Skip tu di aatikl

Skip tu lis a tapik

Payshens—Wen Hoap Mek Yu Noh Giv Op

Payshens—Wen Hoap Mek Yu Noh Giv Op

BIKAAZ wi di liv eena “di laas dayz,” wi need payshens moa dan eva. (2 Tim. 3:1-5) Wi deh rong peepl hoo lov dehnself, dehn noh kay bowt ada peepl, ahn dehn noh ga self-kanchroal. Peepl hoo ak laik dis yoozhwali noh ga no payshens. Soh den, aala wi need fi aks wiself dehnya kweschanz: ‘Ai di ak laik di peepl eena dis werl hoo noh ga no payshens ataal? Weh ih meen fi bee payshent? Weh Ah ku du fi mek dis impoatant kwaliti wahn paat a hoo mee az wahn Kristyan?ʼ

WAT DA PAYSHENS?

Akaadn tu di Baibl, payshens da moa dan jos fi put op wid wahn prablem. Wahn persn wid gaadli payshens ga wahn reezn wai ih noh giv op—ih hoap dat tingz wahn geh beta. Ih noh onli tink bowt ihself, bot ih kay bowt di feelinz a adaz, eevn peepl hoo hert ahn er weh chreet ahn bad. Ih kantinyu fi hoap dat dehn wahn ku fiks dehn rilayshanship. Dis noh sopraiz wi kaaz di Baibl seh dat payshens kohn fahn lov. * (1 Kor. 13:4) Di Baibl inklood “payshens” az wahn paat a di froot a di hoali spirit. (Gal. 5:22, 23) Soh, weh wi need fi du fi ga payshens?

HOW FI GA PAYSHENS

Fi ga payshens, wi haftu pray fi mek Jehoava spirit help wi. Hihn giv ih spirit tu enibadi hoo chros ahn pen pan ahn. (Look 11:13) Gaad spirit veri powaful, bot, wi need fi du wi paat ahn werk lang wid wi pryaaz. (Ps. 86:10, 11) Dis meenz dat wi haftu du wi bes fi shoa payshens evri day soh dat dis kwaliti ku deh deep dong eena wi haat. Ahn stil, wi mait need fi du moa fi mek payshens bee paat a hoo wee. Wat els ku help wi?

Wi ku ga payshens if wi egzamin ahn fala Jeezas perfek egzampl. Wen di apasl Paal mi taak bowt “di nyoo self,” weh inklood “payshens,” ih inkorij aala wi fi ‘mek di pees weh Jeezas Krais gi wi kanchroal how wi tink.ʼ (Kol. 3:10, 12, 15) Wi ku mek da saym pees tek oava wi haat if wi kapi Jeezas egzampl ahn ga schrang fayt dat Gaad wahn karek tingz eena fi Hihn taim. If wi ga da kaina chros, wi noh wahn looz wi payshens noh mata weh di hapm rong wi.—Jan 14:27; 16:33.

Aala wi kyaahn wayt fi di nyoo werl kohn. Bot wi laan fi bee moa payshent wen wi tink bowt how Jehoava payshent wid wee. Di Baibl tel wi: ‘Unu noh fi tink seh dat di Laad sloa fi du weh ih pramis. Dat da weh som a unu tink. Insted, di Laad onli payshent wid unu bikaaz ih noh waahn non a unu geh dischrai, bot ih waahn aala unu ton fahn unu sin dehn.ʼ  (2 Peet. 3:9) Soh wen wi tink bowt di payshens Jehoava di shoa wi, ih moov wi fi ga payshens wid ada peepl. (Roam. 2:4) Wat da sohn sichuwayshan weh wi need fi ga payshens?

WEN WI NEED MOA PAYSHENS?

Wahn lata sichuwayshan mait kom op evri day weh ku tes wi payshens. Fi egzampl, if yu feel dat yu ga sohnting impoatant fi seh, yu mait need fi ga payshens soh dat yu noh intarop adaz. (Jay. 1:19) Yu mait need fi ga payshens tu wen yu deh rong bradaz ahn sistaz hoo ga habits weh yu noh laik. Insteda geh beks bowt tingz laik dat, tink bowt weh Jehoava ahn Jeezas du wen dehn si fi wee weeknis dehn. Dehn noh foakos pahn aala di lee tingz dehn weh wi du rang. Insteda dat, dehn si di gud kwaliti dehn weh wi ga ahn dehn payshent wid wi. Dehn noa dat wi need taim fi du beta.—1 Tim. 1:16; 1 Peet. 3:12.

Wahn nada sichuwayshan weh mait tes wi payshens da wen sombadi seh dat wi mi seh er du sohnting rang. Moas a di taim, wi praabli wuda geh ofendid er chrai difen wiself. Bot di Baibl sojes wahn difrent rispans. Ih seh: “Ih beta fi bee payshent dan fi bee prowd. Noh kwik fi tek ofens, kaaz onli foolish peepl tek ofens.” (Eccl. 7:8, 9) Soh, eevn if da lai weh dehn di seh bowt wi, wi fi bee payshent ahn kansida how wi wahn rispan. Jeezas mi fala da prinsipl wen ada peepl mi chreet ahn bad.—Mach. 11:19.

