Skip tu di aatikl

Skip tu lis a tapik

Weh Gaad Du Soh Faar?

Weh Gaad Du Soh Faar?

If yu waahn geh fi noa sombadi gud, ih wuda bee beta fi mek yu laan weh di persn don du eena ih laif ahn di difrent chalenjiz weh ih mi fays. Jos laik dat, if yu waahn noa Gaad gud, yu need fi laan weh hihn don du aredi. Yu mait bee sopraiz fi laan dat weh hihn mi du eena di paas stil di benifit wee tudeh ahn wahn benifit wi eena di fyoocha.

GAAD KRIYAYT EVRITING FI MEK WEE BENIFIT

Jehoava Gaad da di Gran Kriyayta, ahn wi ku laan bowt hihn fahn di tingz dehn weh hihn mek. (Roamanz 1:20) “Da hihn mek di ert wid ih powa, da hihn mek di lan weh di projoos wid ih wizdom, ahn da hihn schrech owt di hevn wid ih andastandin.” (Jeremiah 10:12) Di amayzin tingz weh Gaad mek shoa dat ih inchrestid eena wi.

Jehoava mek wi “eena fi hihn imij.” Dis meen dat wee moa speshal dan eniting els weh hihn mek. (Genesis 1:27) Hihn mek wi eena wahn way weh wee ku shoa fi hihn kwalitiz, er wayz. Owta aala Gaad kriyayshan, onli hyoomanz noa dat dehn need fi wership ahn; onli wee ku andastan di way hihn feel bowt tingz ahn weh impoatant tu hihn. Wen wi chrai fi liv bai dehnya tingz, wi hapiya ahn wi laif ga moa meenin. Bot moa dan dat, wee ku ga wahn rilayshanship wid hihn.

Wen wi luk pahn di tingz weh Gaad mek pahn di ert, wi si how hihn feel bowt wi. Di apasl Paal seh dat Gaad “aalwayz gi proof seh hihn da Gaad bikaaz a di ting dehn weh ih du. Da hihn gi unu rayn fahn hevn, ahn gi unu kraps eena dehn taim; ahn da hihn gi unu food ahn ih mek unu hapi.” (Aks 14:17) Gaad gi wi moa dan weh wi need fi liv. Hihn gi wi wahn lata difrent tingz weh wi ku chooz fram; ih du dis jos soh dat wi ku injai laif. Aala dis da jos wahn lee glims a weh ih mi waahn fi wi fahn di biginin.

 Jehoava mek di ert soh dat hyoomanz ku liv fareva pan it. Di Baibl seh: “Di ert ih gi tu hyoomanz,” an ih “neva mek it fi notn.” (Psalm 115:16; Isaiah 45:18) Da hoo hihn mi waahn fi liv pan it ahn fi how lang? “Di raichos [er, obeedyant] wan dehn wahn inherit di ert, ahn dehn wahn liv fareva pan it.”—Psalm 37:29.

Soh Jehoava mi mek di fos man an uman, Adam ahn Eev, ahn put dehn eena wahn paradais rait ya pahn dis ert fi mek dehn “koltivayt it ahn tek kayr a it.” (Genesis 2:8, 15) Gaad mi gi dehn too tingz fi du: Ga chiljren ahn koltivayt di ert. (Genesis 1:28) Soh Adam ahn Eev mi ga di hoap fi liv fareva pahn dis ert. Bot dehn mi chooz fi disobay Gaad, ahn bikaaz a dat, dehn looz owt pahn di apachooniti fi bee monks “di raichos” hoo “wahn inherit di ert.” Dat sad, noh chroo? Bot, wi wahn si dat weh dehn mi du neva chaynj Gaad perpos fi wee er fi di ert. Fos, mek wi si wat els Gaad mi du.

GAAD GI WI IH WERD

Di Baibl da di Werd a Gaad. Wai Jehoava gi wi di Baibl? Di mayn reezn da soh dat wi ku laan bowt ahn. (Proverbs 2:1-5) Di Baibl noh ansa evri kweschan wi mait ga bowt Gaad; no buk deh weh ku du dat. (Ecclesiastes 3:11) Yet evriting weh deh eena di Baibl ku help wi geh fi noa Gaad. Wi si di kaina persn hihn fahn di way ih deel wid peepl. Wi geh fi si di kaina persn dehn weh hihn laik ahn noh laik. (Psalm 15:1-5) Wi laan how hihn feel bowt wership, moraliti, ahn mateeryal tingz. Da laik di Baibl paynt wahn byootiful picha a Jehoava. Bot di bes picha a Jehoava da weh ih Son, Jeezas Krais, mi paynt chroo di tingz weh ih mi seh ahn du.—Jan 14:9.

Wahn nada reezn wai Jehoava gi wi ih Werd, di Baibl, da soh dat wi ku noa how fi liv wahn hapi laif weh ga meenin. Chroo di Baibl, Jehoava tel wi how fi ga wahn hapi famili, how fi bee satisfai wid weh wi gat, ahn how fi deel wid woriz ahn prablemz eena laif. Ahn layta eena dis magazeen, yu wahn laan dat di Baibl ga di ansa tu sohn impoatant kweschanz, laik: Wai soh moch sofarin deh? Weh wahn hapm eena di fyoocha? Yu wahn laan tu weh Gaad don du fi mek shoar dat fi hihn perpos fi di ert ahn fi hyoomanz wahn stil kohn chroo.

