Skip tu di aatikl

Skip tu lis a tapik

 LIV YU LAIF AZ WAHN KRISTYAN

Werk Tugeda fi Preech Eena Wahn Teritori Wehpaat Peepl Taak Moa Dan Wan Langwij

Werk Tugeda fi Preech Eena Wahn Teritori Wehpaat Peepl Taak Moa Dan Wan Langwij

Moas a di taim, peepl moa wilin fi lisn tu di gud nyooz eena dehn oan langwij. Maybi dat da wai da Pentikaas 33 C.E., Jehoava mi mek di “Jooish peepl fahn aal oava di werl” hyaa di gud nyooz eena dehn oan langwij, eevn doa dehn praabli mi taak wahn kaman langwij, laik Heebroo er Greek. (Aks 2:5, 8) Eena sertn teritori weh peepl taak moa dan wan langwij, eech a di difrent kangrigayshan dehn ga meetin eena dehn oan langwij, bot aala dehn mait ga di sayhn teritori dehn fi preech eena. How di poblisha dehn eena dehnya kangrigayshan ku werk tugeda fi preech tu evribadi weh dehn meet, an noh preech eena di saym teritori at di saym taim er preech eena di saym teritori tu moch, soh dat di peepl noh geh beks wid wi?

  • Taak it oava (Pr 15:22): Di feel servis oavaseeya dehn need fi kohn tugeda an agree pahn wahn skejul weh wahn werk bes fi aala di kangrigayshan dehn. Soh if som a di kangrigayshan dehn weh preech eena ada langwij ga wahn smaal teritori, dehn noh mait waahn yu preech tu peepl eena fi dehn langwij teritori. Bot, if di teritori skyata oava wahn big ayrya, den dehn mait waahn yu goh hed ahn preech tu aala di hows dehn, bot mek dehn noa wen yu fain sombadi eena di teritori weh shoa inchres eena fi dehn langwij. (od-E 93 ¶37) Er dehn mait aks yu kangrigayshan fi help dehn fain peepl weh taak di langwij a fi dehn kangrigayshan, ahn giv dehn di ajres a peepl weh mi shoa inchres eena dehn teritori. (km-E 7/12 5, baks) Memba dat eena wan famili, difrent peepl mait taak moa dan wan langwij. Howeva wen di bradaz disaid fi preech eena wahn teritori, dehn need fi obay eni loakal laa weh protek peepl persnal infamayshan.

  • Werk tugeda (Ifee 4:16): Yu need fi fala aala di inschrokshanz weh yu servis oavaseeya gi yu. Fi egzampl, yu di kandok wahn Baibl stodi wid sohnbadi weh prifaa ih oan langwij insteda di langwij a yu kangrigayshan? Di styoodent mait mek moa proagres if yu mek wahn brada er sista fahn wahn kangrigayshan er groop kloas bai weh taak ih langwij kantinyu stodi di Baibl wid ahn.

  • Pripyaa (Pr 15:28; 16:1): Du yu bes fi shyaa di gud nyooz wid enibadi eena yu teritori weh taak wahn difrent langwij. Yu ku fain owt di langwij dehn weh peepl taak eena yu teritori. Den dongload di difrent Baibl chranslayshan ahn veedyo dehn pahn yu sel foan er tablet. Aalso yu ku yooz di JW Language ap fi laan how fi greet peepl eena dehn langwij.