh reel. (Heeb. 11:1b.) Eena weh way? Sopoaz wahn chail aks yu, ‘how yoo noa di ayaa egzis?ʼ Aldoa yu neva si di ayaa bifoa, yu stil wuda taak tu di chail bowt tingz weh proov dat di ayaa egzis. Fi egzampl, yu wuda tel ahn bowt di bret weh wi tek, di leef fahn di chree dehn weh di moov, ahn tingz laik dat. Wen di chail bileev dat dehnya tingz reel, ih andastan dat ih pasabl fi bileev eena sohnting weh yu kyaahn si. Jos laik dat, fayt bays pahn salid proof.—Roam. 1:20.

FI GA FAYT WI NEED FI VALYU DI CHROOT

Sins fayt bays pahn evidens, fi ga fayt wahn persn need fi geh “fi noa di chroot” fos. (1 Tim. 2:4) Bot dat noh inof. Di apasl Paal rait dat da wid di haat” wahn persn shoa fayt. (Roam. 10:10) Wahn persn noh onli need fi bileev di chroot bot ih aalso need fi valyu it. Onli den ih wahn ku liv eena wahn way weh pleez Gaad. (Jay. 2:20) Bikaaz sombadi mait rifyooz fi chaynj dehn bileef er bikaaz dehn waahn du weh dehn waahn, dehn  mait rijek eevn schrang evidens weh proov dat Gaad egzis. (2 Peet. 3:3, 4; Jood 18) Dis da wai, noh evribadi hoo mi si di mirakl dehn bak eena Baibl taimz mi divelop fayt. (Num. 14:11; Jan 12:37) Gaad hoali spirit onli help peepl hoo reeli lov chroot fi divelop fayt.—Gal. 5:22; 2 Tes. 2:10, 11.

HOW DAYVID MI DIVELOP SCHRANG FAYT?

King Dayvid da sombadi weh mi ga schrang fayt. (Heeb. 11:32, 33) Bot noh evribadi eena Dayvid famili mi ga fayt laik hihn. Fi egzampl, wahn taim Dayvid oaldis breda, Elaiyab, mi shoa wahn lak a fayt wen ih mi seh dat Dayvid mi ga di rang reezn fi geh beks bowt Golaiyat chalenj. (1 Sam. 17:26-28) Non a wi noh baan wid fayt; ahn non a wi noh inherit fayt fahn wi payrents, soh Dayvid fayt da-mi wahn rizolt a fi hihn oan rilayshanship wid Gaad.

Eena Psalm 27, Dayvid shoa how hihn mi kohn fi ga soch a schrang fayt. (Vers 1) Dayvid mi meditayt pan ih paas ekspeeryens ahn pahn how Jehoava mi deel wid ih enimi dehn. (Vers 2 ahn 3) Hihn mi reeli apreeshiayt Jehoava araynjment fi wership. (Vers 4) Dayvid mi wership Gaad lang wid ih felo bileeva dehn da di tabernakl. (Vers 6) Hihn mi reeli saach fi Jehoava chroo pryaa. (Vers 7 ahn 8) Dayvid mi aalso waahn laan bowt Jehoava wayz. (Vers 11) Fayt mi soh impoatant tu Dayvid dat ih aks: “Wehpaat Ah mi wahn bee if Ah neva ga fayt?”—Vers 13.

HOW FI SCHRENTN YU FAYT?

Yu ku ga fayt laik Dayvid if yu kapi di mental atichood ahn bihayvya weh geh diskraib eena Psalm 27. Sins chroo nalij da di fongdayshan a fayt, den di moa yu stodi Gaad Werd ahn poblikayshanz weh bays pahn di Baibl, di eeziya ih wahn bee fi mek yu ga di kwalitiz weh di froot a Gaad hoali spirit help wi fi divelop. (Ps. 1:2, 3) Tek taim fi meditayt wen yu stodi. Wen yu meditayt pahn weh yu stodi, yu apreeshiayshan fi Jehoava wahn groa. An az yu apreeshiayshan fi Jehoava groa, yu dizaiya fi shoa fayt wahn groa tu. Yu wahn wership hihn da yu kangrigayshan meetinz ahn tel adaz bowt yu hoap. (Heeb. 10:23-25) Aalso, wi shoa fayt wen wi kantinyu fi “pray ahn noh giv op.” (Look 18:1-8) Soh, “neva stap pray” tu Jehoava, ahn chros dat “hihn kay bowt yoo.” (1 Tes. 5:17; 1 Peet. 5:7) Fayt wahn mek wi tek akshan, ahn wi akshanz wahn schrentn wi fayt.—Jay. 2:22.

