Skip tu di aatikl

Skip tu lis a tapik

 CHAPTA 4

Wai Wi fi Rispek Peepl Weh Gat Atariti?

Wai Wi fi Rispek Peepl Weh Gat Atariti?

‘Yu fi rispek evribadi. Shoa speshal lov fi yu bradaz ahn sistaz weh da bileeva. Yu mos fyaa Gaad ahn rispek di king.ʼ—1 PEETA 2:17.

1, 2. (a) Fi hoo gaidans wi need fi fala? (b) Wat da sohn kweschanz wi wahn ansa eena dis chapta?

WEN yoo da-mi wahn lee pikni, dehn praabli mi ga taimz wen yu payrents mi aks yu fi du sohnting weh yu neva waahn du. Eevn doa yu mi lov yu payrents ahn mi noa dat yu haftu obay dehn, yu praabli stil neva aalwayz waahn obay dehn.

2 Wi noa dat Jehoava, wi Faada, lov wi. Ih tek kayr a wi ahn mek shoar dat wi ga evriting weh wi need fi injai laif. Ih gi wi di gaidans weh wi need soh dat wi ku ga sokses eena wi persnal laif. Sohntaim, ih yooz ada peepl fi tel wi weh fi du. Wi need fi rispek Jehoava atariti. (Proverbs 24:21) Bot wai ih noh aalwayz eezi fi mek wi aksep gaidans fahn adaz? Wai Jehoava aks wi fi obay? Ahn how wi ku shoa dat wi rispek fi hihn atariti?—Pleez goh da Noat 9 da di en a dis buk.

WAI IH NOH EEZI?

3, 4. Wai hyoomanz noh perfek tudeh? Wai ih noh eezi fi aksep gaidans fahn adaz?

3 Bikaaz wi noh perfek, ih eezi fi mek wi ribel.  Hyoomanz stan laik dis fahn di taim Adam ahn Eev mi sin. Eevn doa Jehoava mi mek dehn perfek, dehn gaan gens fi hihn atariti. Sins den, aala wi baan eena sin. Soh den, dat da wan reezn wai ih noh eezi fi mek wi aksep gaidans fahn Jehoava er fahn hyoomanz. Wahn nada reezn da bikaaz di peepl weh Jehoava di yooz fi gaid wi noh perfek needa.—Genesis 2:15-17; 3:1-7; Psalm 51:5; Roamanz 5:12.

4 Bikaaz wi noh perfek, ih eezi fi mek wi bee prowd. Praid mek it haad fi wahn persn aksep gaidans ahn kongsl. Fi egzampl, bak eena di dayz a di Izrelait dehn, Jehoava mi chooz Moaziz fi leed Ih peepl. Bot wahn man weh mi naym Koara, hoo mi-di serv Jehoava fi wahn lang taim, mi geh prowd ahn neva ga no rispek fi Moaziz. Aldoa Moaziz mi-di leed Gaad peepl, ih neva geh prowd. In fak, di Baibl diskraib hihn az di moas hombl man bak den. Bot Koara neva waahn Moaziz tel ahn weh fi du. Ih mi eevn kanvins wahn gud amonk a di peepl fi jain ahn, ahn dehn gaan gens Moaziz. Weh mi hapm tu Koara ahn dehndeh rebl? Jehoava dischrai aala dehn. (Numbers 12:3; 16:1-3, 31-35) Eena di Baibl, wi ga lata egzampl weh ku teech wi bowt di daynja a praid.—2 Chronicles 26:16-21; pleez goh da Noat 10 da di en a dis buk.

5. How som hyoomanz abyooz dehn powa?

5 Yu eva hyaa peepl seh, “Powa korop”? Hischri shoa dat wahn lata hyoomanz abyooz dehn powa. (Reed Ecclesiastes 8:9.) Fi egzampl, Saal da-mi wahn gud ahn hombl man wen Jehoava mi fos  chooz hihn fi bee di king a Izrel. Bot ih mek praid ahn jelosi tek ahn oava, an ih mi en op di persikyoot Dayvid, wahn inosent man. (1 Samuel 9:20, 21; 10:20-22; 18:7-11) Laytaraan, Dayvid mi geh fi bee di king, ahn hihn da-mi wan a di bes king weh Izrel mi eva gat. Ahn stilyet, az taim gaan aan, eevn hihn anaal mi abyooz ih powa. Ih mi komit adolchri wid Baat-sheeba, di waif a wahn man weh mi naym Yuraiya. Den, Dayvid sen Yuraiya da waar kaaz ih mi waahn mek shoar dat Yuraiya ded eena batl. Dayvid mi du dis kaaz ih mi-di chrai haid ih sin.—2 Samuel 11:1-17.

