Skip tu di aatikl

Skip tu lis a tapik

 CHAPTA 1

Di Lov a Gaad Laas Fareva

Di Lov a Gaad Laas Fareva

“Ahn fi lov Gaad meen dat wi wahn obay weh ih koman wi fi du. Ahn weh hihn koman wi fi du noh haad.”—1 JAN 5:3.

1, 2. Wai yoo lov Jehoava Gaad?

YOO lov Gaad? Af koars yu wuda seh yes, espeshali if yu don dedikayt yu laif tu ahn. Yu mait eevn feel dat hihn da yu bes Fren. Bot Jehoava mi lov yoo eevn bifoa yoo mi lov hihn. Di Baibl seh: “Di reezn wai wee lov, da kaa hihn mi lov wee fos.”—1 Jan 4:19.

2 Tink bowt aala di difrent wayz Jehoava shoa ih lov fi wi. Ih gi wi dis byootiful ert az wi hoam an evriting els weh wi need fi injai laif. (Machyu 5:43-48; Revilayshan 4:11) Ih gi wi weh wi need fi laan bowt ahn kaaz ih waahn wi ga wahn gud rilayshanship wid hihn. Wen wi reed di Baibl, wi di lisn tu Jehoava. Ahn wen wi pray, hihn di lisn tu wee. (Psalm 65:2) Ih gaid ahn schrentn wi wid ih powaful hoali spirit. (Look 11:13) Ih mi eevn sen ih preshos Son fi ded fi wi soh dat wi ku bee free fahn sin ahn det.—Reed Jan 3:16, NW; Roamanz 5:8.

3. How wi ku kip wahn gud rilayshanship wid Jehoava?

3 Stap ahn tink fi wahn lee wail bowt wan a yu  kloas fren, sombadi hoo mi deh bai yu said chroo gud ahn bad taimz. Ih tek lata werk fi kip wahn kloas frenship laik dat schrang, noh chroo? Wel, da di saym ting wid wi frenship wid Jehoava, di kloasis Fren weh wi kuda eva gat. Wi frenship wid hihn ku laas fareva, bot ih op tu wee. Dats wai di Baibl seh: “Kip unuself eena di lov a Gaad.” (Jood 21) How wi ku du dis? Di Baibl seh: “Fi lov Gaad meen dat wi wahn obay weh ih koman wi fi du. Ahn weh hihn koman wi fi du noh haad.”—1 Jan 5:3.

WEH IH MEEN FI LOV GAAD?

4, 5. (a) How wi shoa Gaad dat wi lov ahn? (b) How yu lov fi Jehoava mi staat tu groa?

4 Di Baibl tel wi how wi ku shoa Gaad dat wi lov ahn. Wi shoa dis deep feelin fi Gaad wen wi obay ih komanment dehn. Yoo memba wen yu mi fos staat tu lov Jehoava?

Wen yu dedikayt yuself tu Jehoava ahn geh baptaiz, yu shoa dat yu lov hihn ahn yu waahn serv ahn fareva

5 Memba how yu mi feel wen yu mi fos laan dat Jehoava waahn yu liv fareva eena fi hihn nyoo werl? Yu mi laan bowt aala di tingz weh ih mi du fi mek dat pasabl. Den yu praabli mi tel yuself, ‘Dat da wahn preshos gif fi chroo! Jehoava mi sen ih oan Son fi ded fi mee!ʼ (Machyu 20:28; Jan 8:29; Roamanz 5:12, 18) Di moa yu mi laan humoch Jehoava lov yu, yu kudn help bot jos lov ahn bak.—Reed 1 Jan 4:9, 10.

6. How yu ku shoa sombadi dat yu lov ahn? Weh yoo du soh faar bikaaz a yu lov fi Gaad?

6 Da lov weh yu feel fi Gaad da-mi onli di biginin. Fi egzampl, wen wi lov sombadi, wi du moa dan jos  seh “Ai lov yoo.” Wi du tingz fi mek da persn feel hapi. Jos laik dat, yu waahn du tingz fi mek Jehoava hapi tu. Yu mi mek chaynjiz eena yu laif fi pleez hihn. Den dis lov weh yu ga fi Jehoava mi moov yu fi dedikayt yuself tu hihn ahn geh baptaiz. Wen yu mi du dat, yu mi pramis dat yu wahn serv ahn fareva. (Reed 1 Peeta 4:2.) Weh ku help yu fi kip da pramis?

