Skip tu di aatikl

Skip tu lis a tapik

 LIV YU LAIF AZ WAHN KRISTYAN

Mek Pees Wid Yu Brada Fos—How?

Mek Pees Wid Yu Brada Fos—How?

Imajin dat yu di liv da Gyalilee joorin Jeezas taim. Yu mek di lang jerni da Jeroosalem fi goh selibrayt di Festival a Boots. Di siti soh bizi wid aala di ada peepl weh kohn fahn difrent plays fi wership da dis big selibrayshan tu. Now, yu waahn goh kehr yu aafrin tu Jehoava. Soh yu tek yu goat ahn staat mek yu way tu di templ chroo wahn lee ali weh onli krowdid wid peepl. Wen yu get da di templ, yu si dat ih ful op a peepl weh waahn gi fi dehn aafrin tu. Den di taim kohn fi yoo gi yu goat tu di prees. Sayhn taim, yu memba dat yu brada, hoo kuda deh eniway eena di krowd er eena di siti, ga sohnting gens yu. Jeezas eksplayn wat yu need fi du now. (Reed Machyu 5:24.) How yoo ahn yu brada weh “ga sohnting gens yu” ku mek pees jos laik how Jeezas mi seh? Eena eech wan a di lis dehn da batam, put wahn lee maak rait neks tu di karek ansa.

YOO SHUDA . . .

  • taak tu yu brada onli if yoo tink hihn ga wahn gud reezn wai ih geh beks wid yu

  • chrai karek how yu brada tink if yoo feel dat ih kech feelinz tu faas er dat hihn da paat a di prablem

  • ga payshens ahn lisn tu yu brada wen ih di tel yu how ih feel, an eevn if yu noh andastan, tel ahn dat yu sari bowt how ih di feel er dat yu neva meen fi hert ih feelinz

YU BRADA SHUDA . . .

  • tel evribadi eena di kangrigayshan dat yu mi hert ahn, ahn chrai get dehn fi tek op fi hihn

  • tel yu aaf, goh oava evriting weh yu du tu ahn, ahn seh dat yoo da di wan weh fi seh sari

  • si dat yu mi need fi bee hombl inof ahn ga di korij fi goh taak tu hihn, ahn fagiv yu wid aala ih haat

Eevn doa wi noh aafa op animal sakrifais tudeh eena wi wership, da weh lesn Jeezas mi-di teech bowt di kanekshan bitween wi wership tu Jehoava ahn pees bitween wee ahn wi bradaz?