Skip tu di aatikl

Inschrokshanz fi Wi Kristyan Laif ahn Minischri Meetin

Inschrokshanz fi Wi Kristyan Laif ahn Minischri Meetin

Lis a Tapik

 

Paragraaf

Inchrodokshan

 2

Chrezhaz Fahn di Werd a Gaad

 3

Werk Haad fi Du Beta Eena Feel Servis

 4

Liv Yu Laif az Wahn Kristyan

 5

Rivyoo

 6

Laan fi Reed ahn Teech Beta

 7

Kongsl

 8

Di Taimin a di Meetin

 9

Wen Da di Week a di Serkit Oavaseeya Vizit

 10

Wen Da di Week a Wahn Asembli er Kanvenshan

 11

Wen Da di Week a di Memoaryal

 12

Laif ahn Minischri Meetin Oavaseeya

 13

Laif ahn Minischri Meetin Chyaaman

 14

Koardinayta a di Badi a Eldaz

 15

Agzilari Kongsla

 16

Agzilari Klaas

 17

Di Veedyo Dehn

 18

1. Wi need fi kandok di Laif ahn Minischri Meetin akaadn tu di skejul an inschrokshan dehn eena di Laif ahn Minischri Meetin Werkbuk, an akaadn tu di inschrokshanz eena dis dakyument. Mek aala di poblisha dehn noa dat wi di invait dehn fi mek dehnself avaylabl fi tek paat eena di difrent asainment dehn. Eni ada inchrestid peepl weh di kohn da aala di meetin dehn ku tek paat tu, az lang az dehn bileev weh di Baibl seh ahn dehn don di liv akaadn tu di prinsipl dehn eena di Baibl.—be-E p. 282.

 2. Inchrodokshan: 3 minits er les. Eech week, afta di sang ahn pryaa, di Laif ahn Minischri Meetin chyaaman wahn help evribadi fi geh inchrestid eena di meetin fi da nait. Ih wahn kaal atenshan tu di kweschan weh deh eena di Laif ahn Minischri Meetin Ansa Sheet fi da week.

 3. Chrezhaz Fahn di Werd a Gaad:

  • Taak: 10 minits. Di Laif ahn Minischri Meetin Werkbuk gat een di teem a dis taak, lang wid bowt too er chree mayn points. Wahn elda er wahn ministeeryal servant weh kwalifai ku gi dis taak. Wen wi wahn staat wahn nyoo buk a di Baibl, play di inchrodokshan veedyo fos. Di speeka ku mek kanekshanz bitween di teem a di taak ahn di veedyo if ih waahn. Bot, ih fi mek shoar ih kova di point dehn fahn eena di werkbuk. Pahn tap a dat, dipendin pahn humoch taim ih gat, ih fi mek gud yoos a di picha ahn skripcha dehn fi bring owt di mayn points.

  • Saach fi Spirichwal Chrezhaz: 8 minits. Dis da wahn kweschan-ahn-ansa diskoshan weh noh ga wahn inchrodokshan ner wahn kankloozhan. Wahn elda er wahn  ministeeryal servant weh kwalifai ku handl it. Ih need fi disaid humoch taim fi gi eech kweschan dipendin pahn di needz a di kangrigayshan, bot ih need fi aks aal foa kweschan ahn noh lef owt non. Da hihn fi disaid weda ih ga inof taim fi mek dehn reed aala di vers dehn weh goh lang wid di fos too kweschan. Aal koments need fi bee 30 sekants er les.

  • Baibl Reedin: 4 minits er les. Dis styoodent asainment da fi bradaz. Di styoodent fi reed di vers dehn weh asain tu dehn widowt wahn inchrodokshan er wahn kankloozhan. Di meetin chyaaman wahn help dehn fi laan fi reed karek, wid andastandin, smood, ahn eena wahn nachral way. Ih wahn help dehn fi put feelin eena di reedin mek ih bee laivli, ahn fi paaz eena wahn nachral way fi bring owt di moas owt di reedin.

