Skip tu di aatikl

Skip tu lis a tapik

 CHAPTA 13

How Gaad Feel Bowt Sertn Selibrayshan?

How Gaad Feel Bowt Sertn Selibrayshan?

“Fain owt weh pleez di Laad.”—IFEEZHANZ 5:10.

1. Weh wi need fi du fi mek shoar dat wi wership pleez Jehoava, ahn wai?

JEEZAS mi seh: “Peepl weh reeli waahn wership Gaad fi chroo wahn wership ahn fahn deep dong eena dehn haat, jos laik how di Spirit a Gaad waahn dehn wership; kaa dat da di kaina peepl weh Gaad di Faada di luk fa fi wership ahn.” (Jan 4:23; 6:44) Aala wi need fi “fain owt weh pleez di Laad.” (Ifeezhanz 5:10) Dis noh eezi, kaaz Saytan di chrai chrik wi fi mek wi du tingz weh Jehoava noh pleez wid.—Revilayshan 12:9.

2. Eksplayn weh mi hapm tu di Izrelait dehn kloas tu Mongt Sainai.

2 How Saytan chrai fi chrik wi? Wan way da fi kanfyooz wi bowt weh rait ahn weh rang. Noatis weh mi hapm tu di nayshan a Izrel wen dehn mi-di kyamp owt kloas tu Mongt Sainai. Moaziz gaan op di mongtin, ahn di peepl mi-di wayt pan ahn fi kom bak tu di kyamp. Wel, dehn geh taiyad a wayt pahn Moaziz an aks Ayron fi mek wahn gaad fi dehn. Soh ih mi mek wahn kyaaf owta goal az wahn aidol fi dehn. Den di peepl mi ga wahn festival; dehn staat tu daans op rong di kyaaf ahn bow dong tu it. Dehn mi akchwali bileev dat dehn mi-di wership Jehoava wen dehn mi-di bow dong tu da kyaaf. Dehn mi eevn kaal dis ivent “wahn  festival tu Jehoava.” Bot how yu tink hihn mi feel bowt dat? Jehoava neva laik it ataal! Az a mata a fak, tu hihn, dat da-mi aidol wership, ahn sayka dat, wahn lata dehn mi looz dehn laif. (Exodus 32:1-6, 10, 28) Wat da di lesn fi wee? Noh mek Saytan fool yu! Wi noh fi “toch notn weh noh kleen” er ga notn fi du wid faals rilijan. Wi fi alow Jehoava fi teech wi weh rait ahn weh rang soh dat wi ku pleez hihn.—Isaiah 52:11; Ezekiel 44:23; Galayshanz 5:9.

3, 4. Wai ih gud fi noa weh wahn lata di papyula selibrayshan dehn kohn fram?

3 Wen Jeezas mi deh pahn ert, ih mi chrayn ih apasl dehn fi set di egzampl az tu how fi wership Gaad eena wahn kleen way. Afta Jeezas mi ded, di apasl dehn mi kantinyu fi teech Jehoava prinsiplz tu di nyoo disaipl dehn. Bot afta di apasl dehn mi ded, sohn faals teecha staat tu bring een aal kaina rang aidyaa ahn paygan kostom ahn selibrayshan eena di kangrigayshan. Dehn mi eevn chaynj di naym a som a dehndeh paygan selibrayshan fi mek ih luk laik dehn da-mi Kristyan selibrayshan. (2 Tesaloanyanz 2:7, 10; 2 Jan 6, 7) Wahn lata dehndeh selibrayshan stil papyula tudeh, ahn dehn stil sopoat faals teechinz, eevn spiritizm. *Revilayshan 18:2-4, 23.

4 Peepl aal oava di werl feel dat di difrent selibrayshan ahn haliday dehn da wahn impoatant paat a fi dehn laif. Bot az yu kantinyu fi laan how Jehoava feel bowt dehnya tingz, yu mait need fi chaynj di way how  yoo feel bowt sertn selibrayshan. Yu mait fain dis haad fi du, bot memba dat Jehoava wahn help yu. Mek wi egzamin weh som a di moa papyula selibrayshan dehn kohn fram soh dat wi ku andastan how Jehoava feel bowt dehn.

HOW KRISMOS MI STAAT?

