Skip tu di aatikl

Skip tu lis a tapik

 CHAPTA AYT

Wat Da di Kingdom a Gaad?

Wat Da di Kingdom a Gaad?

1. Weh faymos pryaa wi wahn taak bowt now?

MILYANZ a peepl tudeh noa di Laadz Pryaa [er, di Our Father Pryaa]. Jeezas mi yooz dis faymos pryaa fi teech ih disaipl dehn how fi pray. Weh Jeezas mi pray bowt? Ahn wai dis pryaa impoatant fi wee tudeh?

2. Wat da chree impoatant tingz Jeezas teech wi fi pray fa?

2 Jeezas mi seh: “Soh den, dis da how unu fi pray tu ahn: ‘Fi wee Faada weh deh da hevn, mek wi kip yu naym hoali. Kohn kohn set op yu kingdom, ahn mek evribadi obay yu pahn ert jos laik how evribadi obay yu da hevn.ʼ” (Reed Machyu 6:9-13.) Da wai Jeezas mi seh fi pray fi dehnya chree tingz?​—Pleez goh da Noat 20 da di en a dis buk.

3. Weh wi need fi noa bowt di Kingdom a Gaad?

3 Wi mi laan dat Gaad naym da Jehoava. Ahn wi mi taak bowt weh hihn waahn fi hyoomanz ahn fi di ert. Bot weh Jeezas mi meen wen ih seh: “Kohn kohn set op yu kingdom”? Now, wi wahn laan wat da di Kingdom a Gaad, weh ih wahn du, ahn how ih wahn kip Gaad naym hoali.

WAT DA DI KINGDOM A GAAD?

4. Wat da di Kingdom a Gaad, ahn hoo da di King?

4 Jehoava set op wahn govament da hevn an ih pik Jeezas fi bee di King. Di Baibl kaal dis govament di Kingdom a Gaad. Jeezas ‘da di Laad weh deh oava aala di ada laad dehn, ahn hihn da di King weh di  rool oava aala di ada king dehn.ʼ (Revilayshan 17:14) Jeezas ku du way moa gud dan eni hyooman roola kuda eva du, an ih moa powaful dan aala dehn put tugeda.

5. Weh di Kingdom a Gaad wahn rool fram? Ahn wat ih wahn rool oava?

5 Jeezas mi gaahn bak da hevn faati dayz afta Gaad mi rezorek ahn. Laytaraan, Jehoava mi pik ahn fi bee di King a di Kingdom. (Aks 2:33) Gaad govament wahn rool oava di ert fahn hevn.(Revilayshan 11:15) Dat da wai di Baibl seh di ‘Laad di rool fahn hevn.ʼ​—2 Timoti 4:18.

6, 7. Wai Jeezas da wahn beta king dan eni hyooman king?

6 Di Baibl seh dat Jeezas grayta dan eni hyooman king bikaaz “hihn wahn neva hafu ded agen. Det noh ga nohmoh powa oava hihn.” (Roamanz 6:9) Soh, aal hyooman roola ku ded, bot Jeezas kyaahn ded. Aala di gud tingz weh Jeezas wahn du fi wi wahn laas fareva.

7 Wahn Baibl prafesi seh dat Jeezas wahn bee wahn fyaa ahn kain King, ih seh: “Di spirit a Jehoava wahn kohn dong pan ahn, di spirit a wizdom ahn andastandin, di spirit a kongsl ahn powa, di spirit a nalij ahn di fyaa a Jehoava. An ih wahn bee hapi di fyaa Jehoava. Ih noh wahn joj bays pahn onli weh ih si, ner gi kongsl bays pahn onli weh ih hyaa. Ih wahn bee fyaa wen ih joj di wan dehn weh poa.” (Isaiah 11:2-4) Yoo wuda waahn wahn king laik dat?

8. How wi noa dat Jeezas noh wahn rool bai ihself?

8 Gaad pik sohn hyoomanz fi goh rool lang wid Jeezas da hevn. Fi egzampl, di apasl Paal mi tel Timoti:  “If wi noh giv op, wi wahn rool wid ahn tu.” (2 Timoti 2:12) Humoch king wahn rool lang wid Jeezas?

9. Humoch king wahn rool lang wid Jeezas? Da wen Gaad mi staat tu pik dehn?

9 Laik weh wi mi laan eena Chapta 7, di apasl Jan mi si wahn vizhan wid Jeezas az di King da hevn, ahn 144,000 ada king mi deh wid ahn. Hoo da di 144,000? Jan seh: “Di naym a di Lam ahn di naym a ih Faada mi rait pahn dehn farid.” (Reed Revilayshan 14:1.) Den ih seh: “Dehn fala di Lam [Jeezas] eniway weh ih goh. Dehn da-mi di fos wan dehn weh geh pik owt fahn monks di peepl pahn di ert.” (Revilayshan 14:4.) Di 144,000 da faytful Kristyanz weh Gaad pik fi goh rool az king oava di ert lang wid Jeezas. Wen dehn ded, Gaad rezorek dehn fi goh da hevn. (Revilayshan 20: 4, 6) Fahn eena di dayz a di apasl dehn, Jehoava mi staat tu pik dehnya faytful Kristyanz fi bee paat a di 144,000.

