Skip tu di aatikl

Skip tu lis a tapik

 CHAPTA 17

Stay Eena di Lov a Gaad

Stay Eena di Lov a Gaad

“Bil op unuself mek unu geh schranga ahn schranga eena unu fayt . . . Kip unuself eena di lov a Gaad.”—JOOD 20, 21.

1, 2. Weh wi ku du fi stay eena di lov a Gaad?

AALA wi waahn bee schrang ahn helti. Soh wi chrai fi eet gud, eksasaiz, ahn tek kayr a wi badi. Aldoa dis tek efoat, wi injai di gud weh kohn fan it, soh wi noh giv op. Bot wi need fi bee schrang ahn helti eena wahn nada way tu.

2 Eevn doa wi mi mek wahn gud staat fi geh fi noa Jehoava, wi need fi kantinyu fi mek wi rilayshanship wid hihn schranga. Wen Jood mi inkorij di Kristyanz bak den fi ‘stay eena di lov a Gaad,ʼ ih mi eksplayn how dehn kuda mi du dis. Ih tel dehn: “Bil op unuself mek unu geh schranga ahn schranga eena unu fayt.” (Jood 20, 21) Soh weh wi ku du fi mek wi fayt geh schrang?

KIP AAN DI BIL OP YU FAYT

3-5. (a) How Saytan waahn yu feel bowt Jehoava standadz? (b) How yoo feel bowt Jehoava laa ahn prinsipl dehn?

3 Ih impoatant dat yoo persnali kanvins yuself dat Jehoava way da di bes way. Saytan waahn yu tink dat Gaad standadz tu haad fi liv op tu ahn dat yu wuda bee hapiya if yoo disaid fi yuself weh rait ahn weh rang. Fahn eena di gyaadn a Eedn, Saytan di chrai  mek peepl bileev dis. (Genesis 3:1-6) Ahn hihn stil di chrai haad tudeh.

4 Yu tink Saytan rait? Yu tink Jehoava standadz tu schrik? Non ataal! Tink bowt dis: Imajin yu di waak chroo wahn zoo ahn yu di paas bai wahn hai fens weh di blak aaf wahn sertn ayrya. Yu wuda tink dat da fens deh eena yu way? Wat if saym taim yu hyaa wahn laiyan roar pahn di ada said a di fens? Now how yu feel bowt da fens? Yu wuda feel hapi ih dehdeh, kaaz da laiyan kuda eet yu! Jehoava standadz da laik da fens, ahn di Devl da laik da laiyan. Bikaaz a dat, di Baibl waan wi seh: ‘Deh pahn yu gyaad, ahn wach owt! Yu enimi, weh da di Devl, da laik wahn laiyan weh di roar; ih di waak rong slai-wan di si hoo ih kud eet op.ʼ—1 Peeta 5:8.

5 Jehoava waahn wi ga di bes laif pasabl. Ih noh waahn di Devl fool wi. Dat da wai ih gi wi Ih laa ahn prinsipl dehn fi protek wi, ahn fi mek wi hapi. (Ifeezhanz 6:11) Jaymz mi rait seh: ‘If yu stodi di perfek Laa weh gi yu freedom, ahn memba it ahn du weh ih seh, Gaad wahn bles yu eena weh yu du.ʼ—Jaymz 1:25.

6. How wi ku kanvins wiself dat Gaad way da di bes way?

6 Wen wi fala di gaidans fahn Jehoava, wi laif wahn geh beta ahn wi frenship wid hihn wahn geh schranga. Fi egzampl, if wi aksep fi hihn invitayshan fi pray evri day, da wee wahn benifit. (Machyu 6:5-8; 1 Tesaloanyanz 5:17) An if wi obay ih koman fi deh da wi meetin dehn an inkorij wan anada, an if wi du wi bes eena di preechin werk, da wee wahn bee hapi. (Machyu 28:19, 20; Galayshanz 6:2; Heebrooz 10:24,  25) Di moa wi tink bowt how dehnya tingz ku kip wi fayt schrang, di moa wi kanvins wiself dat Jehoava way da di bes way.