5. How wi noa dat Jeezas neva baan pahn Disemba 25?

5 Moas peepl rong di werl selibrayt Disemba 25, er weh dehn kaal Krismos Day, az Jeezas bertday. Di Baibl noh tel wi pahn wich day er eevn wich mont Jeezas mi baan, bot ih tel wi sohnting bowt di taim a di yaa. Di gaspl raita weh mi naym Look seh dat Jeezas mi baan da Betlihem, ahn dat ‘sohn shepad mi-di liv owt eena di feel,ʼ di main dehn sheep. (Look 2:8-11) Yoozhwali joorin di mont a Disemba, di weda da Betlihem koal, rayni, an ih eevn snoa sohntaim. Soh den, di shepad dehn wudn deh owtsaid wid dehn sheep da nait. Weh wi laan fahn dis? Wel, dat Jeezas mi baan wen di weda mi waama; fi shoar da neva Disemba. Di Baibl ahn hischri shoa dat Jeezas mi baan sohntaim joorin di monts weh wee noa az Septemba an Aktoaba.

6, 7. (a) Weh wahn lata di papyula Krismos kostom kohn fram? (b) Weh shuda bee wi reezn fi giv eech ada gifs?

6 Soh how Krismos mi staat? Ih kohn fahn wahn paygan selibrayshan weh mi naym Saturnalia. Di Roamanz yoostu ga wahn selibrayshan fi dehn gaad a agrikolcha, weh mi naym Saturn. The Encyclopedia Americana seh: “Saturnalia da-mi wahn Roaman festival weh dehn yoostu selibrayt rong di midl a Disemba. Wahn lata di haliday kostom weh goh lang wid  Krismos kohn fahn dis festival, fi egzampl, di kostom fi gi wan anada gif ahn fi ga big paati. Eevn di kostom fi lait lata kyandl kohn fahn dis selibrayshan.” Pahn tap a dat, dehn mi ga wahn neks faals gaad weh mi naym Mithra, ahn peepl yoostu selibrayt fi hihn bertday pahn Disemba 25.

7 Bot, moas peepl weh selibrayt Krismos noh tink dat da wahn paygan haliday kaaz dehn noh di tink bowt weh ih kohn fram. Rong Krismos taim, dehn jos luk faawod fi deh wid dehn famili, injai gud food, ahn  giv eech ada gif. Af koars, wi lov wi famili ahn frenz, ahn Jehoava waahn ih servant dehn shayr wid wan anada. Da 2 Korintyanz 9:7, di Baibl tel wi dat “Gaad lov wen yu hapi fi giv.” Bot Jehoava noh waahn wi giv tu adaz onli pahn speshal okayzhan. Fi hihn peepl giv gifs tu wan anada ahn spen taim wid frenz ahn famili enitaim a di yaa, ahn dehn noh ekspek fi get notn bak. Dehn giv tu adaz bikaaz a lov.—Look 14:12-14.

Wen wi noa weh wahn selibrayshan kohn fram, ih ku help wi fi noa weh fi avoid

8. Da wen Jeezas mi akchwali geh di gif dehn, da wen hihn mi jos baan? Pleez eksplayn yu ansa.

8 Bikaaz lata peepl laik di kostom fi gi wan anada gifs rong Krismos taim, dehn yooz di ekskyoos dat Jeezas mi geh gif fahn di chree waiz man wen hihn da-mi wahn baybi eena di staybl. Wel, da chroo dat wahn groop a man mi gaahn vizit Jeezas ahn giv ahn sohn gif, bot di Baibl noh seh dat da-mi chree a dehn. Bak eena dehndeh dayz, ih mi kaman fi giv gifs tu wahn persn weh impoatant. (1 Kings 10:1, 2, 10, 13) Bot, yoo noa weh di Baibl seh bowt dehndeh man? Ih seh dat dehn yoostu stodi di staarz ahn di difrent planet dehn. Dehn yoostu praktis majik ahn neva wership Jehoava. Ahn tink bowt dis, dehn neva vizit Jeezas wen hihn mi jos baan. Az a mata a fak, dehn mi vizit ahn laytaraan wen hihn da-mi wahn lee bwai, noh wahn baybi. Ahn Joazef, Mayri, ahn Jeezas mi don di liv eena wahn hows bai da taim deh.—Machyu 2:1, 2, 11.

WEH DI BAIBL SEH BOWT BERTDAY?