WAI WI FI RISPEK JEHOAVA ATARITI?

6, 7. (a) If wi lov Jehoava, weh wi wahn du? (b) How Jeezas egzampl ku help wi fi bee obeedyant eevn wen ih noh eezi?

6 Wi rispek Jehoava atariti bikaaz wi lov hihn. Bikaaz wi lov Jehoava moa dan eniting er enibadi els, wi chrai wi bes fi mek hihn hapi. (Reed Proverbs 27:11; Maak 12:29, 30.) Fahn eena di gyaadn a Eedn, Saytan mi waahn peepl kweschan Jehoava atariti. Di Devl waahn wi tink dat Jehoava noh ga di rait fi tel wi weh fi du. Bot wi noa dat dis da lai. Wi agree wid di werdz fahn dis skripcha: ‘Wi Laad ahn wi Gaad, onli yoo ga di rait fi geh gloari, an aana ahn powa, kaa yoo da di Wan weh mek evriting.ʼ—Revilayshan 4:11.

7 Wen yoo da-mi wahn pikni, yu payrents praabli mi teech yu fi obay dehn eevn wen yu neva waahn, noh chroo? Jos laik dat, az servants a Jehoava, wi  mait ga taimz wen wi feel laik ih noh eezi fi bee obeedyant. Bot wi lov ahn rispek Jehoava, soh wi chrai wi bes fi obay ahn. Jeezas mi set di bes egzampl fi wi, bikaaz hihn mi obay Jehoava eevn wen ih neva eezi far ahn. Dat da wai hihn kuda tel ih Faada: “Ai wahn du wateva yoo waahn, noh weh Ai waahn.”—Look 22:42; pleez goh da Noat 11 da di en a dis buk.

8. Wat da sohn wayz how Jehoava dairek wi? (Si di baks “ Lisn tu Advais.”)

8 Tudeh, Jehoava di gaid wi eena difrent wayz. Fi egzampl, ih gi wi di Baibl ahn di eldaz eena di kangrigayshan. Wi shoa rispek fi Jehoava atariti wen wi rispek di wan dehn weh hihn di yooz fi gaid wi. If wi rijek dehn advais, da laik wi di rijek di advais fahn Jehoava. Wen di Izrelait dehn mi rijek Moaziz, tu Jehoava dat da-mi sohnting seeryos, kaaz da mi laik dehn mi-di rijek hihn tu.—Numbers 14:26, 27; pleez goh da Noat 12 da di en a dis buk.

9. Wai lov ku help wi fi fala dairekshan?

9 Wen wi rispek atariti, ih shoa dat wi lov wi bradaz ahn sistaz. Tink bowt it dis way. Wen wahn nachral dizaasta hapm, wahn rileef teem werk tugeda fi sayv az moch peepl az pasabl. Fi mek dehn du dat doh, sombadi need fi aaganaiz di teem, an eech memba a di teem need fi fala dairekshan. Bot wat if wan persn ignoar di dairekshan ahn du weh hihn waahn? Wel, eevn if ih ga gud reezn fi du weh ih du, bikaaz ih noh lisn, ih ku kaaz prablemz fi di ada teem membaz, ahn maybi eevn kaaz dehn fi geh  seeryos hert. Jos laik dat, if wi noh fala dairekshan fahn Jehoava ahn di eldaz, ada peepl ku geh hert. Bot wen wi obay Jehoava, wi shoa dat wi lov wi bradaz ahn rispek Jehoava araynjment.—1 Korintyanz 12:14, 25, 26.

10, 11. Weh wi wahn stodi bowt now?

10 Wateva Jehoava aks wi fi du da fi wi oan gud. Aala wi benifit wen wi shoa rispek fi atariti eena di famili, eena di kangrigayshan, an eena di way wi deel wid govament ofishalz.—Deuteronomy 5:16; Roamanz 13:4; Ifeezhanz 6:2, 3; Heebrooz 13:17.

11 Wen wi andastan wai Jehoava waahn wi shoa rispek, ih wahn bee eeziya fi mek wi rispek adaz. Soh den, mek wi taak bowt chree ayryaz eena wi laif weh wi need fi shoa rispek.

