Skip tu di aatikl

Skip tu lis a tapik

Wen Sombadi Yu Lov Ded

Wen Sombadi Yu Lov Ded

“Ah mi feel helples wen mi oalda breda mi ded sodn-wan. Eevn afta sohn monts paas, Ah wuda stil feel di payn enitaim Ah memba ahn. Da mi laik if Ah mi-di geh stab eena mi haat oava ahn oava agen. Sohntaim, Ah mi geh beks tu. Wai mai breda mi haftu ded? An Ah mi feel gilti kaaz Ah neva spen wahn lata taim wid ahn wen ih mi alaiv.”—Vanessa, Australia.

IF YOO eva looz wahn fren er relitiv eena det, den yu maita mi feel laik yu kyaahn du notn fi fiks di sichuwayshan. Yu mait eevn feel loanli ahn feel wahn deep payn eensaida yu. Maybi yu mi eevn feel beks, gilti, ahn frayd. Yu mait wanda if ih eevn mek sens fi kantinyu liv.

Noh tink dat bikaaz yu sad, dat meenz dat yu week. Ih jos shoa humoch yu mi lov di persn weh ded. Bot, yu tink ih pasabl fi get oava di payn weh yu feel wen yu looz wahn fren er relitiv eena det?

HOW SOHN PEEPL DEEL WID DI DET A WAHN FAMILI MEMBA ER FREN

Eevn doa ih mait luk laik yu payn wahn neva en, yu mait fain dehnya neks sojeshan helpful:

GI YUSELF TAIM FI DEEL WID YU FEELINZ

Noh evribadi deel wid di det a wahn fren er relitiv di sayhn way, sohn peepl tek moa taim fi get oava dehn payn. Stil, wen yu krai da laik yu di let goh a yu payn. Vanessa, weh wi menshan erliya, seh: “Ah wuda jos krai; Ai mi need fi rilees di payn weh Ah mi-di feel.” Sofía, weh mi looz ih sista sodn-wan eena det, seh: “Ih hert wahn lat fi tink bowt weh mi hapm, da laik yu di oapm op ahn kleen wahn kot weh yu geh. Yu feel laik yu kyaahn tek di payn, bot ih help it fi heel.”

TAAK BOWT WEH YU DI TINK AHN WEH YU DI FEEL

Ih nachral fi mek yu waahn deh bai yuself sohntaim. Bot wen yu looz wahn fren er relitiv eena  det, ih ku bee wahn hevi load fi bak aal bai yuself. Jared mi semteen wen ih pa mi ded. Hihn seh: “Ah mi taak bowt how Ah mi-di feel wid adaz. Ah noh tink weh Ah mi seh mi mek moch sens, bot ih mi feel gud jos fi seh how Ah feel.” Janice, weh wi mi menshan erliya, seh: “Wen Ah taak wid adaz, ih komfert mi wahn lat. Ah feel laik adaz andastan mi, an Ah neva feel laik Ah mi deh bai miself.”

AKSEP HELP

Wahn dakta seh: “Wen wi sad bikaaz wan a wi fren er famili memba ded, ih faar eeziya fi bayr op if wi aksep help fahn wi frenz ahn relitiv dehn fahn di biginin.” Mek yu frenz noa weh dehn ku du fi help; moa dan laikli dehn waahn help yu bot dehn noh mait noa how.—Proverbs 17:17.

JRAA KLOASA TU GAAD

Tina seh: “Wen mi hozban mi ded fahn kyansa, Ah neva ga nobadi fi tel mi feelinz tu, soh Ah tel Gaad evriting! Ah mi staat eech day di aks ahn fi help mi get chroo di day. Gaad mi help mi eena moa wayz dan Ah ku menshan.” Wen Tarsha mi 22 yaaz oal, fi shee ma mi ded. Shee seh: “Ai mi geh komfert fahn dayli Baibl reedin. Dat mi help mi fi tink bowt inkorijin tingz.”

PICHA DI REZOREKSHAN

Tina seh: “Fos, di rezorekshan hoap neva bring mee no komfert bikaaz Ah mi need mi hozban, ahn mai chree son mi need dehn pa tu. Bot now, foa yaaz layta, Ah di hoal aan tait tu da hoap. Dis hoap komfert mi ahn help mi fi foakos pahn wahn hapi fyoocha. Dis da weh help mi fi noh giv op. Ah imajin how ih wuda feel fi si mi hozban agen, ahn dis mek Ah feel jai ahn pees!”

Yu praabli noh wahn geh rid a yu payn ahn sadnis rait away. Bot Vanessa ekspeeryens ku komfert yu. Shee seh: “Yu tink yu wahn neva feel beta, bot lee bit bai lee bit, yu staat tu feel les sad.”

Memba, eevn doa yu mait noh stap mis di persn, ih stil mek sens fi kantinyu liv. Wai? Bikaaz wid Gaad lovin help, yu ku stil injai di spen taim wid gud frenz ahn ga wahn laif weh ful a perpos. Ahn soon Gaad wahn rezorek di ded. Hihn kyaahn wayt fi di day wen yu wahn ku hog yu fren er famili memba agen. Bai den, di payn eena yu haat wahn gaahn fareva!