9. Wich too bertday selibrayshan di Baibl taak bowt?

9 Da wahn hapi day wen wahn baybi baan, noh chroo? (Psalm 127:3) Bot yu tink dat meen wi shuda selibrayt bertday? Tink bowt dis: Di Baibl onli taak  bowt too bertday selibrayshan. Wan a dehn da-mi Fayro bertday, ahn di ada wan da-mi fi King Herod Antipas. (Reed Genesis 40:20-22; Maak 6:21-29.) Non a dehndeh man yoostu serv Jehoava. In fak, no way eena di Baibl taak bowt servants a Jehoava di selibrayt fi dehn oan bertday.

10. How di fos Kristyanz mi feel bowt bertday selibrayshan?

10 The World Book Encyclopedia seh dat di Kristyanz bak den yoostu “bileev dat da wahn paygan kostom fi selibrayt enibadi bertday.” Dis kostom mi kohn fahn faals rilijan. Fi egzampl, di Greek peepl yoostu bileev dat eech persn baan pahn di saym day az wan a fi dehn gaad weh dehn yoostu wership. Soh wen dehn mi selibrayt fi dehn oan bertday, dehn mi bileev dat datdeh gaad wuda mi protek dehn. Bisaidz di fak dat bertday selibrayshan kohn fahn paygan bileef, peepl bileev dat dehn bertday ga fi du wid di staarz ahn di horoskoap.

11. Wen Jehoava waahn wi bee jenaros?

11 Wahn lata peepl feel dat fi dehn bertday da wahn speshal day wen dehn shuda geh lata lov an apreeshiayshan. Bot wi ku shoa lov tu wi famili ahn frenz aal chroo di yaa, noh jos pahn wan spesifik day. Jehoava waahn wi bee kain ahn jenaros aal di taim. (Reed Aks 20:35.) Laif da wahn preshos gif fahn Jehoava, ahn wi soh tankful fi dis gif evri day, noh jos pahn wi bertday.—Psalm 8:3, 4; 36:9.

Chroo Kristyanz giv tu adaz bikaaz dehn reeli lov dehn

12. Eena weh way di day wen wi ded ku bee beta dan di day wen wi baan?

12 Ecclesiastes 7:1 seh: “Wahn gud naym beta dan gud ail, ahn di day wen wi ded beta dan di day wen wi  baan.” How di day wen wi ded ku bee beta dan di day wen wi baan? Wen wi baan, wi noh du notn wid wi laif yet, weda gud er bad. Bot wen wi yooz wi laif fi serv Jehoava ahn du gud fi adaz, wi mek “wahn gud naym,” er repyutayshan, wid hihn, ahn Jehoava wahn memba wi eevn afta wi ded. (Job 14:14, 15) Soh Jehoava peepl noh selibrayt Jeezas bertday ner fi dehn oan bertday. In fak, di onli ivent Jeezas mi koman wi fi selibrayt  da di Memoaryal a fi hihn det.—Look 22:17-20; Heebrooz 1:3, 4.

WEH EESTA KOHN FRAM?

13, 14. Weh Eesta kohn fram?

13 Wahn lata peepl bileev dat dehn di selibrayt Jeezas rezorekshan joorin Eesta taim. Bot akchwali, Eesta ga fi du wid wahn feemayl paygan gaad weh mi naym Eostre, weh sopoas tu rool oava daylait ahn spring. The Dictionary of Mythology seh dat shee da-mi di gaad a fertiliti. An akaadn tu di Encyclopædia Britannica, som Eesta kostom sopoat dis. Fi egzampl, di Encyclopædia seh dat di eg “stan fi nyoo laif ahn rezorekshan,” an ih seh dat da mi wahn kostom fi peepl yooz di rabit az wahn simbol a fertiliti eena paygan wership. Soh ih klayr fi si dat Eesta noh ga notn fi du wid Jeezas rezorekshan.

14 How yu tink Jehoava feel wen hihn si peepl di miks faals rilijos kostom wid di rezorekshan a fi hihn Son? Yu tink ih pleez wid dat? No, af koars nat. (2 Korintyanz 6:17, 18) In fak, Jehoava neva did aks wi fi selibrayt Jeezas rezorekshan.

WAT DA HALOWEEN?