 SHOA RISPEK EENA DI FAMILI

12. How di hozban ku shoa dat ih rispek Jehoava atariti?

12 Wen Jehoava mi staat di famili araynjment, ih gi eech memba wahn roal fi play. Dis araynjment wahn werk gud wans eech memba andastan weh Jehoava waahn dehn du. Den, aala dehn wahn benifit. (1 Korintyanz 14:33) Jehoava put di hozban fi bee di hed a di famili. Dis meenz dat Jehoava waahn di hozban tek kayr a ih waif ahn pikni ahn gaid dehn eena wahn lovin way. Soh wahn hozban haftu ansa tu Jehoava fi how ih tek kayr a ih famili. Wahn Kristyan hozban fi bee kain ahn lovin an ih fi chreet ih famili di way Jeezas chreet di kangrigayshan. Wen wahn hozban du dis, ih di shoa dat ih rispek Jehoava.—Ifeezhanz 5:23; pleez goh da Noat 13 da di en a dis buk.

Wen wahn pa tek kayr a ih famili, ih di fala di Krais

13. How di waif ku shoa dat shee rispek atariti?

 13 Wahn Kristyan waif ga wahn impoatant ahn speshal roal fi play eena di famili tu. Shee sopoat ih hozban wail hihn di werk haad fi bee wahn gud famili hed. Di too a dehn ga di rispansabiliti fi chrayn dehn chiljren. Shee ku chrayn di chiljren fi ga rispek bai di egzampl weh shee set. (Proverbs 1:8) Di waif fi rispek ih hozban ahn sopoat fi hihn disizhan dehn. Eevn wen shee noh agree wid ahn bowt sohnting, shee ku eksplayn ih feelinz eena wahn kain way ahn wid deep rispek. Wen wahn Kristyan sista ga wahn hozban hoo da noh wahn Witnis, shee wahn fays wahn lata difrent chalenjiz. Bot if ih kantinyu fi chreet ih hozban wid lov ahn rispek, maybi wan day hihn mait waahn noa Jehoava ahn wership ahn.—Reed 1 Peeta 3:1.

14. How di chiljren ku shoa rispek fi atariti?

14 Chiljren preshos tu Jehoava, ahn dehn espeshali need protekshan ahn gaidans. Wen dehn obay dehn payrents, ih mek dehn payrents hapi. Aalso, wen chiljren obay dehn payrents, dehn di shoa rispek fi Jehoava ahn mek hihn hapi; ahn dis da di moas impoatant ting. (Proverbs 10:1) Eena wahn lata famili, chiljren di groa op wid onli wan payrent, ahn dis ku bee haad fi da payrent ahn fi di chiljren. Bot dehn ku ga wahn hapi famili if di chiljren sopoat dehn ma er dehn pa. Noh mata di sichuwayshan, no famili perfek. Bot if eech memba fala Jehoava gaidans, evri famili ku bee hapiya. Dis bring gloari tu di wan weh mi staat di famili araynjment, Jehoava Gaad.—Ifeezhanz 3:14, 15.

 RISPEK EENA DI KANGRIGAYSHAN

15. How wi ku shoa dat wi rispek atariti eena di kangrigayshan?

15 Jehoava di dairek wi chroo di Kristyan kangrigayshan, ahn hihn gi Jeezas ful atariti oava it. (Koloashanz 1:18) Ahn Jeezas gi “di faytful ahn diskreet slayv” di rispansabiliti fi tek kayr a Gaad peepl pahn ert. (Machyu 24:45-47, NW) Tudeh, “di faytful ahn diskreet slayv” da di Govanin Badi. Dehn gi wi spirichwal food tu taim. Di eldaz, ministeeryal servants, ahn di serkit oavaseeya dehn sopoat di kangrigayshan dehn rong di werl ahn dehn geh gaidans fahn di Govanin Badi. Aala dehnya bradaz ga di rispansabiliti fi tek kayr a wi. Dehn ansa tu Jehoava fi how dehn handl dis rispansabiliti. Soh wen wi rispek dehnya bradaz, wi di rispek Jehoava.—Reed 1 Tesaloanyanz 5:12; Heebrooz 13:17; pleez goh da Noat 14 da di en a dis buk.

