Skip tu di aatikl

Skip tu lis a tapik

Yes, Ih Mek Sens fi Kantinyu Liv!

Yes, Ih Mek Sens fi Kantinyu Liv!

Faizal mi need wahn haat serjri bowt wan yaa afta ih waif mi ded. Hihn seh: “Wen Ah mi reed di buk a Job, Ah noa dat Jehoava put it deh fi wahn reezn. Wen wi fain di egzampl a sombadi eena di Baibl weh gaahn chroo wahn simila sichuwayshan laik weh wee di goh chroo, ih komfert wi.” Eevn doa hihn gaahn chroo soh moch, hihn seh: “Ih mek sens fi kantinyu liv!”

Tarsha mi yong wen ih ma mi ded. Shee seh: “Bikaaz Ah noa mi Kriyayta, ih gi mi laif meenin, hoap, ahn jai, eevn doa Ah ga lata prablemz fi deel wid. Wi ku bee shoar dat Jehoava ku komfert wi ahn help wi goh chroo di chraiyalz weh wi fays evri singl day.”

DI AATIKL dehn eena dis magazeen shoa how terabl chraiyalz eena laif ku mek yu feel laik giv op. Az yu goh chroo yu oan persnal prablemz, yu mait wanda if ih mek sens fi kantinyu liv er if enibadi eevn kay bowt yoo. Yu ku bee shoar dat Gaad reeli kay bowt how yu feel ahn weh yu di goh chroo. Yoo preshos tu hihn.

King Dayvid, weh mi rait Psalm 86, mi seh humoch ih chros Gaad. Ih mi seh: “Ah kaal pahn yu eena di day a mi chroblz, kaaz yoo wahn ansa mi.” (Psalm 86:7) Yoo mait wanda doh, ‘How Gaad wahn ansa mi “eena di day a mi chroblz”?ʼ

Eevn doa Gaad mait noh solv yu prablemz kwik, fi hihn Werd, di Baibl, tel yu fi bee shoar dat hihn ku gi yu di kaina pees weh yoo need fi koap. Di Baibl seh: “Unu noh fi wori bowt notn, bot unu mos pray an aks Gaad fi evriting. An unu mos tank ahn tu wen unu di aks ahn fi weh unu need. Den Gaad wahn gi unu wahn kaina pees weh nobadi kyaahn andastan. Ih wahn mek da sayhn pees wach oava unu haat ahn unu main” (Filipiyanz 4:6, 7) Pleez kansida how dehnya Baibl vers help wi fi noa dat Gaad kay bowt wi.

Gaad Kay Bowt Yoo

“Gaad noh faget nat wan a dehn [sparo, NW] . . . Unu wot moa tu hihn dahn wahn hoal flak a berd.” Look 12:6, 7.

KANSIDA DIS: Fi moas peepl, wahn lee sparo da notn, bot noh tu Jehoava, tu hihn dehn preshos. Gaad noatis evri singl lee berd. Now imajin humoch moa preshos wahn hyooman tu Jehoava. Hyoomanz da di moas wandaful kriyayshan pahn ert, dehn mek eena Gaad “imij.” Wee ku ga di sayhn wandaful kwalitiz laik hihn.—Genesis 1:26, 27.

“Oa Jehoava, yu don saach chroo mi ahn yu noa mi. . . . Yoo noa weh Ah di tink bowt. . . Saach chroo mi ahn noa aala mi woriz.” Psalm 139:1, 2, 23.

KANSIDA DIS: Gaad noa hoo yoo. Hihn noa weh yu feel ahn weh kansaan yu eevn if da wahn seekrit. Eevn doa adaz mait noh andastan yu feelinz er yu woriz, Gaad kay bowt yoo an ih waahn help yu. Now, dat reeli mek yu valyu yu laif, noh chroo?

 Yu Laif Ga Meenin

“Oa Jehoava, pleez lisn tu mi pryaa; Ah bayg yu fi lisn tu mi. . . . Kohn dong tu mi; pleez ansa mi kwik wen Ah kaal fi yoo. . . . Hihn wahn pay atenshan tu di pryaaz a di poa.” Psalm 102:1, 2, 17.

KANSIDA DIS: Jehoava kay bowt ahn noatis evri singl tyaaz weh ron dong yu fays kaaz a sofarin. (Psalm 56:8) Dis inklood evribadi. Di reezn wai hihn memba bowt aala yu tyaaz a sofarin ahn sadnis da kaaz yoo preshos tu hihn.

“Noh wori, kaaz Ai da yu Gaad. Ai wahn schrentn yu, fi shoar, Ai wahn help yu. . . . Ai, Jehoava yu Gaad,. . . di Wan weh tel yu, ‘Noh bee frayd. Ai wahn help yu.ʼ” Isaiah 41:10, 13.

KANSIDA DIS: Gaad redi fi help yu. If yu faal dong, hihn wahn lif yu op.

Di Hoap a Wahn Beta Fyoocha Deh Heda Wi

“Bikaaz Gaad ga soh moch lov fi di werl, ih sen ih onli-bigatn Son, soh dat evribadi weh eksasaiz dehn fayt eena hihn ku geh evalastin laif ahn noh geh dischrai.”Jan 3:16, NW.

KANSIDA DIS: Yoo soh preshos tu Jehoava dat hihn mi wilin fi aafa op ih Son, Jeezas, az wahn sakrifais fi sayv yoo. Dis sakrifais weh hihn pay giv yoo di apachooniti fi liv wahn hapi laif, ful a meenin, di kaina laif weh wahn neva en. *

Eevn doa yu mait ga lata woriz ahn yu feel laik yu kyaahn goh nohmoh, stodi Gaad Werd. Groa eena yu fayt an eena di hoap weh Gaad pramis. Wen yu du dat, yu wahn si dat fi chroo fi chroo, ih mek sens fi kantinyu liv.

^ par. 19 Fi laan moa bowt how yu ku benifit fahn Jeezas sakrifais, wach di veedyo Memba di Det a Jeezas da www.jw.org/bzj. Luk anda POBLIKAYSHANZ > VEEDYO > WI MEETIN DEHN AHN WI MINISCHRI.