15. How Haloween mi staat?

15 Wahn nada naym fi Haloween, er di day bifoa Aal Saynts Day, da Aal Haloaz Eev, an ih ga fi du wid wich ahn goas. Dis da noh wahn nyoo selibrayshan doh. Yaaz ahn yaaz agoa, di Celt peepl fahn Britain an Ireland yoostu selibrayt di festival a Samhain pahn di ful moon kloasis tu Novemba 1. Dehn mi bileev dat joorin dis festival, di spirit a di ded peepl kohn bak tu di  ert. Soh di peepl dehn yoostu put owt food ahn jrink soh dat dehndeh spirit wudn hert dehn. Nowadayz, wen chiljren put aan dehn kastyoom ahn goh fahn hows tu hows di seh “Chrik er chreet,” dehn di kapi dis kostom weh ga fi du wid spiritizm ahn dehn noh eevn noa it.

DI KAINA WEDN WEH PLEEZ GAAD

16, 17. Weh wi shuda tink bowt wen wi di plan wahn wedn?

16 Wahn wedn da wahn hapi okayzhan, ahn peepl aal oava di werl selibrayt wedn eena lata difrent wayz. Moas peepl noh tink bowt weh dehndeh difrent wedn kostom kohn fram, soh dehn noh mait noa dat som a di kostom dehn kohn fahn paygan rilijos bileef. Bot wahn Kristyan kopl weh di plan dehn wedn need fi mek shoar dat ih wahn pleez Jehoava. If dehn tek di taim fi fain owt weh sertn wedn kostom kohn fram, ih ku help dehn fi mek gud disizhanz.—Maak 10:6-9.

17 Wahn lata peepl bileev dat som wedn kostom wahn bring ‘gud lokʼ tu di nyoo kopl. (Isaiah 65:11) Fi egzampl, eena som konchri peepl chroa rais er sohnting laik dat pahn di braid ahn groom. Dehn bileev dat dis wahn gi di kopl chiljren, hapinis, ahn wahn lang laif ahn dat ih wahn protek dehn fahn eevl. Bot Kristyanz haftu bee kyaaful; wi need fi avoid eni kostom weh ga fi du wid faals rilijan.—Reed 2 Korintyanz 6:14-18.

18. Wat da sohn ada Baibl prinsipl weh ku help wahn kopl weh di plan wahn wedn?

18 Wahn Kristyan kopl waahn dehn wedn fi bee wahn hapi ahn rispektabl okayzhan. Ahn dehn waahn evribadi injai dehnself tu. Soh if eni a di ges da wahn  Kristyan wedn mek wahn speech, dehn shudn tel doti joaks, seh tingz weh noh kain, er seh tingz weh shoa disrispek tu di braid ahn groom er tu adaz. (Proverbs 26:18, 19; Look 6:31; 10:27) Wahn Kristyan noh fi yooz wahn wedn fi shoa aaf weh ih gat. (1 Jan 2:16) If yoo di plan wahn wedn, mek shoar dat yu wahn ku luk bak pan it wid hapi memriz.—Pleez goh da Noat 28 da di en a dis buk.

WEH TOASTIN KOHN FRAM?

19, 20. Weh toastin kohn fram?

19 Da wahn kaman praktis da wedn an ada paati fi peepl gi wahn toas er rayz dehn glaas er byaa ahn gi wahn speech. Joorin wahn toas, evribadi rayz dehn glaas wail wan persn di wish fi di hapinis a adaz. How Kristyanz fi vyoo toastin?

20 Di International Handbook on Alcohol and Culture seh dat toastin praabli kohn fahn wahn paygan kostom. Joorin dis kostom, wahn persn wuda aafa wahn “hoali jrink tu di gaad dehn.” Dehn mi du dis fi mek di gaad dehn ansa wahn wish er pryaa. Dehn wuda seh wahn pees a di pryaa lang wid di toas, laik ‘lang laif!ʼ er ‘tu yu helt!ʼ Yaaz agoa, wen peepl mi waahn wahn blesin fahn fi dehn gaad, dehn wuda rayz dehn kop, bot dat da noh how wi aks Jehoava fi blesinz.—Jan 14:6; 16:23.

