Skip tu di aatikl

Skip tu lis a tapik

 CHAPTA TOO

Di Baibl Kohn Fahn Gaad

Di Baibl Kohn Fahn Gaad

1, 2. Wai di Baibl da wahn speshal gif fahn Gaad?

HOW yoo feel wen wahn fren gi yu wahn gif weh yu neva di ekspek? Yu kyaahn wayt fi oapm it, noh chroo? Yu hapi dat yu fren mi-di tink bowt yu. Ahn yu tank ahn far it.

2 Di Baibl da wahn gif fahn Gaad. Weh yu reed een deh, yu kyaahn fain no way els. Fi egzampl, ih seh dat Gaad mi mek di hevn, di ert, ahn di fos man ahn uman. Ih gi wi advais pahn how fi deel wid wi prablem dehn. Gaad mi pramis fi mek dis ert bee wahn beta plays fi aala wi; eena di Baibl wi laan how ih wahn du dis. Di Baibl da wahn veri speshal gif!

3. Weh yu wahn laan az yu stodi di Baibl?

3 Az yu kantinyu stodi di Baibl, yu wahn laan dat Gaad waahn yoo bee ih fren. Di moa yu laan bowt hihn, di kloasa yu wahn feel tu ahn.

4. Humoch Baibl deh nowadayz? Ahn how yoo feel bowt dat?

4 Di Baibl deh eena 3,200 difrent langwij, ahn dehn don print bilyanz a kapiz. Moa dan 90 persent a di peepl eena di werl ku reed di Baibl eena dehn oan langwij. An evri week, moa dan wahn milyan peepl geh wahn Baibl! Di Baibl difrent fahn aal ada buk fi chroo!

5. Wai wi ku seh dat di Baibl kohn fahn Gaad?

5 Di Baibl kohn fahn Gaad. (Reed 2 Timoti 3:16.) Bot sohn peepl mait tink, ‘How di Baibl kuda  bee fahn Gaad if da man mi rait it?ʼ Di Baibl seh: “Di prafit dehn neva tink op dehn ting pahn dehn oan. Dehn mi anda di kanchroal a di Hoali Spirit wen dehn tel di mesij weh kohn fahn Gaad.” (2 Peeta 1:21) Da laik wen wahn baas tel ih sekiteri fi rait wahn leta. Da fahn hoo di mesij weh deh eena di leta? Da fahn di baas, noh fahn di sekiteri. Eena da sayhn way, di Baibl da fahn Gaad, eevn doa ih mi yooz man fi rait it. Gaad mi gaid dehn soh dat dehn kuda mi rait dong fi hihn tinkin. Soh di Baibl da reeli “Gaad mesij” tu wee.​—1 Tesaloanyanz 2:13; pleez goh da Noat 2 da di en a dis buk.

Di New World Translation of the Holy Scriptures avaylabl eena lata difrent langwij

 WI KU CHROS DI BAIBL

6, 7. Wai wi ku seh dat di Baibl noh kanchradik ihself?

6 Ih mi tek moa dan 1,600 yaaz fi rait di Baibl. Di man dehn weh mi rait di Baibl neva liv rong di sayhn taim laik wan anada. Som a dehn mi veri ejukaytid ahn som a dehn da-mi kaman peepl. Fi egzampl, wan a dehn da-mi wahn dakta, bot adaz da-mi faama, fishaman, shepad, prafit, joj, ahn king. Eevn doa da difrent man mi rait di Baibl, di buk dehn noh kanchradik wan anada. Ih noh seh wan ting eena wan chapta, ahn wahn neks ting eena di ada chapta dehn. *

7 Di fos buk a di Baibl tel wi dat Gaad mi mek di fos man, Adam, ahn di fos uman, Eev. Dehn neva lisn tu Gaad, soh dehn mi geh sik, geh oal, ahn ded. Foa towzn yaaz layta, di apasl Jan mi rait di laas buk a di Baibl an eksplayn weh Gaad wahn du fi gi wi weh Adam ahn Eev laas​—perfek helt, evalastin laif, ahn hapinis.

