Skip tu di aatikl

Skip tu lis a tapik

 CHAPTA 15

Injai Yu Werk

Injai Yu Werk

“Evribadi shuda . . . injai di gud fahn dehn haad werk.”—ECCLESIASTES 3:13.

1-3. (a) How wahn lata peepl feel bowt dehn jab? (b) Wat da sohn kweschan wi wahn kansida eena dis chapta?

PEEPL aal oava di werl werk haad fi sopoat dehnself ahn dehn famili. Bot wahn lata dehn noh laik dehn jab, ahn fi adaz, jos fi goh da werk evri day schres dehn owt. If dat da how yoo feel, weh yu ku du fi laik yu jab moa? Weh yu ku du fi feel gud bowt yu werk?

2 Jehoava tel wi: “Evribadi shuda eet ahn jrink ahn injai di gud fahn dehn haad werk. Da wahn gif fahn Gaad.” (Ecclesiastes 3:13) Hihn mi kriyayt wi wid di need ahn di dizaiya fi werk. Ih waahn wi feel gud bowt di werk weh wi du.—Reed Ecclesiastes 2:24; 5:18.

3 Soh, weh ku help wi fi injai wi werk? Weh kaina werk Kristyanz fi avoid? How wi ku kip wi jab ahn wi wership tu Jehoava eena dehn prapa plays? Ahn weh da di moas impoatant werk wi ku du?

DI TOO BES WERKA

4, 5. How Jehoava feel bowt werk?

4 Jehoava lov fi werk. Genesis 1:1 seh: “Eena di biginin Gaad mi mek di hevn ahn di ert.” Afta ih don mek di ert an evriting pan it, ih seh dat weh ih mi  mek mi “veri gud.” (Genesis 1:31) Wi Kriyayta mi satisfai wid weh ih mi mek.—1 Timoti 1:11.

5 Jehoava noh stap werk. Jeezas mi seh: “Mai Faada aalwayz di help peepl.” (Jan 5:17) Da chroo wi noh mait noa bowt aala di wandaful tingz Jehoava di du, bot wi noa bowt som a dehn. Fi egzampl, hihn di chooz di wan dehn hoo wahn rool lang wid ih Son, Jeezas Krais, fi bee paat a di Kingdom da hevn. (2 Korintyanz 5:17) Ahn Jehoava di tek kayr a wi ahn gaid aala wi tudeh. Bikaaz a di werlwaid preechin werk, milyanz a peepl di geh fi noa bowt hihn ahn ga di hoap fi liv fareva pahn wahn paradais ert.—Jan 6:44; Roamanz 6:23.

6, 7. Weh kaina werka Jeezas?

6 Jeezas lov fi werk tu, jos laik ih Faada. Bifoa ih mi kohn tu di ert, Jeezas da-mi Gaad “maasta werka.” Ih mi werk lang wid ih Faada di mek evriting eena hevn ahn pahn ert. (Proverbs 8:22-31; Koloashanz 1:15-17) Wen Jeezas mi deh pahn di ert, ih mi kantinyu fi werk haad. Ih mi laan fi du kyaapenta werk. Ih pasabl dat ih mi mek fernicha an eevn bil hows. Jeezas mi geh fi bee soh gud dat dehn yoostu kaal ahn ‘di kyaapenta.ʼ—Maak 6:3.

7 Bot, di moas impoatant werk weh Jeezas mi du wen ih mi deh pahn di ert da-mi fi goh preech ahn teech peepl di gud nyooz. Ih mi ga chree an a haaf yaaz fi finish ih minischri, an ih mi werk haad fahn erli da maanin til layt da nait. (Look 21:37, 38; Jan 3:2) Ih mi waak honjridz a mailz pahn sohn dosti road fi kehr di gud nyooz tu peepl.—Look 8:1.

8, 9. Wai Jeezas mi injai ih werk?

 8 Tu Jeezas, di werk weh Gaad mi giv ahn fi du da-mi laik food. Dis werk mi giv ahn enerji ahn schrent. Jeezas mi werk soh haad dat dehn mi ga dayz wen ih neva eevn ga taim fi eet wahn meel. (Jan 4:31-38) Ih mi tek advantij a evri apachooniti fi help adaz laan bowt ih Faada. Dats wai ih kuda mi tel Jehoava: “Ai shoa evribadi ya pahn dis ert fi yoo gloari, kaa Ai don du evriting weh yoo sen mi fi du.”—Jan 17:4.

9 Soh, wi si dat Jehoava ahn Jeezas da haad werkaz, ahn di werk weh dehn du gi dehn jai ahn satisfakshan. Wi goal da fi “bee laik Gaad,” ahn wi waahn ‘fala Krais futstep dehn.ʼ (Ifeezhanz 5:1; 1 Peeta 2:21) Dats wai wi chrai fi werk haad ahn du wi bes noh mata weh wi di du.

HOW WI SHUDA FEEL BOWT WI WERK?

10, 11. Weh ku help wi fi ga wahn pazitiv atichood bowt wi jab?

