Skip tu di aatikl

Skip tu lis a tapik

 SEKSHAN 1

Gaad Ku Help Yu Ga Wahn Hapi Marij

Gaad Ku Help Yu Ga Wahn Hapi Marij

“Gaad mi mek man ahn uman fahn di biginin.”—Machyu 19:4

Da Jehoava * Gaad mi marid di fos kopl. Di Baibl tel wi dat hihn mi mek di fos uman an ih “mi bring ahn tu di man.” Adam mi soh hapi dat ih mi seh: “Now dis wan da boan fahn mai boan ahn flesh fahn mai flesh.” (Genesis 2:22, 23) Jehoava stil waahn marid peepl bee hapi.

Wen yu geh marid, yu mait tink dat evriting wahn bee perfek. Bot eevn wen wahn hozban ahn waif reeli lov wan anada, dehn wahn stil ga prablemz. (1 Korintyanz 7:28) If yu praktis di prinsipl dehn fahn di Baibl weh deh eena dis broashoar, yu marij ahn yu famili wahn bee hapi.—Jaymz 1:22-25.

 1 AKSEP DI ROAL WEH JEHOAVA GI UNU

WEH DI BAIBL SEH: Di hozban da di hed a di famili.—Ifeezhanz 5:23.

If yoo da wahn hozban, Jehoava ekspek yu fi tek kayr a yu waif eena wahn lovin way. (1 Peeta 3:7) Hihn mi mek shee fi werk lang wid yu, ahn hihn waahn yu chreet ahn wid lata lov ahn rispek. (Genesis 2:18) Yu mos lov yu waif soh moch dat yu wilin fi put fi shee needz fos.—Ifeezhanz 5:25-29.

If yoo da wahn waif, Jehoava ekspek yu fi ga deep rispek fi yu hozban ahn fi help ahn bee wahn gud famili hed. (1 Korintyanz 11:3; Ifeezhanz 5:33) Sopoat eni disizhan weh ih mek ahn werk lang wid ahn widowt komplayn. (Koloashanz 3:18) Wen yu du dat, yu wahn luk priti tu yu hozban, an eevn pritiya tu Jehoava.—1 Peeta 3:1-6.

WEH YU KU DU:

  • Aks yu marij paadna weh yoo ku du fi bee wahn beta hozban er waif. Lisn gud gud tu weh ih seh ahn chrai yu bes fi du beta

  • Ga payshens. Ih wahn tek taim fi unu laan weh unu need fi du fi mek wan anada hapi

2 SHOA DAT YU REELI KAY BOWT HOW YU MARIJ PAADNA FEEL

WEH DI BAIBL SEH: Unu fi luk owt fi wan anada. Soh dat meen dat unu fi kay bowt how wan anada feel. (Filipiyanz 2:3, 4) Memba dat Jehoava ekspek aala ih servant dehn fi “bee kain tu evribadi,” soh yu fi chreet yu marij paadna az sohnbadi preshos. (2 Timoti 2:24) “Wen yu taak widowt tink da laik wahn stab fahn wahn soad, bot di tong a di waiz wan ku heel.” Soh tink gud bifoa yu taak. (Proverbs 12:18) Hoali spirit fahn Jehoava wahn help yu fi taak eena wahn kain ahn lovin way.—Galayshanz 5:22, 23; Koloashanz 4:6.

WEH YU KU DU:

  • Bifoa yu taak tu yu hozban er waif bowt sohnting seeryos, mek shoar yu pray tu Jehoava fi help yu stay kaam ahn fi bee wilin fi lisn

  • Tink gud bowt weh yu wahn seh ahn how yu wahn seh it

 3 WERK AZ WAHN TEEM

WEH DI BAIBL SEH: Wen yu geh marid, yu da “laik wan persn” wid yu marij paadna. (Machyu 19:5) Bot unu da stil too difrent peepl weh noh tink di saym way. Soh unu wahn need fi laan fi werk tugeda soh unu ku bee wan eena di way how unu tink ahn feel. (Filipiyanz 2:2) Wen unu fi mek wahn disizhan, ih impoatant dat di too a unu gree wid wan anada. Di Baibl seh: “Wen yu taak tingz oava wid wan anada, yu planz wahn werk owt.” (Proverbs 20:18) Mek di prinsipl dehn fahn di Baibl gaid unu wen unu mek eni impoatant disizhan tugeda.—Proverbs 8:32, 33.

WEH YU KU DU:

  • Noh jos taak tu yu marij paadna, bot tel ahn egzakli how yu feel

  • Taak tu yu hozban er waif bifoa yu agree tu eniting

^ par. 4 Di Baibl shoa wi dat Gaad naym da Jehoava.