Skip tu di aatikl

Skip tu lis a tapik

 FAHN WI HISCHRI REKADZ

How di Chroot Mi Reech Portugal

How di Chroot Mi Reech Portugal

BRADA George Young mi-di chravl tu ih nyoo asainment da Europe pahn wahn ship. Joorin di chrip, ih mi-di tink bak pahn aal weh ih mi du fi di Kingdom wen ih mi deh da Brazil. * Ih mi hapi bowt aal weh ih mi du deh. Bot az di chrip mi kantinyu, Brada Young mi staat tink bowt ih nyoo asainment—Spain ahn Portugal. Sins di gud nyooz neva reeli reech deh yet, ih mi-di hoap fi araynj op tingz soh dat Brada J. F. Rutherford kuda mi gi sohn Baibl taak. An ih mi-di hoap fi giv owt bowt 300,000 chrak!

Brada George Young mi gaahn bai see tu wahn lata plays fi preech

Wen Brada Young reech Lisbon erli eena 1925, da-mi joorin wahn rof taim fi di konchri. Dehn mi ga wahn revolooshan eena 1910 weh mi chaynj di govament ahn tek weh wahn lata powa fahn di Kyaatlik Cherch. Di peepl mi geh moa freedom, bot di hoal konchri mi ga moa prablem.

Saym taim wen Brada Young mi-di mek araynjment fi mek Brada Rutherford giv wahn taak, di govament mi set op wahn kerfyoo sayka weh di militari mi-di chrai tek oava di govament. Di sekiteri a di British and Foreign Bible Society mi waan Brada Young dat ih mi wahn ron intu prablemz fi shoar. Bot stilyet, Brada Young mi aks fi yooz di jim da wan a di hai skool dehn, ahn dehn mi tel ahn yes!

Brada Rutherford mi fi gi di taak pahn May 13. Soh, dayz bifoa di taak dehn put op sainz pahn bildinz, ahn ron advataizment eena di nyoozpaypa. Di naym a di poblik taak da-mi “How to Live on the Earth Forever.” Wel, som a di rilijos peepl fahn deh mi hori rait wahn aatikl eena dehn nyoozpaypa fi waan di peepl bowt di “faals prafit dehn” weh mi jos reech. Pahn tap a dat, dehn mi gaahn bai di jim ahn han owt towznz a broashoar weh mi ga infamayshan gens di teechinz a Brada Rutherford.

Bot stil, bowt 2,000 peepl mi ful op di jim, ahn dehn mi haftu ton bak bowt da saym amonk tu. Som peepl mi eevn hoal aan tu sohn roap lada weh mi deh eena di jim. Ahn adaz mi-di sidong pahn di eksasaiz masheen dehn.

Noh evriting mi gaahn smood-wan joorin di taak. Peepl weh mi deh gens di werk mi-di hala op ahn brok op di chyaa dehn. Bot Brada Rutherford stay kaam ahn klaim op pahn wahn taybl fi mek peepl kuda mi hyaa ahn beta. Wen ih mi finish, da mi nayli 12 aklak da nait, an oava 1,200 peepl mi lef dehn naym an ajres fi geh Baibl lichricha. Di neks day, di nyoozpaypa O Século mi poblish wahn aatikl bowt Brada Rutherford taak.

Bai Septemba 1925, wi mi staat tu poblish di Porchugeez kapi a The Watch Tower da Portugal. (Wahn Porchugeez kapi mi don deh da Brazil aredi.) Rong da taim deh, wahn Baibl Styoodent da Brazil, weh mi naym Virgílio Ferguson, staat tu mek planz fi moov tu Portugal fi help wid di  Kingdom werk. Ih mi werk wid Brada Young bifoa da di branch aafis a di Baibl Styoodents da Brazil. Brada Virgílio an ih waif, Lizzie, jain Brada Young agen. Brada Ferguson mi get da Portugal di rait taim tu, kaaz noh lang afta dat, Brada Young mi geh wahn nyoo asainment weh mi inklood di Soviet Union.

Brada Virgílio ahn Sista Lizzie rezidens permit, 1928

Wen di militari mi tek oava di govament, tingz mi geh wers da Portugal, an ih neva mi luk laik tingz mi wahn geh beta enitaim soon. Brada Ferguson mi tek korij ahn protek di smaal groop a Baibl Styoodents ahn sopoat dehn werk. Ih mi chrai geh permishan fi yooz ih hoam fi ga di meetinz. Eena Aktoaba 1927, ih mi geh di permishan.

Joorin di fos yaa anda di militari govament, bowt 450 peepl da Portugal yoostu soskraib fi geh The Watch Tower. Ahn bisaidz dat, di chrak ahn di ada lee buk dehn mi help lata peepl laan di chroot chroo di hoal Porchugeez Empaiya—Angola, di Azores, Cape Verde, East Timor, Goa, Madeira, ahn Mozambique.

Eena di layt 1920ʼs, wahn hombl Porchugeez gyaadna, weh mi naym Manuel da Silva Jordão, moov tu Lisbon. Wen ih mi-di liv da Brazil, ih mi hyaa wahn poblik taak weh Brada Young mi giv. Rait away, ih rekonaiz di chroot an ih mi waahn help Brada Ferguson wid di preechin werk. Soh, Manuel staat fi serv az wahn colporteur, er weh wi kaal wahn painyaa tudeh. Bikaaz di preechin werk mi moa aaganaiz, di lee kangrigayshan da Lisbon mi-di groa!

Eena 1934, Brada ahn Sista Ferguson mi haftu goh bak tu Brazil. Bot di chroot mi don reech wahn lata peepl aredi. Eevn doa da mi joorin di Spanish Civil War ahn World War II, di faytful groop a bradaz da Portugal mi manij fi servaiv spirichwali. Fi wahn lee wail di werk mi sloa dong laik wen wahn faiya soon owt. Bot di faiya neva did owt, an in ih mi blayz op bak agen wen Brada John Cooke mi reech eena 1947. Hihn da-mi di fos mishineri weh mi grajuayt fahn di Baibl Skool a Gilyad fi geh asain tu Portugal. Afta dat, di nomba a Kingdom poblishaz mi groa ahn groa. Eevn wen di govament mi ban di werk a Jehoava Witnisiz eena 1962, di nomba a poblishaz mi stil gaan op. Den, eena Disemba 1974 wen di konchri lif di ban ahn leegali rekonaiz Jehoava Witnisiz az wahn rilijan, moa dan 13,000 poblishaz mi deh eena di konchri.

Tudeh, moa dan 50,000 Kingdom poblishaz di preech di gud nyooz bowt Gaad Kingdom da Portugal. Di gud nyooz mi reech di difrent ailan dehn weh dehn taak Porchugeez tu, laik di Azores ahn Madeira. Som a di poblishaz weh deh da Portugal tudeh da di disendant dehn a som a di saym peepl dehn hoo mi gaahn lisn tu Brada Rutherford taak eena 1925.

Wi tank Jehoava ahn dehn faytful bradaz ahn sistaz hoo mi ga di korij fi tek di leed eena dis werk “fi Krais Jeezas monks di peepl dehn.”—Roam. 15:15, 16.—Fahn wi hischri rekadz da Portugal.

^ par. 3 Si “There Is More Harvest Work to Be Done” eena The Watchtower, May 15, 2014, payj 31-32.