Skip tu di aatikl

Skip tu lis a tapik

 LESN 6

Wat Da di Hoap fi Dehn Wan Weh Ded?

Wat Da di Hoap fi Dehn Wan Weh Ded?

1. Wat da di gud nyooz bowt di ded?

Wen Jeezas reech Betani, wahn tong kloas tu Jeroosalem, ih fain owt dat ih fren Lazaros mi don ded fi foa dayz aredi. Jeezas gaan wid Mayri ahn Marta, weh da-mi Lazaros sista, da di toom. Soon, wahn hoal krowd gyada rong. Imajin how hapi Mayri ahn Marta mosi mi feel wen Jeezas mi rayz op bak Lazaros!​—Reed Jan 11:21-24, 38-44.

Marta mi noa bowt di gud nyooz fi dehn wan weh don ded. Ih mi noa dat Jehoava wahn bring dehn bak tu laif fi liv pahn di ert agen.​—Reed Job 14:14, 15.

2. Wat da di kandishan a di ded?

Gaad mi tel Adam: “Yu kohn fahn dos ahn yu gwehn bak tu dos.”—GENESIS 3:19.

Hyoomanz mek owta dos. (1 Korintyanz 15:47) Wee da noh wahn spirit persn weh di liv eena wahn hyooman badi. Wen wi ded, no paat a wi kantinyu fi liv, noh eevn wi braynz. Soh wi kyaahn tink er memba notn agen. Dat da wai Lazaros neva seh notn bowt weh mi hapm afta ih mi ded, kaaz ded peepl noh noa notn.​—Reed Psalm 146:4; Jan 11:11-14.

Yoo tink Gaad ponish peepl eena faiya afta dehn ded? Di Baibl teech wi dat di ded noh noa notn. Soh wen peepl teech dat Gaad wahn bon op peepl eena hel, dehn di tel lai ahn gi Gaad bad naym. Fi eevn tink bowt taacha peepl eena faiya da sohnting disgostin tu Gaad.​—Reed Jeremiah 7:31.

Wach di veedyo Wat Da di Kandishan a di Ded?

 3. Yoo tink ded peepl ku taak tu wi?

Di ded kyaahn taak ahn dehn kyaahn hyaa. (Psalm 115:17) Bot sohn wikid aynjel, weh da deemonz, mait taak tu peepl ahn play laik dehn da hyoomanz weh don ded. (Jood 6) Jehoava seh wi noh fi chrai mek kantak wid ded peepl.​—Reed Deuteronomy 18:10, 11.

4. Hoo aal wahn kohn bak tu laif?

Milyanz a peepl weh don ded wahn kohn bak tu laif pahn di ert. Eevn som weh neva noa Gaad ahn mi praktis badnis wahn geh rayz op bak.​—Reed Look 23:43; Aks 24:15.

Dehn wan weh kohn bak tu laif wahn ku laan di chroot bowt Gaad. Dehn wahn need fi obay Jeezas fi shoa dehn ga fayt eena ahn. (Revilayshan 20:11-13, NW) Dehn wan weh kohn bak tu laif ahn du weh rait wahn ku injai laif fareva pahn di ert.​—Reed Jan 5:28, 29.

5. Weh wi ku laan bowt Jehoava fahn di rezorekshan?

Gaad mi mek di rezorekshan hoap pasabl wen ih sen ih Son fi ded fi wi. Dis teech wi bowt di lov weh Jehoava ga fi wi ahn how ih kain tu wi eevn doa wi noh dizerv it. Da hoo yoo wuda reeli waahn si wen di rezorekshan hapm?​—Reed Roamanz 6:23; 1 Jan 4:9, 10.