Skip tu di aatikl

Skip tu lis a tapik

 CHAPTA AYTEEN

Dedikayt Yu Laif Tu Gaad Ahn Geh Baptaiz—Wen Ahn How?

Dedikayt Yu Laif Tu Gaad Ahn Geh Baptaiz—Wen Ahn How?

1. Weh kweschan yu mait aks yuself afta yu don stodi dis buk?

YU DON laan wahn lata chroot fahn di Baibl, laik di hoap fi liv fareva, weh hapm tu wi wen wi ded, ahn di rezorekshan hoap. (Ecclesiastes 9:5; Machyu 5:5; Jan 5:28, 29; Revilayshan 21:3, 4) Yu mait di kohn da di meetin dehn a Jehoava Witnisiz ahn bileev dat dehn ga di chroo rilijan. (Jan 13:35) Yu mait ga wahn schrang frenship wid Jehoava, ahn don mek op yu main fi serv ahn. Soh yu mait aks yuself, ‘Weh Ah need fi du now fi serv Gaad?ʼ

2. Wai wahn Eetiyopyan man mi waahn geh baptaiz?

 2 Wahn Eetiyopyan man weh mi liv joorin di taim a di apasl dehn, mi aks ihself da saym kweschan. Di disaipl Filip mi preech tu ahn, ahn proov dat Jeezas da-mi di Mesaiya. Di Eetiyopyan man mi reeli bileev weh ih mi laan, soh rait away ih seh: “Wach ya, sohn waata deh ya. Da weh mek yu kyaahn baptaiz mi now?”​—Aks 8:26-36.

3. (a) Weh Jeezas mi koman ih disaipl dehn fi du? (b) How wahn persn fi geh baptaiz?

3 Di Baibl teech dat if yu waahn serv Jehoava, yu haftu geh baptaiz. Jeezas mi tel ih falowaz: ‘Chrayn peepl fahn owta aala di nayshan dehn fi bee mi disaipl ahn baptaiz dehn.’ (Machyu 28:19) Jeezas mi set di egzampl fi wi wen hihn mi geh baptaiz. Wen Jan mi baptaiz ahn, ih neva jos poar lee bit a waata pahn Jeezas hed, bot ih dok Jeezas hoal badi anda di waata. (Machyu 3:16) Saym way tudeh, wen wahn Kristyan geh baptaiz, ih hoal badi haftu goh anda di waata.

4. Weh yu shoa ada peepl wen yu geh baptaiz?

4 Wen yu geh baptaiz, yu di shoa ada peepl dat yu waahn serv Gaad ahn bee ih fren. (Psalm 40:7, 8) Soh yu mait wanda, ‘Weh Ah need fi du fi geh baptaiz?ʼ

YU NEED FI GA NALIJ AHN FAYT

5. (a) Weh yu need fi du bifoa yu ku geh baptaiz? (b) Wai ih impoatant dat wi goh da di meetin dehn?

5 Bifoa yu geh baptaiz yu haftu geh fi noa Jehoava ahn Jeezas. Yu di du dis aredi chroo yu stodi a di  Baibl. (Reed Jan 17:3.) Di moa yu laan bowt Gaad, hihn “wahn shoa yu evriting ih waahn yu du.” (Koloashanz 1:9) Di meetin dehn a Jehoava Witnisiz ku help yu fi ga wahn schranga frenship wid Jehoava. Dat da wan reezn wai ih impoatant fi mek yu goh da di meetin dehn evri week.​—Heebrooz 10:24, 25.

Bifoa yu geh baptaiz, yu haftu stodi di Baibl

6. Humoch yu need fi noa bowt di Baibl bifoa yu ku geh baptaiz?

6 Jehoava noh seh dat yu need fi noa evriting bifoa yu geh baptaiz. Hihn neva ekspek di Eetiyopyan man fi noa evriting bifoa ih mi geh baptaiz. (Aks 8:30, 31) Ahn wi wahn aalwayz di laan nyoo tingz bowt Jehoava. (Ecclesiastes 3:11) Bot fi geh baptaiz, yu need fi noa di mayn teechinz fahn di Baibl ahn liv bai dehn.​—Heebrooz 5:12.