“WI WAHN OBAY WEH IH KOMAN WI FI DU”

7. If wi lov Jehoava, weh wi wahn du? Wat da som a Gaad komanment dehn?

7 Bikaaz wi lov Jehoava, ‘wi obay weh ih koman wi fi du.ʼ Eena di Baibl wi laan how Jehoava waahn wi fi liv. Fi egzampl, ih tel wi dat ih rang fi geh jronk, fi teef er lai, fi ga seks wid sombadi weh wi noh marid tu, er fi wership enibadi er eniting ada dan hihn.—1 Korintyanz 5:11; 6:18; 10:14; Ifeezhanz 4:28; Koloashanz 3:9.

8, 9. How wi ku noa weh fi du eena wahn sichuwayshan weh di Baibl noh tel wi egzakli weh fi du? Yooz di egzampl eena paragraaf 9.

8 Fi pleez Jehoava, ih noh inof fi jos obay ih komanment dehn. Wi need fi du moa dan dat. Ih noh gi wi wahn lang lis a laa fi evri sichuwayshan eena laif. Sohntaim wi mait fays wahn sichuwayshan weh di Baibl noh tel wi egzakli weh fi du. Wen dat hapm, weh ku help wi fi mek gud disizhanz? (Ifeezhanz 5:17) Eena di Baibl wi fain lata prinsipl. Wahn prinsipl da wahn baysik chroot weh teech wi how Jehoava tink er feel bowt sertn tingz. Wen wi  reed di Baibl, wi geh fi noa Jehoava az wahn Persn. Wi laan di way ih tink, inkloodin weh ih lov ahn weh ih hayt.—Reed Psalm 97:10; Proverbs 6:16-19; pleez goh da Noat 1 da di en a dis buk.

9 Fi egzampl, how wi ku noa weh fi wach pahn TV er pahn di Intanet? Jehoava noh tel wi egzakli weh fi du. Bot di prinsipl dehn weh ih gi wi wahn help wi fi mek gud disizhanz. Wahn lata di entataynment tudeh gat een wahn lata vailens ahn seks. Eena di Baibl, Jehoava tel wi how hihn feel bowt dehndeh kaina tingz. Di Baibl seh dat “ih hayt enibadi weh lov vailens” ahn dat ih “wahn joj enibadi weh di sleep rong.” (Psalm 11:5; Heebrooz 13:4) How dehnya prinsipl ku help wi mek gud disizhanz? Wel, wen wi noa dat sohnting imoaral tu Jehoava er dat ih hayt it, wi fi avoid it.

10, 11. Wai wi obay Jehoava?

10 Wai wi obay Jehoava? Da noh jos fi avoid ponishment er di prablemz weh wi fays wen wi mek bad disizhanz. (Galayshanz 6:7) Wi obay Jehoava bikaaz wi lov ahn. Di saym way how wahn pikni waahn mek ih pa hapi, wee waahn mek wi hevnli Faada hapi. Notn deh eena dis laif weh ku mek wi feel hapiya ahn moa satisfai dan fi noa dat Jehoava pleez wid wi!—Psalm 5:12; Proverbs 12:2; pleez goh da Noat 2 da di en a dis buk.

11 Wi noh onli obay Jehoava wen ih eezi er wen wi noh ga no ada chois. Ahn wi noh pik ahn chooz wich wan a Gaad laa ahn standadz wi wahn fala er wich wan wi noh wahn fala. (Deuteronomy 12:32)  Insted, wi obay Gaad wid aala wi haat, laik di saamis hoo mi seh: “Ah noh onli laik yu komanment dehn, Ah lov dehn.” (Psalm 119:47; Roamanz 6:17) Wi fi chrai fi bee laik Noawa. Hihn mi du evriting weh Jehoava mi koman ahn fi du, kaaz ih mi waahn shoa Gaad humoch ih lov ahn. Di Baibl seh dat Noawa mi obay Gaad ahn ‘du egzakli weh ih mi tel ahn fi du.ʼ (Genesis 6:22) Yu wuda waahn Jehoava seh di saym ting bowt yoo?

12. Weh wi ku du fi mek Jehoava hapi?

12 How Jehoava feel wen wi obay ahn? Di Baibl seh dat wi mek ih ‘haat feel hapi.ʼ (Proverbs 11:20; 27:11) Now, dat da sohnting fi tink bowt fi chroo! Wi ku mek di Kriyayta a di yoonivers hapi if wi obay ahn. Hihn noh foas wi fi obay ahn; insted ih gi wi free wil. Dis meenz dat wi ga di freedom fi chooz fi du weh rait er weh rang. Jehoava waahn wi mek gud disizhanz soh dat wi ku ga di bes laif pasabl. Bot, ih waahn wi mek dehndeh disizhanz bikaaz wi lov ahn.—Deuteronomy 30:15, 16, 19, 20; pleez goh da Noat 3 da di en a dis buk.