Di Baibl da reeli wahn amayzin buk—wahn buk weh onli kuda kohn fahn Gaad. Ih mi tek 40 difrent man bowt 1,600 yaaz fi rait di Baibl. Stilyet, di hoal Baibl ga di saym mesij, bikaaz ih kohn fahn Gaad. (2 Timoti 3:16) Wen peepl stodi aala di difrent oal skroal ahn manyuskrip dehn weh avaylabl, dehn si proof dat di Baibl weh wi gat tudeh stil karek, eevn doa ih towznz a yaaz oal. Ahn dat reeli amayzin wen wi tink bowt humoch taim peepl chrai stap adaz fahn chranslayt, print, er geh di Baibl fi reed it. Tudeh, da di moas papyula buk; ih deh eena nayli evri hoam an eena wahn lata difrent langwij. Di fak dat wee ga di Baibl tudeh da proof dat “di werd a fi wee Gaad wahn laas fareva.”—Isaiah 40:8.

GAAD BAK OP IH PERPOS

Jehoava wahn mek fi hihn perpos fi di ert ahn fi hyoomanz kohn chroo. Hihn waahn hyoomanz liv fareva pan dis ert. Wen Adam mi chooz fi sin, ih looz di apachooniti fi geh evalastin laif noh onli fi ihself bot fi ih fyoocha chiljren tu. “Sin mi fos kom eena di werl wen wan man sin, ahn da man sin bring det; ahn sin spred tu evribadi, ahn aala dehn sin. Sayka dat, evribadi wahn ded.” (Roamanz 5:12) Bikaaz Adam mi sin, wahn persn mait wanda, ‘Gaad perpos fi di ert wahn stil kohn chroo?ʼ Soh Gaad mi du sohnting fi bak op ih werdz fi mek wi noa dat weh ih seh wahn kohn chroo.

Weh Jehoava mi du mi rait in lain wid di kaina persn hihn. Hihn da wahn Gaad a jostis, soh Adam ahn Eev mi haftu ansa fi dehn akshanz. Bot owta lov fi dehn fyoocha chiljren, Gaad mek wahn way owt fi wi. Memba, hihn da wahn Gaad a wizdom, soh hihn disaid how ih mi wahn deel wid da chalenj, ahn rait away, ih kom op wid wahn way fi mek wi eskayp sin ahn det. (Genesis 3:15) Da way da chroo ih Son, Jeezas Krais. Weh dat mi involv?

 Jehoava waahn sayv wi fahn aala di payn weh Adam sin kaaz. Dats wai ih mi sen Jeezas tu di ert fi teech peepl how fi liv ahn fi “giv op fi hihn laif soh dat lat moa peepl ku geh free fahn dehn sin dehn.” * (Machyu 20:28; Jan 14:6) Onli Jeezas kuda mi ded fi wi, bikaaz hihn mi perfek jos laik Adam. Jeezas mi stay obeedyant tu Jehoava, eevn tu di point a det; Adam neva obeedyant. Sins Jeezas neva dizerv fi ded, Jehoava mi bring ahn bak tu laif. Ih gaan bak da hevn fi liv wid ih Faada. Now Jeezas ku du weh Adam neva du—paas aan tu hyoomanz, weh stay obeedyant, di hoap fi liv fareva. Di Baibl seh: “Ahn wen da wan man disobay, dat mek evribadi bee sina. Sayhn way, sayka di Wan man weh mi du weh Gaad tel ahn fi du, Gaad mek evriting rait bitween hihn ahn lata peepl.” (Roamanz 5:19) Bikaaz Jeezas mi ded fi wi, weh Gaad mi pramis wahn kohn chroo—evalastin laif rait ya pahn dis ert.

Wi laan wahn lat bowt Jehoava fahn di way ih mi deel wid di difrent chalenj dehn weh mi kom op afta Adam mi disobay ahn. Jehoava wahn finish weh hihn mi staat. Notn ku stap ahn; wateva hihn seh wahn kohn chroo. (Isaiah 55:11) Wi aalso get fi apreeshiayt di amonk a lov weh Jehoava ga fi wi. ‘Dis da di way how Gaad mi shoa ih lov tu wi: ih sen ih onli Son eena di werl soh dat chroo hihn, wee ku ga laif weh wahn neva en. Dis da weh da reel lov; da noh dat wee mi lov Gaad, bot da hihn mi lov wee ahn sen ih Son fi bee di sakrifais, soh dat ih ku fagiv wi a wi sin dehn.ʼ—1 Jan 4:9, 10.

Di Baibl seh: “Gaad neva eevn kip ih oan Son fahn sofa, soh den wen Gaad gi ih oan Son fi aala wi, wi ku noa fi chroo dat ih noh wahn hoal bak notn fahn wee.” (Roamanz 8:32) Soh den, wateva Jehoava pramis wi wahn kohn chroo. Bot da wat ih mi pramis fi du fi wi? Wel, pleez kantinyu reed di neks aatikl fi fain owt.

WEH GAAD DU SOH FAAR? Jehoava mek hyoomanz fi liv fareva pahn di ert. Ih gi wi di Baibl soh dat wi ku laan bowt ahn. Chroo Jeezas Krais, Jehoava mek it pasabl fi mek wi geh laif. Dat da how Jehoava shoa hyoomanz dat fi hihn perpos wahn kohn chroo

^ par. 16 Fi moa infamayshan bowt Jeezas det, pleez si chapta 5 a di buk weh naym Weh di Baibl Ku Teech Wi? weh Jehoava Witnisiz poblish ahn weh avaylabl onlain da www.jw.org/bzj.