7, 8. Weh ku help wi soh dat wi noh wori bowt eni tes weh wi mait fays eena di fyoocha?

7 Wi mait wori dat eena di fyoocha wi wahn fays tingz weh wahn tes wi fayt, ahn wi mait feel dat wi noh redi. If yu eva feel laik dis, memba weh Jehoava mi seh: “Ai, Jehoava, da yu Gaad, di Wan weh di teech yu fi yu oan gud, di Wan weh di gaid yu eena di way how yu shuda waak. If yu wuda onli pay atenshan tu mi komanment dehn! Den yu pees wuda bee laik wahn riva ahn yu raichosnis wuda bee laik di wayv dehn eena di see.”—Isaiah 48:17, 18.

8 Wen wi obay Jehoava, wi pees wahn bee laik wahn riva weh wahn neva jrai op. Ahn wi raichosnis, weh di rifaa tu di gud tingz weh wi du evri day eena wi laif, wahn bee laik di wayv dehn eena di see weh stay di  wash op pahn di beech, wan afta di ada. Soh noh mata weh mait hapm eena wi laif, wi ku bee faytful tu Jehoava. Di Baibl pramis: “Chroa yu woriz pahn Jehoava, ahn hihn wahn help yu. Ih wahn neva alow di raichos wan fi looz ih balans ahn faal dong.”—Psalm 55:22.

MEK DI EFOAT FI BEE WAHN MACHOAR KRISTYAN

9, 10. Weh ih meen fi bee wahn machoar Kristyan?

9 Di moa yu schrentn yu rilayshanship wid Jehoava, di moa yu wahn groa az wahn spirichwal persn. (Heebrooz 6:1) Bot weh ih meen fi bee wahn spirichwal persn?

10 Eech day wi di get oalda, bot eena wahn spirichwal sens, oalda noh meen machoar. If wee waahn bee wahn machoar Kristyan, wi haftu bee bes fren wid Jehoava ahn chrai fi si tingz di way hihn si dehn. (Jan 4:23) Paal mi seh: “Peepl weh di liv di way fi dehn sinful haat tel dehn fi liv, dehn jos di tink aal di taim bowt weh dehn waahn du. Bot dehn peepl weh di liv fi du weh Gaad Spirit tel dehn fi du, dehn jos di tink aal di taim bowt weh di Spirit waahn dehn du.” (Roamanz 8:5) Wahn machoar persn noh foakos ih laif pahn plezha er mateeryal tingz. Insted, ih foakos pahn serv Jehoava ahn mek waiz disizhanz eena ih laif. (Proverbs 27:11; reed Jaymz 1:2, 3.) Ih noh alow eniting er enibadi fi kaaz ahn fi du weh rang. Ahn wahn machoar persn noa weh rait ahn mek op ih main fi du it.

11, 12. (a) Weh Paal mi seh wahn persn need soh dat ih ku ‘tel di difrens bitween gud ahn eevlʼ? (b) Eena weh way wahn machoar Kristyan da laik wahn persn weh play spoats?

11 Ih tek efoat fi bee wahn machoar Kristyan. Di apasl Paal mi seh: “Salid food da fi peepl weh don  groa op, peepl weh ga ekspeeryens eena how fi tel weh da di difrens bitween gud ahn eevl.” (Heebrooz 5:14) Ih tek taim, efoat, ahn chraynin fi bee dis kaina persn, noh chroo?

12 Wahn persn weh play spoats noa dat ih tek taim, efoat, ahn chraynin fi play di gaym. Ih neva baan di play di spoat. Wen hihn da-mi wahn baybi, ih neva eevn noa how fi yooz ih han an ih fut dehn. Bot in taim, ih laan how fi hoal tingz eena ih han ahn how fi waak. Wen ih get oalda, da den ih laan fi play di gaym gud bikaaz a aala di chraynin ih mi get. Jos laik dat, ih tek taim ahn chraynin fi mek wi groa az wahn machoar Kristyan.