10 Bikaaz wee da Jehoava peepl, wi chrai werk haad fi sopoat wiself ahn wi famili. Wi waahn feel gud bowt wi werk, noh chroo? Bot dis ku bee wahn chalenj. Soh, weh wi ku du if wi noh laik wi jab?

If yu ga wahn pazitiv atichood, yu ku injai eni jab

11 Ga wahn pazitiv atichood. Wi mait kyaahn chaynj wehpaat er humoch wi werk, bot wi ku chaynj wi atichood. If wi andastan weh Jehoava ekspek fahn wi, wi ku ga wahn beta atichood bowt wi werk. Fi egzampl: Jehoava ekspek wahn famili hed fi chrai ih bes fi provaid di tingz weh ih famili need. In fak, di Baibl seh dat wahn persn weh noh  provaid fi ih famili “wosa dan sohnbadi weh noh bileev eena Krais.” (1 Timoti 5:8) If yoo da wahn famili hed, yu praabli werk haad fi provaid fi yu famili. Ahn yu noa dat yu di mek Gaad hapi kaaz yu di provaid fi yu famili, noh mata if yu laik yu jab er nat.

12. How wi benifit wen wi werk haad ahn bee aanis?

12 Werk haad ahn bee aanis. Dis wahn help yu fi injai yu werk. (Proverbs 12:24; 22:29) Fi wan ting, yu baas wahn ku chros yu. Tink bowt dis: If yoo wuda ga wahn aanis persn di werk fi yu, yu wudn wori dat da persn di ways taim pahn di jab er di teef yu moni er mateeryalz, noh chroo? Evribadi apreeshiayt aanis werkaz. (Ifeezhanz 4:28) Jehoava noa wen yu di werk haad ahn bee aanis, ahn dis da di moas impoatant ting. Ahn yu wahn ga wahn gud kanshans bikaaz yu noa dat yu di pleez di Gaad weh yu lov.—Heebrooz 13:18; Koloashanz 3:22-24.

13. Wat els ku hapm da wi werk wen wi aanis?

13 Memba dat yu kandok da werk ku bring aana tu Jehoava. Dis da wahn nada reezn fi mek wi feel gud bowt wi werk. (Taitos 2:9, 10) Ih pasabl dat sombadi da yu werk mait eevn waahn stodi di Baibl bikaaz a yu gud egzampl.—Reed Proverbs 27:11; 1 Peeta 2:12.

WEH KAINA JAB AH SHUDA CHOOZ?

14-16. Weh wi need fi kansida wen wi di chooz wi jab?

14 Di Baibl noh ga wahn lis a jab weh wahn Kristyan ku du er kyaahn du. Bot ih ga prinsiplz weh ku help wi fi mek gud disizhanz bowt werk. (Proverbs 2:6) Soh mek wi diskos how wi ku yooz Baibl prinsiplz  fi mek wahn disizhan eena dehnya sichuwayshan:

Luk fi di kaina werk weh noh goh gens Jehoava standadz

15 If Ah tek dis jab, Ah wahn need fi du sohnting weh Jehoava seh rang? Wi don laan bowt som a di tingz weh Jehoava noh laik. Fi egzampl, ih noh laik wen wahn persn teef er tel lai. (Exodus 20:4; Aks 15:29; Ifeezhanz 4:28; Revilayshan 21:8) Soh wi haftu bee kyaaful dat wi noh du eni kaina werk weh goh gens Jehoava standadz.—Reed 1 Jan 5:3.

 16 Dis jab sopoat wahn rilijos aaganaizayshan weh Jehoava kandem? Fi egzampl, wat if sombadi aks yu fi goh werk az wahn sekiteri fi wahn cherch mishan er rilijos aaganaizayshan? Now, ih noh rang fi werk az wahn sekiteri. Ahn yu mait tink tu yuself, ‘Ai noh jain di cherch; da jos wahn jab.ʼ Bot yu noh tink yu wuda stil di sopoat faals rilijan er wahn faals rilijos aaganaizayshan? How yu tink Jehoava wuda feel?—Revilayshan 18:4.

17. Weh ku help wi fi mek disizhanz weh wahn pleez Gaad?

17 If wi yooz Baibl prinsiplz, wi ku bee di kaina persn weh Heebrooz 5:14 taak bowt. Da skripcha seh dat wi ku bee “peepl weh ga ekspeeryens eena how fi tel weh da di difrens bitween gud ahn eevl.” Aks yuself: ‘If Ai tek dis jab, ada peepl wuda geh stombl? Ah wuda haftu lef mi hozban er waif ahn mi chiljren ahn goh liv faar fahn dehn, maybi eevn eena wahn nada konchri? Weh wuda hapm tu mi famili?ʼ

“NOA WEH DA DI BES TING FI DU”

18. Wai ih ku bee wahn chalenj fi mek wi foakos pahn wi wership?

18 Ih ku bee wahn chalenj fi mek wi put wi wership tu Jehoava fos eena wi laif eena dehnya “terabl taimz.” (2 Timoti 3:1) Ih ku bee haad fi fain wahn jab ahn kip it. Wi need fi tek kayr a wi famili, bot wi noa dat wi wership kohn fos. Wi kyaahn mek mateeryal tingz geh tu impoatant eena wi laif. (1 Timoti 6:9, 10) Soh how wi ku “noa weh da di bes ting fi du” ahn provaid fi wi famili saym taim?—Filipiyanz 1:10.

