Skip tu di aatikl

Skip tu lis a tapik

Peepl Hoo Jenaros Wahn Bee Hapi

Peepl Hoo Jenaros Wahn Bee Hapi

“Gaad bles yu moa wen yu gi.” —AKS 20:35.

SANG: 76, 110

1. How kriyayshan shoa dat Jehoava da wahn jenaros Gaad?

EEVN doa Jehoava mi deh aal bai ihself bifoa ih staat mek evriting, ih neva mi-di tink onli bowt ihself. Bot insted, ih gi laif tu aynjelz eena hevn ahn tu hyoomanz pahn di ert. Di Baibl seh dat Jehoava da di “blesid [hapi] Gaad.” Hihn laik gi gud tingz tu adaz. (1 Tim. 1:11; Jay. 1:17) Ahn bikaa ih waahn wee bee hapi tu, ih teech wi fi bee jenaros.—Roam. 1:20.

2, 3. (a) Wai wi wahn bee hapi if wi giv tu adaz? (b) Weh wi wahn stodi eena dis aatikl?

2 Gaad mi mek hyoomanz eena fi hihn imij. (Gen. 1:27) Dat meenz dat hihn mi mek wi eena wahn way weh wee ku shoa di sayhn kwalitiz laik hihn. Fi mek wi ga hapinis ahn satisfakshan eena laif, wi need fi fala Jehoava egzampl ahn shoa inchres eena adaz ahn bee jenaros wid dehn. (Fil. 2:3, 4; Jay. 1:5) Wai? Bikaaz Jehoava mi mek wi da way. Eevn doa wi noh perfek, wi ku stil fala Jehoava egzampl ahn bee jenaros.

 3 Di Baibl tel wi how wi ku bee jenaros. Mek wi rivyoo som a di lesn fahn di Baibl pahn dis tapik. Wi wahn si how wen wi jenaros wi geh blesinz, ahn how wen wi werk haad fi bee moa jenaros wi di du weh Jehoava waahn wi du. Ahn wi wahn laan how wahn jenaros atichood ku leed tu hapinis ahn wai wi need fi kip aan di werk fi bee jenaros.

HOW WI KU GEH BLESINZ FAHN GAAD

4, 5. Eena weh wayz Jehoava ahn Jeezas shoa dat dehn jenaros wid wee?

4 Jehoava waahn mek hyoomanz fala fi hihn egzampl, soh hihn hapi wen ih si dat wi jenaros. (Ifee. 5:1) Wi noa fahn di tingz weh Gaad mek ahn di way how ih kriyayt wi dat ih waahn wi bee hapi. (Ps. 104:24; 139:13-16) Soh, wi aana hihn wen wi chrai fi mek adaz hapi.

5 Chroo Kristyanz fala Krais egzampl. Hihn mi shoa wi how hyoomanz ku bee jenaros wid wan anada. Jeezas ihself mi seh: ‘Di Son a Man neva kohn fi mek nobadi serv hihn, bot hihn kohn fi serv ada peepl ahn fi giv op fi hihn laif soh dat lat moa peepl ku geh free fahn dehn sin dehn.ʼ (Mach. 20:28) Dats wai di apasl Paal mi tel Kristyanz: “Unu fi tink di sayhn way how Krais Jeezas tink . . . Ih giv op evriting ahn mek ihself bee wahn servant.” (Fil. 2:5, 7) Aala wi shuda aks wiself, ‘How Ai ku fala Jeezas egzampl eevn moa dan how Ah di fala hihn rait now?ʼ—Reed 1 Peeta 2:21.