7. How yu stodi a di Baibl di help yu?

7 Di Baibl seh: “Nobadi kyaahn pleez Gaad if dehn noh ga fayt.” (Heebrooz 11:6) Soh yu need fi ga fayt bifoa yu ku geh baptaiz. Di Baibl seh dat som a di peepl dehn fahn Korint ‘mi bileev di mesij weh dehn mi-di hyaa ahn geh baptaiz.ʼ (Aks 18:8) Soh jos laik dat, yu stodi a di Baibl di help yu ga fayt eena Gaad pramis dehn an eena how Jeezas sakrifais ku sayv wi fahn sin ahn det.​—Joshua 23:14; Aks 4:12; 2 Timoti 3:16, 17.

TEL ADA PEEPL BOWT WEH YU DI LAAN

8. Weh wahn mek yu waahn tel ada peepl bowt weh yu di laan?

8 Di moa yu laan weh di Baibl teech ahn si how ih help yu eena yu laif, yu fayt wahn geh schranga. Ahn yu wahn waahn tel ada peepl bowt weh yu di laan.  (Jeremiah 20:9; 2 Korintyanz 4:13) Bot hoo yu ku taak tu?

Yu fayt wahn mek yu tel ada peepl weh yu bileev

9, 10. (a) Hoo yu ku staat taak tu bowt weh yu di laan? (b) Weh yu fi du if yu waahn preech lang wid di kangrigayshan?

9 Yu ku taak tu yu famili er fren dehn, yu nayba, er di peepl yu werk wid bowt weh yu di laan. Bot memba, yu haftu bee kain ahn lovin. Den wid taim, yu wahn ku preech lang wid di kangrigayshan. Wen yu redi fi du dat, yu ku taak tu di Witnis weh di teech yu di Baibl ahn tel ahn dat yu waahn goh preech wid di kangrigayshan. If da persn tink dat yu redi, an if yu di liv akaadn tu weh di Baibl seh, den di too a unu ku taak tu too eldaz fahn di kangrigayshan.

10 Di elda dehn wahn meet wid yu fi si if yu andastan ahn bileev di mayn teechinz fahn di Baibl, if yu di obay weh di Baibl seh eena yu laif, an if yu reeli waahn bee wan a Jehoava Witnisiz. Memba dat di elda dehn tek kayr a evribadi eena di kangrigayshan, soh if yoo da paat a it, dehn wahn tek kayr a yu tu. Soh noh frayd fi taak tu dehn. (Heebrooz 13:17; 1 Peeta 5:2, 3) Afta dehn don meet wid yu, dehn wahn tel yu if yu ku staat preech lang wid di kangrigayshan.

11. Wai ih impoatant fi mek eni chaynj eena yu laif bifoa yu goh preech lang wid di kangrigayshan?

11 Di elda dehn mait tel yu dat yu need fi mek moa chaynj eena yu laif bifoa yu ku preech lang wid di kangrigayshan. Wai ih soh impoatant dat yu mek dehn chaynj? Bikaaz wen wi taak tu ada peepl bowt Gaad, wi di reprizent Jehoava. Soh wi haftu liv eena wahn way weh aana hihn.​—1 Korintyanz 6:9, 10; Galayshanz 5:19-21.

 RIPENT AHN TON FAHN YU SIN DEHN

12. Wai aala wi need fi ripent?

12 Di Baibl taak bowt wahn neks ting weh yu need fi du bifoa yu ku geh baptaiz. Ih seh yu haftu ripent ahn ton fahn yu sin dehn. (Aks 3:19, 20) Weh ih meen fi ripent? Ih meen dat wi fi feel sari deep dong eena wi haat fi eni rang weh wi du. Fi egzampl, if wahn persn di liv wahn loos laif, ih wuda haftu ripent fi serv Gaad. Soh, if yoo noh di liv wahn kleen laif fronta Gaad, yu haftu ripent. An eevn if aala yu laif yu di chrai yu bes fi du weh rait, yu stil need fi ripent, kaaz aala wi da sinaz ahn need fi aks Gaad fi fagivnis.​—Roamanz 3:23; 5:12.