10. Wai yu wuda seh dat Jehoava du wahn lovin ting wen ih pik Jeezas ahn di 144,000 fi rool oava hyoomanz?

10 Wai Jehoava pik sohn hyoomanz fi goh rool lang wid Jeezas da hevn? Bikaaz ih waahn wi noa humoch ih lov ahn kay fi wi. Jeezas wahn bee wahn gud roola bikaaz ih andastan wi; ih noa weh ih feel laik fi bee wahn hyooman ahn fi sofa. Di apasl Paal mi seh dat Jeezas feel fi wi. Ih mi seh dat hihn “da noh wan weh kyaahn andastan fi wee weeknis dehn, kaa hihn mi geh temtid eena evri way, sayhn laik wee.” (Heebrooz 4:15; 5:8) Di 144,000 noa weh ih feel laik fi bee hyooman, fi noh bee perfek, ahn fi geh sik, jos laik di res a wi. Fi shoar, Jeezas ahn di 144,000 wahn  andastan how wi feel ahn di prablem dehn weh wi haftu deel wid.

WEH DI KINGDOM A GAAD WAHN DU?

11. Wai Jeezas mi seh fi pray dat evribadi da hevn obay Gaad?

11 Jeezas mi teech ih disaipl dehn fi pray dat evribadi da hevn ahn pahn di ert obay Gaad. Wai ih mi seh dis? Wel, wi mi laan eena Chapta 3 dat Saytan di Devl gaan gens Jehoava. Afta hihn mi du dis, Jehoava mi alow hihn ahn di ada bad aynjel dehn, er di deemonz, fi stay da hevn fi wahn wail. Soh, noh evribadi da hevn mi-di obay Jehoava. Eena Chapta 10, wi wahn laan moa bowt Saytan ahn di deemon dehn.

12. Weh too impoatant ting Revilayshan 12:10 taak bowt?

12 Di Baibl seh dat rait afta Jeezas mi staat rool eena di Kingdom, ih waar gens Saytan. (Reed Revilayshan 12:7-10.) Vers 10 taak bowt too impoatant ting weh mi hapm. Wan, di Kingdom a Gaad mi staat tu rool wid Jeezas az di King. Too, Jeezas mi kik Saytan owta hevn ahn chroa ahn dong ya pahn di ert. Wi wahn laan dat dehnya ting don hapm aredi.

13. Weh mi hapm da hevn wen Jeezas kik owt Saytan?

13 Di Baibl seh dat di faytful aynjel dehn mi onli hapi wen Jeezas kik owt Saytan an ih deemon dehn. Ih seh: ‘Soh den, unu fi rijais, aala unu eena hevn! Unu fi bee hapi, aala unu weh liv deh!ʼ (Revilayshan 12:12) Now, nobadi deh gens Gaad da hevn, soh dehn ga pees an evribadi di werk tugeda di obay Gaad.

Eva sins Jeezas kik Saytan owta hevn, lat moa sofarin deh dong ya pahn di ert. Aala dis sofarin wahn soon en

14. Weh hapm pahn di ert bikaaz Saytan deh dong ya?

14 Bot dong ya pahn di ert, tingz difrent. Bad tingz  hapm tu peepl ‘kaa di Devl kohn dong ya! Ih beks bad, kaa ih noa seh dat ih ga jos lee bit a taim lef.ʼ (Revilayshan 12:12) Jeezas kik ahn owta hevn an ih noa dat ih wahn geh dischrai soon. Soh ih di du evriting weh ih kud fi kaaz chrobl, payn, ahn sofarin aal oava di werl.

15. Weh Gaad waahn fi di ert?

15 Bot weh Gaad waahn fi di ert noh chaynj. Ih stil waahn di ert bee wahn paradais an ih waahn perfek hyoomanz liv fareva pan it. (Psalm 37:29) Soh da how di Kingdom a Gaad wahn du dis?

16, 17. Weh Daniel 2:44 tel wi bowt di Kingdom a Gaad?

16 Di prafesi da Daniel 2:44 seh: “Eena di dayz a dehndeh king, di Gaad a hevn wahn set op wahn kingdom weh wahn neva geh dischrai. Ahn dis kingdom wahn neva geh paas aan tu eni ada peepl. Ih wahn krosh ahn put wahn en tu aala dehnya kingdom, an ih wahn bee di onli wan weh wahn laas fareva.” Weh dis prafesi teech wi bowt di Kingdom a Gaad?

17 Dis prafesi teech wi chree tingz, (1) dat di Kingdom a Gaad wahn staat tu rool “eena di dayz a dehndeh king,“ er wail ada govaments stil di rool, (2) dat di Kingdom a Gaad wahn laas fareva ahn dat no ada govament wahn tek ih plays, ahn (3) dat Gaad govament wahn waar gens di govament dehn a dis werl. Di Kingdom a Gaad wahn win ahn bee di onli govament weh di rool oava di ert. Den hyoomanz wahn ga di bes govament dehn kuda eva gat.