6. Weh wi ku laan fahn Jeezas parabl bowt di gud Samaritan? (Koment pahn di picha da di biginin a dis aatikl.)

6 Jehoava wahn bles wi if wi fala fi hihn egzampl ahn Krais egzampl tu. Wi need fi bee inchrestid eena di tingz weh wahn mek adaz hapi ahn luk fi wayz fi help dehn. Jeezas mi shoa dat dis veri impoatant wen ih mi gi di parabl a di gud Samaritan. Ih seh dat fi hihn falowaz fi goh owta dehn way fi help adaz, eevn peepl fahn difrent bakgrong. (Reed Look 10:29-37.) Yu memba wai Jeezas mi gi di parabl bowt di gud Samaritan? Wahn Joo mi aks ahn: “Hoo egzakli da mi nayba?” Jeezas ansa shoa dat wi haftu bee wilin fi bee jenaros laik di Samaritan if wi waahn Gaad bles wi.

7. How wi ku shoa dat wi bileev Jehoava way fi du tingz da di bes way?

7 Kristyanz ga wahn lata gud reezn fi bee jenaros. Fi egzampl, dis kwaliti ga fi du wid di ishu weh mi kom op eena di gyaadn a Eedn. Wai wi seh dat? Saytan mi klaym seh dat Adam ahn Eev wuda bee hapiya if dehn foakos onli pahn weh dehn waahn insteda obay Gaad. Eev mi disobay bikaaz shee mi waahn bee laik Gaad; shee mi selfish. Adam mi ga di saym selfish atichood kaaz hihn mi waahn pleez Eev. (Gen. 3:4-6) Ih playn fi si wat da di rizolt a dehn disizhan. If wi selfish, wi noh wahn bee hapi. Wen wi jenaros, wi shoa dat wi kanvins dat Gaad way fi du tingz da di bes way.

DU WEH GAAD WAAHN WI DU

8. Wai Adam ahn Eev shuda mi bee inchrestid eena adaz?

8 Gaad mi gi Adam ahn Eev inschrokshanz weh shuda mi mek dehn tink bowt di hapinis a adaz, eevn doa dehn mi deh bai dehnself eena di  gyaadn. Jehoava mi bles Adam ahn Eev an inkorij dehn fi ga chiljren, ful op di ert, ahn koltivayt it. (Gen. 1:28) Jos laik how di Kriyayta mi-di tink bowt di hapinis a adaz, Adam ahn Eev shuda mi bee inchrestid eena di hapinis a dehn fyoocha chiljren. Adam ahn Eev mi sopoas tu mek di hoal ert wahn Paradais fi benifit dehn chiljren. Fi du dat, dehn wuda mi need evribadi fi werk tugeda.

9. Wai evribadi wuda mi bee hapi if Adam ahn Eev mi mek di Paradais groa til ih kova di ert?

9 Aal perfek hyoomanz wuda mi ga di privilij fi mek dis ert bee wahn Paradais. Dehn wuda mi ga di privilij fi werk lang wid Gaad fi mek fi hihn perpos kohn chroo. Dat wuda mi mek evribadi feel gud ahn satisfai fi chroo! Dis mi wahn bee chroo satisfakshan ahn jai kaaz ih wuda mi bays pahn di fak dat dehn di du gud fi adaz ahn noh fi dehnself.

10, 11. How wi ku obay di koman fi goh preech ahn mek disaipl?

10 Tudeh, Jehoava giv ih peepl di werk fi preech ahn mek disaipl. Fi du dis, wi need fi bee inchrestid eena di hapinis a peepl. Wi ku kantinyu eena dis werk onli if wi du it fi di rait reezn, ahn da reezn da lov fi wi nayba.

11 Eena di fos senchri C.E., Paal mi seh dat hihn ahn sertn bradaz mi-di ‘werk tugeda wid Gaad.ʼ Dehn mi-di help plaant ahn waata di Kingdom seed. (1 Kor. 3:6, 9) Tudeh, wee ku ‘werk tugeda wid Gaadʼ tu. Wi need fi bee jenaros wid wi taim, tingz weh wi gat, ahn wi enerji eena dis preechin werk. Dat da wahn privilij fi chroo!