13. Weh ih meen fi ‘ton fahn yu sin dehnʼ?

13 Yu kyaahn jos feel sari fi weh yu mi du, di apasl Peeta seh dat yu need fi ‘ton fahn yu sin dehn.ʼ Dis meen dat yu haftu stay weh fahn eni rang kandok weh yu yoostu du ahn staat du weh rait. Tink bowt dis, imajin yu di jraiv goh da wahn plays weh yu neva gaan bifoa. Wahn lee wail layta, yu fain owt dat yu di goh dong di rang road. Weh yu wuda du? Af koars yu wuda sloa dong, stap, ton rong, ahn geh pahn di karek road. Sayhn way, joorin yu Baibl stodi, yu mait fain owt dat yu haftu giv op sohn habit er ada tingz eena yu laif weh rang. Bot bee wilin fi ‘ton fahn yu sin dehn,ʼ er chaynj wateva yu need fi chaynj, ahn staat du weh rait.

 DEDIKAYT YU LAIF TU GAAD

Yu don pramis Jehoava fi serv ahn?

14. How fi dedikayt yu laif tu Gaad?

14 Wahn nada impoatant ting yu need fi du bifoa yu geh baptaiz da fi dedikayt yu laif tu Jehoava. Wen yu du dis, yu seh wahn speshal pryaa tu Jehoava di pramis ahn dat hihn wahn bee di moas impoatant persn eena yu laif, ahn dat da onli hihn yu wahn wership.​—Machyu 4:10.

15, 16. Weh mek wahn persn waahn dedikayt ih laif tu Gaad?

15 Wen yu pramis Jehoava dat yu wahn serv onli hihn, da laik wen yu pramis sombadi weh yu lov dat yu wahn spen di res a yu laif wid ahn. Imajin wahn man ahn wahn uman weh laik wan anada. Di moa dehn geh fi noa wan anada, dehn lov geh schranga, ahn dehn geh marid. Eevn doa dehn noa dis da wahn seeryos disizhan, dehn wilin fi aksep di rispansabiliti bikaaz dehn lov eech ada.

16 Di moa yu laan bowt Jehoava, yu wahn geh fi lov hihn ahn waahn du yu bes fi serv ahn. Dis wahn mek yu waahn seh da speshal pryaa fi pramis hihn dat yu wahn serv ahn fareva. Di Baibl seh dat enibadi weh waahn fala Jeezas haftu ‘stap goh afta weh dehn waahn.ʼ (Maak 8:34) Weh dis meen? Ih meen dat yu wahn put Jehoava fos eena yu laif. Weh hihn waahn, fi bee moa impoatant dan weh yoo waahn.​—Reed 1 Peeta 4:2.

NOH FRAYD FI DEDIKAYT YU LAIF TU GAAD

17. Wai sohn peepl frayd fi dedikayt dehn laif tu Jehoava?

17 Sohn peepl noh dedikayt dehn laif tu Jehoava, bikaaz dehn frayd dehn mait kyaahn kip dehn pramis  fi serv ahn. Dehn noh waahn disapoint Jehoava, er dehn mait tel dehnself dat if dehn noh pramis hihn eniting, den dehn noh haftu ansa fi weh dehn du.

18. Weh wahn help yu fi noh feel frayd?

18 Yu lov fi Jehoava wahn help yu fi noh feel frayd. Dis lov wahn help yu fi du yu bes fi kip yu pramis tu hihn ahn noh disapoint ahn. (Ecclesiastes 5:4; Koloashanz 1:10) Yu noh wahn tink dat ih tu haad fi du weh Jehoava seh. Di apasl Jan seh: “Fi lov Gaad meen dat wi wahn obay weh ih koman wi fi du. Ahn weh hihn koman wi fi du noh haad.”​—1 Jan 5:3.