8. Wat da sohn egzampl weh shoa dat saiyens ahn di Baibl gree?

8 Di Baibl da noh wahn saiyens buk er skool teksbuk, bot wen ih menshan eniting bowt saiyens, da aalwayz di chroot. Dat da weh wi wuda ekspek fahn di Baibl. Fi egzampl, eena di buk a Leviticus yu ku fain weh Gaad mi tel di Izrelait dehn fi du soh dat dehn kuda mi bee moa helti. Dis da-mi lang bifoa peepl mi noa how dizeez mi spred. Di Baibl teech wi tu, dat di ert di heng pahn notn. (Job 26:7) Ahn wen moas peepl  mi bileev dat di ert mi flat, di Baibl mi seh dat ih rong.​—Isaiah 40:22.

9. Di man dehn weh mi rait di Baibl mi aanis. Weh dat di shoa wi?

9 Wen di Baibl taak bowt hischri, ih noh rang. Bot wahn lata hischri buk noh aalwayz tel di chroot bikaaz di raita dehn noh aanis. Fi egzampl, if dehn konchri looz wahn waar, dehn mait noh rait bowt dat. Bot, di man dehn weh mi rait di Baibl mi aanis eevn wen di nayshan a Izrel neva win aala dehn waar. Dehn mi rait bowt fi dehn oan mistayk tu. Fi egzampl, eena di buk a Numbers, Moaziz mi rait dat hihn mi mek wahn seeryos mistayk ahn Gaad mi ponish ahn far it. (Numbers 20:2-12) Soh bikaaz di man dehn weh mi rait di Baibl mi aanis, ahn dehn mi rait bowt fi dehn oan mistayk, wi ku chros di Baibl.

DI BAIBL GAT EEN LATA GUD ADVAIS

10. Wai di advais eena di Baibl ku help wi?

10 Di Baibl kohn fahn Gaad ahn ‘weh deh een deh gud fi mek wi teech di chroot, ahn fi mek wi noa dehn ting weh rang eena wi laif. Ih gud fi skoal wi wen wi need it, ahn fi teech wi how fi liv rait.ʼ (2 Timoti 3:16) Soh, di advais [er, prinsipl dehn] eena di Baibl ku help wi. Da Jehoava mek wi, soh hihn andastan how wi tink ahn feel. Ih noa weh gud ahn weh bad fi wi. Hihn noa wi beta dan how wi noa wiself, an ih waahn wi bee hapi.

11, 12. Wat da sohn gud advais weh wi ku geh fahn di Baibl?

11 Eena Machyu chapta 5 tu 7, Jeezas mi gi wi sohn gud advais pahn how fi bee hapi, how fi get lang wid wan anada, how fi pray, ahn how fi manij moni. Eevn  doa da bowt 2,000 yaaz now sins hihn mi gi dis advais, ih stil ku help wi tudeh.

12 Eena di Baibl, Jehoava teech wi how fi ga wahn beta famili laif, how fi bee wahn gud werka, ahn how fi liv eena pees wid ada peepl. Di advais eena di Baibl ku aalwayz help wi, noh mata hoo wee, weh wi deh, weh wi liv, er weh kaina prablem wi di deel wid.​—Reed Isaiah 48:17; pleez goh da Noat 3 da di en a dis buk.

DI PRAFESI DEHN EENA DI BAIBL AALWAYZ KOHN CHROO

Di prafit Aizaiya mi prafesai dat Babilan mi wahn geh dischrai

13. Weh di prafit Aizaiya mi seh wuda mi hapm tu di siti a Babilan?

13 Wahn lata di prafesi dehn eena di Baibl don kohn chroo, laik di dischrokshan a Babilan weh Aizaiya mi prafesai bowt. (Isaiah 13:19) Ih mi seh egzakli how dis mi wahn hapm. Di siti mi ga sohn big gayt ahn wahn riva weh mi protek it. Bot Aizaiya mi prafesai dat di riva mi wahn jrai op ahn dat dehn mi wahn lef di gayt dehn oapm. Wahn aami mi wahn tek oava di siti ahn noh eevn haftu fait far it. Aizaiya mi eevn seh hoo mi wahn tek oava Babilan. Ih mi seh dat ih mi wahn bee wahn man weh naym Sairos.​—Reed Isaiah 44:27–45:2; pleez goh da Noat 4 da di en a dis buk.

14, 15. How Aizaiya prafesi mi kohn chroo?

14 Too honjrid yaaz layta, wahn aami reech da Babilan redi fi atak it, jos laik weh Aizaiya mi seh. Hoo da-mi di leeda a da aami? Wel, da mi jos laik weh di prafesi mi seh, da mi Sairos, di king a Perzha. Evriting mi redi now fi di res a di prafesi kohn chroo.

