Skip tu di aatikl

Skip tu lis a tapik

 LESN 2

How fi Bee Hombl

How fi Bee Hombl

WEH IH MEENZ FI BEE HOMBL?

Wahn hombl persn da sombadi weh ga rispek. Ih noh ak prowd er ekspek adaz fi chreet ahn laik ih impoatant er speshal. Raada, wahn persn weh hombl shoa dat ih reeli ga inchres eena adaz ahn dat ih wilin fi laan fahn dehn.

Sohntaim peepl ga di rang aidyaa dat wahn persn weh hombl da wahn week persn. Bot reeli, hyoomiliti da wahn schrent weh help peepl fi noa dehn faalts ahn noa weh dehn ku du er kyaahn du.

WAI IH IMPOATANT FI BEE HOMBL?

  • Hyoomiliti mek wahn rilayshanship beta. Di buk, The Narcissism Epidemic seh: “Ih eeziya fi wahn hombl persn mek frenz ahn fi kamyoonikayt wid ada peepl.”

  • Hyoomiliti help yu chail fi ga wahn beta fyoocha. If yu chail laan fi bee hombl fahn now, ih wahn bee eeziya fi mek ih geh wahn jab wen ih groa op. Dakta Leonard Sax rait: “If di yong persn tink tu moch a ihself ahn noh rekonaiz weh ih kyaahn du, ih noh wahn du gud wen ih goh luk fi wahn jab. Bot if di yong persn shoa dat ih inchrestid eena weh di persn weh di intavyoo ahn ga fi seh, ih wahn praabli geh di jab.” *

HOW FI TEECH YU CHAIL FI BEE HOMBL

Help yu chail noh fi tink tu moch a ihself.

BAIBL PRINSIPL: ‘If enibadi tink seh hihn soh impoatant dat hihn kyaahn help owt sohnbadi els, den hihn onli di fool ihself.ʼ—Galayshanz 6:3.

  • Noh seh tingz tu yu chail weh noh reel. Tingz laik: “Aal yu jreem dehn ku kohn chroo” ahn “Yu ku bee eniting weh yu waahn bee” mait song laik dehn di bil op di chail, bot moas a di taim eena reel laif dehnya tingz noh kohn chroo. Yu chiljren wahn ku ga sokses if dehn set reeznabl goalz ahn werk haad fi reech dehn.

  • Komen ahn fi spesifik tingz weh ih du. If yu jos tel wahn chail dat ih “amayzin” dat noh wahn help ahn fi bee hombl. Komen ahn bowt wahn sertn kwaliti; bee spesifik.

  • Limit humoch taim yu chail spen pahn soashal meedya. Wahn lata taim pahn soashal meedya, peepl laik poas tingz fi shoa aala di grayt tingz weh dehn du. Dat da di opozit a hyoomiliti.

  • Inkorij yu chail fi bee kwik fi seh sari. Wen yu chail du sohnting rang, help ahn fi andastan weh ih du rang ahn fi admit ih rang.

 Teech ahn fi bee tankful.

BAIBL PRINSIPL: “Unu fi bee tankful.”—Koloashanz 3:15, NW.

  • Tankful fi kriyayshan. Wahn chail shud laan fi bee tankful fi aala di tingz eena kriyayshan an andastan dat wi need wahn lata dehn tingz fi stay alaiv. Wi need ayaa fi mek wi liv, waata fi jrink, ahn food fi eet. Yooz dehnya egzampl fi help yu chail fi bee tankful an apreeshiayt aal di byootiful tingz eena kriyayshan.

  • Tankful fi peepl. Help yu chail noh fi bee jelos a adaz kaaz dehn ga wahn beta skil er abiliti dan ahn, bot help ahn fi si how ih ku laan fahn dehn.

  • Shoa dat dehn tankful. Teech yu chiljren fi seh “tank yu,” noh jos wid werdz bot bai dehn akshanz tu. If wi shoa tanks, ih help wi fi stay hombl.

Teech yu chiljren dat ih gud fi du tingz fi help adaz.

BAIBL PRINSIPL: ‘Unu sopoas tu bee hombl ahn unu noh fi tink dat unu beta dahn enibadi els. Unu mos luk owt fi wan anada, ahn noh onli fi unu oanself.ʼ—Filipiyanz 2:3, 4.

  • Gi yu chail werk fi du eena di hows. If yu tel yu chail dat ih noh haftu help du tingz eena di hows, da laik yu di tel ahn dat hihn er shee tu impoatant fi du werk eena di hows. Di werk weh yu asain ahn fi du fi kohn fos, ahn play an ada tingz fi kohn sekant. Shoa ahn how di werk weh ih du rong di hows benifit adaz ahn how adaz wahn apreeshiayt an rispek ahn if ih du dehn.

  • Teech ahn how ih gud fi du tingz fi adaz. If yu chail du tingz fi adaz ih wahn help ahn fi bee machoar. Soh, inkorij yu chail fi fain owt hoo need help. Diskos wid ahn weh ih ku du fi help dehn. Komen ahn sopoat yu chail az ih help adaz.

^ par. 8 Fahn di buk The Collapse of Parenting.