Wi geh lata jai wen wi help sombadi laan di chroot (Paragraaf 12)

12, 13. Weh yoo wuda seh da som a di riwaad wi geh wen wi preech ahn mek disaipl?

12 Wen wi jenaros wid wi taim an enerji eena di preechin werk, wi wahn bee hapi. Wahn lata bradaz ahn sistaz hoo ga di privilij fi kandok Baibl stodiz wid peepl hoo proagres eena di chroot kuda tel yu bowt di hapinis dehn feel. Wi soh hapi wen wi si peepl wid sinsyaa haat apreeshiayt spirichwal chroot, ga schranga fayt, mek chaynjiz eena dehn laif, ahn shayr weh dehn di laan wid adaz. Jeezas mi feel reeli hapi wen ih sen owt di 70 disaipl ahn dehn mi kohn bak fahn di feel ‘onli hapiʼ bikaaz a di gud rizolts dehn mi gat.—Look 10:17-21.

13 Aala wi bradaz ahn sistaz rong di werl feel hapi wen dehn si how di gud nyooz di afek peepl laif eena pazitiv wayz. Kansida di ekspeeryens a wahn yong sista weh naym Anna. * Shee mi moov tu Eastern Europe fi help owt  wid di preechin werk. Shee seh: “Lata apachooniti deh ya fi kandok Baibl stodiz, an Ah reeli laik dat. Mi servis mek Ah feel soh hapi. Wen Ah get bak hoam, Ah noh eevn ga taim fi foakos pahn miself. Ah tink bowt di peepl hoo Ah di stodi wid. Ah tink bowt dehn chroblz ahn woriz, den Ah luk fi wayz fi inkorij ahn help dehn. Now, Ah bileev dis skripcha eevn moa: ‘Gaad bles yu moa wen yu gi dahn wen yu get.ʼ”—Aks 20:35.

Wen wi goh da evri hows eena di teritori, wi di gi peepl di chaans fi rispan tu di Kingdom mesij (Paragraaf 14)

14. Eevn if jos lee bit a peepl rispan eena wahn pazitiv way tu di gud nyooz, how wi ku stil bee hapi eena wi minischri?

14 Wi wahn bee hapi wen wi gi peepl di chaans fi rispan tu di gud nyooz weda dehn lisn er nat. Aftaraal, fi wee asainment tudeh da nayli laik di wan weh Gaad mi gi di prafit Izeekyel. Jehoava tel ahn: “Yu mos tel dehn weh Ah di tel yu, ih noh mata if dehn lisn er nat.” (Ezek. 2:7; Isa. 43:10) Eevn if som peepl noh apreeshiayt wi mesij, wee noa dat Jehoava apreeshiayt wi werk. (Reed Heebrooz 6:10.) Wan poblisha mi shoa dat ih mi ga wahn gud atichood bowt ih minischri wen ih seh: “Wi plaant, wi waata, ahn pray ahn hoap dat Jehoava wahn mek di inchres groa.”—1 Kor. 3:6.

HOW FI BEE HAPI

15. How wahn lata peepl rispan wen wi jenaros wid dehn, ahn how dis shuda afek how wi ak?

15 Jeezas waahn wi bee hapi, soh ih inkorij wi fi bee jenaros. Wen wi jenaros wid peepl, lata taim dehn wahn rispan eena wahn gud way. Ih seh: “Giv, ahn unu wahn geh bak unu ful amonk, wel pak, shayk dong, ahn di ron oava. Dat da how unu wahn get it poar bak eena unu lap. Kaa di sayhn way how yu gi, dat da how yu wahn geh bak.” (Look 6:38) Af koars, noh evribadi rispan eena wahn pazitiv way wen wi jenaros wid dehn. Bot wen dehn staat tu apreeshiayt wi jenaros atichood, dis ku moov dehn fi bee jenaros tu. Soh giv tu adaz weda wi tink dehn apreeshiayt it er nat. Yu neva noa humoch  gud yu ku du wen yu jenaros wid sombadi.