“WEH HIHN KOMAN WI FI DU NOH HAAD”

13, 14. How wee noa dat weh Gaad koman wi fi du noh haad? Yooz di egzampl eena paragraaf 14.

13 Wat if wi tink dat Jehoava komanment dehn haad fi obay er dat dehn wahn stap wi fahn du weh wee waahn? Di Baibl seh playn-wan: “Weh hihn koman wi fi du noh haad.” (1 Jan 5:3) Di Greek werd fi “haad” meenz “hevi.” Eena ada skripchaz, dehn  yooz dis werd wen dehn di taak bowt roolz weh haad fi kip er peepl weh di chrai kanchroal adaz. (Machyu 23:4; Aks 20:29, 30) Di New English Translation seh it laik dis: “Ih komanment dehn noh way wi dong.” Soh weh Jehoava koman wi fi du noh haad fi mek wi obay. Weh hihn aks wi fi du da tingz weh ih noa wi ku du.

14 Fi egzampl, imajin yu di help wan a yu frenz fi moov intu wahn nyoo hows. Ih don ga evriting pak op eena sohn baks. Som a dehn lait an eezi fi bak, bot som a dehn soh hevi dat ih tek too peepl fi pik dehn op. Yu tink yu fren wuda aks yu fi pik op wahn hevi baks aal bai yuself? Af koars nat! Wai? Bikaaz ih noh waahn yu hert yuself. Jos laik dat, Jehoava wuda neva aks yu fi du sohnting weh tu haad fi du. (Deuteronomy 30:11-14) Jehoava andastan dat wi noh perfek. Di Baibl seh: “Hihn noa gud how wee geh mek, ih memba dat wee da dos.”—Psalm 103:14.

15. Wai wee ku bee shoar dat Jehoava komanment dehn da fi wi oan gud?

15 Moaziz mi tel di nayshan a Izrel dat Jehoava komanment dehn da-mi fi dehn oan gud, ahn dat if dehn mi obay Ahn, dehn mi wahn stay alaiv. (Deuteronomy 5:28-33; 6:24) Saym ting tudeh, eniting weh Jehoava aks wi fi du wahn mek wi laif beta. (Reed Isaiah 48:17.) Wi Faada, Jehoava, noa wat da di bes ting fi wi. (Roamanz 11:33) Di Baibl tel wi dat “Gaad da lov.” (1 Jan 4:8) Dis meenz dat evriting Jehoava seh ahn du da owta lov fi wee.

16. How wi noa dat wi ku bee obeedyant eevn doa wi noh perfek ahn wi liv eena wahn wikid werl?

 16 Ih noh aalwayz eezi fi obay Gaad. Saytan di rool dis wikid werl weh wi liv eena. Ahn hihn di chrai ih bes fi geh peepl fi du weh bad. (1 Jan 5:19) Pahn tap a dat, wi noh perfek, soh wi oan tinkin ahn feelinz ku mek wi disobay Gaad. (Roamanz 7:21-25) Bot wi lov fi Jehoava gi wi di schrent fi du weh rait. Hihn si how haad wi di chrai fi obay ahn, an ih gi wi ih powaful hoali spirit fi help wi. (1 Samuel 15:22, 23; Aks 5:32) Hoali spirit help wi ga kwalitiz laik lov, pees, ahn self-kanchroal weh mek it eeziya fi obay hihn.—Galayshanz 5:22, 23.

17, 18. (a) Weh wi wahn laan eena dis buk? (b) Weh wi wahn diskos eena di neks chapta?

17 Eena dis buk, wi wahn laan how fi liv eena wahn way weh pleez Jehoava. Wi wahn aalso laan how fi aplai Baibl prinsiplz ahn moaral standadz eena wi oan laif. Ahn memba, Jehoava noh foas wi fi obay ahn. Bot wen wi chooz fi bee obeedyant, wi laif wahn geh beta ahn wi wahn ga wahn wandaful fyoocha. Ahn di moas impoatant ting, wi wahn shoa Jehoava humoch wi lov ahn.—Pleez goh da Noat 4 da di en a dis buk.

18 Jehoava giv eech wan a wi wahn kanshans soh dat wi ku noa di difrens bitween rait ahn rang. If wi chrayn wi kanshans, ih ku help wi fi ‘obay weh Gaad koman wi fi du.ʼ Soh, wat da wi kanshans, ahn how wi ku chrayn it? Mek wi si eena di neks chapta.