18. Wat da di naym a di waar bitween di Kingdom a Gaad ahn di govament dehn a dis werl?

18 Di Kingdom a Gaad don staat rool. Bot ih wahn soon tek oava di roolaship a di hoal ert. How dat  wahn hapm? Di deemon dehn wahn mek ‘di king dehn weh di rool oava aal di ert fait gens Gaad.ʼ Da waar da weh di Baibl kaal Armagedon. Imajin dat, hyooman govament wahn fait gens di Kingdom a Gaad!​—Revilayshan 16:14, 16; pleez goh da Noat 10 da di en a dis buk.

19, 20. Wai wi need di Kingdom a Gaad fi rool oava wi?

19 Wai wi need di Kingdom a Gaad? Bikaaz wi geh sik ahn ded. Bot di Baibl seh dat wen di Kingdom a Gaad di rool oava wi, wi wahn ku liv fareva. In fak, Jan 20:31 seh: “Aala dehn ting mi rait dong soh dat unu ku bileev dat Jeezas da di Krais, ahn dat hihn da Gaad Son. Ahn wen unu bileev eena hihn, unu wahn ku ga reel laif weh wahn laas fareva.”

20 Wahn nada reezn wai wi need di Kingdom a Gaad da bikaaz wikid peepl deh aal rong wi. Lata dehn tel lai, cheet, ahn liv loos laif. Wi kyaahn stap dehn. Bot bikaaz dehn noh waahn chaynj, Gaad wahn dischrai dehn da Armagedon. (Reed Psalm 37:10.) Wahn neks reezn wai wi need di Kingdom a Gaad da bikaaz hyooman govament noh ga di powa fi fiks di prablem dehn eena di werl; dehn kruwil ahn dehn korop. Dehn noh inchrestid fi help peepl obay Gaad ataal. Di Baibl seh dat “man rool oava man ahn onli kaaz payn.”​—Ecclesiastes 8:9.

21. How di Kingdom a Gaad wahn mek shoar dat evribadi obay Gaad pahn di ert?

21 Afta Armagedon, di Kingdom a Gaad wahn mek shoar dat evribadi di obay Gaad. Fi egzampl, ih wahn geh rid a Saytan an ih deemon dehn. (Revilayshan 20:1-3) Da taim deh, nobadi wahn geh sik er ded. Bikaaz  a di ransom, evribadi weh faytful wahn ku liv fareva eena Paradais. (Revilayshan 22:1-3) Di Kingdom a Gaad wahn kip Gaad naym hoali. Weh dis meen? Ih meen dat wen Gaad govament di rool di ert, aala wi wahn di aana Gaad naym.​—Pleez goh da Noat 21 da di en a dis buk.

DA WEN JEEZAS MI STAAT TU ROOL AZ KING?

22. How wi noa dat Jeezas neva staat tu rool wen ih mi deh pahn di ert, er rait afta ih mi gaan bak da hevn?

22 Wen Jeezas mi deh pahn di ert, ih mi teech ih disaipl dehn fi pray: “Kohn kohn set op yu Kingdom.” Soh wi andastan fahn dis dat Gaad govament mi wahn rool eena di fyoocha. Fi geh redi fi dis, Jehoava mi fos set op ih govament ahn mek Jeezas di King. Bot Jeezas neva staat rool az soon az ih mi gaan bak da hevn. Peeta ahn Paal mi taak bowt dis wen dehn mi koat wahn prafesi bowt Jeezas da Psalm 110:1. Eena da prafesi Jehoava seh: “Sidong rait ya da mi rait han said, til Ah put yu enimi dehn anda yu fut  laik wahn futstool.” (Aks 2:32-35; Heebrooz 10:12, 13) Bot da how lang Jeezas mi haftu wayt til Jehoava mi mek ahn King?

Di Kingdom a Gaad wahn mek shoar dat evribadi di obay Gaad pahn di ert

23. (a) Da wen Jeezas mi staat tu rool az King a Gaad govament? (b) Weh wi wahn laan eena di neks chapta?

23 Jeezas mi staat tu rool az di King a Gaad govament eena di yaa 1914. Wahn groop a Kristyanz mi andastan heda taim dat da yaa mi wahn bee wahn impoatant yaa wen wahn lata di Baibl prafesi dehn mi wahn staat kohn chroo. Ahn dat da weh hapm, kaa sins da yaa, lat moa waar, staavayshan, ahn siknis deh. (Psalm 110:2) Wan a di fos ting Jeezas mi du da kik Saytan owta hevn, ahn now ‘Saytan noa seh dat ih ga jos lee bit a taim lef.ʼ (Revilayshan 12:12) Di Baibl kaal di taim weh wi di liv eena “di laas dayz.” Eena di neks chapta wi wahn si moa proof dat wi di liv eena di laas dayz fi chroo. Wi wahn laan tu, dat di Kingdom a Gaad wahn mek shoar dat evribadi di obay Gaad pahn di ert.​—Pleez goh da Noat 22 da di en a dis buk.