Skip tu di aatikl

Skip tu lis a tapik

 KWESCHAN 9

Wich Wan Ah Shuda Bileev​—Evolooshan er Kriyayshan?

Wich Wan Ah Shuda Bileev​—Evolooshan er Kriyayshan?

WAI DI ANSA SOH IMPOATANT?

If evolooshan da chroo, den weh da di perpos a laif? Bot if kriyayshan da chroo, den wi ku fain ansaz tu kweschanz bowt laif ahn di fyoocha weh wahn satisfai wi.

WEH YOO WUDA DU?

Imajin dis: Aleks kanfyooz. Hihn mi aalwayz bileev eena Gaad ahn eena kriyayshan. Bot tudeh, eena baiyoloji klaas, di teecha chrai kanvins dehn dat saiyentis don risaach ahn fain proof dat evolooshan da chroo. Aleks noh waahn nobadi tink hihn fool-fool. Ih tel ihself, ‘Aftaraal, if dehn saiyentis don proov dat evolooshan da chroo, den da hoo mee fi kweschan dehn?’

If yoo da-mi Aleks, yoo wuda bileev eena evolooshan jos bikaa di teksbuk seh da chroo?

STAP AHN TINK!

Peepl pahn di too said a di dibayt kwik fi seh wat dehn bileev, ahn dehn noh eevn noa wai dehn bileev it.

  • Sohn peepl bileev eena kriyayshan jos bikaa dat da weh dehn mi laan da cherch.

  • Sohn peepl bileev eena evolooshan jos bikaa dat da weh dehn mi laan da skool.

 SIKS KWESCHANZ FI TINK BOWT

Di Baibl seh: “Evri hows hafu ga sohnbadi weh bil it, bot da Gaad da di Wan weh mek evriting.” (Heebrooz 3:4) Yu tink dat mek sens?

Fi seh dat laif noh ga wahn Kriyayta foolish. Da laik yu di seh nobadi neva bil dis hows

WEH PEEPL SEH: Evriting eena di yoonivers egzis sayka wahn big eksploazhan.

1. Soh da hoo er wat kaaz di big eksploazhan?

2. Wich wan mek moa sens—dat evriting kohn fahn notn er dat evriting kohn fahn sombadi?

WEH PEEPL SEH: Man kohn fahn mongki.

3. Soh if man kohn fahn mongki, wai dehn ga wahn big big difrens bitween wahn hyooman braynz ahn wahn mongki braynz?

4. Da wai eevn di moas smaalis livin ting soh komplikaytid?

WEH PEEPL SEH: Evolooshan da wahn fak weh saiyens don proov.

5. Yu tink peepl jos seh dis rait soh er dehn don chek it owt fi dehnself?

6. Humoch peepl yoo tink bileev eena evolooshan jos bikaaz peepl weh smaat bileev eena it?

“If yoo mi-di waak chroo di bush ahn yu fain wahn nais priti hows, yoo wuda tink tu yuself: ‘Mayn! Aal dehn chree mosi jos jrap dong eena di rait spat fi mek dis hows.’ Cho! Dat noh mek no sens! Soh den, wai wi wuda eva bileev dat evriting eena di yoonivers jos hapm bai chaans?”—Joolya.

“Imajin dat sombadi tel yu dat dehn mi ga wahn big eksploazhan da wahn printin fakchri. Dehn seh dat aal di ink splash op pahn di waal ahn di seelin. Ahn wen dehn gaan een aftawodz, insteda fain wahn mes, dehn fain wahn kompleet dikshineri. Yoo wuda bileev dat?”—Gwen.

 WAI BILEEV EENA GAAD?

Di Baibl inkorij yu fi ‘tes tingz owt.’ (1 Tesaloanyanz 5:21) Dat meenz yu shudn jos bileev eena Gaad sayka

  • FEELINZ (Ah jos feel laik wahn haiya powa dehn owt deh)

  • WEH PEEPL RONG YU BILEEV (Peepl rong weh Ah liv bileev eena Gaad)

  • DI WAY DEHN RAYZ YU (Mai payrents dehn rayz mi op fi bileev eena Gaad—Ah neva ga no chois)

Insteda dat, yu shuda ga sohn gud reezn fi weh yu bileev eena.

“Wen Ai deh eena klaas di lisn tu di teecha eksplayn how di badi werk, Ah noh ga no dowt eena mai main dat Gaad egzis. Evri paat a di badi ga ih oan lee jab fi du, dong tu di leelis deetayl. Dehnya lee jab hapm widowt wi eevn noa. Di hyooman badi soh wandaful!”—Teresa.

“Wen Ah si wahn big bildin, wahn krooz ship, er wahn kaar, Ah aks miself, ‘Da hoo mek dis?’ Fi egzampl, ih tek wahn smaat persn fi mek wahn kaar bikaa ih ga wahn lata lee paats weh hafu werk tugeda fi mek di kaar ku ron. Ahn if sombadi mi hafu dizain di kaar, den, weh yu tink a wee hyoomanz?”—Richad.

“Di moa Ah stodi saiyens, di les Ai bileev eena evolooshan. . . . Tu mee, ih tek moa ‘fayt’ fi bileev eena evolooshan dan fi bileev eena wahn Kriyayta.”—Antoni.

TINK BOWT DIS

Eevn doa dehn di risaach fi yaaz ahn yaaz, saiyentis stil noh kom op wid wahn eksplanayshan fi evolooshan weh aala dehn ku gree pan. If saiyentis kyaahn gree bowt evolooshan—ahn dehn sopoas tu bee di smaat wan dehn—yu tink yoo rang fi dowt weh dehn di teech?