Payrents need fi shoa moa payshens wen dehn need fi karek eni rang atichood ahn dizaiya dehn chiljren mait gat. Mek wi kansida di egzampl a Mattias, hoo serv da di Betel da Scandinavia. Az wahn teenayja, ih klaasmayt dehn yoostu teez ahn wahn lat sayka ih bileef dehn. Fi di fos, ih payrents neva mi noa bowt it. Bot dehn mi haftu deel wid how dat mi-di afek dehn son. Mattias mi staat tu kweschan weda er nat dis da di chroot. Gillis, Mattias pa, seh: “Wi mi need lata payshens. Mattias wuda aks kweschan laik, ‘Hoo da Gaad? Wat if di Baibl da noh di Werd a Gaad? How wi noa dat da reeli Gaad waahn mek wi du dis er dat?ʼ” Sohntaim Mattias wuda tel ih pa: “Wai enibadi shuda joj mee jos bikaaz Ai noh feel di saym way laik yoo er bileev weh yoo bileev?”

Gillis seh: “Sohntaim di kweschanz weh wi son mi aks wi da neva bikaaz ih mi beks wid wee az ih payrents, da mi bikaaz ih mi feel dat di chroot mi-di mek fi hihn laif tu haad.” How Gillis mi handl dis sichuwayshan? Ih seh: “Mee ahn mi son wuda sidong fi owaz ahn taak. Moas a di taim Ah lisn an aks wahn fyoo kweschanz fi mek Ah andastan how ih mi-di feel ahn how ih mi-di tink. Sohntaim, Ah giv ahn wahn ansa fi mek ih tink bowt joorin di day er bifoa wi staat op wi kanvasayshan agen.  Ada taimz, Ah wuda jos seh dat Ah need wahn fyoo dayz fi tink bowt sohnting weh ih mi seh. Chroo dehnya kanvasayshan, Mattias mi geh fi andastan an aksep teechinz laik di ransom, Gaad roolaship, ahn Jehoava lov. Ih mi tek taim, ahn moas a di taim, ih mi veri haad. Bot lee bit bai lee bit, ih staat lov Jehoava. Mee ahn mi waif soh hapi dat wi mi payshent wid wi son chroo ih teenayj yaaz. Ih mi wert di efoat ahn wi mi reech ih haat.

Gillis an ih waif mi chros dat Jehoava mi wahn sopoat dehn az dehn shoa payshens wid dehn son. Gillis seh: “Ah aalwayz tel Mattias dat wi deep lov far ahn moov mee an ih ma fi pray eevn haada. Wi pray dat Jehoava wuda help ahn fi andastan.” Dehnya payrents glad dat dehn mi ga payshens ahn dat dehn neva giv op!

Wi aalso need payshens wen wi di tek kayr a wahn famili memba er fren hoo ga wahn siknis weh laas fi wahn lang taim. Mek wi luk pahn di egzampl a Ellen, * hoo liv da Scandinavia tu.

Bowt ayt yaaz agoa, Ellen hozban mi geh too schroak weh mi damij ih brayn. Bikaaz a dat, ih kudn feel kompashan, hapinis, er sadnis. Dis da wahn chalenj fi Ellen. Shee seh: “Ih tek wahn lata payshens ahn lata pryaaz. Mi fayvrit skripcha weh reeli komfert mi da Filipiyanz 4:13, weh seh: ‘Fi evriting, Ai ga di schrent fahn di wan hoo gi mi powa.ʼ”(NW) Ellen reeli apreeshiayt da powa kaaz ih help ahn noh fi giv op bot fi ga payshens ahn chros eena Jehoava sopoat.—Ps. 62:5, 6.

GA PAYSHENS LAIK JEHOAVA

Af koars, wen ih kohn tu payshens, Jehoava da di perfek egzampl fi mek wi fala. (2 Peet. 3:15) Wahn lata egzampl deh eena di Baibl a how Jehoava mi shoa payshens. (Neh. 9:30; Isa. 30:18) Fi egzampl, weh Jehoava mi du wen Aybraham mi kweschan fi Hihn disizhan fi dischrai Sadam? Jehoava neva intarop Aybraham az ih staat taak. Insteda dat, Jehoava mi lisn tu ahn; ih mi payshent wid Aybraham az ih lisn tu eech wan a ih kweschan ahn kansaan. Den, Jehoava mi shoa dat ih mi-di lisn kaaz ih mi ripeet bak tu ahn di tingz weh Aybraham mi-di wori bowt. Jehoava mi pramis Aybraham dat Ih neva mi wahn dischrai Sadam eevn if da onli ten raichos peepl mi deh eena di siti. (Gen. 18:22-33) Dat da wahn byootiful egzampl a sombadi hoo payshent ahn lisn, ahn sombadi hoo stay kaam ahn noh eezi fi looz kanchroal!

Gaadli payshens da reeli wahn impoatant paat a hoo wee az Kristyanz. If wi werk haad fi ga dis byootiful kwaliti, wi aana wi lovin ahn payshent hevnli Faada. Ahn wi wahn deh monks “dehn wan weh mi ga fayt ahn weh mi payshent til wen dehn geh weh Gaad mi pramis dehn.”—Heeb. 6:10-12.

^ par. 4 Wi mi taak bowt lov eena di fos aatikl a dis seeriz pahn di froot a Gaad hoali spirit.

^ par. 15 Di naym chaynj.