Skip tu di aatikl

Skip tu lis a tapik

 SEKSHAN 4

How fi Manij Moni

How fi Manij Moni

“Taak tingz oava . . . [ahn] yu planz wahn werk owt.”—Proverbs 20:18

Aala wi need moni soh wi ku provaid fi wi famili. (Proverbs 30:8) Aftaraal, di Baibl seh dat “moni da wahn protekshan.” (Ecclesiastes 7:12) Az wahn kopl, unu mait fain it haad fi taak bowt moni, bot noh mek moni bee di reezn fi ga prablemz eena unu marij. (Ifeezhanz 4:32) Wahn kopl fi chros wan anada ahn werk tugeda wen dehn di disaid how dehn wahn spen dehn moni.

 1 PLAN GUD HOW UNU WAHN SPEN UNU MONI

WEH DI BAIBL SEH: “Sopoaz eni wan a unu waahn put op wahn bildin. Yu noh wahn sidong fos ahn figa owt humoch ih wahn kaas, fi si if yu ga nof moni fi finish it?” (Look 14:28) Ih impoatant fi unu disaid tugeda how unu plan fi spen unu moni. (Amos 3:3) Disaid weh unu need fi bai ahn humoch unu ku reeli spen. (Proverbs 31:16) Jos bikaaz unu ga di moni fi bai sohnting noh meen dat unu hafu bai it. Chrai noh fi hoa nobadi, ahn onli spen di amonk a moni weh unu gat.—Proverbs 21:5; 22:7.

WEH YU KU DU:

  • Afta unu don pay aala unu bil, ahn unu ga ekschra moni da di en a di week er en a di mont, unu ku disaid tugeda weh fi du wid it

  • If unu mi spen moa dan weh unu mi mek, chrai si how unu ku kot bak fi neks taim, laik kuk unu oan food insteda goh owt goh eet

 2 BEE AANIS BOWT UNU MONI

WEH DI BAIBL SEH: “Wi di chrai wi bes fi du weh rait eena Gaad sait, ahn eena di sait a peepl tu.” (2 Korintyanz 8:21) Bee aanis wen yu di tel yu marij paadna humoch moni yu mek ahn humoch yu spen.

Aalwayz taak tu yu hozban er waif wen yu need fi mek wahn impoatant disizhan bowt unu moni. (Proverbs 13:10) Wen unu taak bowt moni ih help kip di pees eena unu marij. Tink bowt di moni weh yu mek az yu famili moni ahn noh az fi yoo oan moni.—1 Timoti 5:8.

WEH YU KU DU:

  • Unu ku gree pahn wahn sertn amonk a moni weh eech wan a unu ku spen widowt hafu di chek wid wan anada

  • Noh wayt til wahn moni prablem kom op bifoa unu taak bowt moni