  4. Werk Haad fi Du Beta Eena Feel Servis: 15 minits er les. Dis sekshan a di meetin da fi mek wi ku praktis fi di minischri ahn laan how wi ku du beta eena wi preechin ahn teechin. Di fos kaal ahn di ritern vizit dehn wahn bays pahn di sampl kanvasayshan dehn pahn di front payj a di Laif ahn Minischri Meetin Werkbuk. Di styoodent ku disaid weda er nat fi yooz wan a di poblikayshan er veedyo dehn fahn owta wi Teechin Toolbaks. Di Laif ahn Minischri Meetin Werkbuk wahn gi di styoodent wahn set taim fi du di asainment, an ih mait gi di styoodent ada inschrokshanz tu. Di styoodent dehn noh need fi ad een ada infamayshan jos fi yooz op di taim. If di asainment dehn pripyaa gud, ih pasabl som a dehn mait eevn finish wahn hoal minit erli. If nesiseri, eldaz ku geh asainments tu.

  • Sampl Kanvasayshan Veedyo: Sohn sampl kanvasayshan veedyo wahn play eech mont akaadn tu how dehn skejul eena di Laif ahn Minischri Meetin Werkbuk. Den, di Laif ahn Minischri Meetin chyaaman wahn diskos di veedyo wid di aadyans. Di veedyo dehn wahn shoa wahn sampl a di fos kaal, di fos ritern vizit, ahn di sekant ritern vizit.

  • Fos Kaal: Eeda wahn brada er wahn sista ku du dis asainment. If da wahn brada, di howshoalda fi bee wahn brada tu, an if da wahn sista, di howshoalda fi bee wahn sista tu. Di onli way di howshoalda ku bee fahn di opozit seks da if da wahn famili memba. Dehn ku du di paat stan op er sidong, ih op tu dehn. Di styoodent shuda greet di persn eena wahn way weh soot di ayrya weh dehn liv. Dis paat shud bays pahn di sampl kanvasayshan pahn di front payj a di Laif ahn Minischri Meetin Werkbuk.

  • Fos Ritern Vizit: Eeda wahn brada er wahn sista ku du dis asainment. Di howshoalda noh fi bee sombadi fahn di opozit seks. (km-E 5/97 p. 2) Dehn ku eeda sidong er stan op, ih op tu dehn. Di styoodent shud shoa how fi goh bak ahn taak tu sohnbadi weh mi shoa inchres pahn di fos kaal. Dis paat shud bays pahn di sampl kanvasayshan pahn di front payj a di Laif ahn Minischri Meetin Werkbuk.

  • Sekant Ritern Vizit: Eeda wahn brada er wahn sista ku du dis asainment. Di howshoalda noh fi bee sombadi fahn di opozit seks. (km-E 5/97 p. 2) Dehn ku eeda sidong er stan op, ih op tu dehn. Di styoodent shud shoa how fi goh bak ahn taak tu sohnbadi weh mi shoa inchres pahn di fos ritern vizit. Dis paat shud bays pahn di sampl kanvasayshan pahn di front payj a di Laif ahn Minischri Meetin Werkbuk.

  • Baibl Stodi: Eeda wahn brada er wahn sista ku du dis asainment. Di howshoalda noh fi bee sombadi fahn di opozit seks. (km-E 5/97 p. 2) Dehn ku eeda sidong er stan op, ih op tu dehn. Dis paat shuda shoa wahn sekshan a wahn Baibl stodi laik if ih don di hapm. Dehn noh need fi ga wahn inchrodokshan er wahn kankloozhan anles wan a dehndeh kongsl point da weh di styoodent di werk pan. Dehn noh need fi reed aala di  stodi mateeryal joorin di asainment, bot dehn kud if dehn waahn. Gud teechin skilz da weh wi waahn foakos pan wid dis asainment.

  • Taak: Dis asainment da fi bradaz onli. Dehn fi handl it az wahn taak tu di kangrigayshan.

  5. Liv Yu Laif az Wahn Kristyan: Afta di sang, di neks 15 minits a dis sekshan a di meetin wahn ga wan er too paat weh dizain fi help di aadyans yooz di Werd a Gaad eena dehn laif. Asain dehnya paat tu eldaz er ministeeryal servants weh kwalifai, anles di inschrokshanz seh adawaiz. Eni loakal needz paat shuda asain tu wahn elda.