“EVRIBADI WEH LOV JEHOAVA, UNU MOS HAYT WEH BAD”

21. Wat da sohn ada kaina selibrayshan Kristyanz fi avoid?

21 Wen yu di disaid if yu wahn tek paat eena wahn selibrayshan er nat, tink bowt di kaina atichood ahn  kandok ih di inkorij adaz fi gat. Fi egzampl, sohn selibrayshan ahn kaanival ga wahn lata naasti daansin, oava jrinkin, an eevn imoraliti. Dehnya selibrayshan mait eevn inkorij wahn gay er lezbiyan laifstail. Ahn dehn inkorij adaz fi tink dat fi dehn konchri beta dan adaz. If wi tek paat eena dehnya kaina selibrayshan, yu tink wi reeli di hayt weh Jehoava hayt?—Psalm 1:1, 2; 97:10; 119:37.

22. Weh ku help wahn Kristyan fi disaid if ih wahn tek paat eena wahn selibrayshan?

22 Kristyanz need fi bee reeli kyaaful if dehn waahn avoid eni selibrayshan weh Gaad noh laik. Di apasl Paal mi seh: “Evriting weh unu du, weda da eet er jrink, er eniting els, unu fi du evriting eena soch a way dat Gaad geh di gloari far it.” (1 Korintyanz 10:31; pleez goh da Noat 29 da di en a dis buk.) Af koars, noh aal selibrayshan kohn fahn faals rilijan, ahn da noh aala dehn inkorij peepl fi bee imoaral er fi ga praid eena dehn konchri. Soh if wahn selibrayshan noh goh gens Baibl prinsiplz, wee need fi mek wahn persnal disizhan if wi wahn tek paat eena it er nat. Ahn wi need fi kansida tu how wi disizhan wahn afek adaz.

AANA JEHOAVA WID DI TINGZ WEH WI SEH AHN DU

23, 24. How wi ku eksplayn wi disizhan bowt sertn selibrayshan tu wi famili membaz hoo da noh Witnisiz?

23 Bai now yu praabli don stap tek paat eena selibrayshanz weh Jehoava noh laik. Bikaaz a dis, som a yu famili membaz hoo da noh Jehoava Witnisiz mait tink dat yu noh laik dehn nohmoh er dat yu noh  waahn deh rong dehn agen. Dehn mait feel dat di haliday dehn da di onli taim weh di famili ku get tugeda. Soh weh yu ku du? Lata wayz deh weh yu ku stil mek dehn feel dat yu lov dehn ahn dat dehn impoatant tu yoo. (Proverbs 11:25; Ecclesiastes 3:12, 13) Yu ku invait dehn fi spen taim wid yu pahn ada okayzhan.

24 If yu relitiv dehn waahn noa wai yu noh wahn selibrayt sertn haliday nohmoh, yu ku luk op infamayshan eena wi poblikayshan dehn er pahn jw.org weh ku help yu fi eksplayn wai. Noh mek dehn feel dat yu di chrai win wahn aagyument er foas dehn fi aksep yu bileef dehn. Help yu famili fi si dat yu mi kansida wahn lata tingz bifoa yu mi mek dis persnal disizhan. Stay kaam, ahn “taak tu dehn eena wahn nais ahn inchrestin way weh wahn mek dehn waahn yehr moa.”—Koloashanz 4:6.

25, 26. How payrents ku help dehn chiljren laan fi lov Jehoava standadz?

25 Ih impoatant dat aala wi andastan klayr-wan wai wee persnali noh tek paat eena sertn selibrayshan. (Heebrooz 5:14) Wi goal da fi pleez Jehoava. An if wi da payrents, wi haftu tek di taim fi help wi chiljren andastan ahn lov Baibl prinsiplz, kaaz wen wi chiljren staat tu si Jehoava az fi dehn fren, dehn wahn waahn pleez ahn.—Isaiah 48:17, 18; 1 Peeta 3:15.

26 Jehoava hapi fi si dat wi di chrai wi bes fi wership ahn eena wahn kleen an aanis way. (Jan 4:23) Bot wahn lata peepl tink dat ih haad fi bee aanis eena wahn werl weh noh aanis. Yu tink dat da chroo? Mek wi taak bowt dis eena di neks chapta.

^ par. 3 Yu ku fain infamayshan bowt eech spesifik selibrayshan eena di Watch Tower Publications Index, eena di Research Guide for Jehovahʼs Witnesses, ahn pahn jw.org.