Skip tu di aatikl

Skip tu lis a tapik

 DEHN MI FAYS DI CHALENJ

Di Stoari a Ricardo an Andres

Di Stoari a Ricardo an Andres

Ejukayshan weh bays pahn di Baibl ga di powa fi chaynj wahn persn laif. Kansida di egzampl a Ricardo an Andres.

RICARDO: Wen Ah mi 15, Ah mi jain wahn gang. Mi nyoo fren dehn mi chaynj mi wahn lat. In fak, Ah mi ga di goal fi spen ten yaaz da prizn! Dat mait song foolish. Bot eena mai naybahud, peepl admaiya ahn rispek enibadi weh spen taim da prizn. An Ai mi waahn dat.

Ah mi ekspeeryens evriting weh kohn lang wid gang laif—jrogz, seks, ahn vailens. Wahn nait Ah mi involv eena wahn shoot-owt. Ah mi tink dat dehn mi wahn kil mi, bot Ah mi manij fi eskayp. Afta dat, Ah staat tu reeli tink bowt mi laif ahn mi goalz, an Ah mi disaid dat Ah mi waahn chaynj. Bot how? Wehpaat Ah kuda mi fain help?

Moas a mi relitiv dehn neva hapi. Fi dehn laif mi ful a loan prablemz. Bot wan a mi onkl famili mi difrent, an Ah mi noa dat dehn da-mi gud peepl weh praktis weh di Baibl seh. In fak, dehn mi teech mi dat Gaad naym da Jehoava. Soh noh tu lang afta da shoot-owt, Ah pray tu Jehoava, kaal ahn bai ih naym, an aks ahn fi help mi. Wel, di veri neks day, wan a Jehoava Witnisiz nak pahn mi doa. Dat mi sopraiz mi! Da persn en op di teech mi di Baibl.

Noh lang afta dat, Ah mi fays wahn big chalenj. Mi oal frenz mi aalwayz waahn mek Ah heng owt wid dehn. Ih neva eezi fi tel dehn no. Bot Ah mi du it. Ah mi waahn kantinyu wid mi Baibl stodiz, an Ah mi glad dat Ah neva giv op! Ah mi mek sohn big chaynjiz eena mi laif, ahn now Ah hapi.

Ah memba wahn taim Ah mi pray ahn tel Gaad dat Ai mi wilin fi spen ten yaaz da prizn jos fi geh di rispek az wahn gang memba. Soh Ah aks ahn fi alow mi fi serv ahn fi at lees ten yaaz az wahn ful-taim minista a di gud nyooz. Ah mi waahn help adaz jos laik how sombadi mi help mi. Gaad mi ansa mi pryaa, bikaaz Ah don spen 17 yaaz az wahn ful-taim minista! An Ah neva did gaan da prizn.

Wahn lata mi frenz weh Ah yoostu gat di serv lang prizn sentens. Sohn adaz don ded aredi. Wen Ah luk bak pahn mi laif, Ah feel soh moch apreeshiayshan fi mi Witnis relitiv dehn. Dehn mi wilin fi bee difrent, fi liv bai di Baibl. Ah mi geh fi rispek dehn eevn moa dan Ah mi eva rispek enibadi eena di gang. Bot moa dan enibadi els, Ah soh tankful tu Gaad fi weh ih teech mi di bes way fi liv.

 ANDRES: Ah mi baan ahn groa op eena wahn poa naybahud weh ih mi kaman fi si peepl yooz jrogz, chaans op wan anada, merda, ahn prastichoot dehnself. Mi pa da-mi wahn alkaholik ahn wahn kokayn adik. Hihn ahn mi ma mi aalwayz di fait ahn kos op wan anada.

Soh fan Ah yong, Ah staat tu jrink alkohol ahn yooz jrogz. Ah mi spen moas a mi taim pahn di schreet dehn. Ah teef wateva Ah kuda mi fain ahn sel it. Az Ah mi get oalda, mi pa mi chrai fi geh kloas tu mi, bot ih mi du it eena di rang way. Ih mi teech mi how fi smogl jrogz an ada ileegal tingz intu di konchri ahn sel dehn. Ah mi mek wahn lata moni—faas-wan tu. Den wan day di polees kohn da mi hows an ares mi. Dehn mi chaaj mi fi chrai kil sombadi ahn sentens mi tu faiv yaaz da prizn.

Wahn maanin, Ah mi hyaa wahn anonksment oava di prizn lowdspeeka. Dehn mi-di invait di prizna dehn fi goh lisn tu wahn Baibl diskoshan weh Jehoava Witnisiz mi wahn giv. Ai disaid fi gaan. Wat Ah mi hyaa mi mek sens tu mee, soh Ah staat stodi di Baibl wid di Witnisiz. Dehn neva priti op notn fi mi, bot dehn shoa mi fahn di Skripchaz wat da-mi Gaad hai moaral standadz.

Ih neva tek mi lang fi riyalaiz dat Ah kudn mek di chaynjiz pahn mi oan, Ah mi need help, espeshali bikaaz mi felo prizna dehn neva laik weh Ah mi-di du. Soh Ah pray fi noa weh fi du ahn fi ga di schrent fi du it, ahn Jehoava help mi. In fak, Ah kuda mi eevn taak tu di ada prizna dehn bowt di Baibl.

Wen dehn mi rilees mi, Ah mi soh nervos dat Ah mi akchwali waahn stay langa da prizn! Wen Ah mi-di lef, som a di prizna dehn wayv mi gudbai. Som eevn tel mi laik dis, “Goh hoam, wi lee shepad.”

Ah noh eevn waahn tink bowt how mi laif wuda mi ton owt if Ah neva alow Gaad fi teech mi. Ah soh tankful dat Gaad lov mi ahn neva giv op pahn mi, ahn dat ih tink dat Ai kuda mi mek wahn chaynj. *

^ par. 15 Fi si moa egzampl a how di Baibl ga di powa fi chaynj wahn persn laif, pleez goh da jw.org/bzj. Luk anda BAIBL TEECHINZ > PEES & HAPINIS.