  • Kangrigayshan Baibl Stodi: 30 minits. Onli eldaz weh kwalifai ku du dis paat. (Eni kangrigayshan weh shaat a eldaz ku yooz ministeeryal servants weh kwalifai if dehn need tu.) Di badi a eldaz shuda disaid hoo aal kwalifai fi dis. Di bradaz weh dehn aproov shuda bee bradaz weh ku kandok di stodi eena wahn way weh benifit di kangrigayshan, kip di stodi pahn taim, bring owt di mayn skripcha dehn, ahn help di aadyans si how dehn ku yooz weh dehn di stodi eena dehn day tu day laif. Di inschrokshanz pahn how fi kandok di Wachtowa Stodi ku help. If pasabl, yooz difrent bradaz fi kandok ahn reed eech week. If di Laif ahn Minischri Meetin chyaaman aks fi mek di stodi finish lee erli, den di brada weh di kandok need fi disaid how hihn wahn shaatn it. Ih ku disaid noh fi reed som a di paragraaf dehn.

  6. Rivyoo: 3 minits er les. Di Laif ahn Minischri Meetin chyaaman wahn goh oava som a di points fahn di meetin weh ku benifit evribadi, ahn den goh oava som a di points weh wi ku luk faawod tu pahn neks week meetin. Ih need fi rivyoo di kweschan an ansa fahn di Laif ahn Minischri Meetin Ansa Sheet. Ih mait waahn menshan wan a di kweschan weh wahn diskos pahn di neks week meetin tu, fi gi di bradaz sohnting fi luk faawod tu. Ih ku goh oava hoo aal ga paat pahn neks week meetin if ih ga inof taim fi du it. Anles ih seh adawaiz, eni anonksment er leta weh need fi reed tu di kangrigayshan shuda reed joorin dis paat a di meetin. Regyula infamayshan, laik regyula feel servis araynjments ahn di kleenin skejul, shudn anonks fahn di platfaam. Jos put dehn pahn di infamayshan boad. If eni anonksment er leta fi reed tu di kangrigayshan tu lang fi di chree minits weh deh pahn di skejul fi dis paat a di meetin, di chyaaman wahn haftu aks di bradaz weh ga paat pahn di Liv Yu Laif az Wahn Kristyan sekshan a di meetin fi shaatn dehn paat fi mek taim. (Adishanal infamayshan deh eena  paragraaf 5 ahn  9.) Di meetin wahn finish wid wahn sang ahn wahn pryaa.

 7. Laan fi Reed ahn Teech Beta: Staatin wid di week a Janiweri 7, 2019, di Laif ahn Minischri Meetin chyaaman shuda yooz di Reed ahn Teech broashoar fi bays ih kongsl ahn komendayshan pan. Eech styoodent wahn werk pahn di stodi point weh eena brakit saida di asainment eena di Laif ahn Minischri Meetin Werkbuk. Joorin di fos week a eech mont, di Laif ahn Minischri Meetin chyaaman wahn goh oava wan a di stodi point dehn eena di Reed ahn Teech broashoar. Di “Kip Chrak a How Yu Di Du” sekshan a di broashoar da fi mek di styoodent yooz, soh di chyaaman noh wahn maak it fi dehn.

  8. Kongsl: Afta eech a di styoodent asainment dehn, di Laif ahn Minischri Meetin chyaaman ga bowt wan minit fi gi di styoodent komendayshan ahn kongsl bays pahn di Reed ahn Teech broashoar. Wen di chyaaman intajoos di styoodent, ih noh wahn anonks ih kongsl point. Bot afta di styoodent finish di asainment, di chyaaman shud gi ahn sohn komendayshan ahn den seh weh kongsl point di styoodent mi-di werk pan. Den ih ku tel ahn eena weh way ih mi du gud, er ih ku tel ahn eena wahn nais way wai ih wahn need fi kantinyu werk pan it. Di chyaaman  ku aalso koment pahn eni ada deetaylz weh ih tink di styoodent er di aadyans ku benifit fan. Akaadn tu weh eech styoodent need, di chyaaman ku gi praivit kongsl afta di meetin er som ada taim. Dis kongsl shud bays pahn di Reed ahn Teech broashoar, an ih ku bee bowt di kongsl point weh di styoodent mi-di werk pan er ih ku bee bowt wahn nada kongsl point.—Goh da  paragraaf 13 ahn  16 fi moa infamayshan bowt di Laif ahn Minischri Meetin oavaseeya ahn di agzilari kongsla.