PUT FAYT EENA JEEZAS

Pahn di eevnin bifoa Jeezas mi ded, hihn mi tel ih disaipl dehn: “Put fayt eena Gaad ahn put fayt eena mee tu.” (Jan 14:1, NW) Soh wi noh onli need fi put fayt eena  Jehoava, bot wi aalso need fi put fayt eena Jeezas. How wi ku put fayt eena Jeezas? Mek wi luk pahn chree wayz.

Weh ih meenz fi put fayt eena Jeezas?

Fos, luk pahn di ransom az wahn persnal gif fahn Gaad tu yoo. Di apasl Paal mi seh: “Di way Ai di liv mi laif now da bai di fayt weh Ah ga eena Gaad Son, weh lov mi ahn mi gi ih laif fi mi.” (Gal. 2:20) Wen yu put fayt eena Jeezas, yu reeli bileev dat di ransom ku help yu, yu bileev dat bays pahn di ransom yu ku geh fagivnis fi yu sinz, yu bileev dat ih aafa yu di hoap fi liv fareva, ahn yu bileev dat ih da di graytis proof dat Gaad lov yu. (Roam. 8:32, 38, 39; Ifee. 1:7) If yu reeli bileev dat di ransom ku help yu, yu noh wahn feel gilti ahn bad bowt yuself.—2 Tes. 2:16, 17.

Sekant, jraa kloas tu Jehoava chroo pryaa weh onli pasabl bikaaz a Jeezas sakrifais. Bikaaz a di ransom, wi ku pray tu Jehoava ahn “noh frayd fi kohn fronta fi hihn chroan. Rait dehsoh wi wahn geh mersi fahn hihn, ahn fain grays fi help wi wen wi need it.” (Heeb. 4:15, 16; 10:19-22) Pryaa help wi fi mek op wi main eevn moa fi fait di temtayshan fi sin.—Look 22:40.

Terd, obay Jeezas. Di apasl Jan mi rait: “Evribadi weh put dehn fayt eena Gaad Son wahn liv fareva; bot enibadi weh noh du weh di Son seh wahn neva ga da laif deh, ahn Gaad jojment wahn aalwayz di heng oava dehn hed.” (Jan 3:36) Noatis dat Jan seh dat di opozit a fayt da disobeedyans. Soh, wi put fayt eena Jeezas wen wi obay ahn. Wi obay Jeezas wen wi fala “di komanment weh Jeezas Krais gi” wi. Dat meenz wen wi du aal weh ih mi teech ahn koman wi fi du. (Gal. 6:2) Wi aalso obay Jeezas wen wi fala di dairekshanz weh hihn gi wi chroo “di faytful ahn diskreet slayv.” (Mach. 24:45, NW) Wen wi obay Jeezas, wi wahn ga di schrent fi bayr op wen wi fays prablemz weh luk daynjaros ahn fraitnin laik wahn staam.—Look 6:47, 48.

“BIL OP UNUSELF . . . EENA UNU FAYT WEH HOALI”

Wahn taim, wahn man mi krai owt tu Jeezas: “Yes, Ah ga fayt, Ah ga fayt. Jos help mi fi ga lee moa!” (Maak 9:24) Dis man mi noa dat ih ga fayt, bot ih mi hombl an ih mi rekonaiz dat ih need moa fayt. Laik dis man, aala wi wahn need fayt at som point eena wi laif. An aala wi ku schrentn wi fayt fahn now. Soh laik weh wi jos diskos, wi schrentn wi fayt wen wi stodi Gaad Werd ahn meditayt pan it. Dis wahn help wi apreeshiayt Jehoava eevn moa. Wi fayt wahn aalso groa schranga wen wi wership Jehoava lang wid wi bradaz ahn sistaz, tel adaz bowt wi hoap, ahn neva stap pray. Pahn tap a dat, wen wi schrentn wi fayt, wi geh di bigis riwaad. Gaad Werd tel wi: ‘Mi dyaa fren, unu mos bil op unuself mek unu geh schranga ahn schranga eena unu fayt. . . . Kip unuself eena di lov a Gaad.ʼ—Jood 20, 21.