19. How chros eena Jehoava ku help wi fi bee balans wid wi werk?

 19 Chros eena Jehoava wid aala yu haat. (Reed Proverbs 3:5, 6.) Wi noa dat Gaad noa egzakli weh aala wi need ahn dat ih kay wahn lat bowt wi. (Psalm 37:25; 1 Peeta 5:7) Di Baibl tel wi: “Noh di lov moni; satisfai wid weh unu ga, kaa di Laad pramis wi seh, ‘Ah wahn neva lef unu; Ah wahn neva dizert unu.ʼ” (Heebrooz 13:5) Jehoava noh waahn wi wori tu moch bowt how wi wahn provaid fi wi famili. Oava an oava agen, ih shoa wi dat hihn ku provaid weh fi hihn peepl need. (Machyu 6:25-32) Noh mata weh kaina werk wi du, wi mos aalwayz mek taim fi stodi di Werd a Gaad, preech di gud nyooz, ahn deh da wi Kristyan meetin dehn.—Machyu 24:14; Heebrooz 10:24, 25.

20. Weh wi ku du fi kip wi laif simpl?

20 Foakos pahn di rait tingz. (Reed Machyu 6:22, 23.) Wi sopoas tu mek disizhanz eena laif weh wahn help wi fi foakos pahn wi servis tu Jehoava. Wi noa dat ih wuda bee foolish fi alow moni, wahn komfatabl laif, er di laytes teknalaji fi bee moa impoatant tu wee dan wi frenship wid Gaad. Soh, weh ku help wi fi put fos tingz fos? Wi haftu chrai wi bes fi noh hoa nobadi. If yu don hoa di bank, kredit yoonyan, er sombadi els, den chrai mek wahn gud plan fi pay it aaf er at lees fi bring dong di amonk weh yu hoa. If wi noh kyaaful, mateeryal tingz ku tek op wahn lata wi taim an enerji, ahn wi mait noh ga taim fi pray, stodi, er goh preech. Soh insteda mek mateeryal tingz get wi laif owta kanchroal, wi  need fi laan fi bee kantentid wid di baysik tingz eena laif laik ‘food ahn kloaz.ʼ (1 Timoti 6:8) An ih gud fi mek wi egzamin wi laif fahn taim tu taim fi si how wi ku du moa eena wi servis tu Jehoava, noh mata weh sichuwayshan wi deh eena.

21. Wai wi need fi disaid weh kohn fos eena wi laif?

21 Noa weh fi kohn fos. Wi need fi yooz wi taim, enerji, ahn mateeryal tingz eena wahn waiz way. If wi noh kyaaful, ada tingz weh noh az impoatant, laik ejukayshan er moni, wahn tek op wi preshos  taim. Jeezas mi seh: ‘Weh unu fi aym fa fos, da fi bee paat a di Kingdom a hevn.ʼ (Machyu 6:33) Di chois dehn weh wi mek, wi habit dehn, di tingz weh wi du day-tu-day, ahn wi goalz, ku shoa weh reeli kohn fos eena wi haat.

DI MOAS IMPOATANT WERK WEH WI KU DU

22, 23. (a) Wat da di moas impoatant werk weh wahn Kristyan ku du? (b) Weh wahn help wi fi injai wi werk?

22 Di moas impoatant ting wi kuda eva du da serv Jehoava. Wan a di mayn wayz wi du dis da chroo di preechin a di gud nyooz. (Machyu 24:14; 28:19, 20) Jos laik Jeezas, wi waahn du evriting weh wi kud eena dis impoatant werk. Som Witnisiz eevn moov tu wahn nada ayrya fi help owt wid di preechin werk. Adaz laan wahn nyoo langwij. Taak wid bradaz ahn sistaz hoo du dis aredi, an aks dehn bowt it. Dehn wahn tel yu dat dehn laif hapiya ahn ga moa meenin.—Reed Proverbs 10:22.

Wi servis tu Jehoava da di moas impoatant werk weh wi kuda eva du

23 Tudeh, wahn lata wi haftu put een sohn lang dayz da werk, er maybi wi ga moa dan wan jab jos fi provaid di baysik tingz weh wi famili need. Jehoava noa dis, ahn hihn apreeshiayt evriting weh wi du fi tek kayr a wi famili. Soh mek aala wi kantinyu fi kapi Jehoava ahn Jeezas egzampl ahn werk haad, noh mata weh kaina jab wi gat. Ahn mek wi memba dat Jehoava fi kohn fos eena wi laif, ahn dat di moas impoatant werk da di preechin a di gud nyooz bowt fi hihn Kingdom. Dis wahn gi wi chroo hapinis eena laif.