19. Wai yu noh need fi frayd fi dedikayt yu laif tu Jehoava?

19 Yu noh haftu bee perfek fi dedikayt yu laif tu Jehoava. Hihn noh aks wi fi du moa dan weh wi ku du. (Psalm 103:14) In fak, hihn wahn help yu fi du weh rait. (Isaiah 41:10) Chros eena Jehoava wid aala yu haat, ahn “hihn wahn gaid yu eena di rait way.”​—Proverbs 3:5, 6.

SHOA EVRIBADI DAT YU DEDIKAYT YU LAIF TU GAAD

20. Wat da di neks ting yu need fi du afta yu dedikayt yu laif tu Gaad?

20 Yoo tink yu redi fi dedikayt yu laif tu Gaad? Afta yu dedikayt yu laif, yu need fi geh baptaiz.

21, 22. How yu ku mek evribadi noa dat yu ga fayt?

21 Tel wan a di elda dehn eena di kangrigayshan dat yu don dedikayt yu laif tu Jehoava ahn dat yu waahn geh baptaiz. Den som a di eldaz wahn goh  oava som a di mayn teechinz fahn di Baibl wid yu. If dehn agree dat yu redi, dehn wahn tel yu dat yu ku geh baptaiz da wi neks asembli er kanvenshan. Da di asembli, yu wahn hyaa wahn taak weh eksplayn weh yu baptizm meen. Di brada hoo di gi di taak wahn aks too kweschan. Wen yu ansa dehn kweschan, yu di ‘seh wid yu mowtʼ dat yu ga fayt.​—Roamanz 10:10.

 22 Den yu wahn geh baptaiz. Di bradaz wahn dok yu anda di waata. Wen yu geh baptaiz yu di shoa evribadi dat yu don dedikayt yu laif tu Jehoava ahn dat yu da wan a Jehoava Witnisiz now.

 WEH YU BAPTIZM STAN FA

23. Weh ih meen fi geh baptaiz “eena di naym a di Faada, di Son ahn di Hoali Spirit”?

23 Jeezas mi seh dat ih disaipl dehn fi geh baptaiz “eena di naym a di Faada, di Son ahn di Hoali Spirit.” (Reed Machyu 28:19.) Weh dat meen? Ih meen dat yu rispek Jehoava atariti, ahn dat yu apreeshiayt how Gaad yooz Jeezas ahn fi Hihn hoali spirit fi du fi Hihn wil.​—Psalm 83:18; Machyu 28:18; Galayshanz 5:22, 23; 2 Peeta 1:21.

Wen yu geh baptaiz, yu di shoa dat yu waahn du Gaad wil

24, 25. (a) Weh yu baptizm stan fa? (b) Weh wi wahn taak bowt eena di laas chapta?

24 Baptizm stan fi sohnting impoatant. Wen yu goh dong anda di waata, da laik di oal laif yu yoostu liv ded, er yu lef di oal laif bihain. Den wen yu kom bak op owta di waata, yu wahn staat wahn nyoo laif di du weh Gaad waahn. Ih shoa dat yu wahn serv Jehoava fahn now aan. Memba dat yu noh dedikayt yu laif tu wahn hyooman, wahn aaganaizayshan, er wahn werk. Yu dedikayt yu laif tu Jehoava.

25 Wen yu dedikayt yu laif tu Jehoava, ih wahn help yu fi kip yu frenship wid hihn schrang. (Psalm 25:14) Dis noh meen dat wahn persn wahn geh sayv jos bikaaz ih geh baptaiz. Di Baibl seh: ‘Yu haftu kip aan di bileev ahn stay schrang eena yu fayt ahn noh mek nobadi geh yu shayki eena di hoap.ʼ (Koloashanz 1:23) Soh baptizm da jos di fos step tuwaadz salvayshan. Bot how yu ku stay kloas tu Jehoava? Di laas chapta eena dis buk wahn ansa da kweschan.