16. Weh shuda bee di reezn wai wi jenaros wid adaz?

16 Wahn persn weh reeli jenaros noh giv jos fi mek adaz giv bak tu ahn. Jeezas mi-di tink bowt dis wen ih seh: “Wen yu ga wahn bankwit, invait dehn wan weh poa, ahn weh kripl, ahn dehn wan weh haafa, ahn weh blain. Den Gaad wahn bles yu kaa yu invait dehn wan weh kudn pay yu bak.” (Look 14:13, 14) Wahn Baibl raita mi seh: “Gaad wahn bles di jenaros persn.” Ahn wahn nada wan seh: “Enibadi hoo shoa kansidarayshan tu di poa persn wahn bee hapi.” (Prov. 22:9; Ps. 41:1) Soh, wen wi help adaz, ih mek wee hapi.

17. Wat da sohn tingz wi ku giv tu adaz weh ku mek wi hapi?

17 Wen Paal mi koat Jeezas werdz dat “Gaad bles yu moa wen yu gi dahn wen yu get,” Paal neva jos mi-di taak bowt mateeryal tingz. Ih mi-di taak bowt inkorijment, gaidans, ahn help tu enibadi weh need dehnya tingz. (Aks 20:31-35) Di apasl Paal mi set wahn gud egzampl fi wi. Ih mi teech wi fi yooz wi taim, enerji, atenshan, ahn wi lov fi help adaz.

18. Weh som peepl ga fi seh bowt di benifits wi geh wen wi jenaros?

18 Peepl hoo stodi hyooman bihayvya seh dat wahn persn weh jenaros wahn bee hapi. Akaadn tu wan aatikl, “peepl seh dat dehn feel wahn lat hapiya afta dehn du sohnting kain fi adaz.” Dehn seh dat wen wi help adaz, wi ga “moa perpos ahn meenin” eena wi laif “bikaaz az hyoomanz, wi need fi du tingz fi adaz soh dat wi ku feel reeli hapi.” Soh dehn inkorij peepl fi valantyaa fi kamyooniti servis if dehn waahn liv wahn heltiya ahn hapiya laif. Af koars, dis noh sopraiz wi non ataal kaaz wi Kriyayta, Jehoava, teech wi dat wen wi giv tu adaz, wi wahn bee hapi.—2 Tim. 3:16, 17.

WERK HAAD FI BEE MOA JENAROS

19, 20. Wai yoo waahn bee jenaros?

19 Ih ku bee wahn chalenj fi kip wahn jenaros atichood wen wi deh rong peepl hoo selfish. Bot, Jeezas seh dat di too graytis komanment da fi lov Jehoava wid wi hoal haat, soal, main, ahn schrent ahn fi lov wi nayba laik wiself. (Maak 12:28-31) Laik weh wi si eena dis aatikl, peepl hoo lov Jehoava kapi fi hihn egzampl. Jehoava ahn Jeezas giv tingz tu adaz. Ahn dehn inkorij wi fi du di saym ting kaaz wen wi giv tu adaz, wi wahn bee hapi. If wi chrai fi shoa dis jenaros atichood wid Gaad ahn wi nayba, wi wahn bring aana tu Jehoava, ahn wee an adaz wahn benifit.

20 Wi noa dat yu don di du wahn lat fi adaz aredi, espeshali fi yu bradaz ahn sistaz. (Gal. 6:10) If yu kantinyu du dat, evribadi wahn lov an apreeshiayt yu, ahn yu wahn bee hapi bikaaz a dat. Proverbs 11:25 seh: “Di jenaros persn wahn praspa, an enibadi weh rifresh adaz wahn geh rifresh tu.” Wi noa dat Jehoava wahn bles wi bikaaz wi jenaros. Eena wi laif ahn minischri, wi ga lata difrent wayz how wi ku bee jenaros wid adaz. Di neks aatikl wahn taak bowt som a dehn wayz.

^ par. 13 Di naym chaynj.