13. Weh wahn help wi fi laan fi tink laik Jehoava?

13 Eena dis poblikayshan, wi mi egzamin how wi ku tink laik Jehoava ahn si tingz di way hihn si dehn. Ahn wi mi laan how fi apreeshiayt ahn lov Jehoava standadz. Soh wen wi mek eni disizhanz, wi need fi aks wiself: ‘Wat da sohn laa er Baibl prinsipl weh Ah ku yooz eena dis sichuwayshan? How Ah kuda yooz dehndeh prinsipl? Weh Jehoava waahnt Ai du?ʼ—Reed Proverbs 3:5, 6; Jaymz 1:5.

14. Weh wi need fi du if wi waahn bil op wi fayt?

14 Wi wahn neva stap bil op wi fayt eena Jehoava. Wen wi eet helti food, wi badi geh schranga. Jos laik dat, wen wi laan bowt Jehoava, wi fayt geh schranga. Wen wi mi jos staat stodi di Baibl, wi mi laan som a di baysik chroot bowt Jehoava ahn fi hihn wayz. Bot now, wi need fi andastan di deepa tingz. Dis da weh Paal mi meen wen ih mi seh: “Salid food da fi peepl weh don groa op.” Wen wi praktis di tingz weh wi  laan fahn di Baibl, wi geh moa wizdom. Ahn di Baibl tel wi dat “wizdom da di moas impoatant ting.”—Proverbs 4:5-7; 1 Peeta 2:2.

15. Wai ih impoatant fi mek wi lov Jehoava ahn wi bradaz ahn sistaz?

15 Wahn persn mait bee schrang ahn helti, bot fi stay da way deh, ih noa dat ih haftu kantinyu tek gud kayr a ihself. Jos laik dat, wahn machoar persn noa dat ih need fi werk haad fi kip ih rilayshanship wid Jehoava schrang. Paal rimain wi seh: “Unu fi chek unu haat gud ahn si if unu di liv eena fayt fi chroo.” (2 Korintyanz 13:5) Bot, wi need moa dan jos schrang fayt. Wi need fi mek wi lov fi Jehoava ahn wi bradaz ahn sistaz kantinyu fi groa. Paal mi seh: “If Ah . . . noa evriting weh deh fi noa, ahn if Ai mi ga fayt weh ku moov di mongtin dehn, an Ai noh ga lov fi nobadi, Ai da noh notn.”—1 Korintyanz 13:1-3.

FOAKOS PAHN YU HOAP

16. How Saytan wuda waahn wi feel?

16 Saytan waahn wi tink dat wi kuda neva bee gud inof fi pleez Jehoava. Ih waahn wi feel diskorij ahn tink dat wi noh ga no ansa tu wi prablem dehn. Ih noh waahn wi chros wi Kristyan bradaz ahn sistaz, an ih noh waahn wi bee hapi needa. (Ifeezhanz 2:2) Saytan noa dat negitiv tinkin ku damij wee ahn wi rilayshanship wid Gaad. Bot Jehoava gi wi sohnting weh ku help wi fait negitiv tinkin. Ih gi wi hoap.

17. Wai wi hoap soh impoatant?

17 Da 1 Tesaloanyanz 5:8, di Baibl seh dat wi hoap da laik di helmit weh wahn soalja yooz fi protek ih hed wen ih deh da waar. Di Baibl seh dat da ‘hoap ku  gi wi salvayshan.ʼ Wen wi hoap eena Jehoava pramis dehn, wi wahn ku protek wi main ahn fait gens negitiv tinkin.

18, 19. Weh mi help Jeezas fi kip ih hoap schrang?