16. Wai wi ku seh dat da hoali spirit apoint eldaz ahn ministeeryal servants?

16 Di eldaz ahn ministeeryal servants help aala wi fi stay faytful ahn yoonaitid. Af koars, dehn noh perfek, jos laik wee. Soh da how dehn geh apointid fi serv? Wel, dehnya bradaz haftu meet di kwalifikayshan dehn weh deh eena di Baibl. (1 Timoti 3:1-7, 12; Taitos 1:5-9) Jehoava mi yooz ih hoali spirit fi gaid di man dehn weh mi rait dong dehnya kwalifikayshanz. Di eldaz haftu pray tu Jehoava fi ih hoali spirit wen dehn di taak bowt hoo shuda bee apointid fi serv az wahn elda er wahn ministeeryal servant. Soh den, ih klayr fi si dat da Jehoava  ahn Jeezas di dairek aala di kangrigayshan dehn. (Aks 20:28) Eech wan a dehnya bradaz weh sopoat ahn tek kayr a wi da wahn gif fahn Gaad.—Ifeezhanz 4:8.

17. Weh wahn sista mait haftu du sohntaim fi shoa rispek?

17 Sohntaim no eldaz er ministeeryal servants avaylabl fi handl wahn asainment eena di kangrigayshan. Wen dis hapm, ada baptaiz bradaz ku help, bot if non noh deh, wahn sista ku du di asainment eevn doa da sohnting wahn brada naamali wuda du. Eena dis kays den, shee wuda haftu put aan sohnting fi kova ih hed, maybi wahn hed rap er wahn hat. (1 Korintyanz 11:3-10) Wen shee du dis, shee di shoa rispek fi Jehoava araynjment az tu hoo shuda tek di leed eena di famili ahn di kangrigayshan.—Pleez goh da Noat 15 da di en a dis buk.

RISPEK FI GOVAMENT OFISHALZ

18, 19. (a) Weh wi laan fahn Roamanz 13:1-7? (b) How wi shoa rispek fi di govament?

18 Tudeh, Jehoava alow di govament dehn limitid atariti, ahn wi fi rispek dehn. Eech govament set op laa soh dat dehn ku aaganaiz dehn konchri ahn provaid di peepl wid difrent servis weh dehn need. Kristyanz haftu obay di koman da Roamanz 13:1-7. (Reed.) Wi rispek “dehn wan weh di rool eena di govament” an obay di laa a di konchri er kamyooniti weh wi liv. Dehnya laa mait afek wi famili, wi bizniz, er di tingz weh wi oan. Fi egzampl, wi pay taks ahn ful owt eni faam er dakyument weh di govament  aks fa. Bot weh wi shuda du if di govament aks wi fi du sohnting weh goh gens Gaad laa? Di apasl Peeta seh: “Wee hafu obay Gaad, noh man.”—Aks 5:28, 29.

19 If wi haftu deel wid wahn govament ofishal, laik wahn joj er wahn polees aafisa, wi fi aalwayz shoa rispek. Yong Kristyanz haftu shoa rispek tu dehn teechaz an ada werkaz da dehn skool. Ahn Kristyanz weh werk haftu shoa rispek tu dehn baas eevn if ada werkaz noh shoa rispek fi di baas. Wen wi du dis, wi di fala di egzampl a di apasl Paal, hoo mi shoa rispek tu di ofishal dehn eevn wen ih neva eezi. (Aks 26:2, 25) Eevn if ada peepl chreet wi bad, wi stil shoa rispek.—Reed Roamanz 12:17, 18; 1 Peeta 3:15.

20, 21. Weh kaina gud tingz ku hapm wen wi shoa rispek fi ada peepl?

20 Aal oava di werl, peepl di shoa les ahn les rispek fi adaz. Bot Jehoava peepl difrent. Wee mek it wi goal fi rispek evribadi. Wi du weh di apasl Peeta seh fi du. Ih mi seh: “Yu fi rispek evribadi.” (1 Peeta 2:17) Peepl noatis wen wi shoa dehn rispek. Jeezas mi seh: “Yu fi shain yu lait fronta evribadi, soh dehn ku si di gud ting dehn weh yu du, ahn prayz yu Faada eena hevn.”—Machyu 5:16.

21 Wen wi shoa rispek eena wi famili, wi kangrigayshan, an ada ayryaz a wi laif, wi gud egzampl ku help ada peepl laan bowt Jehoava. Ahn wen wi shoa rispek fi adaz, wi shoa rispek fi Jehoava. Dis mek Jehoava hapi ahn shoa hihn dat wi lov ahn.