15 Di nait wen Sairos an ih aami mi fi atak, di peepl a Babilan mi-di ga wahn big paati. Dehn mi feel laik  notn kuda mi hapm tu dehn bikaaz a fi dehn big siti waal ahn di riva. Bot Sairos an ih aami mi deh owtsaida di siti, ahn dehn mi dig wahn big jrayn fi mek di waata levl goh dong. Ih mi gaan dong jos inof fi mek Sairos an ih aami waak chroo it. Bot how dehn mi wahn get eensaida di siti? Jos laik weh di prafesi mi  seh, di gayt dehn mi lef oapm, soh di soalja dehn gaan een ahn tek oava di siti, ahn dehn neva haftu fait far it.

16. (a) Weh Aizaiya mi prafesai bowt how Babilan mi wahn en op? (b) How wee noa dat Aizaiya prafesi mi kohn chroo?

16 Aizaiya mi prafesai dat nobadi mi wahn eva liv da Babilan agen. Ih mi seh: “Shee noh wahn ga enibadi di liv deh nohmoh, nobadi wahn liv deh fi jenarayshan afta jenarayshan.” (Isaiah 13:20) Yu tink dat mi kohn chroo? Di plays weh Babilan yoostu deh da loan rooinz now. Ih deh da Iraq kloas tu Baghdad. Eevn op tu tudeh, nobadi di liv deh. Jehoava seh dat hihn mi wahn dischrai Babilan fi gud.​—Isaiah 14:22, 23. *

How Babilan luk tudeh

17. Wai wi ku chros aala Gaad pramis dehn?

17 Wahn lata Baibl prafesi don kohn chroo. Soh dis meen dat wi ku chros weh di Baibl seh bowt di  fyoocha. Jehoava wahn kip fi hihn pramis fi mek dis ert wahn paradais. (Reed Numbers 23:19.) Soh, wi ga wahn hoap; wi ‘kud luk faawod tu di laif weh wahn laas fareva ahn eva. Gaad noh tel no lai, an ih mi don pramis fi gi wi da laif weh wahn neva en.ʼ​—Taitos 1:2. *

DI BAIBL KU CHAYNJ YU LAIF

18. Weh Paal mi seh bowt “di Werd a Gaad”?

18 Wi laan dat di Baibl difrent fahn aal ada buk. Ih noh kanchradik ihself. Wen di Baibl taak bowt saiyens er hischri, ih aalwayz tel di chroot. Ih gi wi gud advais tu, ahn lata di prafesi dehn don kohn chroo. Pahn tap a dat, di apasl Paal mi rait seh: “Di Werd a Gaad alaiv ahn ga powa!” Weh dat meen?​—Reed Heebrooz 4:12.

19, 20. (a) How di Baibl ku help yu fi noa yuself beta? (b) How yu ku shoa dat yu apreeshiayt di Baibl?

19 Di Baibl ku chaynj yu laif. Ih ku help yu fi noa yuself beta, fi andastan weh yu reeli di tink, ahn how yu reeli di feel eensaid. Fi egzampl, wi mait tink seh wi lov Gaad. Bot di moa wi reed di Baibl, wi wahn geh fi andastan dat if wi reeli lov Gaad wi noh jos wahn seh it, bot wi wahn shoa it. Soh fi proov dat wi lov Gaad, wi need fi du weh di Baibl seh.

20 Di Baibl da wahn buk fahn Gaad. Hihn waahn yu reed, stodi, ahn lov it. Shoa dat yu apreeshiayt dis gif ahn kantinyu fi stodi it. Den yu wahn andastan weh Gaad waahn fi hyoomanz. Eena di neks chapta, wi wahn laan moa bowt dis.

^ par. 6 Sohn peepl seh dat di Baibl kanchradik ihself, bot dat da noh chroo. Pleez reed chapta 7 a di buk The Bible​—Godʼs Word or Manʼs? weh Jehoava Witnisiz poblish.

^ par. 16 If yu wuda waahn laan moa bowt Baibl prafesi, pleez reed payj 27-29 a di broashoar A Book for All People, weh Jehoava Witnisiz poblish.

^ par. 17 Di dischrokshan a Babilan da jos wan Baibl prafesi weh don kohn chroo. Fi si sohn prafesi weh don kohn chroo bowt Jeezas, pleez goh da Noat 5 da di en a dis buk.