    9. Di Taimin a di Meetin: No paat a di meetin shuda goh oavataim, noh eevn di koments a di Laif ahn Minischri Meetin chyaaman. Hihn wahn need fi stap eni styoodent weh goh oavataim, bot eena wahn nais way. If eni a di ada paat dehn pahn di meetin goh oavataim, di agzilari kongsla fi gi di brada praivit kongsl. Di hoal meetin, inkloodin di sang ahn pryaa dehn, shuda laas 1 owa ahn 45 minits.

 10. Wen Da di Week a di Serkit Oavaseeya Vizit: Wen di serkit oavaseeya vizit di kangrigayshan, yu wahn stil du di meetin jos laik how di skejul seh eena di Laif ahn Minischri Meetin Werkbuk eksep fi di Kangrigayshan Baibl Stodi. Insteda di stodi, di serkit oavaseeya wahn gi wahn 30-minits servis taak. Eevn doa di servis taak tek di plays a di Kangrigayshan Baibl Stodi eena di Liv Yu Laif az Wahn Kristyan sekshan a di meetin, di Laif ahn Minischri Meetin chyaaman wahn goh oava di points fahn di meetin, koment pahn di neks week meetin, ahn mek eni anonksment er reed eni leta bifoa ih intajoos di serkit oavaseeya. Di serkit oavaseeya wahn pik di sang fi en di meetin, ahn den afta di servis taak, da hihn wahn kloaz di meetin. Joorin di serkit oavaseeya vizit, no agzilari klaas wahn deh anles da fi wahn farin langwij groop. If di kangrigayshan di sponsa wahn langwij groop, dehn ku stil ga dehn meetin joorin di serkit oavaseeya vizit. Bot dehn stil need fi jain op bak wid di hoas kangrigayshan fi di servis taak.

 11. Wen Da di Week a Wahn Asembli er Kanvenshan: No meetin wahn deh joorin di week weh yu ga asembli er kanvenshan. Eech famili er poblisha shuda goh oava di infamayshan fi da week deh joorin dehn famili wership.

 12. Wen Da di Week a di Memoaryal: Wen di Memoaryal faal pahn wahn day joorin di week, no Laif ahn Minischri Meetin wahn deh. Af koars, di kangrigayshan ku stil plan wahn meetin fi feel servis pahn di day a di Memoaryal.

  13. Laif ahn Minischri Meetin Oavaseeya: Di badi a eldaz wahn pik wan a di elda dehn fi bee di Laif ahn Minischri Meetin oavaseeya. Hihn wahn rispansabl fi mek shoar di meetin aaganaiz ahn goh akaadn tu dehnya inschrokshanz. Hihn wahn need fi ga gud kamyoonikayshan wid di agzilari kongsla. Az soon az di Laif ahn Minischri Meetin Werkbuk kom owt fi eech mont, di Laif ahn Minischri Meetin oavaseeya wahn mek di styoodent asainment dehn fi da mont. (Adishanal infamayshan deh eena  paragraaf 4.) Eech wan a di styoodent dehn shuda geh di Wi Kristyan Laif ahn Minischri Meetin Asainment slip (S-89) wid aala di infamayshan ful owt pan it at lees chree weeks bifoa di dayt a di asainment.

