Skip tu di aatikl

Skip tu lis a tapik

Payrents teech dehn chiljren lov bai egzampl

 DI FOS STEP FI MEET DI CHALENJ

Moaral Ejukayshan

Moaral Ejukayshan

Pahn wahn skool chrip, sohn teenayj bwai sekshwali asaalt wahn neks mayl styoodent. Aala dehn goh tu wahn hai-klaas praivit skool da Canada. Afta dat mi hapm, Leonard Stern rait eena di Ottawa Citizen nyoozpaypa: “Yong peepl mait bee smaat, goh da wahn gud skool, ahn kohn fahn wahn hai-klaas bakgrong, ahn stil dehndeh tingz noh stap dehn fahn mek bad, shaymin, disizhanz.”

Mista Stern mi aalso seh: “Yu wuda tink dat di moas impoatant ting wahn payrent wuda teech ih pikni da fi noa weh rait ahn weh rang. Bot moas payrents tu kansaan bowt ejukayshan ahn mateeryal tingz.”

Af koars, ih impoatant fi mek wi chiljren ga wahn ejukayshan, bot noh eevn di bes ejukayshan weh di werl ga fi aafa ku help wahn persn fait rang dizaiyaz. Soh den, wehpaat wi ku geh di kaina ejukayshan weh ku gi wi moaral gaidans?

EJUKAYSHAN WEH PROVAID MOARAL AHN SPIRICHWAL GAIDANS

Di Baibl da laik wahn miro. Wen wi reed it, wi si wi weeknis dehn, ahn wi si weh wi ku du fahn weh wi kyaahn du. (Jaymz 1:23-25) Bot di Baibl du eevn moa dan dat. Ih help wi fi mek wateva chaynj wi need fi mek; fi chaynj wi oal wayz ahn ga beta wayz weh ku help wi fi ga pees wid adaz. Wi laan fi shoa gudnis, payshens, self-kanchroal, ahn lov. Di Baibl eevn seh dat lov ku “tai aala dehn ting [wayz] tugeda soh dat evriting ku goh smood smood.” (Koloashanz 3:14) Wai lov soh speshal? Noatis weh di Baibl seh bowt lov.

  • “Yu si, wen yu lov ada peepl, unu wahn bayr payshens wid dehn. Unu wahn kain tu dehn ahn unu noh wahn jelos dehn. Unu noh wahn tink tu moch a unuself, ahn unu noh wahn bee prowd ahn chreet peepl bad. If unu lov peepl, unu noh wahn bee selfish ahn aalwayz waahn unu oan way aal di taim. Wen yu lov peepl yu noh wahn eezi fi geh beks, ahn yu noh wahn di kip chrak a hoo aal du yu ting. If unu lov ada peepl, unu noh wahn rijais oava notn weh eevl, bot unu wahn rijais oava di chroot. If unu lov peepl, unu wahn neva giv op. . . . Unu wahn bee redi fi bileev gud tingz bowt peepl. Unu wahn ku bayr evriting. Lov wahn laas fareva.”—1 Korintyanz 13:4-8.

  • “Wen yu lov yu nayba, yu noh wahn du ahn notn bad.”—Roamanz 13:10.

  • “Moa impoatant dahn aal, unu fi lov wan anada wid chroo chroo lov, bikaaz lov kova oava lata sin.”—1 Peeta 4:8.

Wen yu deh rong peepl hoo lov yu, how yu feel? Yu feel sayf ahn rilaks, noh chroo? Yu noa dat dehn waahn di bes fi yu, dat dehn wuda neva hert yu fi spait.

 Lov ku moov peepl fi mek sakrifais, eevn chaynjiz eena dehn laif, weh ku benifit adaz. Fi egzampl, wahn man hoo wi wahn kaal George mi reeli waahn spen taim wid ih granson, kaaz da mi ih fos granchail. Bot George mi smoak wahn lat, an ih son-in-laa neva waahn mek ih smoak rong di baybi. Weh George du? Eevn doa ih mi smoak fi 50 yaaz, ih giv op di habit fi di sayk a ih granson. Dat da di powa a lov!

Di Baibl help wi fi ga sohn byootiful wayz, laik gudnis, kainis, an espeshali lov

Wi ku laan fi shoa lov. Payrents da di mayn wan dehn weh ku teech dehn chiljren how fi lov. Dehn feed ahn protek dehn chiljren ahn dehdeh fi dehn wen dehn geh hert er geh sik. Gud payrents taak wid dehn chiljren ahn teech dehn. Dehn aalso disiplin dehn chiljren ahn teech dehn weh rait fahn weh rang. Aalso, gud payrents set wahn gud egzampl weh dehn chiljren ku fala.

Ih sad doh, dat som payrents noh tek kyaa a dehn rispansabiliti fi teech ahn disiplin dehn chiljren. Yu tink dis meen dat dehn chiljren wahn bee bad wen dehn groa op? Dat noh haftu bee di kays! Eevn peepl weh don oal, ahn weh kohn fahn wahn famili wid lata prablemz, mek amayzin chaynjiz eena dehn laif, ahn now dehn da gud peepl hoo yu ku chros. Eena di neks aatikl, wi wahn si dat dis eevn inklood som weh adaz mi tink kyaahn chaynj.