18 Jeezas hoap mi help ahn fi bee schrang. Joorin di laas nait a ih laif pahn di ert, ih mi deel wid sohn haad sichuwayshan, wan afta di ada. Fi egzampl, wan a ih kloas frenz mi sel ahn owt. Wahn nada wan seh playn-wan dat ih neva noa ahn. Som a ih ada frenz mi lef ahn pan ih oan ahn ron weh. Ahn som a ih oan peepl dehn mi ton gens ahn an insis dat dehn taacha ahn tu det. Weh mi help Jeezas fi fays aala dehndeh paynful tingz? Di Baibl seh: “Mek wi foakos pahn wi Leeda ahn di Wan weh kompleet wi fayt, Jeezas. Bikaaz a di jai weh hihn mi gat, ih kuda mi fays det pahn wahn taacha stayk ahn deel wid di shaym weh  adaz mi waahn hihn feel. Den ih sidong pahn di rait han said a Gaad chroan.”—Heebrooz 12:2, NW.

19 Jeezas mi noa dat if hihn mi stay faytful, ih wuda bring aana tu ih Faada ahn proov dat Saytan laiyad. Dis hoap mi mek ih feel reeli hapi. Ih mi noa dat soon ih mi wahn goh bak da hevn wid ih Faada. Dis hoap mi help ahn fi fays di difrent chalenj dehn weh ih mi gaahn chroo wen ih mi deh pahn di ert. Jos laik Jeezas, wi haftu foakos pahn wi hoap. Dis wahn help wi fi noh giv op noh mata weh tes wi fays.

20. Weh ku help yu fi bee pazitiv?

20 Jehoava si di fayt weh yu gat ahn how haad yu di fait fi noh giv op. (Isaiah 30:18; reed Malachi 3:10.) Ih pramis fi “gi yu weh yu dizaiya eena yu haat.” (Psalm 37:4) Soh kip yu main foakos pahn yu hoap. Saytan waahn yu looz yu hoap ahn feel dat  Jehoava pramis dehn noh wahn eva kohn chroo. Bot yu kyaahn alow yuself fi ga negitiv tinkin! If yu noatis dat yu di looz yu hoap, aks Jehoava fi help yu. Memba weh Filipiyanz 4:6, 7 seh: “Unu noh fi wori bowt notn, bot unu mos pray ahn aks Gaad fi evriting. Ahn unu mos tank ahn tu wen unu di aks ahn fi weh unu need. Den Gaad wahn gi unu wahn kaina pees weh nobadi kyaahn andastan. Ih wahn mek da sayhn pees wach oava unu haat ahn unu main bikaa unu da wan wid Krais Jeezas.”

21, 22. (a) Weh laif wahn bee laik eena di nyoo werl? (b) Weh yoo mek op yu main fi du now?

21 Aalwayz tek di taim fi tink bowt di eksaitin fyoocha weh deh heda wi. Soon, evribadi wahn di wership Jehoava. (Revilayshan 7:9, 14) Jos tink bowt weh laif wahn bee laik eena di nyoo werl. Ih wahn bee beta dan eniting weh wi kuda eva imajin! Saytan, ih deemon dehn, an aala di wikidnis weh deh rong wi noh wahn deh nohmoh. Yu noh wahn geh sik, ahn yu noh wahn ded. Insted, yu wahn wayk op evri day ful a enerji ahn hapi fi bee alaiv. Evribadi wahn werk tugeda fi mek di ert bee wahn paradais. Aala wi wahn ga gud ahn helti food fi eet ahn wahn sayf plays fi liv. Peepl noh wahn bee kruwil ner vailent tu wan anada bot dehn wahn chreet eech ada eena wahn kain way. Joorin da taim deh, aala wi wahn injai di freedom weh Gaad pramis wi.—Roamanz 8:21.

22 Jehoava waahn bee yu bes Fren, ahn hihn waahn yoo chooz ahn az yu bes Fren tu. Soh chrai yu bes fi obay Jehoava ahn fi jraa kloasa tu hihn evri day. Mek aala wi stay eena fi hihn lov fareva an eva!—Jood 21.