 14. Laif ahn Minischri Meetin Chyaaman: Eech week, wan a di elda dehn wahn serv az di chyaaman fi di Laif ahn Minischri Meetin. (If di kangrigayshan shaat a eldaz, yu ku yooz ministeeryal servants weh kwalifai.) Hihn rispansabl fi pripyaa di koments fi di inchrodokshan ahn fi di endin a di meetin, ahn fi diskos di sampl kanvasayshan veedyo ahn di veedyo weh intajoos wahn nyoo stodi point fahn di Reed ahn Teech broashoar. Da hihn wahn intajoos eech paat pahn di meetin ahn, dipendin pahn di saiz a di badi a eldaz, hihn mait need fi help wid ada paat pahn di meetin tu. Eni koments weh hihn mek bitween eech paat shudn tek op tu moch taim. Di badi  a eldaz disaid hoo aal kwalifai fi bee chyaaman. Eech elda weh kwalifai wahn geh ih tern fi bee chyaaman. Dipendin pahn humoch eldaz kwalifai, di Laif ahn Minischri Meetin oavaseeya mait en op bee chyaaman moa dan di ada bradaz. If wahn elda kwalifai fi du di Kangrigayshan Baibl Stodi, den ih praabli kwalifai fi bee chyaaman tu. Pleez memba dat di elda weh serv az chyaaman wahn need fi bee sombadi weh ku bee kain ahn pazitiv eena di komendayshan ahn kongsl weh dehn gi tu di difrent styoodent dehn. Ih hafu bee sombadi weh ku kip di meetin pahn taim tu. (Adishanal infamayshan deh eena  paragraaf 6 ahn  9.) If di chyaaman prifaa, ahn if nof spays deh, yu ku put wahn standin maik pahn di said a di stayj soh dat hihn ku anonks di difrent paat fahn deh wail di speeka goh da di mayn maik wan taim widowt hafu wayt. Sayhn way, di chyaaman mait prifaa sidong da wahn taybl joorin di Baibl Reedin asainment ahn di Werk Haad fi Du Beta Eena di Minischri sekshan a di meetin. Dehnya opshan mait sayv taim.

 15. Koardinayta a di Badi a Eldaz: Da di koardinayta a di badi a eldaz mek aal ada asainment ada dan di styoodent asainment dehn, inkloodin di asainment az tu wich elda wahn bee di chyaaman eech week. Hihn wahn werk lang wid di Laif ahn Minischri Meetin oavaseeya fi mek shoar dat wahn skejul fi di hoal meetin fi eech week deh pahn di infamayshan boad.

  16. Agzilari Kongsla: If pasabl, ih bes fi mek wahn elda wid lata ekspeeryens bee di agzilari kongsla. Di rispansabiliti a di agzilari kongsla da fi gi praivit kongsl tu eldaz ahn ministeeryal servant if dehn need it. Ih ku bee fi paats pahn di Laif ahn Minischri Meetin er fi poblik taak. Ih ku aafa kongsl pahn di way how dehn kandok er reed fi di Wachtowa Stodi er Kangrigayshan Baibl Stodi. (Adishanal infamayshan deh eena  paragraaf 9.) If lata eldaz eena di kangrigayshan weh da gud speeka ahn teecha, den wahn difrent brada ku serv az agzilari kongsla eech yaa. Ih noh nesiseri fi mek di agzilari kongsla aafa kongsl afta eech asainment.

 17. Agzilari Klaas: Dipendin pahn humoch styoodents eena di kangrigayshan, ih mait pasabl fi ga agzilari klaas fi di Laif ahn Minischri Meetin. Eech agzilari klaas need fi ga wahn kongsla, an ih beta mek ih bee wahn elda. If yu shaat a eldaz, yu ku yooz ministeeryal servant weh kwalifai. Di badi a eldaz disaid hoo kwalifai fi dis ahn weda er nat wan brada wahn du it er yu wahn skejul wahn difrent brada eech week. Di kongsla fi fala di inschrokshanz eena  paragraaf 8. If yu ga wahn agzilari klaas, di styoodents wid asainment gwehn da di klaasroom rait afta di Saach fi Spirichwal Chrezhaz paat eena di Chrezhaz Fahn di Werd a Gaad sekshan a di meetin. Den dehn wahn jain op bak wid di mayn aadyans afta di Werk Haad fi Du Beta Eena Feel Servis sekshan a di meetin. Wen di Laif ahn Minischri Meetin chyaaman wahn diskos wahn veedyo, di aadyans eena di agzilari klaasroom ku tai een tu di diskoshan fahn weh dehn deh if dat pasabl. Adawaiz, di agzilari kongsla ku handl it wid wahn tablet er laptap rait deh eena di agzilari klaasroom.

 18. Di Veedyo Dehn: Sertn veedyo wahn skejul fi play joorin di meetin dehn. Dehnya veedyo wahn avaylabl pahn di JW Library aplikayshan. Now ahn agen yu ku yooz di sampl kanvasayshan veedyo dehn fi yu meetinz fi feel servis, bot onli afta ih don play da meetin.